1, 2. Yini lomunye umzalwane layibona mayelana nebuhlobo bakhe naNkulunkulu, futsi yini layenta?

ROBERT wabhajatiswa asemusha, kepha liciniso belingakabaluleki kakhulu kuye. Watsi: “Bekute lokubi lebengikwenta, kodvwa bengilandzela linyenti. Bengibonakala nginebuhlobo lobuhle naNkulunkulu, ngiya kuyo yonkhe imihlangano futsi njalo ngemnyaka bengiba lihlahlandlela lelisitako tinyanga letimbalwa. Kodvwa kukhona lebekushoda.”

² Robert wabona sekashadile kutsi kukhona lebekungahambi kahle. Yena nemkakhe bebacitsa sikhatsi babutana imibuto lemayelana netindzaba letiseBhayibhelini. Umkakhe lebekanebuhlobo lobuhle naNkulunkulu bekakhona kuphendvula lemibuto, kepha Robert bekahlazeka ngobe bekangatati timphendvulo. Utsi: “Bekubonakala ngatsi angati lutfo. Ngabona kutsi kufanele ngente lokutsite kute ngikhone kuhola kahle umndeni wami.” Nguloko Robert lakwenta. Utsi: “Ngacitsa sikhatsi lesinyenti ngidadisha liBhayibheli, futsi ngacala kwati tintfo letinyenti. Kunyenti lebesengikucondza futsi lokubaluleke kakhulu kutsi ngaba nebuhlobo lobuhle naJehova.”

3. (a) Yini lesingayifundza kulokwenteka kuRobert? (b) Ngumiphi imibuto lebalulekile lesitawucoca ngayo?

³ Kunetifundvo letibalulekile lesititfolako kuloko lokwenteka kuRobert. Kungenteka sinalo lwati lolusekelwe eBhayibhelini futsi  sihlale sitihlanganisa nemaKhristu lasebandleni, kepha loko akusho kutsi sesitawuvele sibe nebuhlobo lobuhle naNkulunkulu. Mhlawumbe seyivele ikhona intfutfuko lesiyentile, kepha nasitihlola siyabona kutsi kusekhona lapho kufanele sitfutfukise khona. (Fil. 3:16) Kuze sikhone kuchubeka sitfutfuka, kulesihloko sitawucoca ngetimphendvulo temibuto lemitsatfu lebalulekile: (1) Yini lengasisita kutsi sihlole kutsi bunjani buhlobo betfu naNkulunkulu? (2) Singabucinisa njani buhlobo betfu naNkulunkulu futsi sibutfutfukise? (3) Kuba nebuhlobo lobuhle naNkulunkulu kutasisita njani ekuphileni kwetfu kwamalanga onkhe?

4. Seluleko lesiku-Efesu 4:23, 24 sisebenta kubobani?

⁴ Ngesikhatsi siba tinceku taNkulunkulu, senta tingucuko letinyenti. Letingucuko tashintja konkhe kuphila kwetfu, futsi asizange sigcine kutenta ngesikhatsi sibhajatiswa. Kufanele ‘sichubeke sentiwe sibe basha emandleni etfu ekucabanga.’ (Ef. 4:23, 24) Njengobe sonkhe sinesono, kufanele sichubeke senta tingucuko ekuphileni kwetfu. Ngisho netinceku taJehova lesetimkhonte sikhatsi lesidze kufanele tilondvolote buhlobo bato naJehova.​—Fil. 3:12, 13.

5. Ngumiphi imibuto lengasisita kutsi sitihlole?

⁵ Kuze sitfutfukise buhlobo betfu naNkulunkulu futsi sibulondvolote, kufanele sitihlole ngekwetsembeka. Ngisho noma sibadzala noma sibancane, kufanele sitibute kutsi: ‘Tikhona yini tingucuko lengitentile letikhombisa kutsi indlela lengicabanga ngayo iyafana nendlela Jehova lacabanga ngayo? Buntfu bami buyafana yini nebuntfu baKhristu? Indlela lengitiva ngayo nalengitiphatsa ngayo nangisemhlanganweni webuKhristu ivetani mayelana nebuhlobo bami naNkulunkulu? Lengikukhulumako kuvetani ngetifiso tami? Imikhuba yami yekudadisha, indlela lengigcoka futsi ngitilungise ngayo, kanye nendlela lengenta ngayo nangitfola seluleko iveta kutsi ngingumuntfu lonjani? Ngenta njani nangabe ngibhekene netilingo? Ngiyachubeka yini ngitfutfuka kuze ngibe ngumKhristu lovutsiwe?’ (Ef. 4:13) Kucabanga ngetimphendvulo tetfu kulemibuto kutasisita sibone kutsi butfutfuke kanganani buhlobo betfu naNkulunkulu.

6. Yini lenye lengasisita kutsi sihlolisise buhlobo betfu naNkulunkulu?

⁶ Ngaletinye tikhatsi siyaludzinga lusito lwalabanye kute sibone kutsi bunjani buhlobo betfu naNkulunkulu. Umphostoli Pawula watsi umuntfu wenyama akaboni kutsi indlela laphila ngayo ayimjabulisi Nkulunkulu. Ngakulolunye luhlangotsi, umuntfu lonebuhlobo lobuhle naNkulunkulu uyayati indlela Jehova lacabanga ngayo futsi uyati nekutsi kubi ngani kucondziswa tifiso tenyama. (1 Khor. 2:14-16; 3:1-3) Ngalokuvamile labadzala belibandla basheshe batibone timphawu tekutsi umuntfu lotsite ucabanga ngekuvumelana netifiso tenyama. Nangabe labadzala betama kusisita, siyasemukela yini seluleko sabo futsi sisisebentise? Nangabe senta njalo sisuke sikhombisa kutsi siyafisa kutfutfukisa buhlobo betfu naNkulunkulu.​—Shu. 7:5, 9.

7. Kungani kungakeneli kutsi simane nje sibe nelwati loluseBhayibhelini kute sicabange ngendlela Nkulunkulu lacabanga ngayo?

⁷ Khumbula kutsi kuze sikhone kucabanga ngendlela Nkulunkulu lacabanga ngayo, kufanele singagcini nje ngekuba nelwati loluseBhayibhelini. INkhosi Solomoni yasendvulo beyitati kahle tindlela taJehova. Ngekuhamba kwesikhatsi emavi ayo abhalwa eBhayibhelini. Kodvwa yagcine yehlulekile kuhlala yetsembekile kuJehova. (1 Khos. 4:29, 30; 11:4-6) Ngako ngephandle kwelwati loluseBhayibhelini, yini lenye ledzingekako kute sibe nebuhlobo lobuhle naNkulunkulu? Kufanele sichubeke sitfutfukisa buhlobo betfu naNkulunkulu. (Khol. 2:6, 7) Singakwenta njani loko?

8, 9. (a) Yini letasisita kutsi sibe nekukholwa lokucinile? (b) Kufanele ube yini umgomo wetfu nasidadisha futsi sizindla? (Buka sitfombe lesisekucaleni kwalesihloko.)

 ⁸ Pawula wancenga emaKhristu angelikhulu lekucala kutsi ‘achubekele ekuvutfweni.’ (Heb. 6:1) Singasisebentisa njani seluleko saPawula lamuhla? Lokunye lokubalulekile kutsi sidadishe incwadzi letsi “Tigcineni Elutsandvweni LwaNkulunkulu.” Kudadisha lencwadzi uze uyicedze kutakusita ubone indlela longasebentisa ngayo timiso teliBhayibheli ekuphileni kwakho. Nangabe sewucedzile kuyidadisha, ungafundza letinye tincwadzi letingacinisa kukholwa kwakho. (Khol. 1:23) Uyathantaza yini futsi uzindle ngekutsi ungakusebentisa njani loko lokufundzako ekuphileni kwakho?

⁹ Khumbula kutsi nasidadisha futsi sizindla, umgomo wetfu kufanele ube kutfutfukisa sifiso setfu sekujabulisa Jehova kanye nekulalela imiyalo yakhe. (Hla. 40:8; 119:97) Ngesikhatsi lesifanako kufanele singatenti tintfo letitasivimba kutsi sitfutfukise buhlobo betfu naJehova.​—Thit. 2:11, 12.

10. Yini bantfu labasha labangayenta kuze babe nebuhlobo lobuhle naNkulunkulu?

¹⁰ Nangabe usemusha, unayo yini imigomo yekukhonta Nkulunkulu? Nakasemhlanganweni wesigodzi, lomunye umzalwane lokhonta eBethel uvame kucoca nebazalwane labatawubhajatiswa ngaphambi kwekutsi kucale umhlangano. Labanyenti babo kusuke kubantfu labasha. Lomzalwane ubabuta kutsi ngumiphi imigomo yekukhonta Nkulunkulu labatibekele yona. Labanyenti babo basho timphendvulo letikhombisa ngalokucacile kutsi umgomo wabo kukhonta Jehova​—lokufaka ekhatsi kungenela umsebenti wasikhatsi sonkhe noma kukhonta lapho kunesidzingo lesikhulu khona sebamemeteli beMbuso. Noma kunjalo, labanye labasha abati kutsi baphendvule batsini. Loko kungakhombisa kutsi basengakatimiseli kutibekela imigomo lecacile yekukhonta Nkulunkulu. Njengemuntfu lomusha, tibute kutsi: ‘Ngenta imisebenti lemayelana nekukhonta Nkulunkulu ngenca yekutsi ngifuna kujabulisa batali bami yini? Ngiyasondzela yini kuNkulunkulu ngekutsi ngikhulise buhlobo bami naye?’ Kuliciniso kutsi sikhutsato sekutibekela imigomo yekukhonta Nkulunkulu asisebenti kulabasha kuphela. Kutibekela imigomo kutasisita kutsi sikhulise buhlobo betfu naJehova njengoba sitinceku takhe.​—Shu. 12:1, 13.

11. (a) Yini lokufanele siyente kuze sibe bantfu labavutsiwe? (b) Ngusiphi sibonelo lesiseBhayibhelini lesingasilingisa?

¹¹ Nangabe sesibonile kutsi ngukuphi lasingatfutfukisa khona, kufanele sitsatse tinyatselo letitasisita kutsi sikhone kutfutfuka. Kubaluleke kakhulu kutsi sibe nebuhlobo lobuhle naNkulunkulu. Ecinisweni kungasho kuphila nekufa. (Rom. 8:6-8) Noma kunjalo, kuvutfwa akusho kutsi sesite sono. Umoya waJehova ungasisita sente tingucuko letidzingekako. Noma kunjalo, kudzingeka sente imetamo. Nakakhuluma ngaLukha 13:24, John Barr lobekalilunga LeSigungu Lesibusako, watsi: “Bantfu labanyenti bayehluleka ngenca yekutsi abakatimiseli kwenta lokunyenti kute bavutfwe.” Kufanele sente njengaJakobe longazange aphele emandla ekulwa nengilosi kuze atfole sibusiso. (Gen. 32:26-28) Nanobe singakujabulela kudadisha liBhayibheli, akukafaneli silifundze njengencwadzi leyentelwe kutijabulisa. Kufanele sifune emaphuzu latasisita ekuphileni kwetfu.

12, 13. (a) Yini lengasisita sisebentise seluleko lesikuRoma 15:5? (b) Sibonelo semphostoli Phetro kanye neseluleko sakhe singasisita njani? (c) Yini longayenta kute ube ngumuntfu lovutsiwe? (Fundza libhokisi lelitsi “ Longakwenta Kute Utfutfukise Buhlobo Bakho NaNkulunkulu.”)

¹² Njengoba silwela kuba bantfu labavutsiwe, umoya longcwele utasiniketa emandla ekugucula kucabanga kwetfu. Ngelusito lwemoya longcwele, kancane kancane singakhona kucabanga ngendlela Khristu labecabanga ngayo. (Rom. 15:5) Loko kungaphindze kusisite sikhone kuncoba tifiso tenyama bese siba nebuntfu lobujabulisa Nkulunkulu. (Gal. 5: 16, 22, 23) Nangabe sibona kutsi tingcondvo tetfu tisenta sicabange ngetintfo talelive, akukafaneli silahle litsemba. Kufanele sichubeke sicela umoya longcwele futsi Jehova utasisita sikhone kulawula indlela lesicabanga ngayo bese sinaka tintfo letibalulekile. (Luk. 11:13) Khumbula sibonelo semphostoli Phetro. Etikhatsini letinyenti akazange ente tintfo ngendlela umuntfu lovutsiwe lokufanele ente ngayo. (Mat. 16:22, 23; Luk. 22:34, 54-62; Gal. 2:11-14) Kepha akazange aphele emandla. Ngelusito lwaJehova, kancane kancane Phetro wacala kucabanga ngendlela Khristu lacabanga ngayo. Natsi singenta lokufanako.

¹³ Ecinisweni, ngekuhamba kwesikhatsi, Phetro wakhuluma ngebuntfu lokufanele sibe nabo. (Fundza 2 Phetro 1:5-8.) ‘Kwenta konkhe lokusemandleni etfu’ kuze sibe nebuntfu lobufaka ekhatsi kutibamba, kucinisela kanye nekutsandza bazalwane, kutasisita kutsi sicabange ngendlela Nkulunkulu lacabanga ngayo. Onkhe malanga ungatibuta kutsi: ‘Yini lengingayenta kuze ngitfutfukise buhlobo bami naJehova?’

14. Kucabanga ngendlela Jehova lacabanga ngayo kukutsintsa njani kuphila kwetfu?

¹⁴ Kucabanga ngendlela Khristu lacabanga ngayo kutayitsintsa indlela lesitiphatsa ngayo emsebentini noma esikolweni, indlela lesikhuluma ngayo kanye netincumo lesitenta onkhe malanga. Tincumo lesitentako titawukhombisa kutsi silwela kuba balandzeli baKhristu. Njengebantfu labavutsiwe, asifuni kutsi kube khona lokulimata buhlobo betfu naBabe wetfu losezulwini. Kucabanga ngendlela Khristu lacabanga ngayo kutasisita sincobe tilingo. Ngaphambi kwekutsi sente tincumo, sitawucabanga ngalemibuto: ‘Ngutiphi timiso teliBhayibheli letitangisita ngente sincumo lesikahle? Yini Khristu labengayenta nangabe abekulesimo? Ngusiphi sincumo lesitawujabulisa Jehova?’ Asesicoce ngetimo letimbalwa lapho kufanele sifundze kucabanga khona ngendlela Khristu lacabanga ngayo. Esimeni ngasinye, sitawucoca ngesimiso lesiseBhayibhelini lesingakusita wente sincumo lesihlakaniphile.

15, 16. Shano tibonelo tendlela kucabanga njengaKhristu lokungasisita ngayo nasenta tincumo letimayelana (a) nekukhetsa umuntfu lotawushada naye. (b) nekukhetsa bangani.

¹⁵ Kukhetsa umuntfu lotawushada naye. Simiso lesiseBhayibhelini sitfolakala ku-2 Khorinte 6:14, 15. (Fundza.) Emavi aPawula aveta ngalokucacile kutsi umuntfu lonebuhlobo lobuhle naNkulunkulu angeke akhone kuba nebudlelwane lobuhle nemuntfu locondziswa tifiso tenyama. Singasisebentisa njani leseluleko nangabe sikhetsa umuntfu lesitawushada naye?

¹⁶ Kukhetsa bangani. Cabanga ngesimiso lesiku-1 Khorinte 15:33. (Fundza.) Umuntfu lonebuhlobo lobuhle naNkulunkulu ngeke atihlanganise nebantfu labangabeka buhlobo bakhe naJehova engotini. Ngumiphi imibuto lengakusita wente sincumo lesikahle? Lesimiso singasebenta yini endzabeni yetinhlelo tekuchumana? Yini lokufanele uyente nangabe utfola simemo sekudlala imidlalo ku-internet nebantfu longabati?

17-19. Kucabanga ngendlela Nkulunkulu lacabanga ngayo kungakusita njani kutsi (a) ugweme tintfo letingenamsebenti? (b) utibekele imigomo lekahle ekuphileni? (c) ulungise kungevani?

¹⁷ Timo letivimbela kutsi buhlobo betfu naNkulunkulu bukhule. Emavi Pawula lawabhalela  emaKhristu anesecwayiso. (Fundza Hebheru 6:1.) Ngumiphi ‘imisebenti lefile’ lokufanele siyibalekele? Ngunoma ngutiphi tintfo letingenamsebenti naletingalimata buhlobo betfu naNkulunkulu. Letimiso tingasisita emibutweni leminyenti lengaphakama ekuphileni kwetfu, lefaka ekhatsi letsi: ‘Loku lengikwentako kungumsebenti wenyama yini? Kufanele yini ngihlanganyele kulendlela yekwakha imali? Kungani kungakafaneli ngijoyine emacembu latimisele ngekuletsa lushintjo kulelive?’

¹⁸ Imigomo yekukhonta Nkulunkulu. Inshumayelo yaJesu yasentsabeni isiniketa sicondziso lesicacile mayelana nekutibekela imigomo. (Mat. 6:33) Umuntfu lonebuhlobo lobuhle naNkulunkulu ulwela kufeza imigomo yekumkhonta. Kuhlale sicabanga ngalesimiso kutasisita siphendvule lemibuto lelandzelako: ‘Kufanele ngilwele kutfola imfundvo lephakeme yini? Kufanele yini ngemukele luhlobo lolutsite lwemsebenti?’

¹⁹ Kungevani. Seluleko umphostoli Pawula lasibhalela libandla laseRoma sisisita njani kutsi silungise kungevani? (Rom. 12:18) Njengebalandzeli baKhristu, kufanele sente konkhe lokusemandleni etfu kute sibe “nekuthula nabo bonkhe bantfu.” Nakwenteka sicabana, singakulungisa njani? Sikutfola kumatima yini kwemukela imibono yalabanye noma satiwa njengebantfu “labakha kuthula”?​—Jak. 3:18.

20. Kungani utimisele kutfutfukisa buhlobo bakho naNkulunkulu?

²⁰ Leti tibonelo letimbalwa letikhombisa kutsi kucabangisisa ngetimiso taNkulunkulu kungasisita njani kutsi sente tincumo lokulindzeleke kutsi umuntfu lonebuhlobo lobuhle naNkulunkulu atente. Kucabanga ngendlela Nkulunkulu lacabanga ngayo kungasisita sijabule futsi senetiseke ekuphileni. Robert lokukhulunywe ngaye ekucaleni kwalesihloko utsi: “Nasenginebuhlobo lobuhle naJehova, ngaba yindvodza lekahle futsi ngaba ngubabe loncono. Bengenetiseka futsi ngijabula.” Natsi singatfola tibusiso letifanako nangabe kutfutfukisa buhlobo betfu naNkulunkulu kuta kucala ekuphileni kwetfu. Njengobe sinebuhlobo lobuhle naNkulunkulu sitawutfola injabulo nekwenetiseka nyalo, futsi esikhatsini lesitako sitawutfola “kuphila lokungukonakona.”​—1 Thim. 6:19.