SYLVIANA lolihlahlandlela leliseminyakeni yabo-20 utsi: “Ngesikhatsi bangani bami bangicocela ngetintfo letinhle labahlangana nato nabakhonta endzaweni lenesidzingo lesikhulu semahlahlandlela, ngalangatelela kutfola injabulo lefanako.” Kodvwa wengeta watsi: “Bengesaba kutsi angeke ngikhone kuyokhonta endzaweni lenesidzingo lesikhulu sebamemeteli.”

Utiva ngendlela Sylviana lativa ngayo yini? Kungenteka uyakulangatelela kukhonta endzaweni lenesidzingo lesikhulu kodvwa uyangabata kutsi utawufinyelela lomgomo. Nangabe kunjalo, ungadvumali. Ngelusito lwaJehova, bazalwane nabodzadze labatigidzi bakhonile kuncoba timo letibavimbela kutsi bandzise umsebenti wabo wekushumayela. Kuze sibone kutsi Jehova ubasite njani, sitawucoca ngalokwenteka eMadagascar, lokusichingi sesine lesikhulu emhlabeni wonkhe.

Sekuphele iminyaka lelishumi bamemeteli labakhutsele labangetulu kwa-70 kanye nemahlahlandlela lasuka emaveni langetulu kwa-11 bakhonta kulensimi yase-Afrika lenebantfu labalalelako nalabalihloniphako liBhayibheli. * Bamemeteli baseMadagascar nabo bayafisa kwandzisa kushunyayelwa kwetindzaba letimnandzi teMbuso waNkulunkulu kulelive. Ase sicoce ngalabanye babo.

Louis kanye nemkakhe Perrine labaseminyakeni yabo-30 batfutsela eMadagascar basuka eFrance. Besekuphele sikhatsi lesidze bacabanga ngekwadzisa umsebenti wabo ngekutsi baye kulelinye live, kodvwa Perrine bekangabata. Utsi: “Bengesaba kuya eveni lengingalati. Bekungikhatsata kutsi sitawushiya umndeni wetfu, libandla, indlu, tonkhe tindzawo lebesitetayele kanye netintfo lebesitenta. Ecinisweni bekumatima kakhulu kuncoba kukhatsateka ngekuphila kwami.” Nga-2012, Perrine wakuncoba lokukhatsateka futsi bona naLouis batfutsa. Perrine Utiva njani ngalesincumo labasenta? Utsi: “Nangibuka emuva, ngingasho kutsi kubona indlela Jehova lasisite ngayo ekuphileni kwetfu kukucinisile kukholwa kwami.” Louis utsi: “Ngesikhatsi siya kwekucala eSikhumbutweni sekufa kwaJesu eMadagascar, tifundvo tetfu teliBhayibheli letingu-10 taba khona.”

 Yini leyaniketa lomndeni emandla ekuchubeka nesabelo sawo nakuvela tinkinga? Bathantaza, bancusa Jehova kutsi abanikete emandla labawadzingako kute babeketele. (Fil. 4:13) Louis utsi: “Sabona kutsi Jehova wayiphendvula imithantazo yetfu waphindze wasiniketa ‘kuthula kwakhe.’ Sakhona kunaka injabulo lebesiyitfola nasenta umsebenti waJehova. Ngetulu kwaloko bazalwane nabodzadze baseFrance bebasitfumelela ema-email netincwadzi letisikhutsata kutsi singaphelelwa litsemba.”​—Fil. 4:6, 7; 2 Khor. 4:7.

Jehova wababusisa kakhulu boLouis naPerrine ngenca yekubeketela kwabo. Louis utsi: “Nga-October 2014, saya eSikolweni Lesisekelwe EBhayibhelini SemaKhristu Lashadene * eFrance. Kuya kulesikolwa kusipho lesikhulu lesivela kuJehova futsi ngeke size sisikhohlwe.” Nasebaphotfulile, bajabula kakhulu ngesikhatsi babelwa kutsi babuyele eMadagascar.

Ngesikhatsi Didier nemkakhe Nadine batfutsela eMadagascar basuka eFrance nga-2010 bebaseminyakeni yabo-45 kuya ku-65. Didier utsi: “Ngesikhatsi sisebasha besingemahlahlandlela, futsi sase sikhulisa bantfwana betfu labatsatfu. Nasebakhulile sacabanga ngekuyokhonta kulelinye live.” Nadine utsi: “Kucabanga ngekutsi sitawushiya bantfwana betfu kwangenta ngangabata, kodvwa basitjela kutsi: ‘Nangabe niya kuyokhonta kulelinye live lelinesidzingo lesikhulu, sitawutigcabha ngani!’ Emavi abo asikhutsata kutsi sitfutse. Ngisho noma sihlala khashane nebantfwana betfu, siyajabula kutsi siyakhona kucoca nabo tikhatsi letinyenti.”

BoDidier naNadine bakutfola kumatima ufundza lulwimi lwaseMadagascar. Amamatseka, Nadine utsi: “Sesikhulile.” Yini leyabasita kutsi baphumelele? Kwekucala, baya ebandleni lelikhuluma siFrench. Ngekuhamba kwesikhatsi, baya ebandleni lelikhuluma lulwimi lwaseMadagascar njengobe besekulungele kulufundza. Nadine utsi: “Bantfu labanyenti lesibatfola ensimini bayakutsandza kudadisha liBhayibheli. Bavamise kusibonga ngekubavakashela. Ekucaleni bekungatsi ngiyabhudza. Ngiyakutsandza kushumayela kulendzawo. Njalo nangivuka ekuseni, ngivame kutsi: ‘Ngiyajabula ngoba lamuhla ngiya emsebentini wekushumayela!’”

Didier uyajabula nakakhumbula ngesikhatsi acala kufundza lulwimi lwaseMadagascar. Utsi: “Bengichuba imihlangano, kepha bengingaticondzi timphendvulo lebetishiwo bazalwane nabodzadze. Bengati kutsi ‘Ngiyabonga’ nje kuphela. Ngemuva kwekubonga lomunye dzadze, labahleti emva kwakhe bacala kungikhombisa kutsi imphendvulo layishito beyingasiyo. Masinyane ngabese ngikhomba lomunye umzalwane lengicabanga kutsi washo imphendvulo lengiyo.”

Emhlanganweni lebewunga-2005, Thierry nemkakhe Nadia babukela i-drama lenesihloko lesitsi “Phishekela Imigomo Edumisa UNkulunkulu.” Le-drama lesekelwe eBhayibhelini lekhuluma ngaThimothi  yatitsintsa tinhlitiyo tabo futsi yakhulisa sifiso sabo sekuyokhonta lapho kunesidzingo lesikhulu sebamemeteli beMbuso. Thierry utsi: “Nasishaya tandla ekupheleni kwale drama, ngachweba umkami ngase ngibuta kutsi ‘Sitawuyaphi?’ Umkami watsi naye abecabanga ngentfo lefanako.” Ngemuva kwesikhashana bacala kwenta emalungiselelo kute bafinyelele imigomo yabo. Nadia utsi: “Kancane kancane, sacala kunciphisa tintfo lebesinato taze tenela emaputumendeni lamane!”

Befika eMadagascar nga-2006 futsi bebakujabulela kwenta umsebenti wekushumayela. Nadia utsi: “Bantfu lebesibatfola bebasenta sijabule kakhulu.”

Noma kunjalo, ngemuva kweminyaka lengu-6, lomndeni wahlangabetana nesimo lesimatima. Make waNadia, Marie-Madeleine lebekahlala eFrance wawa, wephuka umkhono futsi walimala enhloko. Ngemuva kwekucoca nadokotela wamake waNadia, bacela make wabo kutsi atohlala nabo eMadagascar. Noma bekaneminyaka lengu-80, wasemukela ngenjabulo lesimemo. Utiva njani ngekuhlala kulelinye live? Utsi: “Ngaletinye tikhatsi kulukhuni kujwayela indzawo lensha, ngisho noma kunetintfo lengingakhoni kutenta, ngitiva ngilusito ebandleni. Kungijabulisa kakhulu kutsi bantfwana bami bayachubeka nekwenta umsebenti wekushumayela lophumelelako ngenca yekutsi sengihlala lapha.”

Riana ngumzalwane loseminyakeni yabo-20. Wakhulela e-Alaotra Mangoro lokusifundza lesisempumalanga yeMadagascar. Bekaphumelela esikolweni futsi bekafuna imfundvo lephakeme. Kodvwa ngemuva kwekudadisha liBhayibheli, washintja umcondvo. Watsi: “Ngalwela kusheshe ngicedze esikolweni futsi ngetsembisa Jehova kutsi, ‘nangingaphasa, ngitawuba lihlahlandlela.’” Nasekaphotfulile, Riana wasifeza setsembiso sakhe. Wahlala nalomunye umzalwane lolihlahlandlela watfola umsebenti lawenta ngemalanga latsite, futsi waba lihlahlandlela. Utsi: “Lesi sincumo lesihle kakhulu kuto tonkhe lengake ngatenta.”

Noma kunjalo, batali baRiana bebangacondzi kutsi kungani angalweli kutfola umsebenti loholela kakhulu. Utsi: “Babe wami, malume kanye na-anti bebangikhutsata kutsi ngilwele kutfola imfundvo lephakeme. Kodvwa bengingafuni kuvumela nome ngabe yini ingiyekelise kuba lihlahlandlela.” Kungakapheli sikhatsi lesidze Riana wafuna kuyokhonta endzaweni lenesidzingo lesikhulu sebamemeteli. Yini leyakhulisa lesifiso sakhe? Utsi: “Tigebengu tangena lapho besihlala khona, futsi tatsatsa tintfo letinyenti lebenginato. Loku kwangenta ngacabanga ngemavi aJesu lamayelana nekutibekela ‘umcebo ezulwini.’ Ngase ngincuma kutimisela ekukhonteni Nkulunkulu.” (Mat. 6:19, 20) Riana wabese utfutsela endzaweni leseningizimu yeMadagascar lokuyindzawo lenesomiso futsi lekhashane ngemakhilomitha langu-1 300 kusukela lapho bekahlala khona. Kulendzawo bekuhlala bantfu labakhuluma si-Antandroy. Yini leyamenta watfutsela kulendzawo?

Nakusesele inyanga kutsi kugcekezwe, Riana abecale kudadisha liBhayibheli nemadvodza lamabili lakhuluma lulwimi lwesi-Antandroy. Abefundze emagama latsite alolulwimi futsi wacabanga ngebantfu labanyenti labakhuluma si-Antandroy labebasengakawuva umlayeto weMbuso. Utsi: “Ngathantaza kuJehova ngamcela kutsi angisite ngikhone kutfutsela endzaweni lapho kunebantfu labakhuluma lolulwimi.”

Riana watfutsa, futsi nakasandza kutfutsa wahlangabetana nenkinga. Abengawutfoli umsebenti. Lenye indvodza yatsi kuye: “Utowentani lapha? Bantfu balapha baya lapho usuka khona kute batfole umsebenti.” Ngemuva kwemaviki lamabili, Riana waya emhlanganweni wesifundza futsi bekete imali leyenele ngako bekangati kutsi utawenta njani. Ngelilanga lekugcina lalomhlangano, lomunye umzalwane wafaka intfo letsite ekhikhini laRiana. Bekuyimali lebeyitawenela kutsi agibele futsi lenye abetawucala ngayo ibhizinisi yekutsengisa i-yogurt. Riana utsi: “Ngalubona lusito lwaJehova lolufike ngesikhatsi lesifanele. Ngakhona kuchubeka ngisita bantfu labasengakalitfoli litfuba lekufundza ngaJehova!” Bekunemsebenti lomkhulu Riana lebekufanele awente ebandleni. Riana utsi: “Ngatfola sabelo sekubeka inkhulumo yelinyenti njalo ngeliviki. Jehova bekangicecesha asebentisa inhlangano yakhe.” Lamuhla  Riana solo uyachubeka ashumayela umlayeto weMbuso ngelulwimi lwesi-Tandroy kubantfu labanyenti labafuna kufundza ngaJehova.

Jehova uyasicinisekisa kutsi wonkhe “loncenga sibusiso eveni uyawutibusisa ngaNkulunkulu lowetsembekile.” (Isa. 65:16) Jehova utasibusisa nangabe sisebenta kamatima kute sincobe tinkinga letisivimbela kutsi sandzise umsebenti wetfu wekushumayela. Cabanga ngesibonelo saSylviana lesicoce ngaye ekucaleni kwalesihloko. Khumbula, bekacabanga kutsi bekangeke akhone kuyokhonta lapho kunesidzingo lesikhulu khona. Kungani bekacanga kanjalo? Sylviana utsi: “Umlente wami wangesencele mfisha ngemasentimitha langu-9 kunalona wangesekudla. Ngako ngiyachuta nangihamba futsi loko kwenta kutsi ngisheshe ngidzinwe.”

Nga-2014, Sylviana wahamba naSylvie Ann longudzadze lolihlahlandlela leliselisha lelisebandleni lakhe futsi bobabili batfusa bayohlala kulenye indzawo lebeyikhashane ngemakhilomitha langu-85 kunalapho labatalelwa khona. Nangetulu kwetinkinga labenato, sifiso sakhe safezeka futsi loko kwaba sibusiso lesikhulu! Utsi: “Nasekuphele umnyaka ngisesabelweni sami lesisha, Doratine longumake losemusha lebengifundza naye liBhayibheli wabhajatiswa emhlanganweni wesigodzi.”

Njengoba sesibonile kuloko lokushiwo ngulabakhonta lapho kunesidzingo lesikhulu khona, nangabe silwela kuncoba tinkinga letisivimbela kutsi sandzise umsebenti wetfu wekushumayela, sitakubona kugcwaliseka kwesetsembiso Jehova lasinika tinceku takhe, lesitsi: “Ngitakucinisa ngikusite.” (Isa. 41:10) Loko kwenta buhlobo betfu naJehova bucine. Ngetulu kwaloko kutinikela kwetfu ngekutitsandzela eveni lakitsi noma kulelinye live kusilungiselela imisebenti lesitayenta nasesiseveni lelisha. Didier lokukhulunywe ngaye ekucaleni utsi: “Kukhonta lapho kunesidzingo lesikhulu khona kuyindlela lekahle yekusiceceshela likusasa!” Shengatsi tingaba tinyenti tisebenti tekutitsandzela letitfola lokuceceshwa!