1, 2. Jehova ukhombisa njani kutsi uyephana?

JEHOVA nguNkulunkulu lowephanako. Konkhe lesinako sikuphiwe nguye. Lonkhe ligolide nelisiliva kanye nawo onkhe ematje laligugu kwaJehova, futsi uyakusebentisa kuze asekele kuphila. (Hla. 104:13-15; Hag. 2:8) LiBhayibheli likhuluma ngetindzaba letinyenti lapho khona asebentisa tintfo latentile kuze asekele bantfu bakhe ngalokusimangaliso.

² Ngesikhatsi ema-Israyeli asehlane iminyaka lengu-40, Jehova wawanakekela ngekuwanika imana kanye nemanti. (Eks. 16:35) Umphumela waloko waba kutsi “abazange beswele lutfo.” (Neh. 9:20, 21) Jehova wenta simangaliso asebentisa umphrofethi Elisha ngekutsi andzise emafutsa labemancane emfelokati lowetsembekile. Lesipho saJehova samenta wakhona kubhala tonkhe tikweleti takhe futsi wasala anemali leyenele yekutinakekela yena kanye nendvodzana yakhe. (2 Khos. 4:1-7) Jehova wasita Jesu kutsi akhone kuniketa bantfu kudla kanye nemali ngalokusimangaliso.​—Mat. 15:35-38; 17:27.

3. Sitawucoca ngani kulesihloko?

 ³ Jehova uyakhona kusekela tinceku takhe letisemhlabeni ngako konkhe letikudzingako. Noma kunjalo, umema tinceku takhe kutsi tisebentise tintfo letinato kute tisekele umsebenti lowentiwa yinhlangano yakhe. (Eks. 36:3-7; fundza Taga 3:9.) Kungani Jehova alindzele kutsi sinikele ngetintfo tetfu letiligugu? Tinceku taNkulunkulu tasesikhatsini lesengcile tabasekela njani bantfu labenta umsebenti waJehova? Lamuhla inhlangano yaJehova iyisebentisa njani imali lenikelwe bazalwane? Kulesihloko sitawucoca ngetimphendvulo talemibuto.

4. Sisuke sikhombisani nasisekela umsebenti Jehova?

⁴ Sinikela kuJehova ngenca yekutsi siyamtsandza futsi sikhombisa kutsi siyabonga ngetintfo lasentele tona. Siyajabula nasicabanga ngako konkhe Jehova lasentele kona. Nayikhuluma ngetintfo lebetitawudzingeka nakwakhiwa lithempeli, iNkhosi Davide yavuma kutsi konkhe lesinako kuvela kuJehova futsi sinikela ngetintfo lasiphe tona.​—Fundza 1 Tikhronike 29:11-14.

5. ImiBhalo ikukhombisa njani kutsi kunikela ngalokusuka enhlitiyweni kuyincenye lebalulekile yekukhonta kweliciniso?

⁵ Kunikela kuyincenye yekukhonta kwetfu Jehova. Embonweni umphostoli Johane weva tinceku taJehova letisezulwini titsi: “Kukufanele Jehova Nkulunkulu wetfu kwemukela inkhatimulo, ludvumo, nemandla, ngobe wadala tonkhe tintfo, nangentsandvo yakho taba khona futsi tadalwa.” (Semb. 4:11) Jehova ufanelwe ludvumo nenkhatimulo, ngako kufanele simnike lokuncono kakhulu etintfweni lesinato. Asebentisa Mosi, Jehova wayala sive sema-Israyeli kutsi sibe nemikhosi lemitsatfu njalo ngemnyaka. Njengobe lemikhosi beyiyincenye yekukhonta kwawo, ema-Israyeli bekungakafanele ete ‘angakaphatsi lutfo.’ (Dut. 16:16) Nalamuhla kunikela ngalokusuka enhlitiyweni kute sisekele inhlangano yaJehova futsi sikhombise kubonga ngayo kuyincenye lebalulekile yekukhonta kwetfu kweliciniso.

6. Kungani kupha kuyintfo lenhle? (Buka sitfombe lesisekucaleni kwalesihloko.)

⁶ Kupha kuyintfo lenhle. Sitfola injabulo lenkhulu nasipha labanye kwendlula lesiyitfola nasemukela. (Fundza Taga 29:21, NW.) Asesicabange ngemntfwana loniketa batali bakhe sipho lasitsenge ngemali labahlale bamupha yona. Labatali bajabula kakhulu ngalesipho. Umntfwana lolihlahlandlela losahlala nebatali bakhe angahle abapha imali kute abasite babhadale tindleko tasekhaya. Ngisho noma labatali bangakagadzi kutsi akwente loko, bayasemukela lesipho ngoba siyindlela umntfwana lakhombisa ngayo kutsi uyabonga ngaloko labamentela kona. Ngendlela lefanako, Jehova uyati kutsi kunikela ngetintfo tetfu letiligugu kuhle.

7, 8. Bantfu baNkulunkulu basesikhatsini lesendlulile basibekela njani sibonelo lesihle sekunikela (a) kute kwentiwe imisebenti lekhetsekile? (b) kute basekele umsebenti waNkulunkulu?

⁷ LiBhayibheli likhuluma kakhulu ngetinceku taNkulunkulu lebetinikela ngetintfo letinato kute tisekele umsebenti waJehova. Nasi sibonelo, Mosi wakhutsata ema-Israyeli kutsi anikele kute kwakhiwe lithempeli futsi naDavide wenta lokufanako nakufanele kwakhiwe lithempeli. (Eks. 35:5; 1 Khr. 29:5-9) Ngesikhatsi kubusa iNkhosi Jehoyashi, baphristi basebentisa iminikelo kute balungise indlu yaJehova. (2 Khos. 12:4, 5)  Ngesikhatsi emaKhristu asendvulo eva ngendlala lebeyihlasele bazalwane baseJudiya, ‘avumelana ngekutsi nguloyo naloyo akatfumele loko langakukhona kute kusitwe labazalwane.’​—Imis. 11:27-30.

⁸ Ngaletinye tikhatsi bantfu baJehova bebasekela labo labaholako ekwenteni umsebenti wakhe. UMtsetfo waMosi bewutsi emaLevi bekungakafaneli atfole lifa lebelitfolwa nguletinye tive. Esikhundleni saloko, ema-Israyeli bekawaniketa kwelishumi futsi loko bekwenta emaLevi akhone kunaka umsebenti labewenta ethempelini. (Num. 18:21) Ngendlela lefanako, labanye bafati “bebasebentisa tintfo tabo kute basite” Jesu kanye nebaphostoli bakhe.​—Luk. 8:1-3.

9. Betitfolakala kuphi letinye tintfo lebekunikelwa ngato esikhatsini lesendlulile?

⁹ Tintfo lebekunikelwa ngato betitfolakale etindzaweni letehlukahlukene. Ngesikhatsi ema-Israyeli anikelela kwakhiwa kwelithempeli, kungenteka anikela ngetintfo labetitsatse eGibhithe. (Eks. 3:21, 22; 35:22-24) Ngelikhulu lekucala leminyaka, lamanye emaKhristu atsengisa tintfo labenato lokufaka ekhatsi tindlu kanye nemasimu futsi imali lebekayitfola bekayimikisa kubaphostoli. Baphostoli bebabese bayehlukanisela bantfu lebebaswele. (Imis. 4:34, 35) Labanye bebabekela eceleni imali labatawunikela ngayo kute basekele umsebenti waJehova. (1 Khor. 16:2) Ngako bonkhe bantfu bebangakhona kunikela ngisho nome banjinge kakhulu nome baphuye kakhulu.​—Luk. 21:1-4.

10, 11. (a) Singatilingisa njani tinceku taJehova lebetinemoya wekupha? (b) Utiva njani ngalilungelo lonalo lekusekela umsebenti weMbuso?

¹⁰ Lamuhla natsi singahle sicelwe kutsi sinikele kute kwentiwe umsebenti lotsite. Nasi sibonelo, kungahle kuhlelwe kutsi kwakhiwe liHholo leMbuso lelisha lelitawusetjentiswa libandla lokulo. Mhlawumbe liHholo leMbuso lokulo lidzinga kulungiswa. Singahle sicelwe kutsi sinikele ngemali kute kulungiswe lihhovisi letfu leligatja, indzawo lesibambela kuyo umhlangano wesifundza noma nakufanele sisite bazalwane betfu labehlelwe sehlakalo semvelo. Siphindze sinikele kute sisekele bazalwane labasendlunkhulu kanye nalabo labasebenta emahhovisini eligatja lasemhlabeni wonkhe. Iminikelo yetfu isekela titfunywa telivangeli, emahlahlandlela lakhetsekile kanye nebabonisi labajikeletako. Asingabati kutsi libandla lokulo lenta livi lesincumo sekusekela kwakhiwa kwemaHholo emhlangano kanye nemaHholo eMbuso kute kusitwe bazalwane labasemhlabeni wonkhe.

¹¹ Sonkhe singaba nencenye ekusekeleni umsebenti waJehova kulamalanga ekugcina. Iminikelo leminyenti ayibhalwa kutsi ibuya kubani. Asibatjeli labanye nasifaka imali emabhokisini emnikelo noma nasinikela ku-internet sisebentisa i-jw.org. Singahle sicabange kutsi iminikelo yetfu lemincane ayisiti ngalutfo. Noma kunjalo, yinyenti imali letfolakala ngeminikelo leminyenti lemincane kunaleyo letfolakala kubazalwane labambalwa labanikela imali lenkhulu. Ngisho noma baphuye kakhulu, bazalwane betfu balingisa sibonelo lesihle sebazalwane baseMasedoniya ‘lebebaswela kakhulu’ kodvwa bancengisisa kute batfole lilungelo lekupha futsi banikela ngalokusuka enhlitiyweni.​—2 Khor. 8:1-4.

12. Yini inhlangano yaJehova leyentako kute iminikelo isetjentiswe kahle?

¹² Ngelusito lwemthantazo, Sigungu Lesibusako silwela kuyisebentisa ngekwetsembeka nangekuhlakanipha iminikelo yebazalwane.  (Mat. 24:45) Kuyahlelwa kutsi imali itawusetjentiswa njani futsi bese isetjentiselwa loko lebeyihlelelwe kona. (Luk. 14:28) Esikhatsini seliBhayibheli emadvodza letsembekile abeciniseka kutsi iminikelo isetjentiselwa kuphela kwenta loko lobekuhleliwe. Nasi sibonelo, Ezra wabuyela eJerusalema netintfo lebetibuya enkhosini yasePheresiya, letifaka ekhatsi ligolide, lisiliva kanye nalamanye ematje laligugu langabita tigidzi letingu-100 temadola aseMelika. Ezra bekatsatsa letintfo njengemnikelo loya kuJehova, futsi wabese ukhokha ticondziso leticacile kute avikele letintfo njengoba bebahamba endleleni leyingoti. (Ezra 8:24-34) Umphostoli Pawula wakweleka imali kute kusitwe bazalwane baseJudiya. Watsatsa tinyatselo kute aciniseke kutsi bantfu lebebaphatsa leminikelo bebenta “tonkhe tintfo ngekwetsembeka, hhayi embikwaJehova kuphela, kodvwa nasembikwebantfu.” (Fundza 2 Khorinte 8:18-21.) Lamuhla inhlangano yaJehova ibeke ticondziso kute iminikelo isetjentiswe kahle njengobe kwenta Ezra kanye naPawula.

13. Kufanele sibe namuphi umbono ngetingucuko letisandza kwentiwa yinhlangano?

¹³ Umndeni ungenta tingucuko letitsite kute unciphise tindleko noma uphindze ucabange ngekutsi ungakwenta njani kuphila kwawo kube melula kute wentele Jehova lokunyenti. Nenhlangano yaJehova yenta lokufanako. Tinyenti tintfo letinsha inhlangano letentile kuleminyaka lembalwa leyendlulile. Ngaletinye tikhatsi imali lesetjentisiwe beyiyinyenti kunaleyo lengenile. Ngako inhlangano ibuka tindlela tekunciphisa tindleko kute ikhone kwenta lokunyenti ngeminikelo yebazalwane.

14-16. (a) Ngutiphi letinye tintfo letentiwako ngeminikelo yetfu? (b) Lamalungiselelo akuzuzise njani?

¹⁴ Tinceku taJehova lesetinesikhatsi lesidze timkhonta titsi tiyacala kubona sikhatsi lapho khona kunetintfo letinyenti kangaka letisisita kutsi sibe nebuhlobo lobuhle naJehova. Cabanga ngaloku, eminyakeni lembalwa leyendlulile sibone kucala kwe-jw.org kanye ne-JW Broadcasting. I-New World Translation of the Holy Scriptures itfolakala ngetilwimi letinyenti. Nga-2014/2015, umhlangano wemalanga lamatsatfu lonesihloko lesitsi “Chubekani Nifuna Kucala UMbuso WaNkulunkulu!” wabanjelwa etinkhundleni temidlalo letinkhulu letisemadolobheni langu-14 emhlabeni  wonkhe. Labo labebaye kulemihlangano bajabula kakhulu ngekuba khona kuyo.

¹⁵ Bantfu labanyenti bakhombisa kubonga ngetinzuzo letinyenti naletinhle labatitfola enhlanganweni yaJehova. Nasi sibonelo, lomunye umndeni lokhonta e-Asia wabhala watsi: “Sabelwa kutsi siyokhonta edolobheni lelincane futsi ngaletinye tikhatsi sitiva silahliwe bese siyakhohlwa ngekubaluleka kwemsebenti waJehova. Kepha nasicedza nje kubukela luhlelo lwe-JW Broadcasting lwetinyanga letehlukene, sibese siyakhumbula kutsi siyincenye yebazalwane labasemhlabeni wonkhe. Bazalwane betfu nabodzadze lesikanye nabo bayijabulela kakhulu i-JW Broadcasting. Sivame kubeva batsi nabacedza kubukela loluhlelo bativa basondzelene nemalunga eSigungu Lesibusako. Nyalo sebayatigcabha ngekuba yincenye yenhlangano yaNkulunkulu.”

¹⁶ Emhlabeni wonkhe, cishe emaHholwa eMbuso langu-2 500 ayakhiwa noma ayalungiswa. Ngemuva kwekucala kusebentisa lihholo lawo lelisha, emalunga elibandla laseHonduras abhala atsi: “Kusijabulisa kakhulu kuba yincenye yemndeni waJehova kanye nekuba yincenye yebazalwane labasemhlabeni wonkhe. Loku kwente kutsi sifiso setfu sekuba neliHholwa leMbuso endzaweni yakitsi sifezeke.” Bazalwane labanyenti bavame kusho emavi lafanako nabatfola liBhayibheli kanye naletinye tincwadzi letihunyushelwe etilwimi tabo, ngemuva kwekutfola lusito nakugadle sehlakalo, kanye nalapho babona imiphumela yekushumayela etindzaweni tawonkhewonkhe.

17. Indlela inhlangano lesebenta ngayo lamuhla ikhombisa njani kutsi isekelwa nguJehova?

¹⁷ Bantfu labanyenti abacondzi kutsi sikhona njani kwenta konkhe loku sisebentisa iminikelo yekutitsandzela kuphela. Ngemuva kwekuvakasha endzaweni lesishicilela kuyo, lomunye umphatsi wenkapani lenkhulu wamangala kutsi lomsebenti lomnyenti kangaka wentiwa ngemavolontiya nangeminikelo yekutitsandzela ngephandle kwekutsengisa noma kucokelela timali. Watsi intfo lenjalo ngeke seyenteke. Loko kuliciniso, ngoba siyati kutsi sikhona kukwenta ngenca yelusito lwaJehova kuphela.​—Jobe 42:2.

18. (a) Ngutiphi tibusiso lesititfolako nasisisekela uMbuso waNkulunkulu? (b) Singabacecesha njani bantfwana kanye nalabasha ebandleni kutsi baphe labanye?

¹⁸ Jehova usinika litfuba lekusekela umsebenti lomkhulu lowentiwako lamuhla. Usicinisekisa kutsi sitawutfola tibusiso nangabe sisekela uMbuso wakhe. (Mal. 3:10) Jehova wetsembisa kutsi bantfu labapha ngekukhululeka batawuphumelela. (Fundza Taga 11:24, 25.) Kupha kuphindze kusente sijabule ngoba “kunenjabulo lenyenti ekupheni kunasekwemukeleni.” (Imis. 20:35) Ngemavi nangetento, sinelilungelo lekucecesha bantfwana betfu kanye nalabasha ebandleni kutsi bangabapha njani labanye futsi batfole tibusiso letinyenti.

19. Lesihloko sikukhutsate njani?

¹⁹ Konkhe lesinako kuvela kuJehova. Kunikela kuye kukhombisa kutsi siyamtsandza futsi siyabonga ngako konkhe lasentele kona. (1 Khr. 29:17) Ngesikhatsi sive sema-Israyeli sinikela nakwakhiwa lithempeli, “sajabula kakhulu, nasibona baholi baso banikela ngenhlitiyo levumako, ngobe bebanikela ngenkhululeko nangenhlitiyo yabo yonkhe kuSimakadze.” (1 Khr. 29:9) Shengatsi natsi singachubeka sitfola injabulo nekwenetiseka nasinikela kuJehova ngaloko lasiphe kona.