“UMSEBENTI wekuvuna mkhulu, kodvwa tisebenti timbalwa. Ngako ncusani iNkhosi yekuvuna kutsi yengete tisebenti ekuvuneni kwayo.” (Luk. 10:2) Lamavi lashiwo nguJesu eminyakeni lengu-2 000 leyendlulile asichaza kahle simo lesiseveni laseMyanmar. Kungani? EMyanmar kunebantfu labatigidzi letingu-55 kani kunebamemeteli betindzaba letimnandzi labangu-4 200 kuphela.

Noma kunjalo, Jehova “iNkhosi yekuvuna” utsintse tinhlitiyo temakhulu ebazalwane nabodzadze labasuka kuletinye tindzawo kutsi baye kulelive lelise-Southeast Asia kute bashumayele tindzaba letimnandzi. Yini leyabenta bashiya emave akubo? Yini leyabasita kutsi batfutse? Ngutiphi tibusiso labatijabulelako? Ase sibone.

Eminyakeni leyendlulile Kazuhiro lolihlahlandlela lase-Japan, bekanesifo sekuwa, ngako wacaleka base bammikisa esibhedlela. Dokotela wamtjela kutsi angashayeli imoto kuze kuphele iminyaka lemibili. Kazuhiro wamangala. Watibuta kutsi: ‘Ngitawenta njani ngobe ngiyakutsandza kuba lihlahlandlela?’ Wathantaza kanyenti acela Jehova kutsi amsite kuze akhone kuchubeka nemsebenti wekuba lihlahlandlela.

Kazuhiro utsi: “Ngemuva kwenyanga, umngani wami lobekalihlahlandlela weva ngalesimo lesicindzetelako lebengibhekene naso. Wase utsi: ‘Wota eMyanmar ngoba kuhanjwa ngemabhasi. Ungakhona kuchubeka nemsebenti wekushumayela ungayisebentisi imoto.’ Ngabuta dokotela wami kutsi bekungangilungela yini kuyohlala eMyanmar. Ngamangala nakatsi: ‘Dokotela wengcondvo losuka eMyanmar uta laJapan. Ngitakumikisa kuye. Nangabe kwenteka lesifo siphindze sikuhlasela, utakunakekela.’ Loko ngakutsatsa njengendlela Jehova laphendvula ngayo imithantazo yami.”

Ngekushesha Kazuhiro watfumela umlayeto ehhovisini leligatja laseMyanmar, wachaza kutsi yena nemkakhe bebafisa kuba ngemahlahlandlela kulelive. Ngemuva nje kwemalanga lasihlanu, lihhovisi leligatja labaphendvula latsi: “Wotani, sidzinga emahlahlandlela lamanyenti!” Kazuhiro nemkakhe Mari batsengisa timoto tabo, batsatsa ema-visa baphindze batsenga emathikithi endiza. Nyalo bajabulela kuhlanganyela nelicembu lelulwimi lwetandla leliseMandalay. Utsi: “Kuko konkhe loku, siyabona kutsi kukholwa kwetfu  kuNkulunkulu kwacina futsi kusente sasetsemba kakhulu setsembiso sakhe lesikuTihlabelelo 37:5 lesitsi: ‘Nikela indlela yakho kuSimakadze, umetsembe, yena-ke uyawukutsatsela tinyatselo.’”

Nga-2014, BoFakazi BaJehova baseMyanmar bajabulela lilungelo lekutsi umhlangano lokhetsekile ube seveni labo. Bazalwane labanyenti lababuya kulamanye emave beta kulomhlangano. Monique, dzadze loseminyakeni yabo-30 lobekasuka eMelika utsi: “Nangibuya kulomhlangano, ngathantaza kuJehova ngamcela kutsi ngibone kutsi ngusiphi sinyatselo lokufanele ngisitsatse. Ngaphindze ngakhuluma nebatali bami ngemigomo lebenginayo yekukhonta Nkulunkulu. Sonkhe saphetsa ngekutsi kufanele ngibuyele eMyanmar, kodvwa kwatsatsa sikhatsi futsi kwadzingeka ngithantaze kanyenti ngaphambi kwekutsi ngitsatse lesincumo.” Monique uyasichaza sizatfu saloko.

“Jesu wakhutsata balandzeli bakhe kutsi ‘babale tindleko.’ Ngako ngatibuta kutsi: Ngingakhona yini kuya eMyanmar? Ngingakhona yini kutisekela ngisho noma ngingacitsi sikhatsi lesinyenti emsebentini wekutiphilisa?’” Monique uchubeka utsi: “Ngekushesha ngabona kutsi site imali leyenele kutsi singakhona kutfutsela kulelive.” Ngako-ke yini leyasita Monique kutsi atfutsele kulelive?​—Luk. 14:28.

Utsi: “Ngalelinye lilanga umphatsi wami wacela kukhuluma nami. Bengetfukile, ngobe bengicabanga kutsi ngitawucoshwa. Kodvwa esikhundleni saloko, wangincoma ngemsebenti lomuhle lengiwentako. Waphindze wangitjela kutsi abehlele kunginiketa i-bonus lebekuyimali lebengiyidzinga kute nginakekele tidzingo tami!”

Kusukela nga-December 2014, Monique abesolo alihlahlandlela eMyanmar. Utiva njani ngekukhonta lapho kunesidzingo lesikhulu khona? Utsi: “Ngikujabulela kakhulu kuba kulelive. Ngichuba tifundvo teliBhayibheli letintsatfu. Ngifundza nalomunye make loneminyaka lengu-67, futsi njalo nakangibona uyamoyitela aphindze angihage. Ngesikhatsi afundza kutsi ligama laNkulunkulu nguJehova, wajabula kakhulu waze wakhala. Watsi: ‘Ngiyacala ngca kuva kutsi ligama laNkulunkulu nguJehova. Umncane kabi kunami, kepha ungifundzise intfo lebaluleke kakhulu ekuphileni.’ Nami ngakhala. Kukhonta lapho kunesidzingo lesikhulu khona kuyajabulisa nawubona bantfu benta ngalendlela.” Monique usandza kutfola lilungelo lekuya eSikolweni Sebavangeli BeMbuso.

Lokunye lokwakhutsata labanye kutsi bayokhonta eMyanmar, yindzaba lesencwadzini letsi “INcwadi Yonyaka YoFakazi BakaJehova Ka-2013” lebeyikhuluma ngalelive. Lomunye dzadze loseminyakeni yabo-30 lobitwa ngekutsi ngu-Li abehlala e-Southeast Asia. Bekasebenta onkhe malanga, kodvwa lendzaba yamkhutsata kutsi acabange ngekuyokhonta eMyanmar. Utsi: “Nga-2014 ngaya emhlanganweni lokhetsekile lebewuse-Yangon futsi ngahlangana nalomunye umndeni lobewukhonta endzaweni lenesidzingo lesikhulu, ensimini yelulwimi lwesiShayina eMyanmar. Njengobe ngikhuluma siShayina, ngancuma kutsi ngiye eMyanmar ngiyosita lelicembu lesiShayina. Ngatfolana naMonique futsi satfutsela e-Mandalay. Jehova wasibusisa ngemsebenti wekufundzisa esikolweni lesiwenta ngemalanga latsite, futsi satfola indzawo yekuhlala lesedvutane. Ngisho noma kushisa kakhulu kulendzawo futsi kunaletinye tinkinga, ngikujabulela kakhulu kukhonta kuyo. Bantfu baseMyanmar baphila kuphila lokumelula, kodvwa banemusa futsi bayatinika sikhatsi sekulalela tindzaba letimnandzi. Kungijabulisa kakhulu kubona indlela Jehova lawusheshisa ngayo lomsebenti. Ngiciniseka mbamba kutsi kuyintsandvo yaJehova kutsi ngibe kulendzawo.”

Bazalwane nabodzaze labanyenti labakhonta lapho kunesidzingo lesikhulu khona babonile kutsi umthantazo unemandla. Cabanga nga-Jumpei kanye nemkakhe Nao labaseminyakeni yabo-30. Bebavele basebandleni lwelulwimi lwetandla e-Japan. Yini leyabenta batfutsela eMyanmar? Jumpei utsi: “Mine nemkami besinemgomo wekuyokhonta lapho kunesidzingo lesikhulu khona kulelinye live. Lomunye umzalwane ebandleni lesikulo watfutsela eMyanmar. Nga-May 2010 satfutsa, ngisho noma besinemali lencane. Bazalwane nabodzadze baseMyanmar basemukela kahle!” Utiva njani ngekushumayela ensimini yelulwimi lwetandla eMyanmar? Utsi: “Bantfu balapha bayalitsandza liciniso. Bajabula kakhulu nasibakhombisa ema-video elulwimi lwetandla. Sijabula kakhulu ngekutsi sakhetsa kutokhonta Jehova lapha!”

Yini lesita boJumpei naNao kutsi bakhone kunakekela tindleko tabo? Jumpei utsi: “Ngemuva kweminyaka lemitsatfu imali lebesinayo yaphela, futsi ngemnyaka lolandzelako besesite imali ye-rent. Mine nemkami sathantaza kanyenti. Singakalindzeli, satfola incwadzi lebeyibuya ehhovisini leligatja, lesicela kutsi sibe ngemahlahlandlela lakhetsekile kwesikhashana! Setsembela kuJehova futsi sibonile kutsi akaze asilahle. Abesolo asinakekela ngato tonkhe tidzingo tetfu.” BoJumpei naNao basandza kuya eSikolweni Sebavangeli BeMbuso.

Yini leyakhutsata Simone umzalwane wase-Italy loseminyakeni yabo-40, kanye na-Anna longudzadze loseminyakeni yabo-30 wase-New Zealand kutsi batfutsele eMyanmar? Anna utsi: “Ngakhutsatwa kufundza INcwadi Yonyaka Ka-2013.” Simone utsi: “Kulilungelo lelikhulu kukhonta eMyanmar. Kulelive kuphilwa imphilo lemelula, futsi ngiyakhona kucitsa sikhatsi lesinyenti emsebentini waJehova. Kujabulisa kakhulu kubona indlela Jehova lasinakekela ngayo nasikhonta lapho kunesidzingo lesikhulu khona.” (Hla. 121:5) Anna utsi: “Angizange sengijabule kangaka ekuphileni kwami. Siphila imphilo lemelula. Sikhatsi lesinyenti ngisicitsa nemyeni wami futsi loko kusente sasondzelana kakhulu. Siphindze satfola nebangani labaligugu. Bantfu balapha ababachwensi BoFakazi BaJehova futsi bayawatsandza emaciniso laseBhayibhelini!” Bakukhombisa njani loko?

Anna utsi: “Ngalelinye lilanga ngacoca nalomunye umfundzi wasenyuvesi emakethe futsi ngahlela kuphindze ngimvakashele. Ngesikhatsi ngiphindze ngimvakashela ngamkhandza analomunye umngani wakhe. Ngatsi nangiphindze ngibuyela, ngakhandza sekunalabanye. Kwaphindze kwengeteka nalabanye. Nyalo ngifundza nalabasihlanu babo.” Simone utsi: “Bantfu labanyenti lengibatfola ensimini banebungani futsi bafuna kwati. Kodvwa site sikhatsi lesenele sekufundza nabo bonkhe.”

 Yini labayenta kuze bakhone kuya eMyanmar? Mizuho wase-Japan utsi: “Mine nemyeni wami Sachio besisolo sifuna kuyokhonta lapho kunesidzingo lesikhulu khona, kodvwa besingati kutsi siyephi? Nasicedza kufundza “INcwadi Yonyaka Ka-2013” satsintseka kakhulu ngetibonelo letinhle talabanye futsi sacala kucabanga kutsi kungasilungela yini kuyokhonta eMyanmar.” Sachio utsi: “Sancuma kuyovakashela eYangon edolobheni laseMyanmar liviki lonkhe kuze sibone lendzawo. Lokuvakasha kwasicinisekisa kutsi kufanele siyokhonta kulelive.”

Kusukela nga-2010, bo-Rodney nemkakhe Jane, labaseminyakeni yabo-50 labebahlala e-Australia kanye nendvodzana yabo Jordan nendvodzakati yabo Danica bebasolo bakhonta eMyanmar. Rodney utsi: “Lokwasenta saya eMyanmar kutsi sabona kutsi labantfu bebalambele emaciniso. Ngikhutsata imindeni kutsi yetame kuyokhonta etindzaweni letifana nelive laseMyanmar.” Kungani? Utsi: “Kuyajabulisa kubona kutsi kukhonta lapho kunesidzingo lesikhulu kwente umndeni wetfu wasondzelana kakhulu naJehova! Bantfu labasha labanyenti bamatasa ngetincingo tabo, timoto, umsebenti, nangalokunye. Kodvwa bantfwana betfu bamatasa bafundza emagama labangawasebentisa ensimini. Betama kufundza kutsi bangabonisana njani nebantfu labangakaletayeli liBhayibheli nekutsi bangaphendvula njani emihlanganweni yelibandla futsi bamatasa ngaletinye tintfo letibasita kutsi basondzele kuJehova.”

Oliver longumzalwane loseminyakeni yabo-30 wase-Melika uchaza kutsi kungani akhutsata kukhonta lakunesidzingo lesikhulu khona. Utsi: “Kukhonta Jehova etimeni letehlukile kulengitetayele kunetinzuzo letinyenti. Kuhamba ekhaya kungisitile ngametsemba kakhulu Jehova ngisho noma ngihlangabetana netimo letilukhuni. Kukhonta nebazalwane lebengingabati kepha labanekukholwa lokufana nekwami kungisitile ngabona kutsi kute intfo lebaluleke kwendlula uMbuso waNkulunkulu.” Lamuhla, bo-Oliver nemkakhe Anna bachubeka nekukhonta Jehova ngekutimisela ensimini yesiShayina leseMyanmar.

Kusukela nga-2004, Trazel dzadze loseminyakeni yabo-50 wase-Australia bekasolo akhonta eMyanmar. Utsi: “Ngikhutsata labo timo letibavumelako kutsi baye kuyokhonta lapho kunesidzingo lesikhulu khona. Ngibonile kutsi Jehova uyayibusisa imetamo yakho yekuyokhonta lapho kunesidzingo lesikhulu khona. Bengingacabangi kutsi ngitawuke ngiphile kanjena. Lena yimphilo lemnandzi naleyenetisa kakhulu.”

Shengatsi lamavi lashiwo bantfu labakhonta endzaweni lenesidzingo lesikhulu angakukhutsata kutsi ucabangele kuyosita bantfu labanetinhlitiyo leticotfo etindzaweni lapho kungashunyayelwa khona. Bamemeteli labasetindzaweni letinesidzingo lesikhulu bayanicela batsi: “Sicela nite eMyanmar nitosisita!”