1, 2. Kusho kutsini kwetsembela kuJehova?

SIPHILA “etikhatsini letibucayi, lokumatima kubhekana nato.” Kuphila kutawuba matima kakhulu ngaphambi kwekutsi Jehova abhubhise lelive lelibi futsi aletse kuthula emhlabeni. (2 Thim. 3:1) Ngako kufanele sitibute kutsi: ‘Ngubani lengetsembele kuye kutsi angisite futsi angicondzise?’ Ungahle uphendvule utsi: “NguJehova,” futsi loko kuhle kakhulu.

² Kusho kutsini kwetsembela kuJehova? Yini lesingayenta kuze siciniseke kutsi sitawuchubeka setsembele kuye nasibhekene netinkinga? Emakhulwini eminyaka lendlulile, umhlabeleli wachaza sidzingo sekuchubeka setsembele kuJehova nasidzinga lusito. (Fundza Tihlabelelo 123:1-4.) Wacatsanisa kwetsembela kwetfu kuJehova nendlela sisebenti lesetsembela ngayo enkhosini yaso. Asho kutsini lamavi? Sisebenti setsembele enkhosini yaso kutsi isiphe kudla futsi isivikele. Kufanele sichubeke sinake inkhosi yaso kuze sati kahle kutsi yini lokufanele siyente bese siyayenta. Ngendlela lefanako, kufanele sifundze liVi  laNkulunkulu onkhe malanga kuze sitotfola loko Jehova lafuna sikwente siphindze silandzele sicondziso sakhe. Nasenta njalo, sitawuciniseka kutsi Jehova utasisita nasidzinga lusito.​—Ef. 5:17.

3. Yini lengasiphatamisa nangabe setsembele kuJehova?

³ Nanobe sati kutsi kufanele sihlale sitsembele kuJehova, ngalesinye sikhatsi singaphazamiseka. Loko kwenteka kuMata, umngani waJesu lomkhulu. Waphatamiseka ngobe “abematasatasa asebenta.” (Luk. 10:40-42) Nangabe Mata lobekatsembekile futsi anaJesu aphatamiseka, kufanele silindzele kutsi kungenteka lokufanako nakitsi. Yini lengasenta singetsembeli kuJehova? Kulesihloko sitawucoca ngekutsi tintfo labanye labatentako tingasenta njani singetsembeli kuJehova. Sitawufundza nekutsi yini lesingayenta kuze sihlale setsembele kuJehova.

4. Kungani kusimangalisa kutsi Mosi akazange angene eVeni Lesetsembiso?

⁴ Mosi waciniseka kutsi wetsembele kuJehova kutsi amcondzise. “Wachubeka acinile shengatsi uyambona Loyo longabonakali.” (Fundza Hebheru 11:24-27.) LiBhayibheli litsi: “Kute umphrofethi lowaphindza wavela ka-Israyeli waba njengaMosi lobekatiwa nguSimakadze buso nebuso.” (Dut. 34:10) Nanobe Mosi abenebuhlobo lobuhle naJehova, walahlekelwa lilungelo lekungena eVeni Lesetsembiso. (Num. 20:12) Yini leyamenta walahlekelwa ngulelilungelo?

5-7. Nguyiphi inkinga leyavela ngesikhatsi ema-Israyeli asandza kuphuma eGibhithe, futsi yini Mosi layenta?

⁵ Kungakapheli tinyanga letimbili ema-Israyeli aphumile eGibhithe, asengakafiki eNtsabeni iSinayi, kwavela inkinga lenkhulu. Bantfu bakhonona ngoba bekute emanti. Bacala kububula kuMosi futsi simo saba sibi kangangekutsi Mosi wakhala kuJehova watsi: “Ngitabatsini nje labantfu? Sebasezingeni lekutsi bangangigcoba ngematje nome ngangunini.” (Eks. 17:4) Jehova wamphendvula ngekutsi amnikete ticondziso leticacile. Watsi akatsatse indvuku yakhe ashaye lelidvwala lebeliseHorebe kuze kutophuma emanti. “Mosi wenta njalo embikwebaholi bema-Israyeli.” Ema-Israyeli anatsa futsi lenkinga yacatululeka.​—Eks. 17:5, 6.

⁶ LiBhayibheli litsi Mosi wetsa lendzawo ngekutsi “yiMasa neMeribha,” ngobe ema-Israyeli alwa, alinga Simakadze ngesikhatsi atsi: “Simakadze usenatsi yini nome cha?” (Eks. 17:7) Lamagama bekafaneleka ngoba asho “Kulinga Nekulwa.”

⁷ Jehova wativa njani ngaloko lokwenteka eMeribha? Watsi ema-Israyeli abengavukeli Mosi kepha bekavukela yena. (Fundza Tihlabelelo 95:8, 9.) Loko lokwentiwa ngema-Israyeli bekukubi. Kepha Mosi wetsembela kuJehova futsi walalela sicondziso sakhe.

8. Nguyiphi inkinga leyaba khona ngasekupheleni kweluhambo lwema-Israyeli ehlane?

⁸ Ngemuva kweminyaka lengu-40 kwaphindze kwaba nesimo lesifanako, ngesikhatsi ema-Israyeli asatocedza luhambo lwawo. Afika endzaweni lesedvute naseKadeshi futsi besekasemnceleni weliVe Lesetsembiso. Ngekuhamba kwesikhatsi yabese ibitwa ngekutsi yiMeribha. * Ema-Israyeli aphindze akhonona ngobe bekute emanti.  (Num. 20:1-5) Kodvwa kulesimo Mosi wenta ngendlela leyehlukile.

9. Ngutiphi ticondziso Mosi latitfola, kodvwa yini layenta? (Buka sitfombe lesisekucaleni kwalesihloko.)

⁹ Yini Mosi layenta ngalokuvukela? Waphindze wetsembela kuNkulunkulu kutsi amcondzise. Kodvwa kuloku Jehova akazange amtjele kutsi ashaye lidvwala. Mosi watjelwa kutsi atsatse indvuku yakhe, abutsele sive ndzawonye bese ukhuluma kulelidvwala. (Num. 20:6-8) Noma kunjalo, Mosi akazange akhulume kulelidvwala. Kunaloko wakhombisa kutfukutsela kwakhe ngekutsi atsetsise bantfu atsi: “Lalelani-ke, nine mahlubuka, sinikhokhele yini emanti kulelidvwala?” Wase ushaya lelidvwala hhayi kanye kodvwa kabili.​—Num. 20:10, 11.

10. Wativa njani Jehova ngalokwentiwa nguMosi?

¹⁰ Jehova wamtfukutselela kakhulu Mosi. (Dut. 1:37; 3:26) Yini leyabangela Jehova kutsi atfukutsele? Kungenteka lesinye sizatfu kwaba kutsi Mosi akazange atilalele ticondziso letinsha Jehova bekamnike tona.

11. Sento saMosi sekushaya lidvwala sabenta njani bantfu banganaki kutsi lesi bekusimangaliso lesentiwa nguJehova?

¹¹ Kungenteka kunalesinye sizatfu lesenta Jehova watfukutsela. Emadvwala lamakhulu aseMeribha lebeyiseceleni kweRefidimu bekacine kakhulu. Noma umuntfu angawashaya kakhulu kangakanani, bekangeke alindzele kutsi kuphume emanti kuwo. Noma kunjalo, emadvwala aseMeribha lesedvute naseKadeshi bekangakacini kakhulu. Ngenca yekutsi bekangakacini, emanti bekangena kulamadvwala futsi ahlale ngaphasi kwawo. Bantfu bebangakhona kuwatfola ngekutsi babhobose lamadvwala. Ngako ngesikhatsi Mosi ashaya lidvwala esikhundleni sekutsi akhulume nalo, kungenteka ema-Israyeli acabanga kutsi lamanti ativelela hhayi kutsi Jehova bekente simangaliso. *

12. Ngusiphi lesinye sizatfu lokungenteka sabangela Jehova kutsi atfukutselele boMosi na-Aroni?

¹² Kungenteka kunalesinye sizatfu lesenta Jehova watfukutselela boMosi na-Aroni. Naka loko Mosi lakutjela bantfu: “Sinikhokhele yini emanti kulelidvwala?” Nakatsi “sinikhokhele,” kungenteka Mosi bekasho kutsi lamanti avela kuye na-Aroni. Lamavi aMosi bekakhombisa kutsi akamhloniphi Jehova lobekente lesimangaliso. Bufakazi baloko sibutfola nasifundza umbhalo weTihlabelelo 106:32, 33, lotsi: ‘Bacunula Simakadze ngaseticojeni taseMeribha, Mosi kwamhambela kabi ngenca yabo, ngobe [bawenta waba munyu umphefumulo waMosi, NW] waze wakhuluma kubo ngemawala.’ * (Num. 27:14) Loko Mosi lakwenta kwambangela kutsi angamniketi Jehova ludvumo lolumfanele. Jehova wakhuluma naMosi na-Aroni watsi: “Nine nobabili aningihloniphanga.” (Num. 20:24) Loku bekusono lesikhulu!

13. Kungani sehlulelo Jehova lasiniketa Mosi besifaneleka futsi sikhombisa kutsi akagucuki?

¹³ Njengobe bebahola bantfu baNkulunkulu, kunyenti lobekulindzeleke kuboMosi na-Aroni. (Luk. 12:48) Esikhatsini lesendlulile, Jehova akazange asivumele sive sema-Israyeli kutsi singene eveni laseKhenani  ngoba besivukela. (Num. 14:26-30, 34) Ngako sehlulelo Jehova lasinika Mosi besifaneleka futsi besikhombisa kutsi akagucuki. Njengawo onkhe ema-Israyeli lavukela Jehova, Mosi akazange angene Eveni Lesetsembiso.

14, 15. Yini leyenta Mosi wangamlaleli Jehova?

¹⁴ Yini leyabangela Mosi kutsi angamlaleli Jehova? Umbhalo weTihlabelelo 106:32, 33 utsi: ‘Bacunula Simakadze ngaseticojeni taseMeribha, Mosi kwamhambela kabi ngenca yabo, ngobe [bawenta waba munyu umphefumulo waMosi, NW] waze wakhuluma kubo ngemawala.’ Ngisho noma ema-Israyeli avukela Jehova, nguMosi lowatfukutsela. Kwehluleka kutibamba kwamenta wangayinaki imiphumela yemavi akhe.

¹⁵ Mosi wavumela tento talabanye kutsi timente angatilandzeli ticondziso taJehova. Mosi wenta kahle ngesikhatsi ema-Israyeli avukela kwekucala. (Eks. 7:6) Kodvwa kungenteka besekadziniwe futsi besekacasukile ngoba besekuphele sikhatsi lesidze ema-Israyeli avukela. Kungenteka Mosi besekanake kakhulu indlela lativa ngayo kunekutsi anake kutsi angamdvumisa njani Jehova.

16. Kungani kufanele sicabange ngaloko lokwentiwa nguMosi?

¹⁶ Nangabe umphrofethi lowetsembekile njengaMosi aphatamiseka futsi wona, nakitsi loko kungenteka melula. Mosi besekayongena eVeni Lesetsembiso futsi natsi sesitawungena eveni lelisha. (2 Phet. 3:13) Kute kitsi lofuna kulahlekelwa ngulelilungelo lelibalulekile. Kuze singene eveni lelisha kufanele sihlale setsembele kuJehova futsi sifune kwenta intsandvo yakhe ngaso sonkhe sikhatsi. (1 Joh. 2:17) Yini lesingayifundza emaphutseni aMosi?

17. Yini lengasisita sikhone kutibamba ngisho noma sitfukutsele?

¹⁷ Tibambe ngisho noma utfukutsele. Ngaletinye tikhatsi sihlangabetana netinkinga letifanako tikhatsi letinyenti. Kodvwa liBhayibheli litsi: “Asingapheli emandla ekwenta lokuhle, ngobe ngesikhatsi lesifanele sitawuvuna nasingadzinwa.” (Gal. 6:9; 2 Thes. 3:13) Nangabe sihlangabetana netimo letisicindzetelako noma nangabe sicabana nalabanye, siyayilawula yini indlela lesitiva ngayo kanye nemagama lesiwakhulumako? (Taga 10:19; 17:27; Mat. 5:22) Nangabe labanye basiphoca, kufanele ‘siyekele lulaka’ noma silindzele Jehova kutsi akhombise lulaka lwakhe. (Fundza Roma 12:17-21.) Kusho kutsini loko? Esikhundleni sekutsi sikwate nasihlangabetana netinkinga, silindzela Jehova kutsi ente lokutsite ngesikhatsi sakhe lesifanele. Sitawube sikhombisa kutsi asimhloniphi nasizama kutiphindziselela esikhundleni sekutsi silindzele yena.

18. Yini lokufanele siyikhumbule ngekulandzela ticondziso?

¹⁸ Landzela ticondziso letinsha ngekucophelela. Siyetsembeka yini futsi silandzele ticondziso letinsha Jehova lasiniketa tona? Nangabe senta njalo, angeke sifune kwenta tintfo ngendlela lebesitenta ngayo esikhatsini lesendlulile. Kunaloko, sitawusheshe sitisebentise ticondziso letinsha Jehova lasiniketa tona asebentisa inhlangano yakhe. (Heb. 13:17) Ngesikhatsi lesifanako, kufanele sicaphele kutsi ‘singeceli ngale kwetintfo letibhaliwe.’ (1 Khor. 4:6) Ngekwenta kanjalo sisuke setsembela kuJehova.

19. Yini lesingayenta kuze singalahlekelwa buhlobo betfu naJehova ngisho noma labanye benta emaphutsa?

 ¹⁹ Ungavumeli emaphutsa alabanye kutsi akwente ulahlekelwe buhlobo bakho naJehova. Nangabe sichubeka sinake Jehova, sitawuhlale sinebuhlobo lobuhle naye futsi angeke sikwate ngenca yetintfo letentiwa ngulabanye bantfu. Loku kubaluleke kakhulu nangabe njengaMosi sinemalungelo enhlanganweni yaJehova. Kuliciniso kutsi ngamunye wetfu kufanele asebente kamatima aphindze alalele Jehova kuze asindziswe. (Fil. 2:12) Noma kunjalo, kunyenti Jehova lakulindzele kitsi nangabe sinemalungelo lamanyenti. (Luk. 12:48) Nangabe simtsandza mbamba Jehova, kute lokutasehlukanisa nelutsandvo lwakhe.​—Hla. 119:165; Rom. 8:37-39.

20. Yini lokufanele sitimisele kuyenta?

²⁰ Kuletikhatsi letimatima shengatsi singahlale sinake Jehova “lohleti esihlalweni sebukhosi” lesisezulwini kuze sente intsandvo yakhe. Lokwenteka kuMosi kusifundzisa kutsi akukafaneli sivumele tento talabanye tilimate buhlobo betfu naJehova. Esikhundleni sekutsi sitfukutsele ngenca yemaphutsa alabanye, shengatsi singatimisela kuchubeka “sincike kuSimakadze, longuNkulunkulu wetfu, aze abe nesihawu kitsi.”​—Hla. 123:1, 2.