1. Yini lesenta sitsi tonkhe tintfo taNkulunkulu? (Buka sitfombe lesisekucaleni kwalesihloko.)

TONKHE tintfo taJehova. “Emazulu,  . . . ngisho nemazulu lasetulu kakhulu imbala; nemhlaba nako konkhe lokukuwo kwakhe.” (Dut. 10:14; Semb. 4:11) Bonkhe bantfu baJehova ngoba badalwa nguye. (Hla. 100:3) Kubo bonkhe bantfu labake baphila, Nkulunkulu utikhetsele bantfu kutsi babe sive sakhe lesikhetsekile.

2. LiBhayibheli litsi bobani bantfu baJehova labakhetsekile?

² Nasi sibonelo, natikhuluma ngetinceku taNkulunkulu letetsembekile, Tihlabelelo 135 titsi Jehova ‘wakhetsa Israyeli kutsi abe lifa lakhe.’ (Hla. 135:4) Ngetulu kwaloko, incwadzi yaHoseya yatsi nebantfu labangesiwo ema-Israyeli bebatawuba bantfu baNkulunkulu. (Hos. 2:23) Lesiphrofetho sagcwaliseka ngesikhatsi Jehova acala kukhetsa bantfu labangesiwo ema-Israyeli kutsi babuse naKhristu ezulwini. (Imis. 10:45; Rom. 9:23-26) Labo labagcotjwe ngemoya longcwele babitwa ngekutsi ‘basive lesingcwele’ futsi ‘bayimphahla lekhetsekile.’ (1 Phet. 2:9, 10) Kutsiwani ngemaKhristu letsembekile lamuhla lanelitsemba  lekuphila emhlabeni? Jehova uwabita ngekutsi “bantfu” bakhe futsi ‘bangulabakhetsiwe bakhe.’​—Isa. 65:22.

3. (a) Bobani labanebuhlobo lobuhle naJehova lamuhla? (b) Yini lesitawucoca ngayo kulesihloko?

³ Lamuhla, ‘umhlambi lomncane’ lonelitsemba lekuyophila ezulwini kanye “naletinye timvu” letinelitsemba lekuphila emhlabeni bakha umhlambi munye loyo Jehova lawubita ngekutsi bantfu bakhe. (Luk. 12:32; Joh. 10:16) Sifuna kumbonga kakhulu Jehova ngekusivumela kutsi sibe nebuhlobo lobuhle naye. Kulesihloko sitawucoca ngekutsi singakhombisa njani kutsi siyambonga Jehova ngekusiniketa lelilungelo lelikhetsekile.

4. Yini lesingayenta kute sibonge Jehova ngekusivumela kutsi sibe nebuhlobo lobuhle naye futsi Jesu wakwenta njani loko?

⁴ Nasitinikela kuJehova ngenhlitiyo yonkhe futsi sibhajatiswa, sisuke sikhombisa kutsi siyambonga ngekusivumela kutsi sibe nebuhlobo lobuhle naye. Ngekwenta njalo, bonkhe batawubona kutsi sibaJehova futsi sitimisele kumlalela. (Heb. 12:9) Jesu wenta intfo lefanako ngesikhatsi abhajatiswa, waze watsi kuJehova: “Yebo, Nkulunkulu wami, kujabula kwami kusekwenteni intsandvo yakho.” (Hla. 40:7, 8) Jesu watinikela kuJehova kute ente intsandvo yakhe ngisho noma bekatalelwe esiveni lebesitinikele kuNkulunkulu.

5, 6. (a) Yini Jehova layisho ngesikhatsi Jesu abhajatiswa? (b) Kungani Jehova ajabula nasitinikela kuye ngisho noma tonkhe tintfo titakhe? Fanekisa.

⁵ Wativa njani Jehova ngesikhatsi Jesu abhajatiswa? LiBhayibheli litsi: “Ngemuva kwekubhajatiswa, Jesu watsi nakaphuma emantini lizulu lavuleka, kwase kwehlela etikwakhe umoya waNkulunkulu unjengelituba. Kwaphindze kwevakala livi lelivela ezulwini litsi: ‘Lena yiNdvodzana yami letsandzekako, ngiyemukele.’” (Mat. 3:16, 17) Jesu bekavele ayindvodzana yaNkulunkulu ngesikhatsi atinikela. Jehova wajabula kakhulu nakabona kutsi indvodzana yakhe ifuna kwenta intsandvo yakhe ngalokuphelele. Jehova uyajabula nangabe natsi sitinikela kuye futsi utasibusisa nasenta njalo.​—Hla. 149:4.

⁶ Njengobe tonkhe tintfo titaJehova, yini lesingamnika yona? Cabanga ngababe lonengadzi lenhle yetimbali. Ngalelinye lilanga umntfwana wakhe lomncane wakha imbali yinye wamniketa. Ngisho noma lembali yayivele iyakhe, lobabe lonelutsandvo wajabula kakhulu ngalesipho. Loko kwamkhombisa kutsi lendvodzakati yakhe iyamtsandza. Lembali umntfwana wakhe lamniketa yona ibaluleke kakhulu kwendlula tonkhe letimbali litisengadzeni. Ngendlela lefanako, Jehova ujabula kakhulu nangabe sitinikela kuye ngalokusuka enhlitiyweni.​—Eks. 34:14.

7. Incwadzi yaMalakhi isisita njani sicondze kutsi Jehova utiva njani ngalabo labamkhonta ngekutitsandzela?

⁷ Fundza Malakhi 3:16. Nangabe usengakatinikeli futsi wabhajatiswa kufanele ucabange ngekubaluleka kwekwenta njalo. Kuliciniso kutsi bowuvele uwaJehova kusukela wabakhona. Asewucabange kutsi Jehova angajabula kangakanani nangabe umemukela njengeMbusi wakho futsi utinikela kuye. (Taga 23:15) Jehova uyabati labo labamkhonta ngenhlitiyo yonkhe futsi ubhala emagama abo ‘encwadzini yesikhumbuto.’

8, 9. Yini Jehova lacela kutsi labo ‘labasencwadzini yesikhumbuto’ bayente?

⁸ Kukhona lokufanele sikwente nangabe sifuna emagama etfu ahlale ‘asencwadzini  yesikhumbuto’ yaJehova. Malakhi watsi kufanele sesabe Jehova siphindze sihloniphe libito lakhe. Nangabe sikhonta lomunye umuntfu noma letinye tintfo, emabito etfu atawususwa kulencwadzi yaJehova.​—Eks. 32:33; Hla. 69:28.

⁹ Akukeneli nje kutsi setsembise kwenta intsandvo yaJehova futsi sibhajatiswe emantini. Loku sikwenta kanye kuphela, kodvwa Jehova simkhonta ngaso sonkhe sikhatsi. Tento tetfu kufanele tikhombise kutsi sikhonta Jehova, yingci nje nasisaphila.​—1 Phet. 4:1, 2.

10. Ngumuphi umehluko lomkhulu lokufanele ube khona emkhatsini webantfu labakhonta Jehova nalabo lanangamkhonti?

¹⁰ Esihlokweni lesendlulile sifundze ngaloko lokwenteka kuKhayini, Solomoni kanye nakuma-Israyeli. Bonkhe bebacabanga kutsi bakhonta Jehova kodvwa bebengakatinikeli kuye ngalokuphelele. Letibonelo tisifundzisa kutsi akukeneli nje kutsi sitsi sikhonta Jehova, kufanele sitondze lokubi sitsandze lokuhle. (Rom. 12:9) Jehova utsi kutawuba nemehluko lomkhulu “emkhatsini walabalungile nalababi, ngisho emkhatsini walabo labakhonta Nkulunkulu nalabo labangamkhonti.”​—Mal. 3:18.

11. Kungani kufanele labanye bavele batibonele kutsi sitinikele ngalokuphelele kuJehova?

¹¹ Simbonga kakhulu Jehova ngekusikhetsa kutsi sibe bantfu bakhe. Kufanele kubemelula kutsi bantfu babone kutsi singaseluhlangotsini lwakhe. (1 Thim. 4:15; Mat. 5:16) Tibute kutsi: ‘Labanye bayabona yini kutsi ngitinikele ngalokuphelele kuJehova? Ngiyawafuna yini ematfuba ekutjela bantfu kutsi nginguFakazi waJehova?’ Cabanga kutsi Jehova angeva buhlungu kangakanani nangabe sesaba kutjela labanye kutsi siboFakazi bakhe.​—Hla. 119:46; fundza Makho 8:38.

12, 13. Labanye bakwente njani kwaba matima kutsi bantfu babone kutsi baBoFakazi BaJehova?

 ¹² Lokubuhlungu kutsi labanye BoFakazi BaJehova ‘banemoya walelive.’ Loko kubenta bangehluki kubantfu labangamkhonti Jehova. (1 Khor. 2:12) Umoya walelive wenta bantfu banake tifiso tabo tebugovu. (Ef. 2:3) Nasi sibonelo, ngisho noma sitfola teluleko ngendlela lokufanele sigcoke ngayo, labanye bagcoka ngendlela lengakazitsi. Bagcoka timphahla letibampintjako naletiveta umtimba ngisho nasemibutsanweni yebuKhristu. Labanye benta titayela tasenhloko letingawafaneli emaKhristu. (1 Thim. 2:9, 10) Umphumela waloko kutsi nabanalabanye bantfu, kuba lukhuni kubona kutsi bakhonta Jehova yini noma ‘babangani balelive.’​—Jak. 4:4.

¹³ Kunalokunye lokwenta kube matima kwehlukanisa emaKhristu kubantfu belive. Nasi sibonelo, lamanye emaKhristu nakasemaphathini ajayiva aphindze atiphatse ngendlela lengakhombisi kutsi akhonta Jehova. Lamanye afaka titfombe tawo etinhlelweni tekuchumana aphindze asho tintfo letikhombisa kucabanga kwalelive. Kungenteka awazange atfole siyalo ebandleni ngekwenta sono lesimatima, kodvwa angabafundzisa umkhuba lomubi bazalwane nabodzadze labetama kwehluka eveni.​—Fundza 1 Phetro 2:11, 12.

14. Yini lokufanele siyente kuze sivikele buhlobo betfu naJehova?

¹⁴ Lelive likhutsata “sifiso senyama, sifiso semehlo kanye nekugabisa ngetintfo umuntfu lanato.” (1 Joh. 2:16) Ngesizatfu sekutsi sikhonta Jehova, sikhutsatwa kutsi “sikulahle kungamhloniphi Nkulunkulu netifiso talelive, kodvwa siphile ngengcondvo lebhadlile, ngekulunga, nangekwesaba Nkulunkulu kulelive.” (Thit. 2:12) Nasikhuluma, sidla, sinatsa, indlela lesigcoka ngayo nalesitilungisa ngayo emsebentini nako konkhe lesikwentako kufanele kukhombise  kutsi sitinikele ngalokuphelele kuJehova.​—Fundza 1 Khorinte 10:31, 32.

15. Kungani kufanele siphatse bazalwane ngemusa nangelutsandvo?

¹⁵ Indlela lesiphatsa ngayo emaKhristu lesikanye nawo ikhombisa kutsi siyambonga Jehova ngekusivumela kutsi sibe nebuhlobo lobuhle naye. Bazalwane betfu nabo babantfu baJehova. Nangabe sihlale sikukhumbula loko, sitawuhlale sibaphatsa ngemusa bazalwane nabodzadzewetfu futsi sibatsandza. (1 Thes. 5:15) Jesu watsi kubafundzi bakhe: “Nangabe nitsandzana, bonkhe batawukwati kutsi nibafundzi bami.”​—Joh. 13:35.

16. Umtsetfo waMosi usifundzisani mayelana nendlela Jehova labatsandza ngayo bantfu bakhe?

¹⁶ Sibonelo lesiseMtsetfweni waMosi singasisita sicondze kutsi kungani kufanele sibaphatse kahle bazalwane betfu. Ethempelini laJehova bekunetitja lebetisetjentiselwa kukhonta kweliciniso kuphela. UMtsetfo bewusho ngalokucacile kutsi ngemaLevi kuphela lobekufanele anakekele letitja. Noma ngubani lobekangalandzeli lomtsetfo bekufanele abulawe. (Num. 1:50, 51) Nangabe Jehova bekanendzaba ngekutsi bantfu baphatse kahle titja lebetisetjentiselwa kumkhonta, kakhulu kanganani-ke ngetinceku takhe letetsembekile. Usitjela indlela lesibaluleke ngayo kuye nakatsi: ‘Umuntfu lotsintsa nine utsintsa inhlavu yeliso lami.’​—Zak. 2:8.

17. Ngutiphi tintfo Jehova latinakako kubantfu bakhe?

¹⁷ Malakhi watsi Jehova ‘uyalalela futsi uyeva’ nangabe bantfu bakhe bakhulumisana. (Mal. 3:16) “Jehova uyabati labo lababakhe.” (2 Thim. 2:19) Ubona konkhe lesikwentako nalesikushoko. (Heb. 4:13) Jehova uyabona nangabe singabaphatsi ngemusa bazalwane nabodzadze. Nangabe sibanaka labanye, siphana, sicolela futsi sinemusa kulabanye bantfu, singaciniseka kutsi naloko Jehova uyakubona.​—Heb. 13:16; 1 Phet. 4:8, 9.

18. Singakhombisa njani kutsi siyabonga ngelilungelo lekuba BoFakazi BaJehova?

¹⁸ Asingabati kutsi sifuna kukhombisa Jehova kutsi siyambonga ngekusikhetsa kutsi sibe bofakazi bakhe. Siyati kutsi senta sincumo lesihlakaniphile nasinikela kuphila kwetfu kuJehova. Ngisho noma siphila “esitukulwaneni lesigwegwile nalesonakele,” sifuna bantfu babone kutsi ‘asisoleki futsi simsulwa, . . . sikhanya njengetibane eveni.’ (Fil. 2:15) Ngako sitimisele kungatenti tintfo Jehova latenyanyako. (Jak. 4:7) Siyabatsandza futsi siyabahlonipha bazalwane betfu ngobe siyati kutsi nabo babantfu baJehova.​—Rom. 12:10.

19. Ngumuphi umvuzo Jehova lawunika bantfu bakhe?

¹⁹ LiBhayibheli lisetsembisa kutsi: “Simakadze angeke asilahle sive sakhe.” (Hla. 94:14) Leso sicinisekiso lesingasetsemba. Noma kungentekani kitsi, Jehova utawuhlale anatsi. Ngisho nekufa ngeke kusehlukanise nelutsandvo lwaNkulunkulu. (Rom. 8:38, 39) “Nasiphila siphilela Jehova, nanasifa sifela Jehova. Ngako kutsi siyaphila nobe siyafa, sibaJehova.” (Rom. 14:8) Sisilindzele ngalabovu sikhatsi lapho khona Jehova atawuvusa bonkhe bangani bakhe labafa. (Mat. 22:32) Ngisho nanyalo sitfola tibusiso letinyenti. Njengobe liBhayibheli lisho, “sibusisiwe leso sive lesiNkulunkulu waso kunguSimakadze, sive latikhetsele sona kutsi sibe lifa lakhe.”​—Hla. 33:12.