“SAWUBONA, unjani?”

Asingabati kutsi uvame kusebentisa lamavi nawuvusela labanye. Kungenteka uyabachawula noma ubahage bantfu nawubavusela. Ngenca yemasiko nekwehluka kwelulwimi, bantfu bavuselana ngetindlela letehlukahlukene, noma kunjalo kubaluleke kakhulu kuvuselana. Ecinisweni kungabavuseli labanye noma kungavumi nabakuvusela kungakhombisa kutsi unelunya noma awuhloniphi.

Akusibo bonkhe bantfu labakutfola kulula kuvusela labanye. Labanye bayesaba kuvuselana ngoba banemahloni noma bayatikhobosa. Labanye bakutfola kumatima kuvusela bantfu besive lesihlukile, labanemasiko lehlukile noma labangalingani nabo. Noma kunjalo, kubingelela labanye kungaba nemiphumela lemihle.

Tibute: ‘Kusita ngani kubingelela labanye? LiVi laNkulunkulu lingifundzisani ngekubingelela labanye?’

Khoneliyuse waba ngumuntfu wekucala labengesuye umJuda lowaba ngumKhristu. Ngesikhatsi umphostoli Phetro amemukela, watsi: “Nkulunkulu akakhetsi.” (Imis. 10:34) Ngekuhamba kwesikhatsi, Phetro wabhala kutsi Nkulunkulu “ufisa kutsi bonkhe bantfu baphendvuke.” (2 Phet. 3:9) Kungenteka lamavi sivame kuwasho kumuntfu localako kufundza liBhayibheli. Kodvwa Phetro wayala emaKhristu watsi: “Hloniphani bantfu bato tonkhe tinhlobo, nitsandze bonkhe bazalwane.” (1 Phet. 2:17) Kungaba kahle kutsi sibavusele labanye ngisho noma ngabe basiphi sive, banemasiko lahlukene futsi bavela etindzaweni letehlukene. Loko kungakhombisa kutsi siyabahlonipha futsi siyabatsandza.

Umphostoli Pawula watsi: “Yemukelanani, njengobe nje naKhristu asemukela.” (Rom. 15:7) Pawula wabasho ngemagama bazalwane lababa “yindvudvuto lenkhulu” kuye. Bazalwane nabodzadze labanyenti lamuhla badzinga kukhutsatwa njengobe Sathane abahlasela kakhulu bantfu baNkulunkulu.​—Khol. 4:11; Semb. 12:12, 17.

Tibonelo letiseBhayibhelini tikhombisa kutsi kuvusela labanye kungabenta bative bemukelekile.

Nakufika sikhatsi sekutsi kuphila kweNdvodzana yaNkulunkulu kwendluliselwe esibeletfweni saMariya, Jehova watfumela ingilosi kutsi ikhulume naMariya. Lengilosi yatsi: “Sawubona wena lobusiseke kakhulu, Jehova unawe.” Mariya ‘wakhatsateka kakhulu’ ngobe bekangati kutsi kungani lengilosi ikhuluma naye. Nayibona kutsi ukhatsatekile, lengilosi yatsi: “Ungesabi Mariya, ngobe utfole umusa kuNkulunkulu.” Yamchazela kutsi kuyinjongo yaNkulunkulu kutsi atale Mesiya. Esikhundleni sekutsi ahlale akhatsatekile, Mariya watitfoba futsi waphendvula watsi: “Mine ngiyincekukati yaJehova! Shengatsi kungenteka njengobe ushito.”​—Luk. 1:26-38.

Kulengilosi bekulilungelo lelikhulu kuba sitfunywa saNkulunkulu, kodvwa ayizange ikubukele phasi kubingelela umuntfu lonesono. Yini lesingayifundza kulesibonelo? Kufanele sihlale sikulungele kubingelela labanye futsi sibakhutsate. Ngisho noma sisho emagama lambalwa, singakhona kusita labanye futsi sibacinisekise kutsi bayincenye lebalulekile yebantfu baJehova.

Emabandla lamanyenti ase-Asia Minor nase-Europe bekamati Pawula. Etincwadzini latibhala, banyenti bantfu lebekababita ngemagama nakababingelela. Loku sikubona kahle encwadzini yaRoma sehluko 16. Pawula wabingelela emaKhristu lamanyenti labenawo. Wabita Foyibe ngekutsi “dzadzewetfu”  futsi wancenga bazalwane kutsi ‘bamemukele eNkhosini ngendlela lefanele labangcwele, nekutsi bamnike nobe nguluphi lusito langahle aludzinge.’ Pawula waphindze wavusela boPhrisila na-Akhwila futsi watsi: “Akusimi ngedvwa lengibabongako kodvwa nawo onkhe emabandla ebetive ayababonga.” Waphindze wavusela nalabanye labafaka ekhatsi “Ephayinethosi lotsandzekako” kanye ‘naboTrayifina naTrayifosa, bafati labasebenta ngekutimisela eNkhosini.’ Pawula bekakutsandza kuvusela bazalwane nabodzadze.​—Rom. 16:1-16.

Cabanga ngekutsi labazalwane bajabula kangakanani ngekutsi bebakhunjulwa. Loko kwabenta batsandzana kakhulu futsi bamtsandza kakhulu umphostoli Pawula. Siyaciniseka kutsi lamaKhristu akhutsateka kakhulu ngesikhatsi Pawula awavusela futsi loko kwawasita kutsi acinise kukholwa kwawo. Ecinisweni kukhombisa labanye kutsi siyabakhatsalela nasibabingelela, kungacinisa bungani betfu futsi kusente sibe nebunye njengobe sikhonta Jehova.

Ngesikhatsi Pawula afika ePhutheyoli futsi aya eRoma, bazalwane labavela eningizimu beta batomhlangabeta. Nakababona, Pawula “wabonga Nkulunkulu, wase uba nesibindzi.” (Imis. 28:13-15) Ngaletinye tikhatsi singagcina nje ngekumoyitela noma kuphakamisa sandla. Noma kunjalo, loko kungamakha umuntu lokungenteka udvumatekile noma lova buhlungu.

Umfundzi Jakobe bekufanele anikete seluleko lesicinile. Lamanye emaKhristu besekufana nekutsi atiphingi ngobe bekatenta bangani balelive abe akhonta Nkulunkulu. (Jak. 4:4) Naka setfulo sencwadzi yemfundzi Jakobe:

“Mine Jakobe, sigcili saNkulunkulu neseNkhosi Jesu Khristu, ngibhalela tive letilishumi nakubili letisakatekile: Ngiyanibingelela!” (Jak. 1:1) Lamavi enta lamaKhristu abona kutsi Jakobe unekukholwa lokufana nekwawo futsi akungabateki kutsi loko kwawenta asemukela kalula leseluleko. Kuliciniso kutsi kumvusela kahle umuntfu kungenta kutsi nikhone kucoca ngetindzaba letibalulekile.

Indlela lesibavusela ngayo labanye kufanele ikhombise kutsi sibatsandza mbamba futsi asitentisi. Loko kufanele sikwente ngisho noma kubonakala ngatsi labanye abasinaki. (Mat. 22:39) Lomunye dzadze wase-Ireland wefika eHholweni leMbuso ngaphambi nje kwekutsi kucale umhlangano. Njengoba bekajake kuyofuna indzawo yekuhlala, lomunye umzalwane wamoyitela futsi wamvusela watsi: “Unjani? Ngiyajabula kukubona.” Lodzadze wavele wahlala phasi.

Ngemuva kwemaviki lambalwa lodzadze waya kulomzalwane wafike wamtjela kutsi abebhekene nesimo lesicindzetelako ekhaya. Watsi: “Bengikwate kakhulu ngalelolanga, kangangekutsi ngacishe ngangeti emhlanganweni. Lokunyenti lebekucocwa ngako angisakukhumbuli, kepha ngisayikhumbula indlela lowangibingelela ngayo. Yangenta ngativa ngemukelekile. Ngiyabonga.”

Lomzalwane bekangati kutsi indlela lamvusela ngayo lodzadze yamtsintsa kakhulu. Utsi: “Ngesikhatsi angitjela kutsi indlela lengamvusela ngayo yamtsintsa kakhulu, ngajabula kutsi ngakhona kumvusela.”

Solomoni watsi: “Jika sinkhwa sakho emantini, ngobe utawuphindze usitfole emvakwemalanga lamanyenti.” (Shu. 11:1) Nasibingelela labanye ngemusa ikakhulukati emaKhristu lesikanye nawo, sisuke siwakhutsata futsi natsi siyakhutsateka. Ngako kufanele singawubukeli phasi umphumela wekuvusela labanye.