Ecinisweni lamuhla kute umuntfu longaciniseka kutsi Pawula abebukeka njani. Titfombe kanye nemidvwebo lesetincwadzini tetfu imane nje imifanekiso, akusito titfombe letisekelwe emacinisweni lavetwa locwaningo lolwentiwe bantfu.

Noma kunjalo, kukhona lokukhombisa kutsi umphostoli Pawula abebukeka njani. Nasi sibonelo, i-Zion’s Watch Tower yanga-March 1, 1902 yatsi: “Mayelana nendlela Pawula bekabukeka ngayo: . . . Incwadzi letsi ‘Acts of Paul and Thecla ,’ . . . leyabhalwa cishe nga-150 A. D, yachaza kutsi Pawula abenjani. Kungenteka ngiyo lemchaza kahle ngekuvumelana naloko bantfu bebasolo bakukholelwa. Yatsi: ‘Abencama, anemphandla, anetigwece, eme kahle, anemashiya lamakhulu futsi anelikhala lelidze.’”

Mayelana nemidvwebo yasendvulo incwadzi letsi “The Oxford Dictionary of the Christian Church” (yanga-1997) yatsi: “Kungenteka incwadzi letsi ‘Acts’ ikhulume intfo lengafakazelani nemlandvo.” Lencwadzi letsi “The Acts of Paul and Thecla” beyetsenjwa kakhulu ngelikhulu lekucala ngobe imiBhalo yesandla yesiGriki lengu-80 beyisekhona futsi beyitfolakala nangaletinye tilwimi. Ngako imidvwebo lesetincwadzini tetfu ivumelana nendlela umphostoli Pawula bekachazwa ngayo etincwadzini tasendvulo.

Noma kunjalo, kufanele sikhumbule kutsi kunaletinye tintfo letibaluleke kakhulu kwendlula indlela Pawula labebukeka ngayo. Ngisho nangesikhatsi Pawula enta umsebenti wakhe labanye bantfu labaphikisako bebatsi “nakakhona uyedzeleleka kantsi nenkhulumo yakhe ayinasisindvo.” (2 Khor. 10:10) Kodvwa kufanele sikhumbule kutsi waba ngumKhristu ngemuva kwekutsi Jesu abonakale kuye ngalokusimangaliso. Singacabanga nangaloko Pawula lakwenta njengobe ‘abesitja [saKhristu] lesikhetsiwe, kute amemetele libito [laJesu] kubetive.’ (Imis. 9:3-5, 15; 22:6-8) Cabanga nangekutsi kunyenti kanganani lesikuzuza etincwadzini teliBhayibheli Jehova laphefumulela Pawula kutsi atibhale.

Pawula akazange atikhukhumete ngaloko labekwentile ngaphambi kwekutsi abe ngumKhristu, futsi akazange achaze indlela labebukeka ngayo. (Imis. 26:4, 5; Fil. 3:4-6) Watsi: “Ngingulomncane kubaphostoli, futsi akungifaneli kubitwa ngekutsi ngingumphostoli.” (1 Khor. 15:9) Ngekuhamba kwesikhatsi watsi: “Mine njengalomncane kwendlula lophansi kunabo bonkhe labangcwele, ngaboniswa lomusa waNkulunkulu kuze ngimemetele etiveni tindzaba letimnandzi letimayelana nemcebo waKhristu longaphenyeki.” (Ef. 3:8) Lomlayeto ubaluleke kakhulu kwendlula kukhatsateka ngendlela Pawula labebukeka ngayo.