1. Ngutiphi timo emaKhristu angelikhulu lekucala labhekana nato?

NGEMNYAKA wa-62 kuya ku-64 C.E., umphostoli Phetro wabhalalela “labo labahleti kwesikhashana eveni, labasakatekele ePhontusi, eGalathiya, eKhaphadosiya, e-Asiya, kanye naseBhithiniya.” (1 Phet. 1:1) Bazalwane labavela emabandleni lehlukahlukene ase-Asia Minor bebadzinga sikhutsato nesicondziso. Bebaphikiswa, betfukwa futsi babhekana ‘netilingo letimatima.’ Bebaphila esikhatsini lesimatima. Phetro watsi: “Kuphela kwato tonkhe tintfo sekusondzele.” IJerusalema beyitawubhujiswa kungakapheli iminyaka lelishumi. Yini lebeyitawusita emaKhristu akhone kubhekana naletimo leticindzetelako?​—1 Phet. 4:4, 7, 12.

2, 3. Kungani Phetro akhutsata bazalwane bakhe kutsi banakekelane? (Buka sitfombe lesisekucaleni kwalesihloko.)

² Phetro wakhutsata emaKhristu labekanye nawo kutsi: ‘Anakekelane.’ (1 Phet. 4:9) Ligama lelitsi “nakekela” ngesiGriki lisho kutsi “sikhombise lutsandvo nemusa bantfu lesingabati.” Naka kutsi Phetro wakhutsata bazalwane nabodzadze labangemaKhristu kutsi ‘banakekele’ lababatiko nalabatihlanganisa nabo. Kunakekelana bekutabasita njani?

³ Bekutabenta babe nebunye. Cabanga ngalokwenteka kuwe. Uke walijabulela yini lilungelo lekumenywa ngulotsite ekhaya  lakhe? Kuliciniso kutsi wajabula futsi uhlale usikhumbula leso sikhatsi. Bungani benu abuzange bucine yini ngesikhatsi umeme labatsite ebandleni lokulo? Kumemela bazalwane nabodzadze emakhaya etfu futsi sibanakekele, kusenta satane kancono kunendlela lebesingabati ngayo kuletinye tindzawo. EmaKhristu angesikhatsi saPhetro bekudzingeka asondzelane kakhulu njengobe timo betiya tiba timbi. Kungulokufanako nakumaKhristu laphila ‘kulamalanga ekugcina.’​—2 Thim. 3:1.

4. Ngumiphi imibuto lesitawucoca ngayo kulesihloko?

⁴ Ngumaphi ematfuba lesinawo ekukhombisa kutsi ‘siyanakekelana’? Singatincoba kanjani timo letingasenta singakhoni kwemukela tivakashi? Yini lengasisita sibe tivakashi letikahle?

5. Singakhombisa kanjani kutsi siyanakekelana nasisemihlanganweni yebuKhristu?

⁵ Nasisemihlanganweni: Sifuna kwemukela tonkhe tivakashi letita emihlanganweni yetfu yebuKhristu kuze titofundza ngaNkulunkulu. Sisuke simenywe nguJehova kanye nenhlangano yakhe emihlanganweni. (Rom. 15:7) Nangabe kukhona labacalako kuta emihlanganweni yetfu, basuke bativakashi tetfu. Ngako kufanele sitsatse sinyatselo kucala sibemukele kungakhatsaliseki kutsi bagcoke njani. (Jak. 2:1-4) Nangabe umuntfu lovakashile abonakala angakanakwa kungaba kuhle kutsi uhlale naye. Angakujabulela kutsi umsite njengobe imihlangano ichubeka futsi akhone kutfola imiBhalo lefundvwako. Leyo yindlela lekahle ‘yekwemukela tivakashi.’​—Rom. 12:13.

6. Bobani lokufanele sibameme emakhaya etfu?

⁶ Nasidla ndzawonye: Ngetikhatsi tekubhalwa kweliBhayibheli, kwemukela tivakashi bekuhlanganisa kumema lotsite ekhaya lakho kuze nidle ndzawonye. (Gen. 18:1-8; Khu. 13:15; Luk. 24:28-30) Nangabe umema lotsite kutsi atodla nawe usuke uvula ematfuba ekwakha bungani kanye nekuthula. Bobani lokufanele sibameme emakhaya etfu? Kufanele kube bazalwane nabodzadze basebandleni ngoba babaluleke kakhulu ekuphileni kwetfu. Nakufika tikhatsi letimatima siyabadzinga bazalwane betfu. Ngako kufanele sibe nebungani nekuthula nabo bonkhe. Kuyajabulisa kutsi nga-2011, Sigungu Lesibusako sasishintja sikhatsi lokuchutjwa ngaso Sifundvo seSicongosekulindza eBethel yaseMelika sasuka ku-6:45 saya ku-6:15 ntsambama. Leni? Loko bekutawuniketa emalunga emndeni waseBethel litfuba lekwemukela tivakashi njengobe lomhlangano besewutawusheshe uphume. Nalamanye emahhovisi eligatja enta lokufananako. Loko kunikete emalunga emndeni waseBethel litfuba lelihle lekwatana kancono.

7, 8. Singakhombisa njani kutsi siyabemukela bameleli benhlangano yaJehova nabasivakashele?

⁷ Kuvakasha kwetikhulumi letivela kulamanye emabandla, babonisi besigodzi kanye nebazalwane labamelele lihhovisi leligatja kusiniketa litfuba lelikahle lekwemukela tivakashi. (Fundza 3 Johane 5-8.) Kudla nabo kuyindlela lekahle yekukhombisa kutsi siyabemukela.

⁸ Lomunye dzadze waseMelika utsi: “Sekuphele iminyaka leminyenti mine nemyeni wami simema tikhulumi kanye nebafati bato ekhaya letfu. Besihlale sijabula futsi lokubaluleke kakhulu kutsi loko bekucinisa kukholwa kwetfu. Asitisoli ngekubamema.”

9, 10. (a) Bobani labangadzinga indzawo yekuhlala sikhatsi lesidze? (b) Labo labete tindlu letinkhulu bangatemukela yini tivakashi? Shano sibonelo.

⁹ Tivakashi letihlala sikhatsi lesidze: Endvulo, kunakekela tivakashi bekufaka  ekhatsi kutilungisela indzawo yekuhlala. (Jobe 31:32; Flm. 22) Nasesikhatsini salamuhla kunesidzingo sekwenta kanjalo. Babonisi betigodzi badzinga indzawo yekuhlala nabavakashele emabandla. Bafundzi labaya etikolweni tebuKhristu kanye nemavolontiya ekwakha badzinga indzawo yekuhlala. Tinhlekelele temvelo tingabangela kutsi labanye balahlekelwe ngemakhaya abo futsi badzinge indzawo yekuhlala kuze kube ngulapho basitwa ngekulungiselwa emakhaya abo. Akukafanele sicabange kutsi ngulabo labanemakhaya lakahle kuphela labangakhona kusita, ngobe kungenteka sebasite tikhatsi letinyenti. Ungakhona yini kulungisela labanye indzawo yekuhlala ngisho noma ute indlu lenkhulu?

¹⁰ Lomunye umzalwane waseSouth Korea ukhumbula ngesikhatsi emukele bafundzi labebete etikolweni tebuKhristu. Utsi: “Ngacale ngangabata ngobe besisandza kushada futsi indlu lebesihlala kuyo beyiyincane. Kodvwa kuhlala nalabafundzi bekumnandzi futsi sakujabulela kakhulu. Njengobe besisandza kushada sabona kutsi umndeni ungajabula kakhulu nangabe ukhonta Jehova futsi ulwela kufinyelela imigomo yekukhonta Nkulunkulu ndzawonye.”

11. Kungani labasandza kufika ebandleni badzinga kunakekelwa?

¹¹ Labasandza kufika ebandleni: Bazalwane labatsite noma umndeni ungatfutsela endzaweni yakini. Labanye bangaya kuyokhonta lapho kunesidzingo lesikhulu khona. Emahlahlandlela angatfunyelwa kutsi ayosita ebandleni lokulo. Bonkhe kungadzingeka betayelane nendzawo lensha, libandla lelisha, noma mhlawumbe nelulwimi lolusha nemasiko. Kubamema kutsi batokudla nawe noma bavakashe nawe kutabasita kutsi bakhe bangani labasha futsi betayelane netimo taleyo ndzawo.

12. Yini leyenteka lekhombisa kutsi akudzingeki tintfo letinyenti kuze wemukele tivakashi?

¹² Akudzingeki kutsi ube netintfo letinyenti kuze wemukele tivakashi. (Fundza Lukha 10:41, 42.) Nakakhumbula emalanga lacala ngawo kuba sitfunywa selivangeli, lomunye umzalwane utsi: “Besisandza kushada, singati lutfo futsi sikhumbula nasekhaya. Ngalenye intsambama umkami bekakhumbule kakhulu ekhaya futsi imetamo yami yekumsita ayizange iphumelele. Nga-7:30 ntsambama, kwanconcotsa umuntfu emnyango. Bekungumfundzi weliBhayibheli futsi abesiphatsele ema-orintji lamatsatfu. Bekete kutowemukela titfunywa telivangeli letisandza kufika. Samngenisa futsi samupha emanti ekunatsa. Sabese simentela litiya. Besisengakakwati kukhuluma siSwahili futsi naye bekangasati siNgisi. Loko kwasisita sacala kwakha bangani nebazalwane basebandleni lesikulo.”

13. Ngutiphi tinzuzo lesitatitfola nasemukela tivakashi?

¹³ Uke wangabata yini kwemukela tivakashi? Nangabe kunjalo, kungenteka walahlekelwa litfuba lekujabulela kuba nebantfu nekwakha bungani lobuhlala njalo. Kwemukela tivakashi kuyindlela lekahle yekucedza situnge. Kodvwa ungatibuta kutsi: ‘Kungani bantfu besaba kwemukela tivakashi?’ Loko kungabangelwa tizatfu letinyenti.

14. Yini lokufanele siyente nangabe kuba bete sikhatsi nemandla kusenta singatemukeli tivakashi?

¹⁴ Kusebentisa sikhatsi kanye nemandla etfu: Tinceku taJehova tihlala timatasa futsi kunemisebenti leminyenti lokufanele tiyente. Labanye bangacabanga kutsi bete sikhatsi kanye nemandla ekwemukela tivakashi. Nangabe utiva kanjalo, kufanele uhlole luhlelo lwetintfo lotentako. Kukhona  yini lushintjo longalwenta kuze ube nesikhatsi nemandla ekwemukela tivakashi? ImiBhalo ikhutsata emaKhristu kutsi emukele tivakashi. (Heb. 13:2) Kuhle kutinika sikhatsi sekwemukela tivakashi futsi kuyintfo lokufanele siyente. Ngaletinye tikhatsi kutawudzingeka unciphise sikhatsi losicitsa wenta letinye tintfo.

15. Ngukuphi kukhatsateka labanye labangaba nako ngekwemukela tivakashi?

¹⁵ Indlela lotiva ngayo: Uke wafisa yini kwemukela tivakashi kepha wangakhululeki? Labanye banemahloni futsi bayesaba ngoba bacabanga kutsi ngeke babe netincociswano letimnadzi nekutsi kungenteka bangakhoni kujabulisa letivakashi. Labanye bete imali lenyenti futsi bacabanga kutsi ngeke bakhone kujabulisa tivakashi njengoba kwenta labanye ebandleni. Khumbula kutsi lokubaluleke kakhulu kutsi ube nebungani futsi likhaya lakho lihlobe liphindze lihleleke.

16, 17. Yini lengasenta sincobe kwesaba kumema tivakashi?

¹⁶ Nangabe ukhatsateka ngekwemukela tivakashi, akusiwe wedvwa lotiva ngaleyondlela. Lomunye lomdzala waseBritain utsi: “Kunyenti kukhatsateka lokungaba khona nawulungiselela tivakashi. Kodvwa njengakuyo yonkhe imisebenti lesiyenta ekukhonteni Jehova, tinzuzo kanye nekwenetiseka lesikutfolako kuba kunyenti kunekukhatsateka lesiba nako. Ngijabulele kuhlala phasi netivakashi sinatse litiya futsi sicoce.” Khumbula kutsi kuhlale kuyintfo lenhle kunaka tivakashi. (Fil. 2:4) Cishe bonke bantfu bayakujabulela kucoca ngalokwenteke ekuphileni kwabo. Imibutsano yekutijabulisa ingaba kuphela kwelitfuba lelikahle lekubuta labanye ngetintfo letenteke kubo. Lomunye umzalwane longulomdzala utsi: “Kumema bazalwane labasebandleni kutsi bete ekhaya lami kungisitile kutsi ngibacondze futsi ngibati kahle kanye nendlela labalitfola ngayo liciniso.” Kukhombisa lutsandvo kungenta noma ngumuphi umbutsano ujabulise.

¹⁷ Lomunye dzadze lolihlahlandlela lowamema bafundzi labebaye etikolweni tebuKhristu watsi: “Ekucaleni bengesaba kubamema ngoba likhaya lami liphasi futsi netimphahla atisito letinsha. Lomunye umfati wemzalwane lobekafundzisa kuletikolwa wangenta ngakhululeka. Watsi nabenta umsebenti wekujikeleta, yena nemyeni wakhe bakujabulela kakhulu kuhlala nemuntfu lote tintfo letinyenti kepha lonebuhlobo lobuhle naNkulunkulu futsi lonemgomo nabo labanawo wekukhonta Nkulunkulu nekwenta kuphila kwabo kube lula. Loku kwangikhumbuta loko bekuvame kushiwo ngumake ngesikhatsi sisebancane: ‘Kuncono kudla umbhidvo ngekuvana.’” (Taga 15:17) Lutsandvo lutasenta simeme labanye futsi ngeke sikhatsateke.

18, 19. Kwemukela tivakashi kungasisita njani sincobe imiva lekabi ngalabanye bantfu?

¹⁸ Indlela lotiva ngayo ngalabanye: Ukhona yini lotsite ebandleni lokulo lokuphatsa kabi? Lomuntfu loyo ungahlale umzonda nangabe kute lokwentako kuze ulungise lesimo. Kuba nebuntfu lobungafani kungenta kutsi kube matima kwemukela tivakashi. Noma mhlawumbe lotsite wakuphatsa kabi esikhatsini lesendlulile futsi ukutfola kumatima kukwendlulisa.

¹⁹ LiBhayibheli lisikhutsata kutsi semukele tivakashi kuze sibe nebuhlobo lobuhle nalabanye bantfu lokufaka ekhatsi netitsa tetfu. (Fundza Taga 25:21, 22.) Kumema lotsite kuyakucedza kungevani nenzondo. Kungasenta sibone buntfu lobuhle bemuntfu lesimmemile kanye netintfo Jehova latibona kuye nakamdvonsela ecinisweni. (Joh. 6:44) Nangabe lutsandvo lukwenta umeme lotsite ningaba bangani. Yini lengakwenta uciniseke kutsi lutsandvo lolukwenta umeme labanye? Lenye indlela yekwenta loko kutsi  ulalele sikhutsato lesikuFiliphi 2:3 lesitsi: “Ngekutfobeka nitsatse labanye njengalabakhulu kunani.” Kufuna tintfo letenta bazalwane betfu nabodzadze babebakhulu kunatsi, kungaba kukholwa kwabo, kubeketela, sibindzi kanye nalobunye buntfu bebuKhristu kungasenta sibatsandze nakakhulu futsi sibameme.

20. Kungani kufanele sisihloniphe simemo lesisemukele futsi singakwenta njani loko?

²⁰ Umhlabeleli Davide wabuta kutsi: “Simakadze! Ngubani longaba nemvume yekungenisa ahlale ethempelini lakho?” (Hla. 15:1) Ngemuva kwekubuta lombuto wabese uchaza buntfu Nkulunkulu lafuna timenywa takhe tibe nabo. Lokunye kwako kukhuluma liciniso. Umuntfu losimenywa saNkulunkulu “wenta sifungo, asigcine, nome sekumatima.” (Hla. 15:4) Nangabe sisemukele simemo akukafaneli bese asisayi ngephandle kwesizatfu. Kungenteka lona losimemile usebente kamatima kuze ente emalungiselelo futsi yonkhe imetamo yakhe ingaba lite nangabe singasayi. (Mat. 5:37) Ngaletinye tikhatsi labanye abayi lapho bebamenywe khona ngenca yekutsi sebatfole lesinye simemo lababona ngatsi sincono. Loko akukhombisi lutsandvo kanye nenhlonipho. Kufanele sikhombise kutsi sibonga ngalokusuka enhlitiyweni ngalesikwentelwa ngulabasimemile. (Luk. 10:7) Nangabe timo letingetulu kwemandla tisiphocelela kutsi singasayi, sitabe sibakhombisa kutsi siyabatsandza futsi siyabacabangela labasimemile nangabe sibatjela kusenesikhatsi.

21. Kuhlonipha emasiko endzawo kungasenta njani sibe tivakashi letikahle?

²¹ Kubalulekile nekutsi siwahloniphe emasiko endzawo. Kuletinye tindzawo bayatemukela tivakashi letifike tingakalindzelwa kantsi kuletinye kuba kahle kutsi kwentiwe emalungiselelo kusenesikhatsi. Kulamanye emave usuke ukhombisa kutsi uyatihlonipha tivakashi nawutinika lokuncono kakhulu kunalokutfolwa ngumndeni wakho kani kulamanye bonkhe batfola lokufanako. Kuletinye tindzawo tivakashi tiphatsa lokutsite natiya lapho timenywe khona kantsi kuletinye laba lababamemile bayajabula nangabe tivakashi tabo tingakwenti loko. Kulamanye emasiko kuyintfo lelindzelekile kutsi bantfu bangasemukeli simemo sekucala noma sesibili kepha kulamanye kungasemukeli simemo kukhombisa kutsi ungumuntfu longabongi. Kufanele sente konkhe lesingakwenta kuze sente bantfu labasimemile bajabule.

22. Kubaluleke ngani kutsi ‘sinakekelane’?

²² “Kuphela kwato tonkhe tintfo sekusondzele” kakhulu kunasesikhatsini lesendlulile. (1 Phet. 4:7) Sibhekana nekuhlupheka lokukhulu lokungazange sekube khona emhlabeni. Njengoba tinkinga tandza kufanele sibatsandze kakhulu bazalwane betfu. Seluleko Phetro lasibhalela emaKhristu lesitsi: “Nibonakekelana” sisebenta kakhulu esikhatsini setfu futsi sitawusebenta kuze kube phakadze.​—1 Phet. 4:9.