JESU watjela balandzeli bakhe kutsi emalangeni ekugcina bebatawujabulela umsebenti lomkhulu wekuvuna. (Mat. 9:37; 24:14) Naka kutsi lamavi agcwaliseka ngalokukhetsekile endzaweni yaseTranscarpathia, lese-Ukraine. Emadolobheni lamatsatfu lakhona kulendzawo kunemabandla langu-50 lanebamemeteli labangu-5 400. * Umuntfu munye kulabangu-4 kulamadolobha unguFakazi waJehova!

Lensimu inebantfu labanjani? Vasile longumzalwane wakulendzawo utsi: “Bantfu balapha bayalihlonipha liBhayibheli, balungile, imindeni yabo inebunye, futsi bayasitana. Ngalesinye sikhatsi abavumelani netinkholelo tetfu. Kodvwa bayalalelisisa nawubakhombisa lokushiwo liBhayibheli.”

Kuliciniso kutsi bazalwane nabodzadze babhekana nebumatima nabashumayela etindzaweni lapho khona bamemeteli babanyenti kunelinani lebantfu labakhona kuleyo ndzawo. Nasi sibonelo, kulelinye libandla kunebamemeteli labangu-134, kantsi kunemiti lengu-50 kuphela lokufanele bashumayele kuyo. Yini lesita labamemeteli kulesimo?

Bazalwane nabodzadze labanyenti bayatikhandla kuze bashumayele etindzaweni letinesidzingo lesikhulu. Umzalwane Ionash loneminyaka lengu-90 utsi: “Ummemeteli munye kufanele ashumayele emakhaya lamabili ensimini yelibandla letfu. Bengihamba emakhilomitha langu-160 nangiya ensimini lengasetjentwa njalo futsi ngishumayela ngelulwimi lwesiHungary. Kodvwa ngenca yetinkinga temphilo, nyalo sengishumayela dvutane. Bamemeteli bayatikhandla kute bashumayele emasimini langasetjentwa njalo. Nangiyogibela sitimela, bengivuka nga-4 ekuseni futsi bengishumayela kuze kushaye 6 ntsambama, ngiphindze ngibuye ngaso. Bengiya kabili noma katsatfu ngeliviki.” Abetiva njani ngemetamo labeyenta? Utsi: “Ngangikujabulela kakhulu. Ngajabula kutsi ngakhona kusita lomunye umndeni kutsi ufundze liciniso.”

Kuliciniso kutsi akusibo bonkhe kulamabandla lakulendzawo labakhona kuhamba emabanga lamadze. Kodvwa bonkhe, ngisho nebamemeteli lasebakhulile bayatimisela kuyihlanganisa yonkhe insimu yelibandla. Umphumela waba kutsi nga-2017 bantfu lababakhona eSikhumbutweni kuwo omatsatfu lamadolobha, bebaphindza kabili linani lebamemeteli, noma bebayihhafu yelinani labo bonkhe bantfu bakulendzawo. Kuliciniso kutsi noma ngukuphi lapho singashumayela khona, kuhlale ‘kunalokunyenti kwekukwenta emsebentini weNkhosi.’​—1 Khor. 15:58.