1. Kuhlabela kusisita kutsi sikhone kwentani?

LOMUNYE umbhali wetingoma lodvumile watsi: “Emagama akwenta ucabange. Umculo ukwenta ube nemiva letsite. Kodvwa ingoma ikwenta ucabange uphindze ube nemiva letsite.” Ngumiphi imiva lencono lesingaba nayo kwendlula indlela lesitiva ngayo nasihlabela tingoma letidvumisa Jehova naletikhombisa kutsi siyamtsandza Babe wetfu losezulwini? Asingabati kutsi kuhlabela kumcoka kakhulu ekukhonteni lokuhlantekile, ngisho noma uhlabela wedvwa noma unelibandla lebantfu baNkulunkulu.

2, 3. (a) Labanye bangativa njani ngekuhlabela ngalokuvakalako ebandleni? (b) Ngumiphi imibuto lesitawucoca ngayo?

² Wena utiva njani ngekuhlabela ngalokuvakalako ebandleni? Ukutfola kulihlazo yini? Kulamanye emasiko, emadvodza ayesaba kuhlabela embikwebantfu. Loko kungalitsintsa lonkhe libandla ikakhulukati nangabe labo labaholako bangahlabeli noma bente leminye imisebenti ngesikhatsi labanye bahlabela.​—Hla. 30:12.

³ Nangabe sitsatsa kuhlabela njengencenye lebalulekile yekukhonta kwetfu Nkulunkulu, angeke siphume nakusahlatjelwa noma sente leminye imisebenti. Ngako ngamunye wetfu kufanele atibute kutsi: ‘Ngikutsatsa njengalokubalulekile yini kuhlabela  emihlanganweni yebuKhristu? Yini lengangisita kutsi ngincobe kwesaba lenginako lokungangenta ngingahlabeli ngenjabulo? Yini lengingayenta kute ngikhombise indlela lengitiva ngayo ngetingoma lesitihlabelako?’

4, 5. Ema-Israyeli abenamaphi emalungiselelo ekuhlabelela Jehova?

⁴ Sekuphele sikhatsi lesidze tikhonti taJehova letetsembekile tisebentisa umculo kute tidvumise Jehova. Kuyaphawuleka kutsi ngesikhatsi ema-Israyeli asendvulo akhonta Jehova ngekwetsembeka, kuhlabela bekuyincenye lebaluleke kakhulu yekukhonta kwawo Nkulunkulu. Nasi sibonelo, ngesikhatsi kulungiselelwa kukhonta ethempelini, iNkhosi Davide yahlela kutsi emaLevi langu-4,000 advumise Jehova ngemculo. Labangu-288 babo ‘bebafundzisiwe baceceshelwa umculo waSimakadze.’​—1 Khr. 23:5; 25:7.

⁵ Ngesikhatsi kuniketelwa lithempeli, umculo kanye nekuhlabela kwabanendzima lebalulekile. Kulandzisa kusitjela kutsi: “Labashayi bemacilongo nalabahlabeli bahlangana bahlabela kanyekanye, kwaze kwaba shangatsi liphimbo linye, banika Simakadze ludvumo netibongo. Baphakamisa emaphimbo abo babonga Simakadze bashaya emacilongo, nemasimbali naletinye nje tingubhu, . . . ngobe inkhatimulo yaSimakadze yagcwalisa lithempeli laNkulunkulu.” Loko kwakucinisa kakhulu kukholwa kwabo.​—2 Khr. 5:13, 14; 7:6.

6. Chaza indlela bantfu labahlabela ngayo nakuniketelwa takhiwo eJerusalema ngesikhatsi kubusa Nehemiya.

⁶ Ngesikhatsi Nehemiya ahola ema-Israyeli letsembekile ekwakheni lubondza lwaseJerusalema, wahlela kutsi emaLevi ahlabele aphindze asebentise tinsimbi temculo. Ngesikhatsi kuniketelwa lubondza, lomculo lokhetsekile wenta lomkhosi waba mnandzi kakhulu. ‘Besekunemakwaya lamabili labehlabela.’ Lamakwaya ahamba ngekuphambana lenye ngesencele, lenye ngesekudla, ahlangana elubondzeni lolusedvutane nelithempeli futsi enta umsindvo lowawungevakala khashane kakhulu. (Neh. 12:27, 28, 31, 38, 40, 43) Asingabati kutsi Jehova wajabula kakhulu nakeva tinceku takhe tihlabela ngemfutfo lomkhulu kute timdvumise.

7. Yini Jesu layenta kuze agcizelele kubaluleka kwekuhlabela ekukhonteni kwebuKhristu?

⁷ Kusukela ngesikhatsi kusungulwa libandla lebuKhristu umculo uchubeke waba yincenye lebalulekile ekukhonteni kweliciniso. Ngebusuku lobubalulekile Jesu lacalisa ngabo umkhosi weSidlo SeNkhosi SakuSihlwa, wahlela kutsi kuhlatjelwe tingoma.​—Fundza Matewu 26:30.

8. EmaKhristu angelikhulu lekucala asibekela njani sibonelo sekuhlabela nasikhonta Nkulunkulu?

⁸ EmaKhristu angelikhulu lekucala enta luhlelo lwekudvumisa Jehova ngengoma ndzawonye. Ngisho noma abevamise kuhlangana emakhaya ebazalwane, loko bekungawenti anciphise umfutfo labenawo nawahlabelela Jehova. Umphostoli Pawula watjela emaKhristu kutsi: “Chubekani nifundzisana futsi nikhutsatana ngetihlabelelo, ngetingoma tekudvumisa, ngekuhlabela tingoma tekukhonta Nkulunkulu ngekubonga, nangekuhlabelela Jehova etinhlitiyweni tenu.” (Khol. 3:16) Tingoma letiseculweni letfu ‘lokutingoma tekudvumisa, kufanele sitihlabele ngekubonga.’ Tiyincenye yekudla lesikulungiselwa “sisebenti lesetsembekile nalesihlakaniphile.”​—Mat. 24:45.

9. (a) Yini lengavimba labanye kutsi bahlabele ngenjabulo emihlanganweni yelibandla kanye nasemihlanganweni lemikhulu? (b) Kufanele sihlabele njani nasidvumisa Jehova, futsi bobani lokufanele bahole? (Buka sitfombe lesisekucaleni kwalesihloko.)

⁹ Kutsiwani nangabe kuhlabela kungakavami emndenini wakho, esikweni lakho noma endzaweni lohlala kuyo? Ngesizatfu setebuchwepheshe lesetandzile ungakujabulela kulalela bahlabeleli labadvumile. Kodvwa ungativa unemahloni noma uhlazeka nawucatsanisa livi lakho nelebahlabeleli labadvumile. Loko akukafaneli kukudvumate bese uyekela kudvumisa Jehova ngekuhlabela. Kunaloko kufanele ulibambe kahle liculo lakho, uphakamise inhloko bese uhlabela ngalokusuka enhlitiyweni. (Ezra 3:11; fundza Tihlabelelo 147:1.) Lamuhla emaHholweni eMbuso lamanyenti nakuhlatjelwa emagama engoma avela ku-TV kute sikhone kuhlabela kahle. Kuyajabulisa nekutsi kuhlabela tingoma teMbuso kwentiwe kwaba yincenye yeSikolwa Semsebenti WeMbuso. Loku kugcizelela sidzingo sekutsi labadzala bahambe embili nakuhlabela libandla.

10. Yini lokufanele siyikhumbule nangabe kwesaba kusenta siyekele kuhlabela ngalokuvakalako?

¹⁰ Kwesaba kungulenye yetintfo letenta bantfu bangahlabeli ngelivi lelivakalako. Kungaba kwesaba kwehluka noma kubhimba. Noma kunjalo, kufanele sihlale sikhumbula kutsi nasikhuluma “siyona tikhatsi letinyenti.” (Jak. 3:2) Kepha loko akusenti siyekele kukhuluma. Ngako akukafanele sivumele emavi etfu langakapheleli asiyekelise kudvumisa Jehova ngekuhlabela.

11, 12. Ngumaphi emasikiselo langasisita sitfutfukise indlela lesihlabela ngayo?

¹¹ Kungenteka siyesaba kuhlabela ngoba asati kutsi kufanele sihlabele njani. Noma kunjalo, kunemasikiselo langasisita sikhone kutfutfukisa indlela lesihlabela ngayo. *

 ¹² Ungafundza kuhlabela ngemfutfo nangelivi lelisetulu ngekutsi uphefumule kahle. Njengobe gesi enta lilambu likhanye, kuphefumula kusenta sikhone kukhuluma siphindze sihlabele. Kufanele uhlabele ngendlela lokhuluma ngayo noma uhlabele kakhulu kunaloko. (Fundza ngetindlela letilusito letitfolakala encwadzini letsi Zuza Emfundvweni YeSikolwa Semsebenti WemaKhristu, emakhasi 181 kuya ku-184, ngaphasi kwesihloko lesitsi “Phefumula Ngendlela Lefanele.”) Ecinisweni nalikhuluma ngekudvumisa Nkulunkulu ngekuhlabela, ngaletinye tikhatsi liBhayibheli likhutsata bakhulekeli baNkulunkulu kutsi bamemete ngenjabulo.​—Hla. 33:1-3.

13. Chaza kutsi singalikhulisa njani lizinga lesitetsemba ngalo nasihlabela.

¹³ Ngesikhatsi sekukhonta kwemndeni noma nawuwedvwa ungetama kwenta loku lokulandzelako: Khetsa yinye ingoma loyitsandza kakhulu eculweni. Fundza emagama alengoma ngelivi lelicinile nalelinemfutfo. Ngelivi lelifanako, shano onkhe emagama laselayinini ube ungaphumuli ndzawo. Hlabela lelo layini ube ungashintji livi. (Isa. 24:14) Livi lohlabela ngalo litawuvakala kahle futsi loko kuyintfo lenhle. Ungavumi likwetfuse noma ucabange kutsi liyakuhlaza.

14. (a) Kungasisita njani kukhamisa kakhulu nasihlabela? (Fundza libhokisi lelitsi “ Ungayitfutfukisa Njani Indlela Lohlabela Ngayo?”) (b) Ngutiphi tindlela lotitfola kulula kutisebentisa kuze uncobe tinkinga lotitfola nawuhlabela?

¹⁴ Angeke ukhone kuhlabela kahle nangabe uvale umlomo. Ngako lokunye longakwenta kutsi ukhamise kakhulu kwendlula nawukhuluma. Yini longayenta nangabe uva ngatsi unelivi lelihoshotako noma leliklabalasako? Ungafundza ngetindlela longatisebentisa encwadzini letsi Zuza Emfundvweni YeSikolwa Semsebenti WemaKhristu, likhasi 184, libhokisi lelinesihloko lesitsi “Kuncoba Letinye Tinkinga.”

15. (a) Ngusiphi simemetelo lesakhokhwa emhlanganweni wemnyaka wa-2016? (b) Ngutiphi letinye tinjongo teliculo lelisha?

¹⁵ Kwaba nenjabulo lenkhulu emhlanganweni  wemnyaka wa-2016 we-Watch Tower Bible and Tract Society of Pennsylvania ngesikhatsi lilunga leSigungu Lesibusako uMzalwane Stephen Lett akhulula liculo lelisha lelinesihloko lesitsi “Hlabelelani Jehova Ngenjabulo,” lebelitawutfolakala masinyane futsi silisebentise emihlanganweni. Umzalwane Lett wachaza kutsi injongo yekubuketwa kwaleliculo lelisha kutsi tingoma talo tihambisane ne-New World Translation of the Holy Scriptures lebuketiwe. Kwadzingeka kutsi babukete emagama lasetjentiswa kuletingoma futsi basuse lawo langasekho ku-New World Translation njengobe nayo yabuketwa nga-2013. Ngetulu kwaloko, kungetwe tingoma letinsha letikhuluma ngemsebenti wetfu wekushumayela kanye nangekukhombisa kubonga ngenhlawulo. Ngetulu kwaloko, kuhlabela kuyincenye lebaluleke kakhulu ekukhonteni kwetfu. Ngako Sigungu Lesibusako besifuna kwakha liculo lelisezingeni lelisetulu lelifana ne-New World Translation lebuketiwe.

16, 17. Nguluphi lushintjo lolutawuba khona kuleliculo lelisha?

¹⁶ Kuze kube melula kusebentisa liculo lelitsi “Hlabelelani Jehova Ngenjabulo” letingoma tihlelwe ngetihloko. Nasi sibonelo, tingoma tekucala letingu-12 tikhuluma ngaJehova, letingu-8 letilandzelako tikhuluma ngaJesu kanye nenhlawulo. Kuneluhla lwetihloko taletingoma letingasita umzalwane nangabe ukhetsa ingoma yenkhulumo yelinyenti.

¹⁷ Lamanye emagama etingoma atawubuketwa kuze kucaciswe umlayeto wato kuphindze kukhishwe emagama langasasetjentiswa. Loku kutawusita wonkhe muntfu akhone kuhlabela ngalokusuka enhlitiyweni. Manje sekutawuba melula kutsi sihlabele ngelivi lelivakalako njengobe kutawusentjetiswa emagama lesiwetayele. Letinye tingoma titawushintjwa kute tikhulume ngemsebenti wekushumayela kanye nangemihlangano.

18. Kungani kufanele siwati emagama etingoma laseculweni letfu lelisha? (Fundza umbhalo longentasi.)

¹⁸ Tingoma letinyenti letiseculweni lelitsi “Hlabelelani Jehova Ngenjabulo” tibhalwe taba njengemithantazo. Ngaletingoma ungakhombisa Jehova indlela lotiva ngayo. Letinye tingoma ‘titasikhutsata elutsandvweni nasemisebentini lemihle.’ (Heb. 10:24) Siyaciniseka kutsi siyafuna kujwayelana naletingoma kanye nemagama lasetjentisiwe. Loku ungakwenta ngekutsi utilalele njengoba titfolakala ku-jw.org tihlatjelwa ngemagama. Ngekuphrakthiza letingoma ekhaya ungakhona kutihlabela ngemdlandla kanye nangalokusuka enhlitiyweni. *

19. Bonkhe labasebandleni bangahlanganyela njani ekudvumiseni Jehova ngalokucondzile?

¹⁹ Khumbula kutsi kuhlabela kubaluleke kakhulu ekukhonteni kwetfu Nkulunkulu. Kuyindlela lehamba embili yekukhombisa Jehova kutsi siyamtsandza futsi siyambonga. (Fundza Isaya 12:5.) Nangabe uhlabela ngenjabulo, utawukhutsata labanye kutsi nabo bahlabele ngekutetsemba. Ecinisweni bonlhe labasebandleni—lokufaka ekhatsi labasha, labadzala kanye nalabasandza kuhlanganyela​—bangahlanganyela ekudvumiseni Jehova ngekuhlabela. Ngako kute lokufanele kukuvimbe kutsi uhlabele. Kunaloko, lalela sicondziso lesiphefumulelwe lesashiwo ngumhlabeleli lesitsi: “Hlabelelelani Jehova.” Shengatsi singahlabelela ngenjabulo!​—Hla. 96:1.