IMINIKELO beyisolo iyincenye lebalulekile yekukhonta kweliciniso. Ema-Israyeli bekanikela ngetilwane, futsi emaKhristu bekasolo atiwa ngekunikela ‘ngemhlatjelo wekudvumisa.’ Kepha ikhona naleminye iminikelo lemjabulisako Jehova. (Heb. 13:15, 16) Njengobe sitawubona kuletibonelo letilandzelako, leminikelo isiletsela injabulo kanye netibusiso.

Hana, lobekasisebenti saJehova lesetsembekile bekafisa mbamba kuba nemntfwana, kepha bekangakhoni ngobe bekangabatfoli bantfwana. Wathantaza kuJehova wafunga kutsi nakangamupha indvodzana, ‘uyawunikela ngayo kuye tonkhe tinsuku tekuphila kwayo.’ (1 Sam. 1:10, 11) Ngekuhamba kwesikhatsi, Hana wakhulelwa futsi watala indvodzana layibita ngekutsi nguSamuweli. Ngemuva kwekutsi Samuweli alunyulwe, Hana wamtsatsa wamyisa ethempelini njengobe bekafungile. Jehova wambusisa Hana ngemoya wakhe wekutidzela. Waphindze wambusisa ngebantfwana labanye labasihlanu futsi Samuweli waba ngumphrofethi nembhali weliBhayibheli.​—1 Sam. 2:21.

NjengaHana naSamuweli, emaKhristu lamuhla anelilungelo lelifanako lekusebentisa kuphila kwawo kute asebentele uMdali wawo. Ngetulu kwaloko, Jesu wetsembisa kutsi sitawubusiswa kakhulu nasitidzela kute sikhonte Jehova.​—Mak. 10:28-30.

Ngelikhulu lekucala umfati longumKhristu lobitwa ngekutsi nguDokhasi, bekatiwa ‘ngekwenta tintfo letinyenti letinhle futsi ephana ngetipho’ kute asite labanye. Lokubuhlungu kutsi “wagula wase uyafa” futsi loko kwalivisa buhlungu libandla. Batsi nabeva kutsi Phetro usedvute nalendzawo lebebakuyo, bafundzi bamcela kutsi ete masinyane. Cabanga ngenjabulo lababa nayo ngesikhatsi Phetro efika futsi avusa Dokhasi​—bekukwekucala ngca kutsi umphostoli avuse umuntfu lofile! (Imis. 9:36-41) Jehova bekangakatikhohlwa tento letinhle taDokhasi. (Heb. 6:10) Indzaba yakhe yabhalwa eBhayibhelini kute silingise sibonelo sakhe lesihle.

Ngalokufanako, umphostoli Pawula wasibekela sibonelo lesihle ngekunikela ngesikhatsi sakhe. Nakabhalela bazalwane bakhe eKhorinte, Pawula watsi: “Mine ngitawusebentisa konkhe lenginako, futsi nami ngitawusetjentiswa ngalokugcwele ngenca yemiphefumulo yenu.” (2 Khor. 12:15) Pawula wafundza kutsi kutinikela kute usite labanye kwenta umuntfu enetiseke, kodvwa lokubaluleke kakhulu kutsi kumenta emukelwe nguJehova futsi ambusise.​—Imis. 20:24, 35.

Kuyacaca kutsi Jehova uyajabula nasisebentisa sikhatsi nemandla etfu kute sisekele uMbuso wakhe futsi sisite lesikholwa nabo. Kepha tikhona yini letinye tindlela lesingasekela ngato umsebenti wekushumayela ngeMbuso? Yebo. Ngetulu kwekunikela ngesikhatsi nemandla etfu, singadvumisa Nkulunkulu ngekutsi sinikele ngekutitsandzela ngetintfo lesinato. Leminikelo isetjentiselwa kusekela umsebenti wekushumayela lowentiwa emhlabeni wonkhe, lokufaka ekhatsi kusekela titfunywa telivangeli kanye naletinye tisebenti letisenkonzweni lekhetsekile yesikhatsi lesigcwele. Ngetulu kwaloko, leminikelo iphindze isite ekuhumusheni nasekukhiciteni tincwadzi nema-video, lapho kuvele khona tinhlekelele, kanye nasekwakhiweni kwemaHholo eMbuso lamasha. Singaciniseka kutsi umuntfu “lowephanako utawubusiswa.” Ngetulu kwaloko, nangabe sinikela ngetintfo tetfu letiligugu, sisuke sidvumisa Jehova.​—Taga 3:9; 22:9.