1, 2. (a) Ngumuphi umvuzo tinceku taNkulunkulu letiwulangatelelako? (b) Yini lengasisita sihlale sinakisise umvuzo? (Buka sitfombe lesisekucaleni kwalesihloko.)

NJENGEMPHOSTOLI Pawula, emaKhristu lagcotjiwe lamuhla anelilungelo lelikhulu lekutfola “umvuzo welubito lwasezulwini loluvela kuNkulunkulu.” (Fil. 3:14) Alangatelela kubusa naJesu Khristu eMbusweni wakhe wasezulwini aphindze ahlanganyele naye ekwenteni bantfu babe bete sono. (Semb. 20:6) Lowo ngumgomo lomuhle Jehova labakhutsata kutsi bawufinyelele! Letinye timvu tinelitsemba lelehlukile. Tilangatelela kutfola umvuzo wekuphila phakadze emhlabeni, futsi lelo lilungelo lelijabulisako!​—2 Phet. 3:13.

² Kute asite emaKhristu lakanye nawo kutsi ahlale etsembekile futsi atfole umvuzo, umphostoli Pawula wawakhutsata watsi: “Tingcondvo tenu atihlale tinake tintfo letisezulwini.” (Khol. 3:2) LamaKhristu bekufanele ahlale anake litsemba leliligugu lekuba tindlalifa tasezulwini. (Khol. 1:4, 5) Ecinisweni, kuzindla  ngetibusiso Jehova lasibekele tona kutasisita sihlale sinake umvuzo wetfu, kungaba wasezulwini noma wasemhlabeni.​—1 Khor. 9:24.

3. Ngutiphi tingoti Pawula lacwayisa ngato emaKhristu labekanye nawo?

³ Pawula waphindze wecwayisa emaKhristu labekanye nawo ngetingoti lebetingawenta angawutfoli umvuzo. Nasi sibonelo, wabhalela libandla laseKholose walecwayisa ngemaKhristu emanga labecabanga kutsi atawutfola umusa waNkulunkulu nakagcina uMtsetfo kodvwa abe angakholelwa kuJesu. (Khol. 2:16-18) Pawula waphindze wachaza tingoti letikhona ngisho nalamuhla letingasenta singawutfoli umvuzo. Waveta indlela lesingancoba ngayo tifiso tekutiphatsa kabi, kulungisa kungevani nemaKhristu lesikanye nawo kanye nekulungisa tinkinga letingaba khona emndenini. Leseluleko saPawula sisasebenta nakitsi lamuhla. Asesihlole letinye tetecwayiso telutsandvo letitfolakala kulencwadzi layibhalela libandla laseKholose.

4. Kungani sifiso sekutiphatsa lokubi singasenta singawutfoli umvuzo?

⁴ Ngemuva kwekuba akhumbute bazalwane bakhe ngelitsemba lelihle labebanalo, Pawula watsi: “Bulalani emalunga emitimba yenu asemhlabeni, ekwenteni budlundlulu, kungcola, inkhanuko, sifiso lesibi, kanye nebukhali, lokukukhonta titfombe.” (Khol. 3:5) Tifiso tekutiphatsa lokubi tingaba nemandla kakhulu futsi tingasilahlekisela ngebuhlobo betfu naJehova kanye nelitsemba ngelikusasa. Ngemuva kwekuba sekabuyele ebandleni, lomunye umzalwane lowancotjwa sifiso sekutiphatsa lokubi watsi: “Lesifiso besinemandla kakhulu kangangekutsi ngagcina ngitiphetse kabi.”

5. Singativikela njani etimeni letingaba yingoti?

⁵ Kubalulekile kutsi sinake ikakhulukati nangabe sibhekene netimo letingasenta sephule timiso taJehova tekutiphatsa. Nasi sibonelo, kukuhlakanipha kutsi bantfu lababili nabacala kutsandzana bavele batibekele imincele mayelana nekubambana, kucabuzana noma kuba bodvwa endzaweni lesitsele. (Taga 22:3) Timo letiholela ekutiphatseni lokubi, tingaba khona nangabe umKhristu angekho ekhaya ngenca yemsebenti noma asebenta nemuntfu webulili lobehlukile. (Taga 2:10-12, 16) Nakwenteka utikhandza usesimeni lesifana nalesi, tichaze kutsi ungulomunye waBoFakazi BaJehova, utiphatse ngendlela lehloniphekile futsi ukhumbule kutsi kudlala ngelutsandvo kungaba nemiphumela lebuhlungu. Singatikhandza sisengotini lenkhulu nangabe sicindzetelekile noma sibutsakatsaka. Ngalesinye sikhatsi singafisa kutfola umuntfu longavelana natsi. Singahle sitive sicidzeteleke kakhulu kangangekutsi singemukela lusito kunome ngabe ngubani. Nakwenteka ubhekana naleso simo, thantaza kuJehova futsi ucele lusito kumaKhristu lokanye nawo kuze ungalahlekelwa ngumvuzo.​—Fundza Tihlabelelo 34:18; Taga 13:20.

6. Yini lokufanele siyikhumbule nasikhetsa tekutijabulisa?

⁶ Kuze sibulale tifiso tekutiphatsa lokubi, kufanele sigweme kutijabulisa lokungakalungi. Lamuhla, tekutijabulisa tiyafana naleto lebetikhona eSodoma naseGomora. (Juda 7) Bantfu labakha tinhlelo tekutijabulisa bakhutsata umbono wekutsi kutiphatsa lokubi ngekwelicasi akukubi futsi kute imiphumela lebuhlungu. Kufanele sigadze, singemukeli noma ngutiphi tinhlelo tekutijabulisa kwalelive. Kufanele sitigweme tindlela tekutijabulisa letitasenta singasawunaki umvuzo wetfu wekuphila.​—Taga 4:23.

7. Ngutiphi tinkinga lesingabhekana nato ebandleni lebuKhristu?

⁷ Sonkhe siyavuma kutsi kusibusiso kuba yincenye yelibandla lebuKhristu. Kudadisha liVi laNkulunkulu nasisemihlanganweni kanye nekusekelwa ngelutsandvo kusisita sihlale sinake umvuzo. Noma kunjalo, ngaletinye tikhatsi emaphutsa angenta kutsi emalunga elibandla angevani. Nangabe singatilungisi letinkinga, tingasenta sihlale sitfukutsele.​—Fundza 1 Phetro 3:8, 9.

8, 9. (a) Ngubuphi buntfu lobutasisita sitfole umvuzo? (b) Yini lengasisita silondvolote kuthula nangabe umKhristu lesikanye naye asiphatsa kabi?

⁸ Yini lesingayenta kute singayivumeli intfukutselo isente singawutfoli umvuzo? Pawula wakhutsata emaKhristu aseKholose watsi: “Njengalabakhetsiwe baNkulunkulu, labangcwele nalabatsandzekako, gcokani luvelo, umusa, kutfobeka, umoya lophansi, nekubeketela. Chubekani nibeketelelana futsi nitsetselelana ngekukhululeka ngisho nobe umuntfu anesizatfu sekukhonona ngalomunye. Njengobe Jehova anitsetselele ngekukhululeka, nani yentani kanjalo. Kodvwa ngetulu kwato tonkhe letintfo, gcokani lutsandvo ngobe lusibopho lesiphelele sebunye.”​—Khol. 3:12-14.

⁹ Lutsandvo kanye nemusa kungasisita kutsi sibacolele labanye. Nasi sibonelo, nangabe silinyetwe ngemavi noma sento semKhristu lesikanye naye kufanele setame kukhumbula tintfo lesatenta noma emavi lesawasho langazange abaphatse kahle labanye. Asizange yini sijabule nangabe bazalwane nabodzadze basikhombisa lutsandvo nemusa ngekutsi bangawanaki emaphutsa etfu? (Fundza Umshumayeli 7:21, 22.) Simbonga kakhulu Khristu ngemusa wakhe lowenta kutsi tikhonti teliciniso tibe nebunye. (Khol. 3:15) Sonkhe sitsandza Nkulunkulu munye, sishumayela umlayeto lofanako futsi tinkinga letinyenti lesibhekana nato tiyafana. Nangabe sinemusa futsi sibatsetselela ngelutsandvo labanye sisuke sikhutsata bunye bebuKhristu futsi loku kutasisita sihlale sinakisise umvuzo.

10, 11. (a) Kungani kuyingoti kuba nemona? (b) Yini lesingayenta kute umona ungasilahlekiseli ngemvuzo?

¹⁰ Tibonelo letisecwayiso letiseBhayibhelini tisikhumbuta kutsi kuba nemona kungasenta singawutfoli umvuzo. Khumbula kutsi Khayini waba nemona ngemnakabo futsi wambulala. Khora, Dathani kanye na-Abhiramu baba nemona ngaMosi futsi bamvukela. Ngetulu kwaloko iNkhosi Sawula yaba nemona ngekuphumelela kwaDavide futsi yetama kumbulala. Ngako asimangali nangabe liVi laNkulunkulu litsi: “Nobe ngukuphi lapho kunemona nemibango khona, kutawuba netiphitsiphitsi nayo yonkhe inhlobo yebubi.”​—Jak. 3:16.

¹¹ Nangabe sinelutsandvo kanye nemusa angeke kube lula kutsi sibe nemona. LiVi laNkulunkulu litsi: “Lutsandvo luyabeketela futsi lunemusa. Lute umona.” (1 Khor. 13:4) Kute sigweme kuba nemona, kufanele setame kubuka tintfo ngendlela Nkulunkulu latibuka ngayo, futsi sitsatse bazalwane betfu njengemalunga emtimba munye. Loku kutasisita kusi sibe munye futsi sente ngekuvumelana neseluleko lesiphefumulelwe lesitsi: “Nangabe sitfo lesitsite sidvunyiswa, tonkhe leletinye tijabula naso.” (1 Khor. 12:16-18, 26) Esikhundleni sekuba nemona, sitawujabula nangabe labanye batfola tibusiso. Cabanga ngesibonelo saJonathani indvodzana yeNkhosi Sawula. Akazange abe nemona ngesikhatsi Davide abekwa kusi abe yiNkhosi, esikhundleni saloko wamkhutsata. (1 Sam. 23:16-18) Singakhona yini kuba nemusa nelutsandvo njengaJonathani?

12. Ngusiphi seluleko lesiseBhayibhelini imindeni lokufanele isilalele kute itfole umvuzo?

¹² Kusebentisa timiso teliBhayibheli kungenta umndeni ujabule, ube nekuthula futsi kuwusite utfole umvuzo. Ngusiphi seluleko seliBhayibheli lesimayelana nemndeni Pawula lasiniketa emaKhristu aseKholose? Watsi: “Bafati, tfobelani emadvodza enu ngobe loku kuhle eNkhosini. Madvodza, chubekani nitsandza bafati benu futsi ningabatfukutseleli kakhulu. Bantfwana, lalelani batali benu kuto tonkhe tintfo, ngobe loku kuyayijabulisa iNkhosi. Bobabe, ningabatfukutselisi bantfwana benu kuze bangapheli emandla.” (Khol. 3:18-21) Siyaciniseka kutsi uyavuma kutsi kusebentisa seluleko saPawula lesiphefumulelwe solo kusawazuzisa emadvodza, bafati kanye nebantfwana.

13. Yini dzadze longumKhristu langayenta kute umyeni wakhe longakholwa emukele emaciniso?

¹³ Kutsiwani nangabe ungumfati futsi ubona ngatsi umyeni wakho longakholwa akakuphatsi kahle? Kumtsetsisa kungasilungisa yini lesimo? Kuliciniso kutsi ungamentisa loko lokufunako, kodvwa angeke ukhone kumenta emukele emaciniso. Kepha nangabe umhlonipha umyeni njengenhloko yemndeni, ungenta kube nekuthula emndenini wakho, utawudvumisa Jehova  uphindze usite umyeni wakho kutsi emukele emaciniso futsi nobabili ningatfola umvuzo.​—Fundza 1 Phetro 3:1, 2.

14. Yini lokufanele yentiwe yindvodza lengumKhristu nangabe umfati wayo longakholwa angayihloniphi?

¹⁴ Kutsiwani nangabe uyindvodza futsi uva ngatsi umfati wakho longakholwa akakuhloniphi? Bewungamphocelela kutsi akuhloniphe yini ngekutsi umtsetsite kute umkhombise kutsi ngubani inhloko? Cha angeke. Nkulunkulu ufuna kutsi ulingise Jesu ngekutsi usebentise bunhloko bakho ngelutsandvo. (Ef. 5:23) Njengenhloko yelibandla, Jesu usebentisa bunhloko bakhe ngelutsandvo nangekubeketela. (Luk. 9:46-48) Ngekulingisa sibonelo saJesu, indvodza ingakhona kwenta umkayo kutsi emukele emaciniso.

15. Indvodza lengumKhristu imkhombisa njani umkayo kutsi iyamtsandza?

¹⁵ Emadvodza ayalwa kutsi: “Chubekani nitsandza bafati benu futsi ningabatfukutseleli kakhulu.” (Khol. 3:19) Indvodza letsandza umkayo iyamhlonipha ngekutsi imlalele futsi imcinisekise kutsi umbono wakhe ubalulekile kuyo. (1 Phet. 3:7) Nanobe ingeke ihlale yenta loko lakucelako, itawucela umbono wakhe kute yente tincumo letihlakaniphile. (Taga 15:22) Indvodza letsandza umkayo ayimphoceleli kutsi ayihloniphe kepha yenta tintfo letitawuyenta ifanelwe yinhlonipho. Indvodza letsandza umndeni wayo ingaba nemndeni lojabulako ekukhonteni Jehova futsi batawutfola umvuzo wekuphila.

16, 17. Njengemuntfu lomusha, ungakugwema njani kutfukutselela batali bakho?

¹⁶ Kutsiwani nangabe usemusha futsi ubona ngatsi batali bakho labangemaKhristu abakulaleli futsi bakuncisha inkhululeko? Kukhatsateka kungakwenta ungabate kutsi kukhonta Jehova yindlela lekahle yekuphila. Kepha nangabe uvumela kucindzeteleka kukwente uyekele kukhonta Jehova, utawutfola kutsi sekute umuntfu lokukhatsalela ngalokusuka enhlitiyweni ngaphandle kwelibandla kanye nebatali bakho labesaba Jehova.

¹⁷ Nangabe batali bakho bangakwekhuti bewungatibuta kutsi bayakukhatsalela yini. (Heb. 12:8) Mhlawumbe iyakukwatisa indlela batali bakho labakuyala ngayo. Esikhundleni sekutsi ukwate, yetama kubona kutsi banesizatfu sekukuyala. Ungakwati, kepha yenta konkhe lokusemandleni akho kute ungabaphendvuli kabi. LiVi laNkulunkulu litsi: “Umuntfu lofundze kuhlakanipha uyalubamba lulwimi lwakhe, lonemoya wekucondza uhlala apholile.” (Taga 17:27) Kwente umgomo wakho kuba ngumuntfu lovutsiwe, losemukela kahle seluleko futsi uzuze kuso ngephandle kwekutsi ukhatsateke ngalokwecile ngendlela lositfole ngayo. (Taga 1:8) Kusibusiso kuba nebatali labakholwako nalabatsandza Jehova ngalokusuka enhlitiyweni. Bayafisa kukusita utfole umvuzo wekuphila.

18. Kungani utimisele kutsi uhlale unakisise umvuzo?

¹⁸ Kufanele sicabangisise ngemvuzo lomuhle lesitawutfola—kungaba wekuya ezulwini noma wekuphila phakadze emhlabeni lolipharadisi. Singaciniseka kutsi loku kutawenteka mbamba ngoba kwetsenjiswe nguMdali wetfu. Akhuluma ngeliPharadisi lasemhlabeni, Nkulunkulu utsi: “Umhlaba uyawugcwala kwati Simakadze.” (Isa. 11:9) Wonkhe umuntfu lotabe asemhlabeni utawufundziswa nguNkulunkulu. Loko kungumvuzo lokufanele silwele kuwutfola. Ngako hlale ucabanga ngetintfo Jehova latetsembisile futsi ungavumeli noma ngabe yini ikwente ulahlekelwe ngumvuzo!