1, 2. (a) Jesu wamphendvula njani Phetro ngesikhatsi amtjela kutsi abe nemusa kuye? (Buka sitfombe lesisekucaleni kwalesihloko.) (b) Kungani Jesu amphendvula ngalendlela?

BAFUNDZI baJesu bebacabanga kutsi Jesu utawubuyisela umbuso ka-Israyeli, kodvwa bamangala kakhulu ngesikhatsi Jesu atsi utawuphatfwa kabi futsi abulawe. Umphostoli Phetro watsi: “Bani nemusa kuwe Nkhosi; loku ngeke kwenteke kuwe.” Jesu watsi: “Suka Sathane! Usikhubekiso kimi, ngobe awucabangisi kwaNkulunkulu kodvwa ucabangisa kwebantfu.”​—Mat. 16:21-23; Imis. 1:6.

² Ngekusho lamavi, Jesu waveta umehluko emkhatsini wendlela Nkulunkulu lacabanga ngayo kanye nendlela bantfu balelive labalawulwa nguSathane labacabanga ngayo. (1 Joh. 5:19) Phetro bekakhutsata Jesu kutsi aticabangele yena, lokuyintfo leyentiwa bantfu balelive. Kodvwa Jesu bekati kutsi Jehova ufuna kutsi atilungiselele ngoba masinyane bekatawuphatfwa kabi futsi abulawe. Indlela Jesu laphendvula ngayo Phetro ikhombisa  kutsi bekatimisele kucabanga ngendlela yaNkulunkulu hhayi yalelive.

3. Kungani kumelula kucabanga ngendlela yebantfu balelive kunekucabanga ngendlela yaJehova?

³ Kutsiwani ngatsi? Sicabanga ngendlela Nkulunkulu lacabanga ngayo yini nobe ngendlela bantfu balelive labacabanga ngayo? Njengobe singemaKhristu, senta konkhe lesingakwenta kute sijabulise Nkulunkulu? Kutsiwani ngetintfo lesiticabangako? Sisebenta kamatima yini kute sicabange njengaJehova, lokusho kubona tintfo ngendlela latibona ngayo? Kwenta njalo kudzinga imetamo. Kute imetamo lokufanele siyente kute sicabange ngendlela bantfu balelive labacabanga ngayo. Loko kwentiwa kutsi situngeletwe ngumoya welive. (Ef. 2:2) Bantfu balelive bavame kusikhutsata kutsi siticabangele tsine sodvwa, ngako ngaletinye tikhatsi singalingeka kutsi sibalalele. Kumatima kucabanga ngendlela Jehova lacabanga ngayo, kodvwa kumelula kakhulu kucabanga njengabantfu balelive.

4. (a) Yini lengenteka nangabe sivumela kutsi lelive lilawule indlela lesicabanga ngayo? (b) Lesihloko sitasisita njani?

⁴ Nangabe sivumela bantfu balelive basente sicabange njengabo, sitaticabangela tsine sodvwa siphindze sifune kutikhetsela kutsi ngukuphi lokulungile nalokungakalungi. (Mak. 7:21, 22) Kubalulekile kutsi silwele ‘kucabangisa kwaNkulunkulu’ hhayi “kwebantfu.” Lesihloko sitasisita. Sitawufundza kutsi kucabanga ngendlela yaJehova akusenti sicindzeteleke kodvwa kuyasisita. Kuphindze kusikhombise kutsi singakubalekela njani kucabanga ngendlela bantfu balelive labacabanga ngayo. Esihlokweni lesilandzelako sitawufundza kutsi singayati njani indlela Jehova lacabanga ngayo etimeni letehlukene siphindze sicabange njengaye.

5. Kungani labanye bantfu bangafuni kucondziswa?

⁵ Labanye bantfu abafuni kuvumela labanye kutsi babasite bashintje indlela labacabanga ngayo. Batsi: “Ngiticabangela mine”. Ecinisweni batentela bona tincumo futsi batsi loko kuyintfo lenhle. Abafuni kucondziswa noma kuphocelelwa kutsi bafane nalabanye bantfu. *

6. (a) Jehova usiniketa yiphi inkhululeko? (b) Lenkhululeko ite yini imingcele?

⁶ Singaciniseka nekutsi kucabanga ngendlela Jehova lacabanga ngayo akusho kutsi ngeke sisakhona kutentela tincumo. UmBhalo wa-2 Khorinte 3:17 utsi: “Lapho umoya waJehova ukhona khona, kuba nenkhululeko.” Jehova usinikete inkhululeko yekutikhetsela luhlobo lwemuntfu lesifuna kuba ngilo. Singatikhetsela tintfo lesititsandzako netintfo lesifuna kutenta. NguJehova lowasidala ngalendlela, kodvwa loko akusho kutsi sinenkhululeko lete imingcele. (Fundza 1 Phetro 2:16.) Jehova ufuna kutsi sitfole indlela lacabanga ngayo eVini lakhe liBhayibheli kute sibone kutsi yini lelungile nalengakalungi. Loku kuyasicindzetela yini noma kuyasisita?

7, 8. Kucabanga ngendlela Jehova lacabanga ngayo kusincisha inkhululeko yini? Shano sibonelo.

⁷ Cabanga nganasi sibonelo. Batali balwela kufundzisa bantfwana babo timiso letinhle tekutiphatsa. Babafundzisa kwetsembeka, kukhutsala kanye nekucabangela labanye. Loku kusho kutsi bayabacindzetela yini? Cha, labatali basuke babasita  kutsi baphumelele ekuphileni. Bantfwana batentela tincumo tabo nasebakhulile futsi sebahambile ekhaya. Nangabe bakhetsa kuphila ngendlela batali babo lababafundzise ngayo, ngeke bangene etinkingeni, ngeke bakhatsateke futsi batawukhona kwenta tincumo labangeke batisole ngato esikhatsini lesitako.

⁸ Njengemtali lonelutsandvo, Jehova ufuna bantfu bakhe bajabule ekuphileni. (Isa. 48:17, 18) Usinikete timiso tendlela lokufanele sitiphatse ngayo nendlela lokufanele siphatse ngayo labanye. Ufuna sifundze kuba nembono wakhe ngetintfo futsi siphile ngetimiso takhe. Loku akusho kutsi sesite inkhululeko, kodvwa kusisita sibe nembono lokahle ngetintfo. (Hla. 92:5; Taga 2:1-5; Isa. 55:9) Kuphindze kusisite sente tincumo letikahle letitasenta sijabule. (Hla. 1:2, 3) Kusisita kakhulu kucabanga ngendlela Jehova lacabanga ngayo.

9, 10. Yini lekhombisa kutsi indlela Jehova lacabanga ngayo iphakeme kuneyebantfu balelive?

⁹ Lesinye sizatfu lesisenta sicabange ngendlela Jehova lacabanga ngayo kutsi imicabango yakhe iphakeme kuneyebantfu balelive. Bantfu balelive baniketa teluleko ngendlela lokufanele sitiphatse ngayo, yekwenta kuphila kwemndeni kujabulise, yekutfola umsebenti loholela kahle nalesingakwenta kute siphumelele ekuphileni. Kodvwa teluleko tabo tiphambene naloko Jehova lakushoko. Nasi sibonelo, lelive lihlale likhutsata bantfu kutsi baticabangele bona kuphela, liphindze libente bakwemukele kutiphatsa lokubi ngekwelicasi. Ngalesinye sikhatsi likhutsata bantfu labashadile kutsi bahlale ngekwehlukana noma badivose nangabe loko kutabenta bajabule ngisho noma singekho sizatfu lesiseBhayibhelini sekwenta njalo. Leteluleko tiphambene naloko lokufundziswa liBhayibheli. Teluleko talelive tiyasebenta yini kwendlula teluleko teliBhayibheli?

¹⁰ Jesu watsi: “Kuhlakanipha kubonakala kulungile ngemisebenti yako.” (Mat. 11:19) Bantfu balelive sebatfutfuke kakhulu kutebuchwephesha, nanobe kunjalo, abakhoni kucatulula tinkinga letenta bantfu bangajabuli, letifana netimphi, lubandlululo kanye nebugebengu. Ngetulu kwaloko, bemukela kutiphatsa lokubi ngekwelicasi. Bantfu labanyenti bayavuma kutsi loku kuyayibhidlita imindeni, kubangela tinkinga temphilo futsi kuba nemiphumela lebuhlungu. Kutsiwani ngeseluleko lesivela kuJehova? Bantfu labaphila ngetimiso taJehova baba nemindeni lejabulako, imphilo lenhle, futsi baba nekuthula nebazalwane labasemhlabeni wonkhe. (Isa. 2:4; Imis. 10:34, 35; 1 Khor. 6:9-11) Loko kukhombisa kahle kutsi indlela Jehova lacabanga ngayo iphakeme kuneyebantfu balelive.

11. Ngubani lowalawula indlela Mosi labecabanga ngayo, futsi waba yini umphumela?

¹¹ Tikhonti taJehova letetsembekile lesifundza ngato eBhayibhelini tabona kutsi imicabango yaJehova iphakeme kuneyebantfu. Nasi sibonelo, nanobe Mosi “afundziswa yonkhe inhlakanipho yaseGibhithe” wacela ‘inhlitiyo lehlakaniphile’ kuNkulunkulu. (Imis. 7:22; Hla. 90:12) Waphindze wancenga Jehova watsi: “Ngikhombise tindlela takho.” (Eks. 33:13) Ngenca yekutsi Mosi abecabanga ngendlela Jehova lacabanga ngayo, Jehova wamsebentisa ekufezeni injongo yakhe futsi imiBhalo itsi usibonelo lesihle sekukholwa.​—Heb. 11:24-27.

12. Betisekelwe kuphi tincumo temphostoli Pawula?

¹² Umphostoli Pawula bekahlakaniphile futsi afundzile, bekati tilwimi letinyenti. (Imis. 5:34; 21:37, 39; 22:2, 3) Nakufanele  ehlukanise kulokulungile nalokungakalungi, bekangacabangi ngendlela bantfu balelive labacabanga ngayo kodvwa tincumo takhe bekatisekela eVini laNkulunkulu. (Fundza Imisebenti 17:2; 1 Khorinte 2:6, 7, 13.) Loko kwamenta waphumelela emsebentini wekushumayela futsi ulangatelela umvuzo wekuphila lokuphakadze.​—2 Thim. 4:8.

13. Ngubani lokufanele avumelanise kucabanga kwakhe nekucabanga kwaNkulunkulu?

¹³ Asingabati kutsi imicabango yaJehova iphakeme kunemicabango yebantfu balelive. Kuphila ngetimiso takhe kutasenta sijabule kakhulu futsi siphumelele. Kodvwa Jehova ngeke asiphocelele kutsi siphile ngato. “Sisebenti lesetsembekile nalesihlakaniphile” kanye nalabadzala belibandla abasiphoceleli. (Mat. 24:45; 2 Khor. 1:24) Kunaloko, umKhristu ngamunye kufanele atikhetsele yena kuphila ngendlela levumelana netimiso taNkulunkulu. Singakwenta njani loko?

14, 15. (a) Kute sicabange ngendlela Jehova lacabanga ngayo, yini lokufanele sizindle ngayo? (b) Ngekusho kwembhalo waRoma 12:2, kubaluleke ngani kutsi siyibalekele imibono yebantfu balelive? Shano sibonelo.

¹⁴ UmBhalo waRoma 12:2 utsi: “Yekelani kwentiwa nifane nalelive, kodvwa gucukani ngekutsi nishintje tingcondvo tenu, kute nititfolele nine loko lokuyintsandvo yaNkulunkulu, lenhle, leyemukelekako nalephelele.” Lombhalo usifundzisa kutsi kunobe ngabe ngutiphi timiso besiphila ngato sisengakafundzi liciniso, sisengakhona kushintja imibono yetfu futsi setame kucabanga ngendlela Jehova lacabanga ngayo. Lufuto nobe tintfo letenteke ekuphileni kwetfu kuyitsintse ngelizinga lelitsite indlela lesicabanga ngayo, kodvwa sisengakhona kushintja. Loko kutawuya ngekutsi sikhetsa kucabanga ngendlela yabani. Nangabe sicabangisisa ngendlela Jehova lacabanga ngayo, sitawube sikhombisa kutsi timiso takhe tihlale tilungile futsi sitawufisa kucabanga ngendlela lacabanga ngayo.

¹⁵ Nanobe kunjalo, kumele sikhumbule kutsi kufanele ‘siyekele kwentiwa sifane nalelive’ kute sikhone kucabanga njengaJehova. Kufanele siyekele kondla tingcondvo tetfu ngemibono kanye nemicabango yebantfu balelive lengavumelani nemicabango yaNkulunkulu. Kute sicondze kubaluleka kwaloko kufanele sicabange nganasi sibonelo. Umuntfu lofuna kuhlale aphilile udla kudla lokunemphilo. Kodvwa loko ngeke kumsite nangabe ahlale adla kudla lokubolile. Ngendlela lefanako kutondla ngemicabango yaNkulunkulu kutoba lite nangabe sondla tingcondvo tetfu ngemicabango yebantfu balelive.

16. Yini lokufanele sitivikele kuyo?

¹⁶ Angeke sikhone kuyibalekela ngalokuphelele indlela bantfu balelive labacabanga ngayo ngoba siphila kulo. Leminye imibono yabo ngeke sikhone kuyibalekela. (1 Khor. 5:9, 10) Emsebentini wekushumayela sihlangana nebantfu labakholelwa tintfo letingasilo liciniso. Nobe kunjalo, kufanele singacabangi ngendlela yabo futsi singayemukeli imibono yabo. NjengaJesu, kufanele siyibalekele imicabango lefeza injongo yaSathane. Ngetulu kwaloko, singativikela ngekutsi singatihlanganisi nebantfu labacabanga ngendlela yalelive kungenasidzingo.​—Fundza Taga 4:23.

17. Ngutiphi letinye tindlela lesingakubalekela ngato kutihlanganisa nebantfu balelive ngalokungenasidzingo?

¹⁷ Nasi sibonelo, kufanele sibakhetse ngekuhlakanipha bangani betfu. LiBhayibheli lisecwayisa ngekutsi nasitihlanganisa nebantfu labangamkhonti Jehova sitawugcina  sesicabanga ngendlela labacabanga ngayo. (Taga 13:20; 1 Khor. 15:12, 32, 33) Kufanele sitikhetse kahle netintfo lesitijabulisa ngato. Nangabe singatijabulisi ngetintfo letikhutsata kutigucukela kwemvelo, budlova nekutiphatsa lokubi, sisuke sivikela tingcondvo tetfu kutsi tingonakaliswa yimicabango ‘lemelene nelwati ngaNkulunkulu.’​—2 Khor. 10:5.

18, 19. (a) Kungani kufanele siyicaphele imibono yebantfu balelive lekhutsatwa ngetindlela letibhacile? (b) Ngumiphi imibuto lokufanele sitibute yona futsi leni?

¹⁸ Senta kahle ngekutsi sikubone kucabanga kwebantfu balelive futsi singakwemukeli ngisho noma kuvela ngetindlela letibhacile. Nasi sibonelo, imibiko yetindzaba ingahle ivetwe ngendlela lesekela licembu lelitsite letepolitiki. Letinye tindzaba tikhutsata imigomo netintfo letitsandvwa bantfu balelive. Lamanye ema-movie kanye netincwadzi tikhutsata bantfu kutsi baticabangele bona noma imindeni yabo, futsi loko tikwenta kubonakale kunengcondvo futsi kuyintfo lenhle. Imibono lenjalo yenta kubukeleke phasi lokushiwo liBhayibheli mayelana nekutsi bantfu kanye nemindeni yabo bayaphumelela nangabe batsandza Jehova kakhulu kwendlula letinye tintfo. (Mat. 22:36-39) Nanobe letinye tincwadzi tebantfwana tenta babone ngatsi kutiphatsa lokubi kuyintfo leyemukelekako.

¹⁹ Loko akusho kutsi kuyintfo lembi kutijabulisa ngetintfo letihlantekile. Nobe kunjalo, senta kahle ngekutibuta: ‘Siyakhona yini kubona timfundziso talelive ngisho noma tingabonakali melula? Siyakhona yini kutivikela, kanye nebantfwana betfu etinhlwelweni te-TV kanye nasetincwadzini letikhutsata kucabanga kwalelive? Siyabasita yini bantfwana betfu kutsi bangacabangi ngendlela bantfu labacabanga ngayo kodvwa bacabange ngendlela Jehova lacabanga ngayo?’ Nangabe sikhona kubona umehluko emkhatsini wemicabango yaJehova neyalelive, angeke ‘sifane nalelive.’

20. Yini letawukhombisa kutsi sicabanga njengaNkulunkulu noma njengebantfu balelive?

²⁰ Kufanele sikhumbule kutsi babili kuphela bantfu labangasilawula​—nguJehova noma lelive lelibuswa nguSathane. Ngubani lesitamvumela kutsi asicondzise? Imphendvulo itawuya ngekutsi ngubani lesimlalelako. Nangabe semukela imibono yebantfu balelive sitawucabanga njengabo futsi silingise indlela labatiphatsa ngayo. Ngako kubaluleke kakhulu kutsi sitinake tintfo lesicabanga ngato.

21. Nguliphi liphuzu lelibalulekile lesitawucoca ngalo esihlokweni lesilandzelako?

²¹ Kulesihloko sifundze kutsi kute sibe nembono waJehova ngetintfo kufanele singagcini nje ngekubalekela tintfo letimbi. Kunaloko, kufanele sizindle ngemicabango yaNkulunkulu kute sikhone kucabanga njengaye. Esihlokweni lesilandzelako sitawufundza kutsi singakwenta njani loko.