1. Yini leyenta sonkhe sidzinge indvudvuto?

SONKHE siyakudzinga kudvudvutwa. Mhlawumbe kuphila kwetfu kugcwele tinkinga, kukhatsateka kanye nekudvumateka. Kungenteka siva buhlungu lobubangelwa kukhula, tifo noma kushonelwa ngumuntfu lesimtsandzako. Labanye betfu bayahlukunyetwa. Bantfu lesiphila nabo banebudlova. Liciniso likutsi siyaciniseka kutsi “tikhatsi letibucayi lokumatima kubhekana nato” tibufakazi bekutsi siphila “emalangeni ekugcina.” Live lelisha lisondzela ngekushesha. (2 Thim. 3:1) Nanobe kunjalo, kungenteka sekuphele sikhatsi lesidze silindzele kugcwaliseka kwetetsembiso taJehova, futsi tintfo letisikhatsatako tiyandza. Singayitfolaphi indvudvuto?

2, 3. (a) Yini lesiyatiko ngaHabakhuki? (b) Kungani sitawuhlolisisa incwadzi yaHabakhuki?

² Kute sitfole imphendvulo, ake sihlolisise incwadzi yaHabakhuki. Ngisho noma imibhalo ingakhulumi kakhulu ngekuphila kwaHabakhuki kanye nemisebenti yakhe, lesikufundza encwadzini lebitwa ngeligama lakhe kusenta sidvudvuteke. Kungenteka ligama laHabakhuki lisho “kudvudvuta ngelutsandvo.” Loku  kungasho indlela Jehova lasidvudvuta ngayo noma indlela lesiphephela ngayo kuye njengobe sitikhonti takhe. Habakhuki wabuta Jehova imibuto letsite. Ecinisweni, Jehova waphefumulela Habakhuki kutsi abhale lencociswano yabo ngoba imibuto leyabutwa nguHabakhuki iyasitsintsa natsi lamuhla.​—Hab. 2:2.

³ LiBhayibheli alikhulumi lokunyenti ngaHabakhuki, kodvwa lisitjela ngencociswano laba nayo naJehova. Incwadzi yakhe iyincenye yato “tonkhe tintfo letabhalwa kadzeni” letiseVini laNkulunkulu liBhayibheli “kute kutsi ngekucinisela kwetfu nangendvudvuto lesiyitfola emiBhalweni sitewuba nelitsemba.” (Rom. 15:4) Ingasisita njani incwadzi yaHabakhuki? Ingasisita sibone kutsi kusho kutsini kwetsembela kuJehova. Ngetulu kwaloko, siphrofetho saHabakhuki sisicinisekisa kutsi singakhona kuba nekuthula futsi sikulondvolote ngisho noma sibhekene netinkinga netimo letimatima. Kulesihloko sitawuhlolisisa kabanti incwadzi yaHabakhuki.

4. Kungani Habakhuki bekakhatsatekile?

⁴ Fundza Habakhuki 1:2, 3. Habakhuki bekaphila ngesikhatsi lesimatima kakhulu. Ngesizatfu sekutsi bekaphila nebantfu lababi nalabebanebudlova, bekakhatsateke kakhulu. Bebutawuphela nini lobubi? Kungani kwaphela sikhatsi lesidze Jehova angasitsatsi sinyatselo? Habakhuki bekahlale abona bantfu bakubo baphatsana kabi futsi bacindzetelana. Bekacabanga kutsi kute lebekangamsita. Kulesikhatsi lesimatima, wacela lusito lwaJehova. Kungenteka Habakhuki wacabanga kutsi Jehova bekangenandzaba naye. Bekabona ngatsi Jehova angeke asitsatse ngekushesha sinyatselo. Wake wativa yini ngendlela lefanako?

5. Ngusiphi sifundvo lesibalulekile lesisitfola encwadzini yaHabakhuki? (Buka sitfombe lesikucaleni kwalesihloko.)

⁵ Habakhuki bekangasametsembi yini Jehova? Wehluleka yini kuba nekukholwa etetsembisweni taJehova? Cha. Kutjela Jehova ngetinkinga takhe lebetimkhatsata hhayi bantfu, bekukhombisa kutsi abengakalilahli litsemba. Bekakhatsatwa kutsi bekangati kutsi Jehova utaticedza nini letinkinga futsi bekangasicondzi sizatfu lesenta Jehova amvumele kutsi abe kulesimo lesimatima kangaka. Ngekuphefumulela Habakhuki kutsi abhale ngetintfo lebetimkhatsata, Jehova usifundzisa sifundvo lesibalulekile: Akukafaneli sesabe kumtjela tintfo letisikhatsatako naletisenta singabate. Ngemusa usicela kutsi sitfululele tinhlitiyo tetfu kuye. (Hla. 50:15; 62:8) Taga 3:5 tisikhutsata kutsi ‘setsembe Simakadze ngayo yonkhe inhlitiyo yetfu’ siphindze ‘singeyami ekwatini kwetfu.’ Kungenteka Habakhuki bekawati lamavi futsi bekawasebentisa ekuphileni kwakhe.

6. Kungani umthantazo ubalulekile?

⁶ Habakhuki watsatsa sinyatselo kucala sekusondzela kuJehova, lobekanguBabe futsi anguMngani wakhe labemetsemba. Habakhuki akazange akhatsateke ngalesimo labekabhekene naso noma etsembele ekwatini kwakhe. Esikhundleni saloko, wathantaza watjela Jehova indlela labetiva ngayo nangetintfo lebetimkhatsata, futsi loko kusibonelo lesihle kitsi. Ngetulu kwaloko, Jehova longuMuvi wemithantazo usicela kutsi sikhombise kutsi siyametsemba ngekutsi simtjele tintfo letisikhatsatako. (Hla. 65:2) Nasenta njalo, sitawubona kutsi Jehova utayiphendvula njani imithantazo yetfu. Sitawubona nekutsi uyasitsandza ngekutsi asidvudvute aphindze asicondzise. (Hla. 73:23, 24) Utasisita siyati indlela lacabanga ngayo kunobe ngabe  nguyiphi inkinga lesingahlangabetana nayo. Imithantazo lesuka enhlitiyweni iyindlela lesikhombisa ngayo kutsi siyametsemba Nkulunkulu.

7. Yini Jehova layenta ngesikhatsi eva kukhala kwaHabakhuki?

⁷ Fundza Habakhuki 1:5-7. Ngemuva kwekutjela Jehova ngako konkhe lobekumkhatsata, kungenteka Habakhuki wacabanga kutsi yini Jehova labetayenta. NjengaBabe loneluvelo nalosicondza kancono, Jehova akazange amtsetsise, kunaloko wamtjela ngalabetakwenta madvutane. Jehova bekati kutsi Habakhuki ucindzetelekile futsi ucela lusito. Kungenteka Habakhuki waba ngumuntfu wekucala Jehova lamtjela kutsi utawajezisa emaJuda labengaketsembeki.

8. Kungani loko Jehova latsi utakwenta kwammangalisa Habakhuki?

⁸ Jehova watjela Habakhuki kutsi ukulungele kutsatsa sinyatselo futsi masinyane utabajezisa bantfu labanebudlova. Ngesikhatsi Jehova atsi utabajezisa ‘emalangeni abo’ bekasho kutsi bekatawubajezisa nakusaphila umphrofethi Habakhuki noma ema-Israyeli labesaphila ngaleso sikhatsi. Habakhuki bekangakakulindzeli loko Jehova lakusho. Bantfu baseBhabhulona bebaneludlame futsi bebanebudlova kakhulu kunema-Israyeli labetati timiso taNkulunkulu. Kungani Jehova bekatawusebentisa labantfu labakhonta bonkulunkulu bemanga kute ajezise bantfu bakhe? Loko bekutawenta emaJuda acindzeteleke kakhulu. Wena bewungativa njani kube bewunguHabakhuki?

9. Ngumiphi imibuto lokungenteka Habakhuki watibuta yona?

⁹ Fundza Habakhuki 1:12-14, 17. Habakhuki bekasolo etfukile nanobe bekacondza kutsi Jehova utawusebentisa iBhabhulona kute ajezise bantfu lababi. Kodvwa ngekutfobeka watjela Jehova kutsi bekasolo ‘aLidvwala’ lakhe. (Dut. 32:4; Isa. 26:4) Habakhuki bekatawuchubeka abeketela aphindze aciniseke kutsi Jehova uyamtsandza futsi umphatsa ngemusa. Ngesizatfu sekutsi lomphrofethi bekametsemba Jehova, akazange esabe kuphindze abute leminye imibuto lenjengaletsi: Kungani Jehova avumela tintfo kutsi tibe timbi kakhulu kaJuda nekutsi bantfu bakhe bacindzeteleke kangaka? Kungani bekangatsatsi sinyatselo ngaleso sikhatsi? Kungani Jehova ‘abindza’ futsi abeketelela lobubi lobugcwele yonkhe indzawo? Jehova ‘ungcwele’ futsi ‘emehlo akhe ahlanteke kakhulu kutsi angabuka bubi.’

10. Ngaletinye tikhatsi singativa njani ngendlela lefanako nendlela Habakhuki lativa ngayo?

¹⁰ Ngaletinye tikhatsi, singativa ngendlela Habakhuki lativa ngayo. Siyamlalela Jehova. Simetsemba ngalokuphelele, sifundza liVi lakhe siphindze silidadishe futsi loku kusenta sibe nelitsemba. Inhlangano yakhe isiniketa ticondziso letisitjela kabanti ngetetsembiso takhe. Kodvwa kungenteka siyatibuta: ‘Kuhlupheka kwetfu kutawuphela nini?’ Sifundzani kuloko Habakhuki labese uyakwenta?

11. Yini Habakhuki latimisela kuyenta ngemuva kwekulalela Jehova?

¹¹ Fundza Habakhuki 2:1. Kucoca naJehova kwenta Habakhuki waba nekuthula. Loko kwamenta wakhetsa kulindzela Jehova ngekuciniseka. Habakhuki wakhombisa kutsi bekatimisele ngesikhatsi atsi: “Ngiyakulilindzela ngekubeketela lilanga lesehlakalo.” (Hab. 3:16) Naletinye tinceku taJehova letetsembekile tachubeka tilindzele Jehova kutsi atsatse sinyatselo. Sibonelo  sato sisikhutsata kutsi natsi sichubeke silindzele Jehova.​—Mik. 7:7; Jak. 5:7, 8.

12. Ngutiphi letinye tifundvo lesitifundza kuHabakhuki?

¹² Yini lesiyifundza kuloko Habakhuki labetimisele kukwenta? Kwekucala, sifundza kutsi kufanele singayekeli kuthantaza kuJehova ngisho noma sehlelwa ngutiphi timo. Kwesibili, kufanele silalele Jehova kuko konkhe lasitjela kona asebentisa liVi lakhe liBhayibheli kanye nenhlangano yakhe. Kwesitsatfu, kufanele silindzele Jehova ngekubeketela, setsembe kutsi utasikhulula ngesikhatsi sakhe. Nangabe sichubeka sitfululela sifuba setfu kuJehova, simlalelisisa siphindze simlindzele ngekubeketela njengobe kwenta Habakhuki, natsi sitawuba nekuthula lokutasisita kutsi sicinisele. Litsemba lesinalo litasisita sibeketele futsi loko kutawusenta sijabule noma singahlangabetana nasiphi simo. Litsemba lisenta siciniseke kutsi Babe wetfu losezulwini utasitsatsa sinyatselo.​—Rom. 12:12.

13. Ngusiphi sicinisekiso semusa lesisitfola kuHabakhuki 2:3?

¹³ Fundza Habakhuki 2:3. Asingabati kutsi Jehova wajabula ngesincumo saHabakhuki sekulindza. Jehova bekasati kahle simo lesibuhlungu Habakhuki labekuso. Ngako Nkulunkulu wamdvudvuta ngelutsandvo lomphrofethi futsi wamcinisekisa ngemusa kutsi utawutitfola timphendvulo temibuto yakhe. Abetawukhululeka ngekushesha kuto tonkhe tintfo lebetimkhatsata. Ecinisweni kufana nekutsi Jehova bekatsi kuHabakhuki: “Beketela, ungetsembe. Ngitakuphendvula ngisho noma kungabonakala kwephuta.” Jehova wamkhumbuta kutsi kunesikhatsi lesibekiwe sekugcwalisa tonkhe tetsembiso takhe. Weluleka Habakhuki kutsi alindzele kugcwaliseka kwetinjongo takhe [Nkulunkulu.] Ekugcineni lomphrofethi bekangeke advumateke.

14. Yini lokufanele sitimisele kuyenta nasibhekene netikhatsi letimatima?

¹⁴ Kulindzela Jehova kanye nekulalela loko lakushoko kutawusenta simetsembe futsi sibe nekuthula ngisho noma singabhekana netimo letibuhlungu. Jesu wasicinisekisa kutsi singametsemba Jehova njengobe angumgcini wesikhatsi lomkhulu, futsi waphindze wasiyala kutsi singanaki “tikhatsi nobe emalanga labekiwe” Nkulunkulu langakasitjeli ngawo. (Imis. 1:7) Shengatsi singete salilahla litsemba, kodvwa sitfobeke, silindzele Jehova futsi sibeketele. Kufanele sisisebentise kahle sikhatsi setfu ngekutsi sente konkhe lesingakwenta kute sikhonte Jehova.—Mak. 13:35-37; Gal. 6:9.

15, 16. (a) Ngutiphi tetsembiso letinhle lesititfola encwadzini yaHabakhuki? (b) Yini lesiyifundza kuletetsembiso?

¹⁵ Naku Jehova lakwetsembisa bantfu labalungile labetsembela kuye: “Lolungile uyawuphila ngekukholwa kwakhe,” futsi “umhlaba uyawugcwala kwati bukhosi baSimakadze.” (Hab. 2:4, 14) Bantfu labetsembela kuJehova nalabalindzela yena batawutfola umvuzo wekuphila.

¹⁶ Cabanga ngesetsembiso lesikuHabakhuki 2:4. Lesetsembiso sibaluleke kakhulu kangangekutsi umphostoli Pawula wakhuluma ngaso etincwadzini letintsatfu latibhala. (Rom. 1:17; Gal. 3:11; Heb. 10:38) Ngisho noma bantfu labalungile bangabhekana netimo letimatima, batawuchubeka banekukholwa futsi banelitsemba lekuphila kute babone kugcwaliseka kwetinjongo taNkulunkulu. Jehova usitjela kutsi sinake kakhulu lokutawenteka esikhatsini lesitako.

17. Incwadzi yaHabakhuki isicinisekisa ngani?

¹⁷ Incwadzi yaHabakhuki isifundzisa sifundvo lesibalulekile njengobe sonkhe siphila  kulamalanga ekugcina. Jehova wetsembisa kutsi utabanika kuphila lokuphakadze bonkhe bantfu labanekukholwa futsi labametsembako. Shengatsi singachubeka sicinisa kukholwa kwetfu futsi simetsembe kakhulu Jehova ngisho noma singabhekana netimo leticindzetelako. Jehova wasebentisa Habakhuki kute asicinisekise kutsi utawusisekela aphindze asikhulule. Ngemusa, usicela kutsi simetsembe futsi silindzele kufika kweMbuso wakhe, lapho khona tonkhe tikhonti takhe titawujabula futsi tibe nekuthula.​—Mat. 5:5; Heb. 10:36-39.

18. Emavi aJehova amsita njani Habakhuki?

¹⁸ Fundza Habakhuki 3:16-19. Emavi aJehova amtsintsa kakhulu Habakhuki. Habakhuki wazindla ngetintfo letimangalisako Jehova latentela bantfu esikhatsini lesengcile. Loko kwamsita waphindze wametsemba Jehova. Bekati kutsi Jehova utasitsatsa ngekushesha sinyatselo. Loko kwamdvudvuta lomphrofethi, ngisho noma bekati kutsi kuhlupheka kwakhe bekutawuchubeka sikhashana. Kungabata Habakhuki labenako kwaphela futsi beketsemba mbamba kutsi Jehova unawo emandla ekumsindzisa. Washo emavi lakhombisa kutsi bekametsemba kakhulu Jehova. Kungenteka kute lomunye umuntfu lowake washo emavi lafana nawo emlandvweni webantfu. Letinye tati titsi emavi aHabakhuki lasevesini 18 asho kutsi, “Ngiyawugcumagcuma ngenjabulo enkhosini yami; Ngitfokote ngaNkulunkulu wami.” Lesi sifundvo lesihle kakhulu kitsi sonkhe. Jehova akagcini ngekusetsembisa tintfo letinhle, kodvwa uyasicinisekisa kutsi uyakulangatelela kutifeza.

19. Singayitfola njani indvudvuto lefana naleyatfolwa nguHabakhuki?

¹⁹ Asingabati kutsi umlayeto lobalulekile losencwadzini yaHabakhuki usisita kutsi setsembele kuJehova. (Hab. 2:4) Singametsemba Jehova nangabe sicinisa buhlobo betfu naye ngekutsi (1) sithantaze njalo kuJehova simtjele ngato tonkhe tinkinga tetfu netintfo letisikhatsatako; (2) sikunakisise loko Jehova lasitjela kona eVini lakhe liBhayibheli neticondziso lesititfola enhlanganweni yakhe, futsi (3) silindzele Jehova ngekubeketela nangekwetsembeka. Habakhuki wenta lokufanako. Ngisho noma ekucaleni kwencwadzi yakhe bekaselusizini, wagcine ametsemba Jehova futsi ajabula. Shengatsi singasilingisa lesibonelo lesiseBhayibhelini futsi sitfole indvudvuto levela kuJehova. Ikhona yini indvudvuto lenkhulu lesingayitfola kulelive?