1, 2. Njengoba sisondzela kakhulu kuJehova, yini lesiyifundzako? Shano sibonelo.

ASESITSI upha umtfwana lomncane sipho. Batali bakhe batsi kuye: “Bonga.” Lomtfwana uvele abonge njengoba bamtjelile. Njengobe akhula, ubese uyabona kutsi kungani batali bakhe batsi kubalulekile kubonga nangabe labanye bantfu bakwentela tintfo letinhle. Ngekuhamba kwesikhatsi ubese ubonga ngalokusuka enhlitiyweni yakhe kute akhombise kutsi uyabonga ngalabamentele kona.

² Ngendlela lefanako, ngemuva kwekufundza liciniso, sabese siyabona kutsi kubalulekile kulalela loko Jehova lafuna kutsi sikwente. Kodvwa njengobe sichubeka siba nebuhlobo lobuhle naJehova, sifundza lokunyenti ngendlela lacabanga ngayo, lokusho loko lakutsandzako, loko langakutsandzi kanye nembono wakhe etindzabeni letitsite. Nangabe sisebentisa timiso taJehova, sitawukhetsa futsi sente tintfo letivumelana nendlela lacabanga ngayo.

3. Yini lengenta kube matima kucabanga ngendlela Nkulunkulu lacabanga ngayo?

³ Nanobe kucabanga ngendlela Jehova lacabanga ngayo kusijabulisa, kodvwa kungaphindze kube matima ngenca yekutsi sinesono. Nasi sibonelo, kungenteka sikutfola kumatima  kucondza umbono waJehova ngekutiphatsa lokuhlantekile, umcebo, umsebenti wekushumayela, kusebentisa kabi ingati noma letinye tintfo. Yini lesingayenta? Yini lengasisita sichubeke sitfutfuka ekucabangeni ngendlela Nkulunkulu lacabanga ngayo? Kwenta njalo kungatitsintsa njani tintfo lesitentako nyalo nalesitawutenta esikhatsini lesitako?

4. Kusho kutsini kulalela seluleko saPawula lesitsi kufanele ‘sishintje tingcondvo tetfu’?

⁴ Fundza Roma 12:2. Kulombhalo, umphostoli Pawula uchaza kutsi yini lokufanele siyente kute sicabange ngendlela Jehova lacabanga ngayo. Esihlokweni lesendlulile, sifundzile kutsi kute ‘singafani nalelive’ kufanele singayenti imikhuba yebantfu balelive futsi singayemukeli imibono yabo. Pawula waphindze wachaza sidzingo sekutsi ‘sishintje tingcondvo tetfu.’ Loko kusho kutsi kufanele sidadishe liVi laNkulunkulu kute sicondze loko lakucabangako, sizindle ngako, futsi setame kucabanga ngendlela lacabanga ngayo.

5. Chaza umehluko emkhatsini wekumane nje ufundze indzaba letsite kanye nekudadisha.

⁵ Kudadisha akusho kumane nje sifundze indzaba letsite noma sidvwebele timphendvulo temibuto. Nangabe sidadisha, kufanele sicabange kutsi lendzaba isifundzisani ngaJehova, ngetindlela takhe, kanye nangendlela lacabanga ngayo. Kufanele setame kucondza kutsi kungani asivumela kutsi sente letinye tintfo, kodvwa letinye singatenti. Kufanele sicabange kutsi yini lesingayenta kute sishintje indlela lesiphila ngayo nalesicabanga ngayo. Kuliciniso kutsi ngeke sikhone kuzindla ngawo onkhe lamaphuzu njalo nasidadisha, kodvwa siyazuza nangabe sitinika sikhatsi sekuzindla ngaloko lesikufundzako.​—Hla. 119:97; 1 Thim. 4:15.

6. Kwentekani nasizindla ngeliVi laJehova?

⁶ Nangabe sizindla njalo ngeliVi laNkulunkulu, kwenteka intfo lemangalisako. ‘Siyatitfolela’ kutsi indlela Jehova lacabanga ngayo ngiyo lekahle. Sibese sibona tintfo ngendlela Jehova latibona ngayo futsi sivumelane nendlela lacabanga ngayo. ‘Sishintja tingcondvo tetfu’ bese siba nendlela lensha yekucabanga futsi sicabange ngendlela Jehova lacabanga ngayo.

7, 8. (a) Jehova unamuphi umbono ngetintfo talelive? (Buka titfombe letisekucaleni kwalesihloko.) (b) Nangabe sicabanga njengaye, yini letawuhlale ita kucala ekuphileni kwetfu?

⁷ Tintfo lesiticabangako tiyayitsintsa indlela lesitiva ngayo ngetintfo letitsite kanye naloko lesikwentako. (Mak. 7:21-23; Jak. 2:17) Kute sikucondze kahle loko, sitawucoca ngetibonelo letimbalwa. EmaVangeli lamane ayichaza kahle indlela Jehova lativa ngayo ngetintfo talelive. Nkulunkulu wakhetsa Josefa naMariya kutsi bakhulise iNdvodzana yakhe nanobe bebete imali lenyenti. (Lev. 12:8; Luk. 2:24) Ngesikhatsi Jesu atalwa, Mariya wambeka “emkhombeni, ngobe bekute indzawo endlini yetivakashi.” (Luk. 2:7) Kube Jehova bekatsandza bekangenta kutsi Jesu atalelwe endzaweni lencono kunalena latalelwa kuyo. Lebekubalulekile kuJehova bekukutsi akhuliswe futsi anakekelwe batali labamkhontako.

⁸ Lendzaba leseBhayibhelini isifundzisa umbono waJehova mayelana nebunjinga. Labanye batali baphocelela bantfwana babo kutsi banjinge, ngisho nome loko kungabulimata buhlobo babo naJehova. Kodvwa kuyacaca kutsi Jehova utsatsa buhlobo betfu naye njengentfo lebaluleke kakhulu. Unembono waJehova yini mayelana nebunjinga?  Yini levetwa nguloko lokwentako?​—Fundza Hebheru 13:5.

9, 10. Singakhombisa njani kutsi sinembono waJehova ngekukhuba labanye?

⁹ Lesinye sibonelo simayelana nendlela Jehova lativa ngayo ngekukhuba labanye. Jesu watsi: “Nobe ngubani lowenta kutsi lomunye walaba labakholwako labanjengebantfwana akhubeke, bekungaba ncono kutsi kuboshelwe litje lelikhulu lekusila entsanyeni yakhe, lelinjengalelo leligucuguculwa yimbongolo, bese ujikwa elwandle.” (Mak. 9:42) Lamavi aveta kutsi Jesu uva buhlungu nangabe bantfu bakhuba labanye. Njengoba Jesu bekanebuntfu lobufana nebaBabe wakhe, singaciniseka kutsi naJehova utiva ngendlela lefanako ngebantfu labakhuba balandzeli baJesu.​—Joh. 14:9.

¹⁰ Sitiva ngendlela Jehova naJesu labativa ngayo yini ngekukhuba labanye? Siyawemukela yini umbono wabo? Yini levetwa nguloko lesikwentako? Nasi sibonelo, kungenteka sitsandza sitayela lesitsite sekugcoka nekutilungisa. Kodvwa yini lesingayenta nangabe sitayela lesitsite singabakhuba labanye ebandleni noma sibente babe nemicabango yekutiphatsa kabi? Kutsandza bazalwane kutasikhutsata yini kutsi sitiyekele titayela letinjalo?​—1 Thim. 2:9, 10.

11, 12. Kuba nembono waNkulunkulu ngalokubi kanye nekutibamba kutasivikela njani ekwenteni lokubi?

¹¹ Sibonelo sesitsatfu kutsi Jehova uyakwenyanya kungalungi. (Isa. 61:8) Nanobe ati kutsi kumatima kutsi sente lokulungile ngenca yekutsi sinesono, Jehova usikhutsata kutsi simlingise ngekutsi sikwenyanye lokubi. (Fundza Tihlabelelo 97:10.) Kuzindla ngetizatfu letenta Jehova akwenyanye lokubi kutasisita kutsi sicabange njengaye futsi sibe nemandla ekuncoba lokubi.

¹² Kuba nembono waJehova ngalokubi kutawuphindze kusisite sitibone tintfo letimbi nanobe liBhayibheli lingakhulumi ngato ngalokucondzile. Nasi sibonelo, luhlobo lwekudansa loluvusa inkhanuko lolubitwa ngekutsi yi-lap dancing, seluvame kakhulu kulelive. Labanye bayawusekela lomkhuba ngoba bacabanga kutsi awufani nekuya ecasini. * Kodvwa umkhuba lonjalo uyahambisana yini nembono waNkulunkulu lowenyanya lonkhe luhlobo lwebubi? Shengatsi singakubalekela kwenta tintfo letimbi ngekutsi sitibambe futsi sitenyanye tintfo Jehova latenyanyako.​—Rom. 12:9.

13. Kungani kufanele sicabange nyalo ngekutsi umbono waJehova utatitsintsa njani tincumo lesitatenta esikhatsini lesitako?

¹³ Nasidadisha, kufanele sicabange ngembono waJehova etindzabeni letitsite, loko kutasisita sente tincumo letikahle esikhatsini lesitako. Nasenta kanjalo, sitakulungela kwenta tincumo letikahle nakufika simo lesidzinga sente tincumo ngekushesha. (Taga 22:3) Ase sicoce ngaletinye tibonelo letiseBhayibhelini.

14. Yini lesiyifundza kulokwentiwa nguJosefa ngesikhatsi umkaPhotifari amncenga kutsi alale naye?

¹⁴ Ngekutsi Josefa angavumi ngesikhatsi umkaPhotifari amncenga kutsi alale naye, wakhombisa kutsi abezindla ngembono waJehova mayelana nekwetsembeka kuloshade naye. (Fundza Genesisi 39:8, 9.) Ngetulu kwaloko, Josefa wakhombisa kutsi abecabanga njengaNkulunkulu. Watsi: “Ngingabenta kanjani lobubi lobungaka, ngone kuNkulunkulu?” Kutsiwani ngatsi? Ase sitsi  umuntfu losebenta naye ucala kwenta tento letikhombisa kutsi uyakutsandza. Yini lotayenta nangabe utfola umlayeto lokhuluma ngetindzaba tekuya ecasini noma sitfombe semuntfu longakagcoki? * Kumelula kakhulu kuhlala setsembekile kuJehova nangabe siwati umbono wakhe, siwemukela futsi sesikwati loko lesitakwenta.

15. Yini lesingayenta kute sihlale setsembekile kuJehove njengobe kwenta lamaHebheru lamatsatfu?

¹⁵ Cabanga ngesibonelo semaHebheru lamatsatfu, boShadraki, Meshaki, na-Abednego. Ngesikhatsi bala ngalokucinile kukhulekela sitfombe seligolide lebesibekwe yiNkhosi Nebukhadnezari futsi bamphendvula ngendlela lecacile, bakhombisa kutsi bebacabangisisile kutsi yini lebekufanele bayente kute bahlale betsembekile kuJehova. (Eks. 20:4, 5; Dan. 3:4-6, 12, 16-18) Ase sitsi umphatsi wakho ucela kutsi unikele ngemali kute kube nemkhosi longamjabulisi Jehova. Yini lobewungayenta? Esikhundleni sekutsi ulindzele kutsi kwenteke intfo lefanako, kukahle kutsi ucabangisise nyalo kutsi Jehova utiva njani ngemikhosi yekukhonta kwemanga. Nangabe kwenteka uhlangabetana nesimo lesinjalo kutawuba melula kutsi uphendvule kahle njengobe kwenta lamaHebheru lamatsatfu.

16. Kuyicondza kahle indlela Jehova lacabanga ngayo kungasisita njani kutsi sisilungele simo semphilo lesiphutfumako?

¹⁶ Kuzindla ngemicabango yaNkulunkulu kungasisita sihlale setsembekile nakuvela simo semphilo lesiphutfumako. Ngisho noma siciniseka kutsi angeke sivume kufakwa ingati noma tincenye tayo letine letiyinhloko, kungahle kudzingeke kutsi sitentele tincumo mayelana netindlela letitsite tekwelashwa kusetjentiswa ingati. Nasenta letincumo kufanele sisebentise timiso teliBhayibheli letikhombisa indlela Jehova lacabanga ngayo. (Imis. 15:28, 29) Ngako sikhatsi lesikahle sekutsi sicabangisise ngaloko akusiko ngesikhatsi sesisesibhedlela, nasisetinhlungwini noma nangabe sicindzetelekile kutsi sente sincumo masinyane. Kubalulekile kutsi ucwaninge nyalo, ugcwalise timphepha letichaza indlela lofuna kwelashwa  ngayo, letifaka ekhatsi likhadi lengati, uphindze ukhulume nadokotela wakho. *

17-19. Kungani kubalulekile kutsi siyifundze nyalo indlela Jehova lacabanga ngayo etimeni letehlukahlukene? Shano sibonelo sesimo lokudzingeka sisilungele.

¹⁷ Cabanga ngendlela Jesu lasheshe wamphendvula ngayo Phetro ngesikhatsi amniketa seluleko lesingakahlakaniphi lebesitsi: “Bani nemusa kuwe Nkhosi.” Jesu bekacabangisisile ngaloko Nkulunkulu bekafuna kutsi akwente kanye nangetiphrofetho lebetimayelana nekuphila nekufa kwakhe. Lakufundza kwamcinisa futsi kwamenta wahlala etsembekile kuJehova waphindze wanikela ngekuphila kwakhe kute kube yinhlawulo yabo bonkhe bantfu.​—Fundza Matewu 16:21-23.

¹⁸ Lamuhla Nkulunkulu ufuna kutsi bantfu babe nebuhlobo lobuhle naye baphindze bawente ngekutimisela umsebenti wakhe. (Mat. 6:33; 28:19, 20; Jak. 4:8) Bantfu labanetisusa letinhle bangetama kusikhweshisa kuJehova njengoba Phetro enta kuJesu. Nasi sibonelo, ase sitsi umphatsi wakho ukukhuphulela esikhundleni lesisetulu futsi ukhuphula nemholo wakho. Yini longayenta nangabe ubona kutsi lesikhundla singakwenta ungasakhoni kwenta tintfo letiphatselene naNkulunkulu? Noma nangabe usafundza, yini longayenta nangabe uniketwa litfuba lekuyotfola imfundvo leyengetiwe khashane nasekhaya. Kuleso simo, ungathantaza yini kuJehova umcele akusite futsi ucele lusito kulabadzala kanye nesemndenini wakho bese wenta sincumo? Kungaba kahle kakhulu kutsi ufundze nyalo kutsi yini Jehova layicabangako ngetimo letinjalo futsi wetame kucabanga ngendlela lacabanga ngayo. Nakungenteka uhlangabetane nesilingo lesifanako esikhatsini lesitako, ungakhona kusincoba. Utawube sewati kutsi yini lokufanele uyente ngoba utawube sewuncumile kutsi utawuhlale unake kukhonta Jehova.

¹⁹ Ungacabanga nangaletinye timo letingenteka ungakatilindzeli. Kuliciniso kutsi angeke sikhone kulungela tonkhe timo lokungenteka sihlangabetane nato. Kodvwa nangabe sizindla ngendlela Jehova lacabanga ngayo nasidadisha, sitawukhona kukhumbula loko lesakufundza futsi sikusebentise nangabe kuvela simo lesitsite. Ngako asinake indlela Jehova lacabanga ngayo etimeni letehlukene bese sicabanga njengaye siphindze sicabange ngekutsi kuba nembono waNkulunkulu kutatitsintsa njani tincumo lesitentako nyalo kanye nalesitawutenta esikhatsini lesitako.

20, 21. (a) Kungani sitakujabulela kuba nenkhululeko epharadisi? (b) Singayitfola njani injabulo nyalo?

²⁰ Silibuke ngalabovu live lelisha. Labanyenti betfu bayakulangatelela kuphila phakadze emhlabeni lolipharadisi. Nasekubusa uMbuso waNkulunkulu bantfu batawukhululeka kuletintfo letimbi letenteka kulelive lesiphila kulo. Ngisho noma sesisepharadisi, bantfu batawuchubeka banenkhululeko yekutikhetsela. Nguloyo naloyo utawutentela tincumo, kuye ngetintfo latitsandzako nalatifisako.

²¹ Inkhululeko lesitawuba nayo itawuba nemincele. Bantfu labalungile batawucondziswa yimitsetfo yaJehova nendlela lacabanga ngayo kute bakhone kwehlukanisa lokulungile nalokungakalungi. Loko kutawubenta bajabule futsi babe nekuthula. (Hla. 37:11) Njengobe sisalindzele kufika kwaleso sikhatsi, singatfola injabulo nangabe sicabanga ngendlela Jehova lacabanga ngayo.