NGIYAJABULA kutsi ngakhuliswa batali labangemaKhristu, boFred na-Edna Molohan, labangifundzisa kutsandza Jehova. Ngatalwa nga-1934 futsi batali bami besebaneminyaka lengu-20 babaFundzi BeliBhayibheli labakhutsele, njengoba BoFakazi BaJehova bebabitwa kanjalo ngaleso sikhatsi. Besihlala eParsons, lidolobha lelincane leliseningizimu yeKansas. Ebandleni besihlanganyela kulo cishe bonkhe bazalwane bebagcotjiwe. Umndeni wakitsi bewukujabulela kuya emihlanganweni yelibandla kanye nekushumayela liciniso leliseBhayibhelini. Njalo ngaboMgcibelo ntsambama besivamise kushumayela etindzaweni tawonkhe wonkhe lebekubitwa ngekutsi ngumsebenti wamagazini. Ngaletinye tikhatsi besisuke sidziniwe nasicedza umsebenti wekushumayela, kodvwa babe bekavame kusitsengela i-ice cream.

Libandla besihlanganyela kulo belilincane, kodvwa belinensimu lenkhulu lebeyihlanganisa emadolobha lamancane nemapulazi lamanyenti. Nasishumayela emapulazini, bantfu lebesibanika tincwadzi bebangakhiphi imali kodvwa bebasinika tibhidvo lebebatilima, emacandza noma tinkhukhu letiphilako. Loku besikudla ngobe babe besekavele atinikelele letincwadzi.

Batali bami bebane-phonograph labebayisebentisa emsebentini wekushumayela. Bengingakhoni kuyisebentisa ngoba bengisemncane, kodvwa bengikujabulela kusita batali bami nabalalelisa bantfu labebabuyela kubo kanye netifundvo tabo teliBhayibheli tinkhulumo temzalwane Rutherford.

Babe wafaka speaker lesikhulu etikwemoto yakhe futsi loko bekusita ekusakateni umlayeto weMbuso. Besivamise kucale sidlale umculo lotsetjuliwe kuze bantfu bawulalele bese sesidlala  inkhulumo yeliBhayibheli. Naseyiphelile inkhulumo besiniketa bantfu tincwadzi.

Edolobheni lelincane laseCherryvale, eKansas emaphoyisa awazange asivumele sishumayele e-park ngemoto ngoba bantfu labanyenti basuke batiphumulele ngemaSontfo ekuseni, kodvwa atsi singashumayela ngephandle. Savele saphuma ngemoto saya esitaladini lesimacondzana ne-park lapho bantfu bebatawuchubeka bawuva kamelula umlayeto. Bengihlale ngikujabulela kushumayela nababe nemnaketfu lomdzala Jerry.

Ngabo-1930 sangenela umkhankaso lokhetsekile wekuhlanganisa insimu lengakabelwa endzaweni lapho besiphikiswa khona. Besivuka entsatsakusa sifake emapheshana noma tincwajana ngaphasi kwetivalo emakhaya, njengobe besenta eJoplin, eMissouri. Ngemuva kwaloko besihlangana ngaphandle kwelidolobha kute sibone kutsi kute yini loboshwe ngemaphoyisa.

Kuleyo minyaka, lenye indlela yekushumayela ngeMbuso lebesiyijabulela bekukuhamba ngelilayini eceleni kwemgwaco silandzelana. Ngikhumbula ngalelinye lilanga edolobheni bazalwane nabodzadze bagabe emabhodi lanesihloko lesitsi, “Inkholo Ilugibe Kanye Nelibhizinisi Lelingekho Emtsetfweni.” Bahamba emakhilomitha langu-1.6 edolobheni futsi base baya ekhaya kitsi. Kuyajabulisa kutsi kute lokwabaphazamisa futsi batfola bantfu labanyenti labatsandza kulalela umlayeto weMbuso.

Besivame kusuka eKansas siye emhlanganweni wesifundza eTexas. Babe bekasebenta eMissouri-Kansas-Texas Railroad (lebeyatiwa ngekutsi yi-M-K-T, noma iKaty, Railroad), ngako besivamise kugibela mahhala esitimeleni nasivakashela bangani betfu noma siya emihlanganweni yesifundza. Malume Fred Wismar, nemkakhe Eulalie, bebahlala eTemple, eTexas. Ngabo-1900 malume watfola emaciniso asemusha futsi wabhajatiswa, wase ucocela bantfwabakubo tindzaba letimnandzi, lokufaka ekhatsi make. Bonkhe bazalwane baseCentral Texas bebamati ngoba bekake waba ngumbonisi wesifundza (nyalo lobitwa ngekutsi ngumbonisi wesigodzi). Malume bekanemusa, ahlala ajabulile futsi bekuhlale kumnandzi kuba naye. Bekalitsandza liciniso futsi waba sibonelo lesihle kimi nangisemusha.

Nga-1941 mine nemndeni wakitsi saya emhlanganweni wesifundza lobewuse-St. Louis, eMissouri. Bantfu labasha bacelwa kutsi bahlale ndzawonye eceleni kwesiteji kuze balalele inkhuluo yemzalwane Rutherford lebeyinesihloko lesitsi “Children of the King.” Nayiphela lenkhulumo, umzalwane Rutherford nebasiti bakhe basipha tincwadzi lebetinesihloko lesitsi Children. Sesisonkhe besingetulu kwa-15,000.

Nga-April 1943 saya emhlanganweni lobewunesihloko lesitsi “Call to Action” lobewuseCoffeyville eKansas. Kwentiwa simemetelo sekutsi  onkhe emabandla sekatawuba ne-Sikolwa Semsebenti WemaKhristu. Kwaphindze kwakhululwa incwajana lenetifundvo letingu-52 lebeyitawusetjentiswa kulesikolwa. Nasekutophela umnyaka, ngabeka inkhulumo yami yekucala kulesikolwa. Lomhlangano bewubaluleke kakhulu kimi ngoba ngabhajatiswa edanyini lelisedvutane.

Ngacedza sikolwa nga-1951 futsi bekufanele ngincume kutsi ngitawentani ngekuphila kwami. Sifiso sami besikutsi ngiyosebenta eBethel lapho khona umnaketfu Jerry bekake wasebenta khona, ngako sicelo sami satfunyelwa emahhovisini laseBrooklyn. Lesincumo lengasenta sangenta ngaba nebuhlobo lobuhle naJehova. Ngekushesha, sicelo sami semukelwa futsi ngacala kusebenta eBethel nga-March 10, 1952.

Bengifisa kuyosebenta lapho kushicilelwa khona tincwadzi futsi ngibe nesandla ekwakhiweni kwabomagazini naletinye tincwadzi. Kodvwa ngabelwa kutsi ngibe nguweta, futsi ngekuhamba kwesikhatsi ngabelwa kutsi ngiyosebenta ekhishini. Bengikujabulela kakhulu kusebenta lapho futsi ngafundza tintfo letinyenti. Angizange ngilitfole lilungelo lekuyosebenta lapho kushicilelwa khona tincwadzi. Besishintjana emsebentini futsi ngaletinye tikhatsi bengingasebenti emini. Bengivame kuya emtatjeni wetincwadzi loseBethel futsi bengifundza tincwadzi letinyenti. Loko kwangisita ngaba nebuhlobo lobuhle naJehova futsi ngaba nekukholwa lokucinile. Kwaphindze kwangenta ngatimisela kusebenta sikhatsi lesidze eBethel. Jerry wahamba eBethel nga-1949 washada naPatricia futsi bebahla eceleni kwaseBrooklyn. Bebahlale bangisita futsi bangikhutsata nangisafika eBethel.

Nangisandza kufika eBethel bazalwane bebafuna kwengenta tikhulumi taseBethel letitawuvakashela emabandla. Bazalwane lebebatawukhetfwa bebatawuvakashela emabandla lakhashane ngemakhilomitha langu-322 kusuka eBrooklyn kuze bayobeka tinkhulumo futsi basebente nemabandla emsebentini wekushumayela. Ngaba ngulomunye webazalwane labakhetfwa. Bengesaba, kodvwa ngakhona kubeka inkhulumo yami yekucala leyatsatsa li-awa. Bengivame kuhamba ngesitimela nangiyovakashela emabandla. Ngikhumbula ngalobunye busika kuliSontfo ntsambama, ngagibela sitimela lesiya eNew York futsi bengitawufika eBethel entsambama. Kodvwa kwaba nesiphepho lesikhulu kwaba nelichwa. Injini yesitimela yayekela kusebenta futsi loko kwangenta ngafika eNew York nga-5 ekuseni ngeMsombuluko. Ngahamba ngetinyawo ngaya eBrooklyn futsi ngavele ngacondza emsebentini wami lobewusekhishini. Ngephuta kufika futsi bengidzinwe kakhulu ngoba bengihleli kwaze kwasa esitimeleni.

Nangisafika eBethel ngatfola sabelo sekutsi ngisite esiteshini semsakato we-WBBR. Le-studio besisetezi sesibili se-124 Columbia Heights. Umzalwane A.  H. Macmillan lobekanesikhatsi lesidze alilunga lemndeni waseBethel bekasita kuletinhlelo talomsakato. Bekatiwa ngekutsi ngumzalwane Mac futsi bekasibonelo lesihle kakhulu kubazalwane labasandza kufika eBethel sekucinisela emsebentini waJehova.

Nga-1958 ngatfola simemo sekusita eSikolweni saseGileyadi. Ngabelwa kutsi ngisite bazalwane nabodzadze labakhutsele labaphotfulako kutsi batfole ema-visa labebatawadzinga nabaya etabelweni tabo kanye nekwekuhamba. Bekudule kakhulu kuhamba ngendiza ngaleso sikhatsi, futsi bancane kakhulu bafundzi labebahamba ngayo. Labanyenti labebaya e-Africa nase-Asia bebahamba ngemikhumbi. Ngemuva kweminyaka kugibela tindiza kwabese kuyashipha futsi titfunywa telivangeli letinyenti betihamba ngendiza natiya etabelweni tato.

Nga-1960 ngasita ekuhleleleni bazalwane tindiza letisuka eMelika tiye emhlanganweni wetive lobewuse-Europe nga-1961. Nami ngagibela  indiza lesuka eNew York iye eHamburg, leseGermany kuze ngiye kulomhlangano. Nakuphela umhlangano, mine kanye nalabanye bazalwane labatsatfu labasuka eBethel sarenta imoto saya kuyovakashela ligatja laseRome lelise-Italy. Nasisuka lapho, saya eFrance futsi sahamba e-Pyrenees Mountains saya naseSpain lapho khona umsebenti wekushumayela bewunjelwe khona. Sakhona kuniketa bazalwane betfu baseBarcelona tincwadzi futsi besitigocotele taba ngatsi tipho. Sajabula kakhulu kubabona! Saphindze sabuyela e-Amsterdam sase sigibela indiza lebuyela eNew York.

Ngemuva kwemnyaka, umsebenti wami waseBethel waphindze wafaka ekhatsi kwenta emalungiselelo ekutsi bazalwane labakhetsiwe baye emihlanganweni yetive yanga-1963 lebeyinesihloko lesitsi, “Everlasting Good News.” Kwentiwa emalungiselelo ekutsi bazalwane labangu-583 baye e-Europe, e-Asia, eSouth Pacific futsi baye eHonolulu, eHawaii, kanye nasePasadena, eCalifornia. Saphindze saya eLebanon naseJordan ngoba besifundza ngetindzawo lokukhulunywa ngato eBhayibhelini. Ngephandle kwekuhlela kutsi batawugibela tiphi tindiza nekutsi batawuhlala kumaphi emahhotela, litiko letfu laseBethel labalungisela ema-visa kuwo onkhe lamave lesaya kuwo.

Nga-June 29 1963 kwaba lilanga lelikhetsekile ngoba ngashada naLila Rogers waseMissouri lebesekuphele iminyaka lemitsatfu alilunga lemndeni waseBethel. Ngemuva kweliviki sishadile, mine naLila saya eGreece, e-Egypt, kanye naseLebanon. Nasisuka e-Beirut saya eJordani. Besingati kutsi kutawentekani nasifika kulelive ngoba umsebenti waBoFakazi BaJehova bewuvinjelwe futsi bebanganikwa ema-visa. Sajabula kakhulu nasibona licembu lebazalwane nabodzadze litosihlangabeta esikhumulweni setindiza futsi liphetse libhodi lelikhulu lelibhalwe kutsi bayasemukela! Kwasijabulisa kakhulu kubona tindzawo lokukhulunywa ngato eBhayibhelini! Savakashela tindzawo lapho bekuhlala khona Abrahama, Isaka kanye naJakobe, lapho Jesu nebaphostoli bebashumayela khona, kanye nalapho buKhristu bacala khona kwandza kuto tonkhe tincenye temhlaba.​—Imis. 13:47.

Kuleminyaka lengu-55 leyengcile, Lila bekasolo angisekela kunoma ngusiphi sabelo lesisitfolako. Sikhonile kuvakashela eSpain nasePortugal tikhatsi letinyenti ngisho nome umsebenti wetfu bewuvinjelwe kuletindzawo. Sikhutsate nebazalwane nabodzadze futsi sabaniketa tincwadzi kanye naletinye tintfo labatidzingako. Sikhonile nekuvakashela bazalwane betfu lababoshiwe eCádiz, eSpain. Kwangijabulisa kakhulu kutsi ngakhona kubabekela inkhulumo leyabakhutsata.

Kusukela nga-1963 ngibe nelilungelo lekuhlela kuvakasha emihlanganweni yetive lebeyise-Africa, e-Australia, eCentral naseSouth America,  e-Europe, e-Asia, eHawaii, eNew Zealand, kanye nasePuerto Rico. Kunemihlangano yesifundza mine naLila lesingayuze siyikhohlwe, lomunye wayo bewuseWarsaw, ePoland, nga-1989. Bazalwane nabodzadze labanyenti baseRussia bebacala kuya emhlanganweni lomkhulu futsi labanyenti babo besekuphele iminyaka leminyenti baboshiwe emajele aseSoviet ngenca yekukholwa kwabo.

Silijabulele kakhulu lilungelo lekuvakashela imindeni yaseBethel kanye netitfunywa telivangeli kuze sitikhutsate. Sagcina ngekuvakashela ligatja laseSouth Korea futsi sakhona kubona bazalwane betfu labangu-50 ejele leliseSuwon. Bonkhe labazalwane banembono lofanele futsi bayakulangatelela kuphindze bente umsebenti wekushumayela. Kubabona kwasikhutsata kakhulu!​—Rom. 1:11, 12.

Ngiyibonile indlela Jehova lababusise ngayo bantfu bakhe eminyakeni leyendlulile. Bekunebamemeteli labacishe babe ngu-100 000 nangibhajatiswa nga-1943. Nyalo sekunebamemeteli labangetulu kwa-8 000 000 emaveni langu-240. Kutikhandla kwebafundzi labaphotfule eGileyadi kusifakile sandla kulokwandza. Kungijabulisa kakhulu kusebenta edvute netitfunywa telivangeli futsi ngitisite tikhone kufika etabelweni tato.

Ngijabula kakhulu ngekutsi ngenta sincumo sekwandzisa umsebenti lengiwentela Jehova ngekutsi ngiyosebenta eBethel. Kuyo yonkhe leminyaka, Jehova ungibusise kakhulu. Ngetulu kwenjabulo lesiyitfole ngekwenta umsebenti waseBethel, mine nemkami sijabulele lilungelo lekushumayela nemabandla aseBrooklyn iminyaka lengetulu kwa-50 futsi sitfole bangani labanyenti beliciniso.

Ngiyakhona kuchubeka ngisebenta eBethel ngoba Lila ungisekela onkhe malanga. Ngisho noma sengineminyaka lengetulu kwa-84, ngisakhona kwenta umsebenti wami waseBethel, lofaka ekhatsi kuphendvula kanye nekutfumela imilayeto.

Kujabulisa kakhulu kuba senhlanganweni yaJehova lemangalisako kanye nekubona kugcwaliseka kwemBhalo waMalakhi 3:18 lotsi: “Niyawuphindze niwubone kahle umehluko emkhatsini walabalungile nalababi, ngisho emkhatsini walabo labakhonta Nkulunkulu nalabo labangamkhonti.” Onkhe malanga live laSathane liyachubeka nekuba libi kakhulu. Loku kwenta bantfu bangajabuli futsi babe bete litsemba. Kodvwa bantfu labatsandza Jehova nalabamkhontako bayajabula futsi banelitsemba lelihle ngelikusasa. Kulilungelo lelikhulu kushumayela tindzaba letimnandzi teMbuso. (Mat. 24:14) Siyakulangatelela kufika kwesikhatsi lapho khona uMbuso waNkulunkulu utawubhubhisa lelive lelibi futsi singene eveni lelisha lapho khona sitawuphila saka futsi sijabule kuze kube phakadze.