1, 2. (a) Kwehluleka kutibamba kungaba namiphi imiphumela? (b) Kungani kutibamba kubalulekile lamuhla?

KUTIBAMBA kungulesinye setitselo temoya. (Gal. 5:22, 23) Jehova uyisebentisa kahle imfanelo yekutibamba. Kodvwa bantfu balwa kamatima kute batibambe ngobe banesono. Lamuhla, tinkinga letinyenti bantfu labanato tibangwa kutsi abakhoni kutibamba. Loko kubangela bantfu kutsi bangatenti tintfo lokufanele batente futsi kubenta bangaphumeleli esikolweni noma emsebentini. Kungaphindze kubangele kukhuluma kabi, kudzakwa, budlova, idivosi, tikwenedi, kuba ngumlutsa, kuboshwa, kucindzeteleka, tifo letitfolakala ngekuya ecasini kanye nekukhulelwa.​—Hla. 34:11-14.

² Kuyacaca kutsi bantfu labehluleka kutibamba batibangela bona tinkinga baphindze babangele nalabanye. Inkinga yekwehluleka kutibamba iyachubeka yandza. Ngabo-1940, kwentiwa lucwaningo lolumayelana nekutibamba, kodvwa lucwaningo lolusandza kwentiwa lukhomba kutsi bantfu sebehluleka mbamba kutibamba. Loku akubamangalisi bafundzi beliVi laNkulunkulu ngoba liBhayibheli labiketela kutsi “emalangeni ekugcina” bantfu bebatawehluleka ‘kutibamba.’​—2 Thim. 3:1-3.

3. Kungani emaKhristu kufanele alwele kutibamba?

³ Kungani kufanele silwele kutibamba? Cabanga nganati tizatfu  letimbili letibalulekile. Kwekucala, bantfu labakhonako kutibamba bavamise kungabi netinkinga letimatima. Bayakhona kubhekana nekucindzeteleka, kumelula kwakha bungani futsi abahlali batfukutsele noma bakhatsatekile njengebantfu labangakhoni kutibamba. Kwesibili, kuze semukeleke kuNkulunkulu kubalulekile kutsi sibe nelikhono lekumelana netilingo kanye nekutibamba. Kwehluleka kwabo-Adamu na-Eva kutibamba kukhombisa kutsi loku kuliciniso. (Gen. 3:6) Cabanga nangemiphumela lebuhlungu labanye lababhekene nayo ngenca yekwehluleka kutibamba.

4. Yini lengakhutsata bantfu labakutfola kumatima kutibamba?

⁴ Kute umuntfu lonesono longakhona kutibamba ngalokuphelele. Jehova uyayibona imetamo yetinceku takhe futsi uyafuna kutisita kutsi tincobe butsakatsaka bato. (1 Khos. 8:46-50) NjengeMngani lositsandzako, ukhutsata tinceku takhe leticotfo letifuna kumkhonta ngisho nome tikutfola kumatima kutibamba. Ase sicoce ngesibonelo lesihle Jehova lasibekela sona. Sitawuphindze sifundze ngetibonelo letinhle naletimbi letiseBhayibhelini, kanye netintfo letingasisita sitfutfukise likhono letfu lekutibamba.

5, 6. Ngusiphi sibonelo Jehova lasibekela sona mayelana nekutibamba?

⁵ Jehova uyisebentisa kahle imfanelo yakhe yekutibamba ngoba tonkhe tintfo utenta kahle. (Dut. 32:4) Kepha tsine sinesono. Kuhlolisisa sibonelo saJehova kungasisita sikhone kumlingisa kancono, futsi sikhone kucondza imfanelo yekutibamba. Ngutiphi timo lapho Jehova akhombisa khona kutibamba?

⁶ Cabanga ngendlela Jehova lakhombisa ngayo kutibamba ngesikhatsi Sathane avukela. Lena bekuyinkinga Nkulunkulu bekufanele ayicatulule. Kuliciniso kutsi lokuvukela kwaSathane kwatimangalisa tinceku taNkulunkulu letetsembekile futsi kwativisa buhlungu. Kungenteka nawe utiva ngendlela lefanako nawucabanga ngako konkhe kuhlupheka lokubangelwe nguSathane. Kodvwa Jehova akazange ambhubhise ngaleso sikhatsi. Leso bekusincumo lesihle futsi besifaneleka. Uyephuta kutfukutsela futsi wakusingatsa kahle kuvukela kwaSathane. (Eks. 34:6; Jobe 2:2-6) Lesinye sizatfu lesente Jehova wabeketela kutsi akafuni kubhubhe ngisho namunye, kepha “ufisa kutsi bonkhe bantfu baphendvuke.”​—2 Phet. 3:9.

7. Yini lesiyifundza esibonelweni saJehova?

⁷ Sibonelo saJehova sekutibamba sisifundzisa kutsi natsi kufanele sikunakisise lesikukhulumako nalesikwentako; akukafaneli sente tintfo ngekuphamatela. Nawubhekene nesimo lesitsite, tinike sikhatsi sekucabangisisa kuze wente ngekuhlakanipha. Thantaza kuJehova ucele kuhlakanipha kuze wente sincumo lesikahle. (Hla. 141:3) Nawusekhubekile kulula kwenta intfo lobewungeke uyente. Bantfu labanyenti baye batisole ngetintfo labatikhulumile noma labatente batfukutsele!​—Taga. 14:29; 15:28; 19:2.

8. (a) Singatitfolaphi tibonelo tebantfu labalingisa buntfu baNkulunkulu? (b) Yini leyenta Josefa wabaleka ngesikhatsi umkaPhotifari etama kumbamba? (Buka sitfombe lesisekucaleni.)

⁸ Ngutiphi tibonelo letiseBhayibhelini letichaza kubaluleka kwekulawula loko lesikwentako? Asingabati kutsi bakhona bantfu lokukhulunywa ngabo eBhayibhelini lobakhumbulako labakhona kumelana nekuvivinywa. Lomunye wabo nguJosefa  indvodzana yaJakobe. Watibamba ngesikhatsi asebenta endlini yaPhotifari lobekayindvuna yabogadzi besigodlo. UmkaPhotifari wahawukela Josefa ‘lobekamuhle futsi alikhwa,’ wamncenga kutsi alale naye. Yini leyasita Josefa kutsi angavumi ngisho noma sekamncenge kanyenti? Asingabati kutsi wacabangisisa ngemiphumela lebeyitawuba khona kube wavuma. Ngesikhatsi etama kumbamba, wabaleka. Watsi: “Ngingabenta kanjani lobubi lobungaka, ngone kuNkulunkulu?”​—Gen. 39:6, 9; fundza Taga 1:10.

9. Ungatilungiselela njani kubhekana nekulingwa?

⁹ Sifundzani esibonelweni saJosefa? Sifundza kutsi kufanele sitibalekele tilingo letitasenta sephule imitsetfo yaNkulunkulu. Ngaphambi kwekutsi babe BoFakazi, bantfu labanyenti kudzingeke balwe kamatima kuze bayekele kuba timiti, tidzakwa, kubhema, kusebentisa kabi tidzakamiva, kutiphatsa lokubi kwelicasi kanye nalokunye. Ngisho sebabhajatisiwe, ngaletinye tikhatsi bangahle balingeke kutsi babuyele emikhubeni yabo lebebayenta. Noma kunjalo, nawulingwa kutsi wephule umtsetfo waJehova, cabangisisa ngemiphumela lebuhlungu longahlangabetana nayo ngekwehluleka kuncoba imicabango lemibi. Loku kungakusita kutsi utfole emandla ekubhekana nesilingo. Yetama kubona timo letingakufaka esilingweni futsi ubone kutsi ungatigwema njani. (Hla. 26:4, 5; Taga 22:3) Nakwenteka ubhekana neluvivinyo, thantaza kuJehova ucele kuhlakanipha kuze ukhone kutibamba.

10, 11. (a) Yini bantfu labasha lababhekana nayo esikolweni? (b) Yini lengasita emaKhristu lasemasha kutsi akhone kubhekana nekucindzetelwa bontsanga?

¹⁰ EmaKhristu lamanyenti lasemasha abhekana nesilingo lesifana nesaJosefa. Cabanga ngesibonelo saKim. Bantfwana labefundza nabo bebaya ecasini futsi ngemuva kwalenye imphelasontfo bebacoca ngako. Kim yena bekangati lutfo ngaloko. Wavuma kutsi ngalesinye sikhatsi bekativa “alahliwe futsi anesitunge” nekutsi bangani bakhe bebatsi ulibele ngoba abengajoli. Noma kunjalo, Kim bekahlakaniphile futsi bekati kutsi linyenti lebantfu labasha libhekana nesilingo sekuya ecasini. (2 Thim. 2:22) Bantfwana labefundza nabo bebahlale bambuta kutsi akazange yini sekaye ecasini. Lelo kwaba litfuba lelikahle lekubachazela kutsi kungani bekangakwenti loko. Siyatigcabha ngemaKhristu lasemasha latimisele kumelana nekucindzetelwa kwekutiphatsa lokubi kwelicasi futsi naJehova uyajabula ngawo!

¹¹ LiBhayibheli lisitjela ngetibonelo tebantfu labatiphatsa kabi ngekwelicasi ngenca yekwehluleka kutibamba. Liphindze lisecwayise ngemiphumela lemibi lengaba khona ngenca yekwehluleka kutibamba. Nakwenteka ubhekana nesimo lesifana nesaKim kuhle kucabangisisa ngesibonelo selijaha lelilibele lokukhulunywa ngalo embhalweni weTaga sehluko 7. Cabangisisa nangesento sa-Amnoni kanye nemiphumela lemibi labhekana nayo. (2 Sam. 13:1, 2, 10-15, 28-32) Batali bangasita bantfwababo kutsi bafundze kuhlakanipha kanye nekutibamba endzabeni yekutsandzana nalotsite ngekutsi bacoce ngaloko ekukhonteni kwemndeni basebentisa tibonelo letiseBhayibhelini lesisandza kucoca ngato.

12. (a) Josefa wakhombisa njani kutibamba ngesikhatsi anabomnakabo? (b) Kukutiphi timo lapho kudzingeka khona kutibamba?

¹² Josefa uphindze asibekele sibonelo lesihle sekutibamba. Josefa akativetanga kubomnakabo ngesikhatsi batotsenga  kudla eGibhithe kuze atfole lebekusetinhlitiyweni tabo. Ngesikhatsi eva buhlungu, waya endzaweni lesitsele, wafike wakhala. (Gen. 43:30, 31; 45:1) Nangabe umKhristu lesikanye naye noma umuntfu lesimtsandzako asehlulela kabi, kutibamba lokufana nekwaJosefa kungasisita kutsi singenti tintfo singakacabangi. (Taga 16:32; 17:27) Nangabe unesihlobo lesiyekeliswe kuba nguFakazi, kubalulekile kutibamba kute ugweme kutihlanganisa naso ngephandle kwesizatfu. Etimeni letinjalo, ngeke kutentakalele kutsi sitibambe, kodvwa kutawuba melula nangabe tentfo tetfu tivumelana nesibonelo saNkulunkulu futsi tihambisana neseluleko sakhe.

13. Yini lesiyifundzako kulokwenteka eNkhosini Davide?

¹³ LiBhayibheli liphindze likhulume ngesibonelo seNkhosi Davide. Beyinemandla, kodvwa ayizange iwasebentise kabi ngesikhatsi itfukutseliswa nguSawula naShimeyi. (1 Sam. 26:9-11; 2 Sam. 16:5-10) Akusho kutsi ngaso sonkhe sikhatsi Davide abekhona kutibamba, loko sikubona esonweni lasenta naBhatisheba kanye nalebekafuna kukwenta kuNabali. (1 Sam. 25:10-13; 2 Sam. 11:2-4) Noma kunjalo, singafundza sifundvo lesibalulekile kuDavide. Kwekucala, babonisi kufanele batibambe kuze bangalisebentisi kabi ligunya labo. Kwesibili, kute lokufanele atitjele kutsi ngeke abhekane nesilingo.​—1 Khor. 10:12.

14. Yini leyenteka kulomunye umzalwane, futsi kubaluleke ngani kutsi natsi sitibambe nasibhekene nesimo lesifanako?

¹⁴ Yini longayenta kute ufundze kutibamba? Cabanga nganasi simo lesenteka mbamba. Lenye imoto yashayisa imoto yaLuigi. Ngisho noma lomshayeli kunguye lebekaneliphutsa, wametfuka futsi wetama kumlwisa. Luigi wathantaza, wacela Jehova kutsi amsite akhone kutibamba, futsi wetama kusita lomshayeli kutsi naye ehlise umoya kodvwa wehluleka. Ngesikhatsi lendvodza isatsetsa, Luigi wabhala inombolo yalemoto kuze akhone kutfola umshwalensi, wase uyahamba. Ngemuva kweliviki, Luigi wabuyela kulomunye make labecoce naye ngeliBhayibheli futsi watfola kutsi lomake ngumfati walendvodza leyashayisa imoto yakhe. Lendvodza yadliwa ngemahloni yaze yacolisa ngalebeyikwentile. Yatsi itawushayela inkampani yemshwalensi kute isheshe imsite. Lendvodza yaba khona nabafundza nalomake futsi yajabula ngaloko leyakufundza. Ngekuhamba kwesikhatsi Luigi wakubona kubaluleka kwekutsi atibambe, futsi wacabanga nangemphumela lobuhlungu lobewutawuba khona kube wehluleka kutibamba.​—Fundza 2 Khorinte 6:3, 4.

15, 16. Kudadisha liBhayibheli kungakusita njani wena kanye nemndeni wakho kutsi nifundze kutibamba?

¹⁵ Kudadisha liBhayibheli ngekucophelela nangekutimisela kungasita emaKhristu kutsi afundze kutibamba. Khumbula kutsi Jehova watsi kuJoshuwa: “Emavi alencwadzi yemtsetfo angesuki emlonyeni wakho; uyawucabangisisa ujule kuwo busuku nemini, kuze ukhone kukwenta konkhe loku lokubhalwe kuwo; khona-ke uyawuphumelela kube kuhle kuwe.” (Jos 1:8) Kudadisha liBhayibheli kungakusita njani ukhone kutibamba?

¹⁶ Njengobe sesifundzile, liBhayibheli linetibonelo letisikhombisa ngalokucacile tinzuzo tekutibamba kanye nemiphumela lebuhlungu yetento tetfu. Jehova wabhala letindzaba kuze sifundze kuto. (Rom. 15:4) Ngako kukuhlakanipha kutsi  sitifundze, sizindle ngato, futsi sitidadishe. Yetama kubona kutsi ungatisebentisa njani wena kanye nemndeni wakho. Cela Jehova akusite ukhone kusebentisa lokushiwo liVi lakhe. Vuma kutsi ngaletinye tikhatsi utawuhle wehluleka kutibamba, bese uyathantaza ngako futsi ulwele kutfutfuka. (Jak. 1:5) Asingabati kutsi etincwadzini tetfu tebuKhristu utawutfola tintfo letingakusita uchubeke utfutfuka.

17. Batali bangabasita njani bantfwana babo kutsi bafundze kutibamba?

¹⁷ Ungabasita njani bantfwana bakho kutsi bakhone kutibamba? Batali bayati kutsi akutentakaleli kutsi bantfwana bakhone kutibamba. Njengato tonkhe timfanelo, batali kufanele babe sibonelo lesihle sekutibamba. (Ef. 6:4) Nangabe ubona kutsi bantfwana bakho bayehluleka kutibamba, kufanele utibute kutsi wena usibonelo lesihle yini kubo. Ungayibukeli phasi imiphumela lemihle yekuya njalo ensimini nasemihlanganweni. Ungesabi kungatemukeli letinye ticelo tebantfwana bakho nangabe kudzingeka. Jehova wababekela imincele bo-Adamu na-Eva futsi lemincele beyitabenta balihloniphe ligunya lakhe. Ngendlela lefanako, kuyala bantfwana bakho kanye nekubabekela sibonelo kungabasita bafundze kutibamba. Kubaluleke kakhulu kufundzisa bantfwana bakho kutsi balihloniphe ligunya laJehova futsi batitsandze timiso takhe.​—Fundza Taga 1:5, 7, 8.

18. Yini lengakwenta uciniseke kutsi kutihlanganisa nebantfu labakahle kutakuletsela tibusiso?

¹⁸ Ngisho noma ungumtali nobe ungesuye, kufanele usinake sidzingo sekubakhetsa ngekuhlakanipha bantfu lotihlanganisa nabo. Tihlanganise nebantfu labatokusita utibekele imigomo lemihle futsi ubalekele tinkinga. (Taga 13:20) Kutihlanganisa nebantfu labavutsiwe kutakwenta ulingise sibonelo sabo sekutibamba. Asingabati nekutsi sibonelo sakho lesihle sitabakhutsata labanye. Kutibamba kubalulekile kute uhlale ujabulile ekuphileni, wemukeleka kuNkulunkulu, futsi uphilisane kahle nalabanye.