1. Nguyiphi indlela lekhetsekile Jehova lativeta ngayo kuMosi, futsi kungani loko kubalulekile?

NGALELINYE lilanga, Jehova wativeta kuMosi wamtjela libito lakhe kanye nebuntfu bakhe. Wacala watsi unesihawu nemusa. (Fundza Eksodusi 34:5-7.) Jehova bekangamtjela ngemandla noma ngekuhlakanipha kwakhe. Kute acinisekise Mosi kutsi uyabakhatsalela bantfu bakhe, wagcizelela buntfu bakhe lobukhombisa kutsi uyafisa kubasita. (Eks. 33:13) Akukujabulisi yini kutsi Nkulunkulu wativeta kucala letimfanelo? Lesihloko sitawukhuluma ngesihawu, lokusho kuvelana nalabahluphekako futsi ube nesifiso sekubasita.

2, 3. (a) Yini lekhombisa kutsi bantfu badalwa banesihawu? (b) Kungani kufanele wati kutsi liBhayibheli litsini ngesihawu?

² Bantfu bangumfanekiso waNkulunkulu. Ngenca yekutsi Jehova unesihawu, kungokwemvelo kutsi bantfu babe naso futsi ngaletinye tikhatsi ngisho nebantfu labangamati bayasikhombisa sihawu. (Gen. 1:27) EBhayibhelini kunetindzaba letinyenti tebantfu labebanesihawu. Cabanga ngebafati lababili lebebaphikisana embikwaSolomoni ngekutsi ngubani make walomntfwana lophilako. Ngesikhatsi Solomoni atsi lomntfwana  akasikwe ekhatsi, make wakhe watsintseka waba nesihawu ngemntfwanakhe. Luvelo lwamenta wanconota kumnika lolomunye umfati. (1 Khos. 3:23-27) Khumbula nendvodzakati yaFaro leyasindzisa Mosi lobekaluswane. Nakuba yabona kutsi loluswane belungumHebheru futsi bekufanele lubulawe, “yaluhawukela” yaphindze yancuma kutsi ilukhulise njengemntfwanayo.​—Eks. 2:5, 6.

³ Kungani kufanele ube nesihawu neluvelo? Kungoba liBhayibheli lisincusa kutsi silingise Jehova. (Ef. 5:1) Nakuba bantfu badalelwa kutsi babe nesihawu, sono lesasitfola ku-Adamu siyasivimba kutsi sibe nesihawu. Ngaletinye tikhatsi kuba matima kutsi sikhetse emkhatsini wekusita labanye bantfu noma sitinake tsine. Kulabanye kulukhuni mbamba kusita labanye. Yini lengakusita ukhone kusita labanye uphindze ubatsandze. Kwekucala, tinike sikhatsi uhlolisisa indlela Jehova lakhombise ngayo sihawu kanye nekutsi labanye basikhombise njani. Kwesibili, cabanga ngendlela longalingisa ngayo sibonelo saNkulunkulu nekutsi loko kungakuzuzisa kanjani.

4. (a) Kungani Jehova atfumela tingilosi eSodoma? (b) Yini lesiyifundza endzabeni yaLoti kanye nemadvodzakati akhe?

⁴ Tinyenti tikhatsi lapho khona Jehova akhombisa luvelo. Cabanga ngaloko Jehova lakwentela Loti. Lendvodza lebeyilungile ‘beyicindzeteleke kakhulu’ ngenca yekutiphatsa lokubi kwekweyisa kwebantfu baseSodoma naseGomora. Nkulunkulu wancuma kubabhubhisa labantfu lababi. (2 Phet. 2:7, 8) Nkulunkulu watfumela tingelosi kutsi tiyosindzisa Loti. Tatjela yena kanye nemndeni wakhe kutsi babaleke kulamadolobha labekatawubhujiswa. “Kepha Loti wabina; ngako-ke ngobe Simakadze waba nesihawu kuye, lamadvodza lamabili [tingilosi] ababamba ngetandla, yena nemkakhe kanye nemadvodzakati akhe abakhiphela ngaphandle kwalelidolobha.” (Gen. 19:16) Lesibonelo asikhombisi yini kutsi Jehova uyatibona timo letimatima tinceku takhe letetsembekile letihlangabetana nato?​—Isa. 63:7-9; Jak. 5:11; 2 Phet. 2:9.

5. Umbhalo wa-1 Johane 3:17 ungasisita njani kutsi sibe nesihawu?

⁵ Jehova akagcini nje ngekusikhombisa sihawu kodvwa uphindze afundzise bantfu bakhe kubaluleka kwekuba nesihawu. Cabanga ngemtsetfo lowanikwa ema-Israyeli lomayelana nekutsatsa ingubo yalomunye umuntfu ibe sibambiso. (Fundza Eksodusi 22:26, 27.) Umbolekisi lonenhlitiyo lembi abengatsatsa ingubo yemuntfu lamkwenedako angayibuyisi, amshiye ete ingubo yekulala. Jehova wafundzisa bantfu kutsi bakugweme kungabacabangeli labanye. Bantfu bakhe bekufanele babe nesihawu. Lesimiso lokusekelwe kuso lomtsetfo asikwenti yini kutsi ube neluvelo? Singabayekelela yini bazalwane betfu bahlupheke kube kukhona lesingakwenta kute sibasite?​—Khol. 3:12; Jak. 2:15, 16; fundza 1 Johane 3:17.

6. Yini lesiyifundzako endleleni Jehova lachubeka asita ngayo ema-Israyeli lebekona?

⁶ Jehova bekawabonisa sihawu ema-Israyeli ngisho noma bekona. LiBhayibheli litsi: “Simakadze Nkulunkulu waboyisemkhulu watfumela livi kubo ngetitfunywa takhe emahlandla lamanyenti, ngobe abebadzabukela bantfu bakhe nendzawo yakhe yekuhlala.”  (2 Khr. 36:15) Akukafaneli yini sitive ngendlela lefanako nasibona bantfu baphendvuka, bashintja indlela labaphila ngayo futsi bemukeleka kuNkulunkulu? Jehova akafuni kubhubhe ngisho namunye ngelilanga lekwahlulela. (2 Phet. 3:9) Ngako asichubeke sitjela bantfu ngesihawu saNkulunkulu kuze kube ngulapho abhubhisa bantfu lababi.

7, 8. Yini leyenta lomunye umndeni wabona kutsi Jehova uwubonise sihawu?

⁷ Tinyenti tindlela Jehova lakhombisa ngato sihawu. Cabanga ngalokwenteka kuMilan, umfana loneminyaka lengu-12 kanye nemndeni wakubo. Ngesikhatsi selushushiso ngasekucaleni kwabo-1990. Milan, bhuti wakhe, umndeni wakubo, kanye nalabanye BoFakazi bebagibele ibhasi basuka eBosnia baya eSerbia. Bebaya emhlanganweni wesifundza futsi batali bakhe bebatawufike babhajatiswe. Batsi nabasegedeni, lomndeni bawehlisa ebhasini ngenca yekutsi bebanebuve lobehlukile. Ngemuva kwemalanga lamabili baboshiwe, leliphoyisa labuta umphatsi walo kutsi bekufanele bawente njani lomndeni. Leliphoyisa belime embikwalomndeni, futsi bonkhe beva lomphatsi aphendvula atsi, “Bakhipheni nibadubule!”

⁸ Njengobe leliphoyisa belisakhuluma nalamanye, kwefika emadvodza lamabili atjela lomndeni kutsi aBoFakazi futsi bekevile ngaloko lobekwentekile ebhasini. Lamadvodza agibeta Milan nabhuti wakhe emotweni futsi aphuma nabo egedeni njengobe emapasipoti ebantfwana abengahlolwa. Babese batjela batali baMilan kutsi bayofohla ngemuva kwaleligede khona batohlangana ngale kwalo. Milan abetfuke kakhulu, angati nekutsi enteni. Batali bakhe babuta lamadvodza kutsi “Nicabanga kutsi batasivumela yini kutsi siphume?” Njengobe bahamba kwabonakala ngatsi lamasotja abebabukisisa. Lomndeni wabese uyahlangana ngale kwaleligede. Bachubeka neluhambo lwabo lwekuya emhlanganweni futsi bebaciniseka ngekutsi Jehova bekayiphendvulile imithantazo yabo. EBhayibhelini sifundza kutsi ngaletinye tikhatsi Jehova abengangeneli ngalokucondzile kute asite tinceku takhe. (Imis. 7:58-60) Nakachaza indlela lativa ngayo, Milan utsi: “Ngabona kutsi Jehova wasebentisa tingilosi kute asikhulule kulamasotja.”​—Hla. 97:10.

9. Yini Jesu layenta ngesimo sebantfu lebebamlandzela? (Buka sitfombe lesisekucaleni kwalesihloko.)

⁹ Kunesifundvo lesisitfolako kuJesu. Waba nesihawu ngebantfu lababona ngoba “bebaphetfwe kabi futsi bahlakatekile njengetimvu letite umelusi.” Yini Jesu layenta kute abasite kulesimo lesibuhlungu bebakuso? ‘Wase ubafundzisa tintfo letinyenti.’ (Mat. 9:36; fundza Makho 6:34.) Jesu bekehluke kakhulu kubaFarisi, ngobe bebangafisi kusita bantfu. (Mat. 12:9-14; 23:4; Joh. 7:49) Wena uyafisa yini kufundzisa bantfu ngaNkulunkulu njengobe Jesu enta?

10, 11. Kufanele yini kutsi sibe nesihawu kuto tonkhe timo? Chaza.

¹⁰ Loko akusho kutsi kufanele sibonise sihawu kuto tonkhe timo. Sihawu saNkulunkulu besifaneleka kuletimo lesisandza kucoca ngato. Noma kunjalo, iNkhosi Sawula yakhombisa kungalaleli ngesikhatsi icabanga kutsi ikhombisa sihawu. Ayizange imbulale Agagi lebekasitsa sebantfu baNkulunkulu futsi ayizange ibulale nemfuyo lekhuluphele. Ngenca yaloko Jehova wayekelisa Sawula kuba yinkhosi yaka-Israyeli. (1 Sam. 15:3, 9, 15.) Jehova unguMehluleli lokahle,  uyakhona kubona lokusetinhlitiyweni tebantfu futsi uyati kutsi kufanele asibonise nini sihawu. (Sil. 2:17; Hez. 5:11) Siyasondzela sikhatsi lapho atowehlulela bonkhe bantfu labangamlaleli. (2 Thes. 1:6-10) Leso kutawube kungasiso sikhatsi sekukhombisa sihawu kubantfu lababi. Esikhundleni saloko kubabhubhisa kutawuba yindlela lekahle Nkulunkulu latawukukhombisa ngayo kutsi unesihawu kubantfu labalungile latawubasindzisa.

¹¹ Kuyacaca kutsi akusiko kwetfu kuncuma kutsi bobani bantfu labatawubhujiswa nalabawusindziswa. Kunaloko kufanele sente konkhe lokusemandleni etfu kute sisite bantfu nyalo. Ngako ngutiphi tindlela letikahle lesingakhombisa ngato kutsi sinesihawu? Ase sicocce ngaletimbalwa.

12. Singasikhombisa njani sihawu kulabanye?

¹² Ngaso sonkhe sikhatsi bani lusito kulabanye. Nasifuna kulingisa Jesu kubalulekile kutsi sibonise sihawu kubomakhelwane kanye nakubazalwane betfu. (Joh. 13:34, 35; 1 Phet. 3:8) Kuba nesihawu kungaphindze kusho “kuvelana nalabanye.” Umuntfu lonesihawu utsatsa sinyatselo sekusita lomunye umuntfu ekuhluphekeni kwakhe. Hlale ufuna ematfuba ekusita labanye! Nasi sibonelo: Ungamsita yini lomunye ngekutsi umentele imisebenti yasekhaya noma umsite ngalokutsite lakudzingako?​—Mat. 7:12.

13. Ngubuphi buntfu lobakhonjiswa bantfu baNkulunkulu ngemuva kwesehlakalo semvelo?

¹³ Sita nakuvele inhlekelele. Kuhlupheka kwebantfu labavelelwe tinhlekelele kwenta labanye bafune kubasita. Bantfu baJehova batiwa ngekuba lusito ngetikhatsi letimatima. (1 Phet. 2:17) Lomunye dzadze waseJapan bekahlala endzaweni leyahlaselwa kutamatama kwemhlaba nga-2011. Utsi “wakhutsateka kakhulu futsi wadvudvuteka” nakabona imetamo yemavolontiya lamanyenti labevela kuletinye tindzawo taseJapan kanye nangesheya kwetilwandle atobasita. Wabhala watsi: “Loku kwangisita ngabona kutsi Jehova uyasikhatsalela futsi nebazalwane  betfu bayakhatsalelana. Ngabona nekutsi bazalwane nabodzadze emhlabeni wonkhe bayasithantazela.”

14. Ungabasita njani lasebakhulile nalabagulako?

¹⁴ Sita labagulako kanye nalasebakhulile. Kubona labanye babhekana nemiphumela yesono sa-Adamu kusenta sifune kubakhombisa sihawu. Siyasilangatelela sikhatsi lapho kugula nekuguga sekungasekho. Kungako sithantazela uMbuso waNkulunkulu kutsi ufike. Njengobe usengakefiki, senta konkhe lokusemandleni etfu kute sisite bantfu labadzinga lusito. Cabanga ngalokwashiwo ngulomunye umbhali lowabhala ngamake wakhe lobesekakhulile futsi labenesifo se-Alzheimer. Ngalelinye lilanga beketama kuwasha timphahla takhe lebetingcolile, futsi kwanconcotsa bantfu emnyango. BekuBoFakazi BaJehova lababili lebebavame kumvakashela. Labodzadze bambuta kutsi bangamsita yini. Kona bekanemahloni, kepha wavuma futsi labodzadze babese bayamsita. Bamentela litiya futsi bacoca naye. Indvodzana yalomake yajabula kakhulu futsi yatsi: “BoFakazi BaJehova ngibetfulela sigcoko ngobe bayakwenta loko labakufundzisako.” Kuvela bantfu lasebakhulile nalabagulako kuyakukhutsata yini wena kutsi wente konkhe longakwenta kute ubasite?​—Fil. 2:3, 4.

15. Umsebenti wekushumayela usiniketa ematfuba ekwentani?

¹⁵ Sita labanye bafundze ngaNkulunkulu. Tinkinga bantfu labanato kanye nekucindzeteleka kwabo kusenta sifune kubasita babe nebuhlobo lobuhle naNkulunkulu. Indlela lekahle yekukwenta kutsi sibafundzise ngaNkulunkulu nangaloko uMbuso wakhe lotakwentela bantfu. Singaphindze sibasite kutsi babone kuhlakanipha kwekuphila ngetimiso taNkulunkulu. (Isa. 48:17, 18) Ungalikhulisa yini lizinga lowenta ngalo umsebenti wekushumayela, njengobe lomsebenti udvumisa Jehova futsi ukhombisa kutsi sinesihawu ngalabanye?​—1 Thim. 2:3, 4.

16. Kusizuzisa njani kuba nesihawu?

¹⁶ Betemphilo batsi kuba nesihawu kungakusita ube nemphilo lenhle, ujabule futsi ube nebuhlobo lobuhle nalabanye. Nawusita labanye utawujabula, ube nelitsemba, ngeke ube nesitunge futsi ayancipha ematfuba ekutsi ube nemicabango lemibi. Kukhombisa sihawu kutawuzuzisa wena. (Ef. 4:31, 32) EmaKhristu lasita labanye aba nanembeza lomsulwa ngenca yekutsi ayati kutsi loko lakwentako kuhambisana netimiso taNkulunkulu. Kuba nesihawu kungakwenta ube ngumtali lonakekelako, ube ngumlingani wemshado lokahle futsi kungakwenta ube ngumngani lokahle. Manyenti ematfuba ekutsi bantfu labasheshako kukhombisa sihawu balutfole lusito kanye nekusekelwa ngesikhatsi labakudzinga ngaso.​—Fundza Matewu 5:7; Lukha 6:38.

17. Kungani kufanele silwele kuba nesihawu?

¹⁷ Akukafaneli kutsi sibe nesihawu ngesizatfu sekutsi kuzuzisa tsine. Sizatfu lesiyinhloko sekukhombisa sihawu kutsi sifuna kulingisa Jehova Nkulunkulu lonelutsandvo nesihawu futsi simkhatimulise. (Taga 14:31) Usibekela sibonelo lesihle kakhulu. Shengatsi sonkhe singenta konkhe lokusemandleni etfu kute simlingise ngekutsi sibatsandze bazalwane betfu kanye nabomakhelwane betfu futsi sibe nesihawu.​—Gal. 6:10; 1 Joh. 4:16.