1. Yini lesenta siciniseke kutsi liVi laNkulunkulu linemandla? (Buka sitfombe lesisekucaleni kwalesihloko.)

NJENGEBANTFU baJehova, siyaciniseka kutsi liBhayibheli licuketse umlayeto waNkulunkulu, ‘liyaphila futsi linemandla.’ (Heb. 4:12) Labanyenti betfu bawabonile emandla eliVi laNkulunkulu ekuphileni kwabo. Labanye bazalwane nabodzadze bebadzakwa, bangemasela, bayimilutsa yetidzakamiva futsi batiphatsa kabi ngekwelicasi. Labanye bebaphumelela kulelive kodvwa bebangakutfoli kwenetiseka ekuphileni kwabo. (Shu. 2:3-11) Etikhatsini letinyenti bantfu lebebalahlekelwe litsemba bakhonile kusitakala ngenca yemandla eliVi laNkulunkulu. Asingabati kutsi ukujabulele kufundza ngaletindzaba letivela kuSicongosekulindza, etihlokweni letitsi “LiBhayibheli Liyakugucula Kuphila.” Kungenteka nekutsi ubonile kutsi ngemuva kwekufundza emaciniso, lamanye emaKhristu ayachubeka atfutfuka ngenca yekusitwa liBhayibheli.

2. Ngelikhulu lekucala, yini leyakhombisa kutsi liVi laNkulunkulu linemandla?

² Akukafaneli simangale nasibona bantfu labanyenti esikhatsini setfu bashintja indlela labaphila ngayo ngemuva kwekudadisha liBhayibheli. Tibonelo letinjalo tisikhumbuta  lokwenteka kubazalwane nabodzadze bangelikhulu lekucala, lebebanelitsemba lekuphila ezulwini. (Fundza 1 Khorinte 6:9-11.) Ngemuva kwekubala tinhlobo tebantfu lebetingeke titfole uMbuso waNkulunkulu, umphostoli Pawula watsi: “Nguloko labanye benu lebebangiko.” Kodvwa liVi laNkulunkulu kanye nemoya longcwele kwabasita kutsi bashintje. Ngisho nangemuva kwekwemukela emaciniso, labanye kwadzingeka kutsi balwisane nemikhuba lemibi. LiBhayibheli likhuluma ngalomunye umzalwane logcotjiwe lowabese uyekeliswa kuba ngumKhristu, kodvwa ngekuhamba kwesikhatsi waphindze wabuyiselwa. (1 Khor. 5:1-5; 2 Khor. 2:5-8) Akusikhutsati yini kucabanga kutsi labanye lesikholwa nabo bakhonile kuncoba tinkinga lababhekana nato ngenca yekusitwa liVi laNkulunkulu?

3. Sitawucoca ngani kulesihloko?

³ Ngenca yekutsi Nkulunkulu usinike livi lakhe lelinemandla, sifuna kulisebentisa kahle. (2 Thim. 2:15) Kulesihloko sitawufundza kutsi singawasentisa njani emandla eliVi laNkulunkulu (1) ekuphileni kwetfu, (2) nasisemsebentini wekushumayela kanye, (3) nalapho sibeka tinkhulumo. Letikhumbuto titasisita sikhombise kutsi siyamtsandza Babe wetfu losezulwini futsi siyabonga ngekutsi usifundzisa tintfo letincono kakhulu.​—Isa. 48:17.

4. (a) Yini lokufanele siyente kuze liVi laNkulunkulu lisebente kitsi? (b) Usakha njani sikhatsi sekufundza liBhayibheli?

⁴ Kuze liVi laNkulunkulu lisebente kitsi kufanele silifundze onkhe malanga. (Josh. 1:8) Labanyenti betfu bamatasatasa ekuphileni. Noma kunjalo, kufanele singavumeli lutfo ngisho nemisebenti yetfu isiphatamise eluhlelweni lwetfu lekufundza liBhayibheli. (Fundza Efesu 5:15, 16.) Bantfu baJehova labanyenti bakhonile kutinika sikhatsi sekufundza liBhayibheli ekuseni, emini noma entsambama. Bativa ngendlela umhlabeleli labetiva ngayo nakatsi: “Maye, ngiyawutsandza umtsetfo wakho! Ngizindla ngawo imini yonkhe.”​—Hla. 119:97.

5, 6. (a) Kubaluleke ngani kuzindla ngalesikufundzako? (b) Nguyiphi indlela lekahle yekuzindla? (c) Kukusite njani kufundza liVi laNkulunkulu futsi uzindle ngalo?

⁵ Ngetulu kwekufundza liBhayibheli kubalulekile kutsi sizindle ngaloko lesikufundzako. (Hla. 1:1-3) Nasenta njalo sitawukhona kukusebentisa kahle kuhlakanipha kwalo lokungaphelelwa sikhatsi. Ngisho noma sifundza liBhayibheli lelishicilelwe noma lelisentfweni yebuchwephesha, umgomo wetfu kufanele ube kukufaka enhlitiyweni loko lesikufundzako.

⁶ Nguyiphi indlela lekahle yekuzindla? Labanye bakutfole kulusito kutsi nabafundza  emavesi latsite emBhalweni, bese bayema batibute imibuto lefana naletsi: ‘Loku kungifundzisani ngaJehova? Lesimiso lengifundza ngaso ngisisebentisa njani ekuphileni kwami? Ngukuphi lapho kufanele ngitfutfukise khona?’ Nasithantaza futsi sizindla ngalesikufundza eVini laNkulunkulu, sitawukhutsateka kutsi sisisebentise ngalokugcwele seluleko salo. Loko kutawusenta siwabone ngalokucacile emandla eliBhayibheli ekuphileni kwetfu.​—2 Khor. 10:4, 5.

7. Yini lesingayenta kuze silisebentise kahle liVi laNkulunkulu nasishumayela?

⁷ Yini lengasisita silisebentise kahle liVi laNkulunkulu nasishumayela? Kufanele silisebentise njalo nasishumayela futsi sifundzisa. Lomunye umzalwane watsi: “Kube bewuhamba naJehova ushumayela emtini ngemuti bewutamvumela yini akhulume noma bewutatikhulumela?” Abecondze kutsi: Nasilifundza ngalokucondzile liVi laNkulunkulu nasishumayela sisuke sivumela Jehova kutsi atikhulumele nemnikati welikhaya. Umbhalo lokhetfwe kahle ungabatsintsa bantfu lesibashumayelako kwendlula loko lesikushoko. (1 Thes. 2:13) Tibute kutsi: ‘Ngilisebentisa njalo yini liVi laNkulunkulu nangitfola litfuba lekucoca nalabanye ngetindzaba letimnandzi?’

8. Kungani kungakafaneli kutsi sigcine nje ngekufundza imibhalo letsite nasishumayela?

⁸ Akukafaneli sigcine nje ngekufundza emavesi latsite eliBhayibheli nebantfu lesicoca nabo. Leni? Ngoba bantfu labanyenti kuncane labakwatiko ngeliBhayibheli futsi labanye abalicondzi sanhlobo. Bekunjalo ngelikhulu lekucala futsi kusenjalo nalamuhla. (Rom. 10:2) Akukafaneli sicabange kutsi umuntfu utawuvele akucondze lokushiwo livesi ngobe nje sesilifundzile. Kudzingeka sitinike sikhatsi sekuchaza incenye ngayinye yelivesi​—mhlawumbe siphindze sifundze emagama layinhloko futsi siwachaze. Kwenta  njalo kungenta kutsi umlayeto weliVi laNkulunkulu ufinyelele tingcondvo netinhlitiyo tebafundzi.​—Fundza Lukha 24:32.

9. Singayetfula njani imibhalo ngendlela letawenta bantfu balihloniphe liBhayibheli? Niketa sibonelo.

⁹ Kufanele setfule imiBhalo ngendlela letawenta bantfu balihloniphe liBhayibheli. Nasi sibonelo, ungase utsi: “Ase sive kutsi uMdali wetfu utsini ngalendzaba.” Nasicoca nemuntfu longasuye umKhristu singahle sitsi: “Naka naku lokushiwo yimiBhalo LeNgcwele.” Nasicoca nemuntfu longenandzaba nenkholo, singambuta kutsi: “Wake weva yini nganasi sisho sasendvulo?” Kufanele sibuke simo semuntfu ngamunye bese sitivumelanisa naso.​—1 Khor. 9:22, 23.

10. (a) Chaza lokwenteka kulomunye umzalwane. (b) Uwabone njani emandla eliVi laNkulunkulu nawusemsebentini wekushumayela?

¹⁰ Bantfu labanyenti batfole kutsi kusebentisa liVi laNkulunkulu nabashumayela kuyatitsintsa tinhlitiyo tetilaleli. Cabanga nganasi sibonelo. Umzalwane lotsite wabuyela kulomunye babe losakhulile futsi lobesekaneminyaka leminyenti afundza bomagazini betfu. Kunekumane nje amnikete Sicongosekulindza lesisha, lomzalwane wamfundzela umbhalo lotfolakala kulomagazini. Wafundza umbhalo wa-2 Khorinte 1:3, 4, lotsi: ‘UnguYise wemusa, naNkulunkulu wayo yonkhe indvudvuto, . . . losidvudvuta kuko konkhe kuhlupheka kwetfu.’ Lombhalo wamtsintsa kakhulu umnikati welikhaya kangangekutsi wacela lomzalwane kutsi aphindze awufundze. Lobabe watsi yena nemkakhe bebayidzinga kakhulu indvudvuto, futsi waba nesifiso sekwati lokwengetiwe ngeliBhayibheli. Awuvumi yini kutsi liVi laNkulunkulu linemandla emsebentini wekushumayela?​—Imis. 19:20.

11. Yini lokufanele yentiwe bazalwane nababeka tinkhulumo?

¹¹ Sonkhe siyakujabulela kuya emihlanganweni yebuKhristu kanye nasemihlanganweni lemincane nalemikhulu. Sizatfu lesiyinhloko sekuya kuyo kutsi sidvumise Jehova. Siphindze sizuze kakhulu naseticondzisweni lesititfolako letimayelana naNkulunkulu. Bazalwane lababeka tinkhulumo kulemihlangano bajabulela lilungelo lelikhulu. Ngesikhatsi lesifanako, kufanele bati kutsi lelilungelo lihambisana nemsebenti lomkhulu. (Jak. 3:1) Kufanele baciniseke kutsi loko labakufundzisako kusekelwe eBhayibhelini. Nangabe uniketwe sabelo sekubeka inkhulumo, ungawasebentisa njani emandla eliBhayibheli nawufundzisa?

12. Sikhulumi singayigcizelela njani imiBhalo enkhulumeni yaso?

¹² Inkhulumo yakho kufanele isekelwe eBhayibhelini. (Joh. 7:16) Ungakwenta njani loko? Ciniseka kutsi indlela lobeka ngayo inkhulumo, tibonelo kanye nemifanekiso loyisebentisako akutenti tilaleli tingakunaki lokushiwo liBhayibheli. Khumbula nekutsi kufundzisa akusho kumane nje ufundze imibhalo lekhonjiwe. Ecinisweni kusebentisa imibhalo leminyenti kungenta tilaleli takho tingakukhumbuli letikufundzile. Ngako khetsa kahle imibhalo leyinhloko futsi utinike sikhatsi sekuyifundza, uyichaze, usho imifanekiso kanye nekutsi singayisebentisa njani ekuphileni kwetfu. (Neh. 8:8) Nangabe inkhulumo isekelwe eluhlakeni loluvela enhlanganweni, kufanele uludadishe futsi ufundze imibhalo lekhonjiwe. Yetama kubona kutsi imibhalo ihlangana njani nemaphuzu lakuloluhlaka, bese usebentisa lemibhalo kuze uwagcizelele. (Ungatfola emaphuzu lamahle esifundvweni  21 kuya ku-23 sencwadzi letsi Zuza Emfundvweni YeSikolwa Semsebenti WemaKhristu.) Ngetulu kwako konkhe, thantaza kuJehova umcele akusite ukhone kuyichaza kahle imicabango leligugu lesevini lakhe.​—Fundza Ezra 7:10; Taga 3:13, 14.

13. (a) Lomunye dzadze wamtsintsa njani umbhalo lowafundvwa emhlanganweni webuKhristu? (b) Ikusite njani imfundvo lesekelwe eBhayibhelini letfolakala emihlanganweni yetfu?

¹³ Lomunye dzadze wase-Australia watsintfwa ngumbhalo lowafundvwa emhlanganweni webuKhristu. Nakuba akhula kabuhlungu, wawemukela umlayeto weliBhayibheli futsi wanikela kuphila kwakhe kuJehova. Kepha bekumatima kwemukela kutsi Jehova uyamtsandza. Ngekuhamba kwesikhatsi waciniseka kutsi Jehova bekamtsandza. Yini leyamsita wafinyelela kulesiphetfo? Wazindla ngembhalo lokwacocwa ngawo kulomunye umhlangano wetfu futsi wawuhlobanisa nalamanye emavesi eliBhayibheli. * Kuke kwenteka yini lakutsintsa ngendlela lefanako liVi laNkulunkulu nawusemihlanganweni yelibandla, yesigodzi neyesifundza?​—Neh. 8:12.

14. Singakhombisa njani kubonga ngeliVi laNkulunkulu?

¹⁴ Asimbongi yini Jehova ngekusinika liVi lakhe liBhayibheli? Akagcini nje ngekusinika lona, kepha uphindze wasigcina setsembiso sakhe sekulilondvolota. (1 Phet. 1:24, 25) Senta kahle ngekutsi sifundze liBhayibheli njalo, silisebentise ekuphileni kwetfu siphindze silisebentise nasisita labanye. Nasenta njalo, sisuke sikhombisa lutsandvo nekubonga ngalo kanye nangeMbhali walo, Jehova Nkulunkulu.