1. Kungani BoFakazi BaJehova babantfu labajabulako? (Buka sitfombe lesisekucaleni kwalesihloko.)

BOFAKAZI BAJEHOVA babantfu labajabulako. Bahlale bacoca futsi bahleka sonkhe sikhatsi nangabe bandzawonye, kungaba semihlanganweni yelibandla, emihlanganweni lemincane nalemikhulu noma nabasemicimbini. Kungani bahlala bajabulile? Sizatfu lesiyinhloko kutsi bati Jehova lokunguNkulunkulu lojabulako, bayamkhonta futsi betama kumlingisa. (1 Thim. 1:11; Hla. 16:11) Jehova unguMtfombo wenjabulo, ngako ufuna kutsi natsi sijabule futsi usiniketa tizatfu letinyenti tekutsi sijabule.—Dut. 12:7; Shu. 3:12, 13.

2, 3. (a) Iyini injabulo? (b) Yini leyenta kube matima kutsi sijabule?

² Kutsiwani ngawe? Uyajabula yini? Kujabula kusho kutiva wenetisekile ekuphileni futsi utfokotile. LiBhayibheli liyakhombisa kutsi bantfu labanebuhlobo lobuhle naNkulunkulu kuphela labajabulako. Kodvwa kulelive lesiphila kulo kungaba matima kutsi ujabule. Kungani?

 ³ Kungaba matima kuhlala sijabulile nangabe sibhekene nesimo lesicindzetelako lesifaka ekhatsi kushonelwa ngulesimtsandzako, noma nangabe ayekelisiwe kuba nguFakazi, nangabe sehlukana nemuntfu lesishade naye, ngisho noma siphelelwa ngumsebenti. Kungaphindze kube matima kujabula nangabe sihlale silwa nemalunga emindeni, nangabe bantfu lesisebenta nabo noma lesifundza nabo bahlale bahlekisa ngatsi noma nangabe sishushiswa noma sivalelwa ejele ngenca yekutsi sikhonta Jehova. Kungenteka sihlaselwe kugula lokungemahlala khona noma kucindzeteleka kakhulu. Khumbula kutsi Jesu Khristu, “uMbusi Lonemandla nalojabulako” bekumjabulisa kudvudvuta labanye nekubenta bajabule. (1 Thim. 6:15; Mat. 11:28-30) ENshumayelweni yakhe yaseNtsabeni, Jesu washo buntfu lobungasisita sihlale sijabula ngisho noma lelive laSathane ligcwele tinkinga letisicindzetelako.

4, 5. Yini lesingayenta kuze sitfole injabulo futsi sihlale sijabulile?

⁴ Intfo yekucala Jesu layisho ibaluleke kakhulu. Watsi: “Bayajabula labo labanakisisa tintfo letiphatselene naNkulunkulu, ngobe uMbuso welizulu ngewabo.” (Mat. 5:3) Nangabe sitinakisisa tintfo letiphatselene naNkulunkulu, sitawubona kutsi kudzingeka simati Nkulunkulu nekutsi siyaludzinga lusito lwakhe nesicondziso sakhe. Singakukhombisa njani loko? Ngekudadisha liBhayibheli, silalele imiyalo yakhe futsi sente kumkhonta kute kucala ekuphileni kwetfu. Kwenta loko kutawusenta sijabule futsi sitawuba nekukholwa lokucinile etetsembisweni taJehova. “Litsemba lelimangalisako” lesilitfola eBhayibheli litasisita sikhone kubeketelela tinkinga lesihlangabetana nato.​—Thit. 2:13.

⁵ Kute sitfole injabulo lehlala njalo, kubaluleke kakhulu kutsi sibe nebuhlobo lobucinile naJehova. Umphostoli Pawula waphefumulelwa kutsi abhale kutsi: “Hlalani nijabula eNkhosini [Jehova]. Ngiyaphindza futsi ngitsi, jabulani!” (Fil. 4:4) Kuze sibe bangani baJehova, kufanele sicele kuhlakanipha kwakhe. LiBhayibheli litsi: “Ubusisiwe umuntfu lotfola kuhlakanipha nalowo lowemukela kucondza. Kusihlahla sekuphila kulabakuphutfumako; labo labakubamba bakunkonkoshele ngulabo labajabulako.”​—Taga 3:13, 18.

6. Yini lenye lokufanele siyente kute sihlale sijabulile?

⁶ Kuze sihlale sijabulile, kubaluleke kakhulu kutsi sichubeke sikusebentisa lesikufundza eBhayibhelini. Jesu wagcizelela kubaluleka kwaloku ngesikhatsi atsi: “Niyajabula nanitati letintfo futsi nitenta.” (Joh. 13:17; fundza Jakobe 1:25.) Loko kubaluleke kakhulu nangabe sifuna kuba nebuhlobo lobuhle naNkulunkulu futsi sihlale sijabulile. Kodvwa yini lesingayenta kute sijabule ngisho noma kunetintfo letinyenti letisivisa buhlungu? Ase sibone kutsi yini Jesu lachubeka wayisho eNshumayelweni yakhe yaseNtsabeni.

7. Yini lengenta bantfu labalilako bajabule?

⁷ “Bayajabula labo labalilako, ngobe batawudvudvutwa.” (Mat. 5:4) Singahle sitibute: ‘Umuntfu angajabula kanjani abe alila?’ Jesu bekangakhulumi ngabo bonkhe bantfu labalilako. Bantfu labanyenti lababi bayalila noma beva buhlungu  ngenca yekutsi bahlangabetana netinkinga ‘lokumatima kubhekana nato kulamanga ekugcina.’ (2 Thim. 3:1) Kodvwa baticabanga bona bodvwa, hhayi ngaJehova, kungako bete buhlobo lobuhle naye futsi ngeke baze bajabule. Jesu bekakhuluma ngebantfu labanakisisa buhlobo babo naNkulunkulu. Balila ngesizatfu sekutsi babona kutsi bantfu labanyenti abamkhonti Nkulunkulu futsi abaphili ngendlela layifunako. Bayati kutsi banesono futsi babona netintfo letimbi letentekako. Jehova ubabona bonkhe labalila ngalokusuka enhlitiyweni futsi uyabadvudvuta asebentisa liVi lakhe futsi ubenta bajabule.​—Fundza Hezekeli 5:11; 9:4.

8. Chaza kutsi kutfobeka kungakwenta njani ujabule.

⁸ “Bayajabula labo labatfobekile, ngobe batawudla lifa lemhlaba.” (Mat. 5:5) Kutfobeka kungakwenta njani ujabule? Bantfu labanyenti baneludlame futsi abahloniphi, futsi loko kungabanga tinkinga letinyenti. Kodvwa nabafundza emaciniso bayashintja futsi bagcoke “buntfu lobusha.” Nyalo ‘baneluvelo, umusa, kutfobeka, umoya lophansi, nekubeketela.’ (Khol. 3:9-12) Banekuthula, banebuhlobo lobuhle nalabanye futsi bayajabula. LiBhayibheli liphindze letsembise kutsi bantfu labanjalo “batawudla lifa lemhlaba.”​—Hla. 37:8-10, 29.

9. (a) Jesu bekasho kutsini nakatsi bantfu labatfobekile “batawudla lifa lemhlaba”? (b) Kungani bantfu “labalambele futsi bomele kulunga” bangajabula?

⁹ Jesu bekasho kutsini nakatsi bantfu labatfobekile “batawudla lifa lemhlaba”? Labagcotjiwe batawudla lifa lemhlaba nasebusa njengemakhosi nebaphristi. (Semb. 20:6) Tigidzi tebantfu letingeke tiyobusa ezulwini titawudla lifa lemhlaba ngekutsi tihlale kuwo kuze kube phakadze. Titawube setite sono, futsi titawuba nekuthula nenjabulo. Laba ngulabantfu Jesu lakhuluma ngabo watsi: “Bayajabula labo labalambele futsi bomele kulunga.” (Mat. 5:6) Sifiso sabo sekutsi kube nekulunga sitawufezeka ngesikhatsi Jehova asusa bonkhe bubi. (2 Phet. 3:13) Bantfu labalungile batawujabula futsi ngeke basalila ngenca yetintfo letimbi letentiwa bantfu lababi.—Hla. 37:17.

10. Kusho kutsini kuba nesihawu?

¹⁰ “Bayajabula labo labanesihawu, ngobe batawuhawukelwa.” (Mat. 5:7) Kuba nesihawu kusho kubavela buhlungu bantfu labahluphekile futsi ube nemusa kubo. Nobe kunjalo, kuba nesihawu kusho lokungetulu kwaloko. LiBhayibheli lifundzisa kutsi kuba nesihawu kufaka ekhatsi kwenta lokutsite kuze usite labanye.

11. Umfanekiso wemSamariya usifundzisani ngekuba nesihawu?

¹¹ Fundza Lukha 10:30-37. Umfanekiso wemSamariya lowashiwo nguJesu usenta sikucondze kahle lokushiwo kuba nesihawu. Luvelo nesihawu kwenta umSamariya wakhona kusita lomuntfu lebekalimele. Ngemuva kwekusho lomfanekiso, Jesu watsi: “Nawe hamba wente njalo.” Ngako natsi kufanele sitibute: ‘Ngiyabasita yini labahluphekile? Ngiyakwenta yini loko lokwentiwa ngulomSamariya loneluvelo? Ngingasikhombisa yini sihawu ngekutsi ngibasite ngemusa labo labahluphekako? Nasi sibonelo, ngiyawasita yini emaKhristu lesekakhulile, bafelokati, kanye nebantfwana labanebatali labangasibo BoFakazi? Ngingasitsatsa yini sinyatselo ‘sekukhuluma ngendlela ledvudvutako nalabacindzetelekile’?’​—1 Thes. 5:14; Jak. 1:27.

12. Yini lesenta sijabule nasibonisa labanye sihawu?

 ¹² Kuba nesihawu kungasenta njani sijabule? Nangabe sikhombisa labanye sihawu sitfola injabulo lesiyitfola nasipha labanye. Ngetulu kwaloko siyati kutsi sisuke sijabulisa Jehova. (Imis. 20:35; fundza Hebheru 13:16.) Mayelana nemuntfu lonakekela labanye, iNkhosi Davide yatsi: “Simakadze uyawumlondvolotela imphilo yakhe uyawumenta abe [ngulojabulako] emhlabeni.” (Hla. 41:1, 2) Nangabe sibakhombisa sihawu neluvelo labanye bantfu sitawutfola umusa waJehova futsi sitawujabula.​—Jak. 2:13.

13, 14. Yini leyenta bantfu labahlantekile enhlitiyweni bajabule?

¹³ Jesu watsi: “Bayajabula labo labahlantekile enhlitiyweni, ngobe batawubona Nkulunkulu.” (Mat. 5:8) Kuze sihlale sihlantekile etinhlitiyweni tetfu kufanele sihlale sinemicabango netifiso letihlantekile. Kubalulekile kutsi sigcine imicabango yetfu ihlantekile nangabe sifuna kwemukelwa nguJehova.​—Fundza 2 Khorinte 4:2; 1 Thim. 1:5.

¹⁴ Bantfu labahlantekile etinhlitiyweni bajabulela kuba nebuhlobo lobuhle naJehova, ngoba utsi: “Bayajabula labo labahlanta tingubo tabo.” (Semb. 22:14) Kusho kutsini ‘kuhlanta tingubo tabo’? EmaKhristu lagcotjiwe ‘ahlanta tingubo tawo’ ngemcondvo wekutsi ahlantekile phambi kwaJehova futsi atawujabulela kutfola kuphila lokuphakadze ezulwini. Sicumbi lesikhulu lesinematsemba ekuphila emhlabeni sijabulela kuba bangani baNkulunkulu, futsi ‘sihlanta tingubo taso sitenta tibe mhlophe engatini yeliWundlu.’​—Semb. 7:9, 13, 14.

15, 16. Bantfu labahlantekile enhlitiyweni bangambona njani Nkulunkulu?

¹⁵ Bantfu labahlantekile enhlitiyweni ‘bangambona’ njani Nkulunkulu “ngobe kute umuntfu longabona [Nkulunkulu] abuye aphile?” (Eks. 33:20) Ligama lesiGriki lelitsi “kubona” lingasho kucabanga, kucondza, kanye nekwati. Ngako kubona Nkulunkulu kusho kumati kahle kanye nekutsandza buntfu bakhe. (Ef. 1:18) Jesu wabukhombisa ngalokuphelele buntfu baNkulunkulu, kungako atsi: “Loyo longibonile mine umbonile naBabe.”​—Joh. 14:7-9.

¹⁶ Ngetulu kwekwati buntfu baNkulunkulu, emaKhristu eliciniso ‘angambona Nkulunkulu’ ngekunaka indlela lawasita ngayo. (Jobe 42:5) Singaphindze sibone noma sihlale sinake tibusiso Jehova latetsembisa labo labahlala bahlantekile futsi  betsembekile kuye. EmaKhristu lagcotjiwe atambona Jehova nasekavusiwe futsi sekaphila ezulwini.​—1 Joh. 3:2.

17. Kungani bantfu labakha kuthula bajabula?

¹⁷ Jesu wachubeka watsi: “Bayajabula labo labatsandza kuthula.” (Mat. 5:9) Singajabula nangabe sitsatsa sinyatselo sekwakha kuthula nalabanye. Umfundzi Jakobe watsi: “Sitselo sekulunga sihlanyelwa etimeni letinekuthula kulabo labakha kuthula.” (Jak. 3:18) Nangabe singavani nalotsite ebandleni noma emndenini, singacela Jehova asisite sakhe kuthula, futsi utasipha umoya wakhe longcwele lotasisita sikhombise buntfu bebuKhristu futsi sitawujabula. Agcizelela kubaluleka kwekutsatsa sinyatselo kucala kuze sakhe kuthula, Jesu watsi: “Nangabe uletsa sipho elatini, bese uyakhumbula kutsi kukhona lomphetse kabi ngako umnakenu, sishiye khona lapho lesipho sakho, uhambe uye kuye. Cale wakhe kuthula naye, nasewente njalo sewungahamba uyewunikela ngesipho sakho.”​—Mat. 5:23, 24.

18, 19. Yini leyenta emaKhristu ajabule, ngisho noma ashushiswa?

¹⁸ Bekasho kutsini Jesu nakatsi: “Niyajabula nangabe bantfu banihlambalata, baniphatsa kabi, futsi banicalela emanga ngenca yami”? Waphindze watsi: “Jabulani nitfokote, ngenca yekutsi umvuzo wenu mkhulu ezulwini, ngobe nebaphrofethi baphatfwa ngaleyo ndlela.” (Mat. 5:11, 12) Ngesikhatsi baphostoli bashaywa futsi batjelwa kutsi bayekele kushumayela, “besuka kuleNkantolo YemaJuda bajabulile.” Bebangajatjuliswa kushaywa, kodvwa bebajabula “ngobe bebakufanele kuhlazwa ngenca yelibito laJesu.”​—Imis. 5:41.

¹⁹ Lamuhla, tikhonti taJehova tiyajabula nangabe tibeketelela kuphatfwa kabi noma tivivinywa ngenca yeligama laJesu. (Fundza Jakobe 1:2-4.) Njengebaphostoli, asijatjuliswa kuhlushwa, kodvwa nasihlala setsembekile, Jehova utasisita asiphe sibindzi kute sibeketele nasivivinywa. Nasi sibonelo, nga-August 1944 Henryk Dornik kanye nemnakabo bamikiswa enkambu yekuhlushwa. Bantfu lebebabashushisa batsi: “Asikhoni kubaphocelela kutsi bente intfo lengabenta bangetsembeki ngobe nasibashushisa bayajabula.” Umzalwane Dornik watsi: “Ngisho noma bengingafisi kushushiswa, kodvwa ngajabula ngobe ngahlale ngetsembekile kuJehova ngisho noma bengiphatfwa kabuhlungu. Umthantazo losuka enhlitiyweni wangisita ngasondzela kakhulu kuJehova, futsi ngabona kutsi uhlale alungele kusisita.”

20. Kusijabulisa ngani kukhonta “Nkulunkulu lojabulako”?

²⁰ Nangabe Jehova, ‘longuNkulunkulu lojabulako’ asitsandza, singajabula ngisho noma sishushiswa ngemalunga emindeni yetfu, sigula nome sesikhulile ngeminyaka. (1 Thim. 1:11) Siyajabula ngobe siyaciniseka kutsi Nkulunkulu “longeke acale emanga” utatigcwalisa tetsembiso takhe. (Thit. 1:2) Kugcwaliseka kwetetsembiso taJehova letijabulisako kuyojabulisa kakhulu kangangekutsi ngeke sisatikhumbula tinkinga lesibhekana nato nyalo. Emhlabeni lomusha, Jehova utasibusisa kakhulu ngendlela lesingayicabangi futsi ‘siyotijabulisa ngekuthula lokukhulu.’​—Hla. 37:11.