1. Nguyiphi indzaba lebalulekile Jesu lakhuluma ngayo nebafundzi bakhe ngebusuku bangaphambi kwekufa kwakhe?

NGEBUSUKU bakhe bekugcina, Jesu wakhuluma nebafundzi bakhe ngelutsandvo tikhatsi leticishe tibe ngu-30. Watjela bafundzi bakhe kutsi kufanele ‘batsandzane.’ (Joh. 15:12, 17) Nangabe batsandzana kakhulu, labanye bantfu bebatawubona kutsi babafundzi baKhristu sibili. (Joh. 13:34, 35) Bebangeke bagcine ngekusho kutsi bayatsandzana, kepha bekufanele bakhombise nangetento. Jesu watsi bekufanele babe nelutsandvo lwekutidzela. Watsi: “Kute umuntfu lonelutsandvo lolukhulu kunalolu, kutsi anganikela ngemphefumulo wakhe ngenca yebangani bakhe. Nangabe nigcina imiyalo yami nitawuba bangani bami.”​—Joh. 15:13, 14.

2. (a) Tinceku taJehova tatiwa ngani lamuhla? (b) Ngumiphi imibuto letawuphendvulwa kulesihloko?

² Tinceku taJehova lamuhla tatiwa ngekuba nelutsandvo sibili, lutsandvo lwekutidzela kanye nebunye. (1 Joh. 3:10, 11) Kuyajabulisa kutsi tinceku taJehova tiyatsandzana ngisho noma tinebuve lobungafani, tikhuluma tilwimi letingafani futsi tikhulele etindzaweni letehlukene. Singahle sitibute kutsi:  ‘Kubaluleke ngani vele kutsi sitsandzane kakhulu kulamanga lesiphila kuwo? Jehova naJesu bakhombisa njani kutsi bayasitsandza? Yini lesingayenta kute sakhane futsi sikhombise labanye kutsi siyabatsandza?’ ​—1 Khor. 8:1.

3. Yini bantfu lababhekana nayo ‘kuletikhatsi letibucayi’?

³ Ngenca yekutsi kuphila kugcwele “kuhlupheka nelusizi,” bantfu labanyenti ‘kuletikhatsi letibucayi’ babhekana nekucindzeteleka lokwehlukahlukene. (Hla. 90:10; 2 Thim. 3:1-5) Bantfu labanyenti baphelelwa litsemba. Luhlolo lukhombisa kutsi njalo ngemnyaka, bantfu labangetulu kwa-800 000 bayatibulala​—loko kusho kutsi njalo ngemizuzwana lengu-40, kunemuntfu lotibulalako. Lokubuhlungu nakakhulu kutsi ngisho nemaKhristu ayabhekana nalokucindzeteleka futsi lamanye awo agcina asatibulele.

4. Bobani lokukhulunywa ngabo eBhayibhelini labebafisa kufa?

⁴ Ngetikhatsi tekubhalwa kweliBhayibheli, letinye tinceku taNkulunkulu letetsembekile tabhekana netinkinga lebetitenta tifise kufa. Nasi sibonelo, Jobe bekeva buhlungu kakhulu kangangekutsi waze watsi: “Sengiyayeya imphilo yami. Ngingamane ngingete ngaphila iminyaka leminyenti.” (Jobe 7:16; 14:13) Jona wadvumateka kakhulu waze watsi: “Kuncono kimi kutsi ngife kunekutsi ngiphile.” (Jona 4:3) Umphrofethi Elija waphelelwa litsemba waze watsi: “Simakadze, sekwenele, sale utsatsa kuphila kwami.” (1 Khos. 19:4) Noma kunjalo, Jehova bekatitsandza letinceku takhe lebetetsembekile futsi bekafuna tichubeke tiphila. Akazange atilahle kodvwa watisita tancoba sifiso sato sekutibulala waphindze watikhombisa kutsi uyatitsandza kuze tichubeke timkhonta ngekwetsembeka.

5. Kungani bazalwane betfu badzinga kukhutsatwa kanye nekutsandvwa, ikakhulukati kulesikhatsi lesiphila kuso?

⁵ Ngisho noma bazalwane betfu bangafisi kufa, kodvwa labanyenti babhekana netimo leticindzetelako futsi bayakudzinga kukhutsatwa kanye nekutsandvwa. Labanye babeketelela kushushiswa futsi kuhlekiswa ngabo emsebentini. Bahlala bakhatsele ngenca yekutsi basebenta imisebenti lematima futsi basebenta sikhatsi lesengetiwe. Labanye banetinkinga temndeni letimatima. Mhlawumbe ngenca yekutsi bashade nebantfu labangamkhonti Jehova, futsi labachubeka babaphikisa. Ngenca yaloku kanye naletinye tinkinga, bazalwane labanyenti bahlala bakhatsele futsi badvumatekile. Ngubani longabasita bachubeke babeketelela letinkinga?

6. Jehova utidvudvuta njani ngelutsandvo tinceku takhe?

⁶ Jehova udvudvuta tinceku takhe ngekutsi aticinisekise kutsi uyatitsandza. Kungenteka kwawakhutsata kakhulu ema-Israyeli letsembekile kuva Jehova atsi: “Wena uligugu kimi, uhloniphekile emehlweni ami, nanjengobe ngikutsandza nje. . . . Ungesabi, ngobe nginawe.” (Isa. 43:4, 5) Njengobe ungulomunye wetikhonti taJehova, ciniseka kutsi Jehova ukutsandza kakhulu. * Kulabo labasekela kukhonta lokuhlantekile, liVi laNkulunkulu  litsi: “Simakadze Nkulunkulu wakho unawe, unemandla ekusindzisa. Uyawukujabulela kakhulu wena.”​—Zef. 3:16, 17.

7. Indlela Jehova lasitsandza ngayo ifana njani nendlela make latsandza ngayo umntfwana wakhe. (Buka sitfombe lesisekucaleni kwalesihloko.)

⁷ Ngisho noma bantfu baNkulunkulu bangahlangabetana natiphi tinkinga, Jehova wetsembisa kutsi utabadvudvuta futsi ngeke abalahle. Watsi bantfu bakhe uyawubetfwala ngemikhono yakhe aphindze abadvudvute “njengemfati nakadvudvuta umntfwanakhe.” (Isa. 66:12, 13) Umntfwana lomncane utiva avikelekile nangabe make wakhe amphetse noma adlala naye. Ngendlela lefanako, Jehova ukutsandza kakhulu futsi ufuna utive uvikelekile. Ungacali ungabate kutsi uligugu kakhulu kuJehova.​—Jer. 31:3.

8, 9. Indlela Jesu lasitsandza ngayo ingasicinisa njani?

⁸ Kunalesinye sizatfu lesisenta sati kutsi Jehova uyasitsandza. LiBhayibheli litsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Joh. 3:16) Loko kusikhombisa kutsi naJesu uyasitsandza futsi loku kuyasicinisa. LiBhayibheli litsi, ngisho ‘nekuhlupheka, noma kucindzeteleka’ ngeke ‘kusehlukanise nelutsandvo lwaKhristu.’​—Rom. 8:35, 38, 39.

⁹ Ngalesinye sikhatsi, tinkinga tingasenta siphelelwe ngemandla futsi sidvumale, noma tisente siphelelwe yinjabulo ekukhonteni Jehova. (Fundza 2 Khorinte 5:14, 15.) Ngisho noma singabhekana netinhlekelele, kuphikiswa, kudvumateka kanye nekukhatsateka, angeke silahle litsemba ngoba siyati kutsi Jesu uyasitsandza.

10, 11. Bobani lokufanele badvudvute bazalwane labadvumatekile? Chaza.

¹⁰ Jehova uphindze asebentise libandla kuze asidvudvute. Singakhombisa kutsi natsi siyamtsandza Jehova ngekutsi sidvudvute bazalwane nabodzadze. (1 Joh. 4:19-21) Umphostoli Pawula wakhutsata emaKhristu watsi: “Chubekani nikhutsatana futsi nakhana, njengobe nje nenta.” (1 Thes. 5:11) Lona akusiwo umsebenti walabadzala kuphela, kepha sonkhe singamlingisa  Jehova naJesu ngekutsi sidvudvute bazalwane betfu nabodzadze.​—Fundza Roma 15:1, 2.

¹¹ Labanye labacindzetelekile nalabakhatsateke kakhulu bangadzinga lusito lwabodokotela. (Luk. 5:31) Labadzala kanye nalabanye bazalwane bayati kutsi abasibo bodokotela, kodvwa bangabasita ngekutsi babadvudvute. Sonkhe kufanele ‘sikhulume ngendlela ledvudvutako nalabacindzetelekile, sisekele lababutsakatsaka, futsi sibeketelele bonkhe bantfu.’ (1 Thes. 5:14) Onkhe emaKhristu kufanele akhulume ngendlela ledvudvutako nalabacindzetelekile futsi ababeketelele. Uyetama yini kudvudvuta labanye? Yini longayenta kuze ubadvudvute nakakhulu?

12. Shano sibonelo sadzadze lowakhutsatwa lutsandvo lwebazalwane bakhe.

¹² Lomunye dzadze wase-Europe utsi: “Ngaletinye tikhatsi ngihle ngicabanga kutibulala. Kodvwa kunebazalwane labangidvudvutako. Bazalwane nabodzadze basebandleni bahlale bangikhutsata ngelutsandvo futsi loku kungisitile kutsi ngichubeke ngiphila. Ngisho noma babancane labatiko kutsi ngicindzetelekile, libandla lonkhe lihlale lingisekela. Lomunye umndeni sewufana nebatali bami mbamba. Uyanginakekela futsi uhlale ukulungele kungisita.” Bazalwane ngeke basisite ngendlela lefanako. Ngamunye wetfu kukhona langakwenta kuze asite bazalwane nabodzadze labacindzetelekile. *

13. Yini lebalulekile lekufanele siyente nangabe sidvudvuta labanye?

¹³ Bani silaleli lesihle. (Jak. 1:19) Sikhombisa kutsi siyabatsandza bantfu nangabe sibalalela futsi sibavela. Singabuta imibuto ngekuhlakanipha nangendlela lekhombisa umusa kuze sati kutsi umuntfu lodvumatekile utiva njani. Nasenta njalo sitawukhona kumvela futsi simdvudvute. Simo sakho sebuso kufanele sikhombise kutsi umkhatsalela mbamba futsi uyamtsandza. Nangabe umKhristu akuchazela indlela lativa ngayo, kufanele umlalelisise ngesineke futsi ungamngeni emlonyeni. Loko kutakusita kutsi uyicondze kahle indlela lativa ngayo. Kutawuphindze kumente akwetsembe futsi akulalele loko lokushoko njengobe wetama kumdvudvuta. Utawukhona kudvudvuta labanye nangabe ubakhombisa kutsi unendzaba nabo futsi uyabatsandza.

14. Kungani kufanele singabasoli labanye?

¹⁴ Ungabasoli. Kusola umuntfu locindzetelekile kungamenta acindzeteleke kakhulu futsi kungenta imetamo yetfu yekumdvudvuta ibe lite. LiBhayibheli litsi: “Emavi lakhulumeke ngebudlabha ahlaba njengesikhali; kodvwa emavi lakhulumeke ngekuhlakanipha ayaphilisa.” (Taga 12:18) Ngalokuvamile sisuke singakacondzi kusho emavi lalimatako kumuntfu locindzetelekile. Noma kunjalo, ulimala kakhulu nangabe siwasho. Sitawukhona kudvudvuta labanye nangabe sibavela futsi senta konkhe lesingakwenta kuze sitifake eticatfulweni tabo.​—Mat. 7:12.

15. Nguliphi lithuluzi lelingasisita nasidvudvuta labanye?

 ¹⁵ Sebentisa liBhayibheli nawudvudvuta labanye. (Fundza Roma 15:4, 5.) LiBhayibheli livela Nkulunkulu “losisita kutsi sicinisele nalosidvudvutako.” Ngako asimangali nangabe sidvudvuteka nasilifundza. Ngephandle kwemibhalo lesidvudvutako, sinemathuluzi lamanyenti ekudadisha liBhayibheli. Singasebentisa i-“Watch Tower Publications Index” kanye ne-Lithulusi Lekucwaninga LaBoFakazi BaJehova. Letincwadzi tingasisita sitfole imiBhalo lengasisita sikhone kubeketelela tonkhe tinkinga. Tingaphindze tisisite sikulungele kahle kudvudvuta labanye ngelutsandvo.

16. Ngubuphi buntfu lokufanele sibe nabo nasidvudvuta umKhristu locindzetelekile?

¹⁶ Bani nesihawu nemusa. Jehova “unguYise wemusa, naNkulunkulu wayo yonkhe indvudvuto,” futsi utikhombisa umusa tinceku takhe. (Fundza 2 Khorinte 1:3-6; Luk. 1:78; Rom. 15:13) Pawula wasibekela sibonelo lesihle kakhulu sekuba nemusa, watsi: “Saniphatsa kahle njengalapho make lomunyisako anakekela luswane lwakhe ngemusa. Ngenca yelutsandvo lolukhulu lesinalo ngani, sakujabulela kuninika tindzaba letimnandzi taNkulunkulu, hhayi tona kuphela, kepha nemiphefumulo yetfu, ngobe natsandzeka kitsi.” (1 Thes. 2:7, 8) Nangabe silingisa Jehova ngekuba nemusa, sitawukhona kudvudvuta umuntfu locindzetelekile lobekathantazela indvudvuto.

17. Ngumuphi umbono lokahle ngebazalwane betfu lotasisita kutsi sibadvudvute?

¹⁷ Ungalindzeli kutsi bazalwane bakho bangawenti emaphutsa. Bani nembono lofanele ngebazalwane bakho. Angeke kwenteke kutsi bangawenti emaphutsa futsi ungadvumala nangabe ugadze kutsi bangawenti. (Shu. 7:21, 22) Khumbula kutsi Jehova akalindzeli kutsi tinceku takhe tente intfo letingeke tikhone kuyenta. Nangabe silingisa sibonelo sakhe, sitawukhona kubabeketelela labanye nabente emaphutsa. (Ef. 4:2, 32) Esikhundleni sekubenta bative bangasilutfo futsi sibacatsanise nalabanye, kufanele sibancome ngaloko labakwentako. Loko kungabakhutsata. Kuncoma labanye ngalokusuka enhlitiyweni kungabadvudvuta futsi kubente bajabule emsebentini labawentela Nkulunkulu.​—Gal. 6:4.

18. Yini lesenta sifune kuchubeka sidvudvuta labanye ngelutsandvo?

¹⁸ Tonkhe tinceku taJehova tiligugu kuye nakuJesu Khristu lowasifela. (Gal. 2:20) Sibatsandza kakhulu bazalwane nabodzadze, ngako sifuna kubanakekela futsi sibakhombise umusa. Kuze sikhone kubakhutsata, kufanele “siphishanekele tintfo letiletsa kuthula netintfo letisenta sakhane.” (Rom. 14:19) Sililangatelela kakhulu live lelisha lapho khona kutawuba bete tintfo letisihlukumetako. Angeke kuphindze kube nekugula, timphi, kufa, kushushiswa, tinkinga temndeni kanye nekudvumateka. Ekupheleni kweminyaka leyinkhulungwane bonkhe bantfu batawuba bete sono. Bantfu labatawuhlala betsembekile eluvivinyweni lwekugcina batawuba ngemadvodzana aNkulunkulu asemhlabeni futsi batawutfola “inkhululeko lekhatimulako yebantfwana baNkulunkulu.” (Rom. 8:21) Shangatsi sonkhe singachubeka sitsandzana futsi sisitana kuze sitfole umvuzo lojabulisako.