Felisa: Ngakhulela eSpain emndenini lophansi ngetimali. BesingemaKatolika emndenini wakitsi futsi besiyitsandza kakhulu inkholo. Ecinisweni, emalunga emndeni wakitsi langu-13 abebaphristi nobe asebentela lisontfo. Umzala wamake naye abengumphristi futsi afundzisa esikolweni semaKatolika. Ngaphambi kwekutsi Papa John Paul II afe, wambusisa lomzala wamake. Babe abesebenta ngetinsimbi, futsi make abesebenta emasimini. Besibantfwana labasiphohlongo futsi mine bengingulomdzala.

Ngesikhatsi ngineminyaka lengu-12, kwacala imphi yelive eSpain. Ngemuva kwalemphi, babe waboshwa ngobe hulumende abengayitsandzi imibono yakhe yepolitiki. Bekumatima ngamake kusitfolela kudla lokwanele kute sidle sonkhe. Ngako watfumela bodzadzewetfu labatsatfu, bo-Araceli, Lauri naRamoni kutsi bayohlala nemasistela edolobheni laseBilbao. Bodzadzewetfu besebatawutfola kudla lokwanele.

Araceli: Ngaleso sikhatsi bengineminyaka lengu-14 budzala, Lauri analengu-12 kantsi Ramoni abeneminyaka lengu-10. Besiwukhumbula kakhulu umndeni wakitsi. Lapho besihlala khona, umsebenti wetfu bewukuhlanta. Ngemuva kweminyaka lemibili, emasistela asitfumela kulenye indzawo lenkhulu lebeyiseZaragoza nayo lebeyihlala emasistela. Kuleyo ndzawo bekunakekelwa lasebakhulile. Besisebenta kamatima sihlanta likhishi futsi loko bekusenta sikhatsale kakhulu.

Felisa: Ngesikhatsi bodzadzewetfu baya eZaragoza, make namalume lobekangumphritsi wasendzaweni bancuma kungitfumela lapho nami. Bebafuna kutsi ngihambe endzaweni ngobe bekunemfana lobekangitsandza. Nami ngakulangatelela kuyohlala nemasistela ngobe bengimtsandza Nkulunkulu. Bengiya esontfweni onkhe malanga, futsi bengifuna kuba sitfunywa selivangeli semaKatolika, njengamalume wami lowaya e-Afrika.

 Kodvwa nangifika lapho bekuhlala khona emasistela, ngabona kutsi angeke ngikhone kwenta tintfo letinyenti lebengifuna kutenta. Lamasistela abengangikhutsati kutsi ngiyokhonta Nkulunkulu kulelinye live njengobe bengifuna kwenta njalo. Ngako ngemuva kwemnyaka, ngabuyela ekhaya kute ngiyonakekela malume njengobe abengumphristi. Bengihlanta indlu yakhe futsi besithantaza kanye kanye njalo ntsambama. Bengikutsandza futsi nekuhlela kahle timbali esontfweni futsi ngigcokise titfombe taMariya ‘netabosanta.’

Araceli: Ngesikhatsi ngiseZaragoza, ngenta tifungo tekucala lebetidzingeka kute ngibe lisistela. Ngemuva kwaloko emasistela akhetsa kungehlukanisa nabodzadzewetfu. Ngako mine bangitfumela eMadrid, Lauri bamtfumela eValencia. Ramoni wachubeka ahlala eZaragoza. Ngesikhatsi ngifika eMadrid, ngenta tifungo tesibili tekuba lisistela. Bekufika bantfu labanyenti batohlala lapho besihlala khona nemasistela, njengebantfu besikolwa nebantfu labadzala. Ngako bewumnyenti umsebenti lebekudzingeka wentiwe. Mine bengisebenta esibhedlela lesikulendzawo lehlala emasistela.

Nami bengikubuke ngalabovu kuba lisistela. Bengicabanga kutsi sitawuba nesikhatsi lesinyenti sifundza liBhayibheli. Kodvwa ngadvumateka. Kute umuntfu bekakhuluma ngeliBhayibheli nobe ngaNkulunkulu naJesu. Ngafundza siLathini, ngafundza nangekuphila ‘kwabosanta’ baseKatolika, futsi sasikhonta Mariya. Kodvwa esikhatsini lesinyenti besisebenta kamatima.

Ngacala kutiva ngicindzetelekile futsi ngikhatsatekile. Ngangitiva shengatsi ngabe ngatfola imali kute ngisite umndeni wami esikhundleni sekusebenta kulendzawo kute ngente labanye bantfu banjinge. Ngako ngakhuluma nalomake lophetse mayelana nalendzaba futsi ngamtjela kutsi ngifuna kuhamba. Kodvwa wangitsatsa wayongivalela kulenye indlwana lencane. Abecabanga kutsi loko kutangenta kutsi ngingasahambi.

Lamasistela angikhipha kulendlana, kodvwa ngisikhatsi babona kutsi solo ngisafuna kuhamba baphindze bangivalela. Bakwenta loko kwaze kwaba katsatfu, ngemuva kwaloko bangitjela kutsi ngingahamba kuphela nangingabhala lamavi lalandzelako: “Ngihamba ngesizatfu sekutsi ngikhetse kukhonta Sathane kunekukhonta Nkulunkulu.” Ngetfuka kakhulu. Bengikufuna mbamba kuhamba, kodvwa bengingafuni kuwabhala lamavi. Ekugcineni ngakhuluma nemphristi futsi ngamtjela kutsi kwentekeni. Wacela imvume kumbhishobhi yekutsi angibuyisele eZaragoza. Ngemuva kwetinyanga letimbalwa ngiseZaragoza, ngavunyelwa kutsi ngihambe. Ngekushesha ngemuva kwaloko, boLauri naRamoni nabo bahamba.

Felisa: Ngemuva kwesikhatsi ngashada futsi ngatfutsela kulesinye sifundza saseSpain lokutsiwa yiCantabria. Bengichubeka ngiya njalo esontfweni. Ngalelinye lilanga esontfweni, umphristi wamemeta atfukutsele watsi: “Bukani nayi incwadzi!” Wasikhombisa incwadzi  letsi “The Truth That Leads to Eternal Life.” Wase utsi: “Nangabe kukhona umuntfu loke wakunika lencwadzi, yiletse lakimi nobe uyilahle!”

Bengite lencwadzi, kodvwa bengiyifuna. Ngemuva kwemalanga lambalwa, bomake lababili bangivakashela. BebaboFakazi BaJehova futsi banginika lencwadzi. Ngayifundza ngalobo busuku. Labomake nababuya bangibuta kutsi ngiyafuna yini kufundza liBhayibheli, futsi ngatsi ngiyafuna.

Bengihlale ngifuna kujabulisa Nkulunkulu. Ngako ngafundza liciniso ngaJehova futsi ngacala kumtsandza ngalokusuka enhlitiyweni. Bengifuna kutjela wonkhe umuntfu ngaye. Nga-1973 ngabhajatiswa. Noma nini nangitfola sikhatsi bengetama kukhuluma nemndeni wami ngeliciniso. Kodvwa umndeni wami, ikakhulukati dzadzewetfu Araceli, wagcizelela kutsi loko lengikukholelwako kungemanga.

Araceli: Ngesizatfu sekutsi bengingaphatseki kahle ngesikhatsi ngihlala nemasistela, bengitiva ngingasayitsandzi inkholo yami. Kodvwa bengichubeka ngiya esontfweni ngemasontfo futsi bengithantaza onkhe malanga. Bengifuna kulicondza liBhayibheli futsi ngacela Nkulunkulu kutsi angisite. Ngemuva kwaloko Felisa wangitjela ngaloko lebesekakufundzile. Abejabule kakhulu ngaloko lebekakukholelwa kangangekutsi ngacabanga kutsi uyahlanya. Angizange ngivumelane naloko bekakusho.

Ngekuhamba kwesikhatsi ngabuyela eMadrid kute ngiyosebenta futsi ngashada. Njengobe iminyaka ichubeka, ngibonile kutsi bantfu lebebaya njalo esontfweni bebangaphili ngetimfundziso taJesu. Ngako ngayekela kuya esontfweni. Ngayekela nekukholelwa ‘kubosanta’ nobe enfundzisweni yesihogo, futsi angiphindzanga ngakholwa kutsi umphristi angatsetselela tono. Ngaphindze ngalahla tonkhe titfombe tenkholo lebenginato. Bengingaciniseki kutsi loko lengikwentako kulungile yini. Ngativa ngidvumatekile, kodvwa ngachubeka ngithantaza kuNkulunkulu ngitsi: “Ngiyafuna kukwati. Ngicela ungisite!” Ngiyakhumbula kutsi BoFakazi BaJehova bebafika tikhatsi letinyenti ekhaya lami, kodvwa angizange ngibavulele ngisho kanye. Beseyingekho inkholo lengiyetsembako.

Dzadzewetfu Lauri bekahlala eFrance, Ramoni ahlala eSpain. Ngabo-1980, bacala kufundza liBhayibheli naBoFakazi BaJehova. NjengaFelisa, nami bengiciniseka kutsi ababoni kutsi bafundziswa emanga.  Ngekuhamba kwesikhatsi, ngahlangana na-Angelines, longulomunye wabomakhelwane bami, futsi saba bangani labakhulu. Naye bekanguFakazi WaJehova. Angelines nendvodza yakhe bangibuta tikhatsi letinyenti kutsi ngiyafuna yini kufundza nabo liBhayibheli. Bebabona kutsi nanobe bengitsi angisanendzaba nenkholo, kodvwa bengifuna kwati ngeliBhayibheli. Ekugcineni ngatsi kubo: “Akunankinga singafundza, kodvwa nangabe nitawuvuma kutsi ngisebentise liBhayibheli lami.” Benginelihumusho lesiNácar-Colunga.

Felisa: Ngesikhatsi ngibhajatiswa nga-1973, bekunaboFakazi labangaba ngu-70 enhloko dolobha yaseCantabria, lokuyiSantander. Bekufanele sihambe emabanga lamadze kute siyoshumayela kuto tonkhe tindzawo taleso sifundza. Ngako besihamba ngebhasi futsi ngekuhamba kwesikhatsi sasebentisa imoto kute siyoshumayela kuletindzawo.

Kuyo yonkhe leminyaka, ngifundzele bantfu labanyenti futsi labangu-11 babo babhajatiswa. Bantfu labanyenti lengifundze nabo liBhayibheli bebamaKatolika. Bekufanele ngibe nesineke nangifundza nabo. Njengami, nabo bebadzinga sikhatsi kute babone kutsi loko lebebakukholelwa kungemanga. Bengati kutsi liBhayibheli kuphela nemoya longcwele waJehova longasita umuntfu kutsi ashintje indlela lacabanga ngayo futsi acondze liciniso. (Hebheru 4:12) Indvodza yami Bienvenido, lebeyiliphoyisa, yabhajatiswa nga-1979, kantsi make wacala kufundza liBhayibheli ngaphambi nje kwekutsi ashone.

Araceli: Ngesikhatsi ngicala kufundza liBhayibheli naBoFakazi BaJehova, benginemuva wekutsi akukafaneli ngibetsembe. Kodvwa ngekuhamba kwesikhatsi, yashintja indlela lebengitiva ngayo. BoFakazi bebangagcini nje ngekufundzisa ngeliBhayibheli kodvwa bebaphindze bayilalele imiyalo yalo. Kukholwa kwami kuJehova naseBhayibhelini kwacala kukhula, futsi ngativa ngijabule kakhulu. Labanye bomakhelwane bami balubona lolushintjo, futsi batsi: “Ye-Araceli chubeka uhamba kulendlela loyikhetsile.”

Ngikhumbula ngithantaza ngitsi: “Ngiyabonga Jehova ngekutsi awukangilahli nekutsi wanginiketa ematfuba lamanyenti ekutsi ngitfole loko lebengikudzinga​—lwati lolungulonalona lweliBhayibheli.” Ngaphindze ngacela dzadzewetfu Felisa kutsi angicolele ngekutsi ngakhuluma kabi naye. Kusukela ngaleso sikhatsi kuchubeke, esikhundleni sekutsi sihhwilitisane, besesijabulela kucoca ngeliBhayibheli. Nga-1989, ngabhajatiswa futsi besengineminyaka lengu-61 budzala.

Felisa: Nyalo sengineminyaka lengu-91 budzala. Indvodza yami yashona, futsi angisakhoni kwenta tintfo ngendlela bengitenta ngayo. Kodvwa ngisalifundza liBhayibheli onkhe malanga, futsi ngiyaya emihlanganweni yelibandla nasensimini noma nini nangikhonile.

Araceli: Ngiyatsandza kukhuluma ngaJehova kubo bonkhe baphristi nemasistela lengidibana nawo. Mhlawumbe loko kubangelwa kutsi nami bengilisistela. Ngibe netincociswane letijabulisako nalabanye babo, futsi labanyenti bayatemukela tincwadzi tetfu nabomagazini. Ngikhumbula nje lomunye umphristi lengake ngacoca naye. Ngemuva kwekutsi ngikhulume naye emahlandla lambalwa, wavumelana naloko lebengikusho. Ngemuva kwaloko watsi: “Kodvwa njengobe sengimdzala kangaka ngingayaphi nje? Balandzeli bami nemndeni wami batawutsini?” Ngamphendvula ngatsi: “Nkulunkulu yena utawutsini?” Wabona kutsi ngicinisile, futsi ngambona kutsi abengakajabuli. Kodvwa kubonakala shengatsi bekete sibindzi sekushintja.

Angeke ngize ngilikhohlwe lilanga indvodza yami leyangitjela ngalo kutsi ifuna kuya nami esifundvweni. Bekangetulu kweminyaka lengu-80 ngesikhatsi aya esifundvweni kwekucala, futsi ngemuva kwaloko akaphindzanga walova. Bamfundzela futsi wacala nekushumayela. Ngikhumbula tikhatsi letinyenti letimnandzi lesaba nato sishumayela kanye kanye. Washona kusele tinyanga lembili kutsi kufike lilanga lakhe lekubhajatiswa.

Felisa: Ngesikhatsi ngicala kukhonta Jehova, bodzadzewetfu labancane labatsatfu bebangiphikisa. Kodvwa ngekuhamba kwesikhatsi, nabo balemukela liciniso. Loko kungulenye yetintfo letinhle kakhulu letake tenteka ekuphileni kwami. Ngemuva kwaloko, besesikwati kucitsa sikhatsi sindzawonye futsi sikhuluma ngaNkulunkulu wetfu lomuhle Jehova nangeliVi lakhe. Ekugcineni sonkhe besesikhonta Jehova. *