1-3. (a) EmaKhristu akukhombise njani kutsi ayakulangatelela kuhlangana ndzawonye? (Buka sitfombe lesisekucaleni kwalesihloko.) (b) Sitawufundza ngani kulesihloko?

NGESIKHATSI Corinna aneminyaka lengu-17 budzala, unina waboshwa wase utfunyelwa enkanjini lekhashane lapho kwakufukuzwa khona. Ngemuva kwaloko, naCorinna watsatfwa wayiswa endzaweni lekhashane ngemakhilomitha latinkhulungwane nelikhaya lakubo leliseSiberia. Kuleyo ndzawo, abesebenta epulazini futsi abephatfwa njengesigcila. Ngaletinye tikhatsi abesetjentiswa ngenkhani emakhateni lashubisa umnkantja, angakagcoki ngisho netimphahla letifutfumele. Nobe kunjalo, Corinna nalomunye dzadze bancuma kutsi batawenta konkhe lokusemandleni abo kute baye emhlanganweni yelibandla.

² Corinna utsi: “Sasuka kulelipulazi ebusuku sahamba ngetinyawo emakhilomitha langu-25 siya esiteshini setitimela. Sitimela sasuka ngensimbi yesibili ekuseni, futsi sahamba ema-awa lasitfupha ngaphambi kwekutsi sisehlise. Ngemuva kwaloko, sahamba emakhilomitha lalishumi ngetinyawo  siya lapho besihlanganela khona.” Lamjabulisa kakhulu Corinna loluhambo. Utsi: “Esifundvweni, safundza Sicongosekulindza futsi sahlabela tingoma teMbuso. Lemihlangano beyakha futsi icinisa kukholwa.” Ngemuva kwemalanga lamatsatfu, labodzadze babuyela kulelipulazi kodvwa umnikati walo akazange abone nekutsi bebangekho.

³ Bantfu baJehova bahlale bakubuke ngalabovu kuhlangana. Sibonelo saloko kutsi emaKhristu angelikhulu lekucala leminyaka, abekulangatelela kuhlangana kute akhonte Jehova futsi afundze ngaye. (Imisebenti 2:42) Ngendlela lefanako, nawe kungenteka ukubuke ngalabovu kuya emihlanganweni. Kodvwa njengabo bonkhe bazalwane nabodzadze, ungakutfola kumatima kuya emihlanganweni ngaso sonkhe sikhatsi. Kungenteka kudzingeka usebente ema-awa lamanyenti nobe kunetintfo letinyenti lokufanele utente nobe mhlawunbe uhlale udziniwe. Ngako-ke, yini lengasisita kute sente konkhe lokusemandleni etfu kutsi sibe khona emihlanganweni? ^[1] (Fundza kwatiswa lokusekugcineni.) Singabakhutsata njani bantfu lesibafundzela liBhayibheli nalabanye kutsi bete njalo emihlanganweni? Lesihloko sitawuchaza kutsi kungani kuya emihlanganweni (1) kubalulekile kitsi, (2) kusita labanye futsi (3) kujabulisa Jehova. ^[2]—Fundza kwatiswa lokusekugcineni.

4. Kuhlangana ndzawonye kusisita njani kutsi sifundze ngaJehova?

⁴ Imihlangano iyasifundzisa. Yonkhe imihlangano iyasisita kutsi sifundze lokunyenti ngaJehova. Nasi sibonelo: Emabandleni lamanyenti bekufundvwa incwadzi letsi “Sondela KuJehova” eSifundvweni SeliBhayibheli Selibandla. Wativa njani nanifundza ngebunguye baJehova nanawuva indlela bazalwane bakho labativa ngayo ngaNkulunkulu? Siyaciniseka kutsi loko kwakwenta wamtsandza kakhulu Jehova. Emihlanganweni, siphindze sifundze lokunyenti ngeliBhayibheli nasilalela tinkhulumo, imiboniso, futsi silalelisisa nasifundzelwa lona. (Nehemiya 8:8) Cabanga nangetifundvo letinyenti lesititfola liviki neliviki nasilungiselela kufundvwa kweliBhayibheli futsi nanasiva kutsi labanye bafundzeni.

5. Imihlangano ikusite njani kutsi usebentise loko lokufundze eBhayibhelini futsi utfutfuke endleleni loshumayela ngayo?

⁵ Imihlangano isifundzisa kusebentisa loko lesikufundza eBhayibhelini ekuphileni kwetfu. (1 Thesalonika 4:9, 10) Nasi sibonelo: Uke waba khona yini eSifundvweni se-Sicongosekulindza lesakwenta wafuna kwenta lokunyenti emsebentini waJehova, wafuna kutfutfukisa imithantazo yakho nobe wafuna kutsetselela umzalwane nome dzadze? Imihlangano lesiba nayo emkhatsini weliviki ingasifundzisa indlela yekushumayela tindzaba letimnandzi nendlela yekusita labanye bacondze liciniso leliseBhayibhelini.​—Matewu 28:19, 20.

6. Imihlangano yetfu isikhutsata futsi isisite njani kutsi sihlale sicinile?

 ⁶ Imihlangano iyasikhutsata. Live laSathane letama kwenta kukholwa kwetfu kube butsakatsaka, lingasenta sitive sikhatsatekile futsi sidvumatekile. Kodvwa imihlangano yetfu iyasikhutsata futsi isiniketa emandla ekuchubeka sikhonta Jehova. (Fundza Imisebenti 15:30-32.) Etikhatsini letinyenti, sifundza ngekutsi tigcwaliseke njani tiphrofetho letiseBhayibhelini. Loku kungasisita setsembe mbamba kutsi loko Jehova lasetsembise kona esikhatsini lesitako kutawenteka. Bazalwane nabodzadzewetfu abasikhutsati nje kuphela nababeka tinkhulumo, kodvwa baphindze basikhutsate nabaphendvula nanabahlabela ngalokusuka enhlitiyweni badvumisa Jehova. (1 Khorinte 14:26) Nasicoca nabo ngaphambi kwekutsi kucale imihlangano nanaseyiphelile, siyavuseleleka ngobe babangani betfu labasikhatsalela mbamba.​—1 Khorinte 16:17, 18.

7. Kungani kubalulekile kuya emihlanganweni yelibandla?

⁷ Emihlanganweni sitfola lusito lwemoya longcwele waNkulunkulu. Jesu usebentisa lomoya longcwele kute ahole emabandla. Usitjela kutsi kufanele ‘sive loko umoya lokushoko emabandleni.’ (Sembulo 2:7) Umoya longcwele ungasisita kutsi silwisane netilingo futsi sishumayele ngesibindzi. Ungaphindze usisite kutsi sitsatse tincumo letikahle. Kungako kufanele sente konkhe lokusemandleni etfu kute sibe khona emihlanganweni futsi sitfole lusito lwemoya longcwele waNkulunkulu.

8. Nangabe bazalwane basibona emihlanganweni, basiva siphendvula futsi sihlabela kubasita njani loko? (Hlola libhokisi lelitsi “ Uhlala Ativa Ancono Ngemuva Kwemhlangano.”)

⁸ Emihlanganweni, siba nelitfuba lekukhombisa bazalwane nabodzadzewetfu kutsi siyabatsandza. Labanyenti emabandleni lesikuwo babeketelela bumatima lobukhulu. Umphostoli Pawula wabhala watsi: “Asinakaneni.” (Hebheru 10:24, 25) Singakhombisa kutsi siyabakhatsalela bazalwane betfu ngekutsi sihlangane ndzawonye kute sikhutsatane.  Nasiya emihlanganweni, sikhombisa bazalwane betfu kutsi sifuna kuba nabo, sicoce nabo nekutsi sinesifiso sekwati indlela labativa ngayo. Siphindze sibakhutsate nabasiva siphendvula futsi sihlabela ngalokusuka enhlitiyweni.​—Kholose 3:16.

9, 10. (a) Chaza kutsi emavi aJesu latfolakala kuJohane 10:16 asisita njani sicondze kungani kubalulekile kutsi sihlangane ndzawonye nebazalwane betfu. (b) Nangabe siba khona njalo emihlanganweni, singamsita njani umuntfu lolahlwe ngumndeni wakhe?

⁹ Nasiya emihlanganweni, sisita libandla kutsi lihlale lisondzelene. (Fundza Johane 10:16.) Jesu watifananisa nemelusi, wase ufananisa balandzeli bakhe nemhlambi wetimvu. Cabanga ngaloku: Nangabe timvu letimbili tingaba segcumeni, bese kutsi letinye letimbili tiba sesihosheni, bese yinye iba kulenye nje indzawo, singasho yini kutsi letimvu letisihlanu tingumhlambi munye? Cha angeke sesisho, ngobe umhlambi wetimvu uhlala ndzawonye futsi ulandzela umelusi wato. Ngendlela lefanako, akukafaneli sitehlukanise nebazalwane betfu ngekutsi singeti emihlanganweni. Sidzinga kuhlangana ndzawonye kute sibe “ngumhlambi munye” futsi silandzele ‘umelusi munye.’

¹⁰ Imihlangano yetfu iyasisita kutsi sibe munye njengemndeni lonelutsandvo. (Tihlabelelo 133:1) Labanye ebandleni balahlwe tihlobo tabo tengati, letifaka ekhatsi batali babo nobe bantfwabakubo. Kodvwa Jesu ubetsembise kubanika umndeni lotabatsandza futsi ubanakekele. (Makho 10:29, 30) Nangabe uya njalo emihlanganweni, uba ngubabe, ngumake, ngubhuti nobe ngusisi walotsite ebandleni. Nasicabanga ngaloko, senta konkhe lokusemandleni etfu kute sibe khona emihlanganweni.

11. Kuya emihlanganweni kusisita njani kutsi sinikete Jehova loko lokumfanele?

¹¹ Nasisemihlanganweni, siyakwati kunika Jehova loko lokumfanele. Njengobe anguMdali wetfu, kufanele simbonge, simhloniphe futsi simdvumise. (Fundza Sembulo 7:12.) Nasisemihlanganweni yetfu yelibandla singakubonisa loko nasithantaza kuJehova, sihlabela, futsi sikhuluma ngaye. Sinelitfuba lelimangalisako lekukhonta Jehova maviki onkhe.

12. Jehova utiva njani nangabe silalela umyalo wakhe wekutsi sibe khona emihlanganweni?

¹² Jehova wasidala, ngako kufanele simlalele. Usiyala kutsi sichubeke sihlangana ndzawonye, ikakhulukati njengobe sisondzela ekupheleni kwalelive. Ngako nasilalela lomyalo, Jehova uyajabula. (1 Johane 3:22) Uyacaphela kutsi sikufuna mbamba kuba khona emihlanganweni futsi uyijabulela yonkhe imetamo lesiyentako kute siye kuyo.​—Hebheru 6:10.

13, 14. Nasisemihlanganweni sisondzela ngayiphi indlela kuJehova nakuJesu?

¹³ Nasiya emihlanganweni, sikhombisa Jehova kutsi sifuna kusondzela kuye naseNdvodzaneni yakhe. Nasisemihlanganweni, sifundza liBhayibheli futsi sifundziswe nguJehova loko lokufanele sikwente nendlela lokufanele siphile ngayo. (Isaya 30:20, 21) Ngisho nobe labanye labangamkhonti Jehova beta emihlanganweni yetfu, bayatibonela kutsi sicondziswa nguNkulunkulu. (1 Khorinte 14:23-25) Jehova ucondzisa imihlangano yetfu ngemoya wakhe longcwele futsi loko lesikufundza kulemihlangano kuvela kuye. Ngako nasisemihlanganweni sisuke sifundziswa nguJehova, sibone nendlela lasitsandza ngayo futsi sisondzelane naye kakhudlwana.

¹⁴ Jesu loyiNhloko yelibandla utsi: “Nangabe kunalababili nobe labatsatfu labahlangene ngelibito lami, nami ngisuke ngilapho.” (Matewu 18:20) LiBhayibheli liphindze litsi Jesu ‘uhamba emkhatsini’ wemabandla. (Sembulo 1:20–2:1) Kuyacaca kutsi Jehova naJesu banatsi futsi bayasicinisa nasisemihlanganweni. Ucabanga kutsi Jehova utiva njani nakakubona wenta konkhe lokusemandleni akho kute usondzele kuye naseNdvodzaneni yakhe?

15. Kuya emihlanganweni kumkhombisa njani Nkulunkulu kutsi sifuna kumlalela?

¹⁵ Nasiya emihlanganweni sisuke sikhombisa Jehova kutsi sifuna kumlalela. Jehova akasiphoceleli kutsi sente loko lakushoko. (Isaya 43:23) Ngako nasikhetsa kulalela umyalo wakhe wekuba khona emihlanganweni, sisuke simkhombisa kutsi siyamtsandza futsi siyakholelwa kutsi unelilungelo lekusitjela lokufanele sikwente. (Roma 6:17) Nasi sibonelo: Yini lesingayenta nangabe umcashi afuna sisebente sikhatsi lesidze size singakhoni kuba khona njalo emihlanganweni? Mhlawumbe hulumende utsi nangabe  bantfu bahlangana kute bakhonte Jehova, batawuhlawuliswa, bafakwe ejele nobe bajeziswe kamatima. Nobe ngaletinye tikhatsi singahle sihlele kwenta lokutsite esikhundleni sekutsi siye emihlanganweni. Kuletimo lesisandza kutisho, kufanele sikhetse kutsi sitawenta njani. (Imisebenti 5:29) Sikhatsi ngasinye nasikhetsa kulalela Jehova, sisuke simjabulisa.​—Taga 27:11.

16, 17. (a) Sati ngani kutsi imihlangano beyimcoka kakhulu kumaKhristu angelikhulu lekucala? (b) UMzalwane George Gangas abetiva njani ngemihlangano yebuKhristu?

¹⁶ Ngemuva kwekuhlangana ndzawonye ngeliPhentekhoste langa-33, emaKhristu abehlangana njalo kuze akhonte Jehova. ‘Abechubeka atinikela etimfundzisweni tebaphostoli, ekwabelaneni tintfo.’ (Imisebenti 2:42) Abehlangana ngisho nobe abephatfwa kabi nguhulumende waseRoma nebaholi benkholo labangemaJuda. Abenta konkhe lokusemnadleni kute achubeke ahlangana ndzawonye ngisho nobe kwakungasimelula.

¹⁷ Nalamuhla, tinceku taJehova tiyakujabulela kuba semihlanganweni. George Gangas lobekalilunga leSigungu Lesibusako iminyaka lengetulu kwa-22, watsi: “Kimi kuhlangana nebazalwane kungulenye yetintfo letingijabulisa kakhulu ekuphileni kwami futsi kuyangikhutsata. Ngiyatsandza kusheshe ngifike eHholweni leMbuso, futsi nakwentekile ngephute kuhamba. Kuyangijabulisa kukhuluma nebantfu baNkulunkulu. Nanginabo ngitiva ngisekhaya, ngisepharadisi lakamoya.” Uchubeka atsi: “Ngihlale ngicabanga futsi nginesifiso sekuba semihlanganweni.”

18. Utiva njani ngemihlangano yetfu, futsi yini lotimisele kuyenta?

¹⁸ Nawe utiva ngaleyo ndlela yini mayelana nekukhonta Jehova? Nangabe kunjalo, chubeka wenta konkhe lokusemandleni akho kute ube nebazalwane emihlanganweni ngisho nobe kumatima. Khombisa Jehova kutsi utiva ngendlela lefana naleyo iNkhosi Davide leyativa ngayo nayitsi: Jehova “ngitsandza indlu lohlala kuyo.”​—Tihlabelelo 26:8.