1. Yini lokufanele sonkhe siyente?

UNGAKUJABULELA yini kugijima emncintiswaneni lowati kahle kutsi umatima, ikakhulukati nawugula nobe ukhatsele? Angeke. Nobe kunjalo, umphostoli Pawula watsi onkhe emaKhristu asemncintiswaneni. (Heb. 12:1) Ngisho nobe sibancane nobe sibadzala, sisenemandla nobe sekasiphelela, kufanele sicinisele kuze kube sekugcineni kuze sitfole umvuzo Jehova lasibekele wona.—Mat. 24:13.

2. Ngekusho kwa-2 Thimothi 4:7, 8, kungani Pawula bekanenkhululeko yekukhuluma?

² Pawula bekanenkhululeko yekukhuluma ngobe ‘walicedza libanga lakhe.’ (Fundza 2 Thimothi 4:7, 8.) Mbambambamba ngumuphi lomncintiswane Pawula lebekakhuluma ngawo?

3. Ngumuphi umncintiswane Pawula lebekakhuluma ngawo?

³ Esikhatsini lesinyenti, Pawula bekavame kubhala ngetintfo lebetenteka emidlalweni lebeyiba khona eGrisi yakadzeni kuze afundzise ngetintfo letibalulekile. (1 Khor. 9:25-27; 2 Thim. 2:5) Etikhatsini letinyenti bekavame kucatsanisa imphilo yemKhristu nemncintiswane wekugijima. (1 Khor. 9:24; Gal. 2:2; Fil. 2:16) Nangabe umuntfu atinikela kuJehova futsi abhajatiswa, usuke angenela ‘umncintiswane.’ (1 Phet. 3:21) Umuntfu ushaya intsambo ngesikhatsi Jehova amnika umvuzo wakhe wekuphila phakadze.—Mat. 25:31-34, 46; 2 Thim. 4:8.

4. Yini lesitawucoca ngayo kulesihloko?

⁴ Ngukuphi kufana lokukhona emkhatsini wekuphila kwemKhristu nekugijima libanga lelidze? Timbalwa tintfo letifanako kuloku. Asesicoce ngaletintsatfu tato. Kwekucala, kufanele sigijime endleleni lefanele; kwesibili, kufanele sitimisele  kufika entsanjeni; kwesitsatfu, kufanele sicinisele ngisho nobe sibhekana netinkinga endleleni.

5. Nguyiphi indlela lokufanele sigijime kuyo, futsi leni?

⁵ Kuze tingijimi tikulungele kutfola umklomelo emncintiswaneni, kufanele tigijime endleleni lengiyo lekhonjwe bahleli balowo mncintiswane. Ngendlela lefanako, nangabe sifuna kutfola umklomelo wetfu wekuphila lokuphadze, kufanele silandzele indlela yekuphila yemaKhristu. (Imis. 20:24; 1 Phet. 2:21) Nobe kunjalo, Sathane kanye nebalandzeli bakhe bafuna ‘sihambe nabo,’ singayilandzeli indlela yekuphila yemaKhristu. (1 Phet. 4:4) Bahlekisa ngendlela lesiphila ngayo futsi batsi indlela yabo yekuphila incono kakhulu ngobe iletsa inkhululeko. Kodvwa lawo ngemanga laluhlata klaba!—2 Phet. 2:19.

6. Yini loyifundzako kulokwenteka kuBrian?

⁶ Bantfu labaphila ngendlela lelive laSathane leliphila ngayo basheshe babone kutsi lendlela labaphila ngayo ayibenti bakhululeke, kunaloko baba tigcili taSathane. (Rom. 6:16) Cabanga nganasi sibonelo saBrian. Batali bakhe bamkhutsata kutsi alandzele indlela yekuphila yemaKhristu. Kodvwa ngesikhatsi aseminyakeni yekutfomba, wabuta kutsi lendlela beyitawumenta ajabule yini. Brian wase ukhetsa kulandzela indlela yebantfu lebebaphila ngetimiso taSathane. Utsi: “Bengingaboni kutsi lendlela lebekutsiwa inalenkhululeko lebengiyifuna itangibangela kutsi ngente tintfo letimbi. Ngalesinye sikhatsi, bengisebentisa kabi tidzakamiva netjwala futsi bengitiphatsa kabi. Eminyakeni lembalwa leyalandzela, ngacala kusebentisa tidzakamiva lebetiyingoti kakhulu futsi ngaba sigcili sato. . . . Ngacala kutsengisa tidzakamiva kuze ngikhone kuphila.” Ngekuhamba kwesikhatsi, Brian wase ukhetsa kuphila ngetimiso taJehova. Wayishintja indlela lebekahamba ngayo futsi wabhajatiswa nga-2001. Nyalo, ujabula kakhulu ngobe sewulandzela indlela yekuphila yemaKhristu. *

7. Ngekusho kwaMatewu 7:13, 14, ngutiphi tindlela letimbili letisembikwetfu?

⁷ Kubaluleke kakhulu kutsi silandzele indlela lengiyo! Sathane ufuna kutsi sonkhe siyekele kugijima endleleni lencane “leya ekuphileni” kodvwa sigijime ngendlela lebanti leyo bantfu labanyenti labahamba ngayo. Lendlela ivamile futsi kumelula kuyitfola, kodvwa ‘iya ekubhujisweni.’ (Fundza Matewu 7:13, 14.) Kuze sihlale sihamba ngendlela lefanele futsi singaphatanyiswa bantfu labangaphili ngetimiso  taJehova, kufanele setsembele kuJehova futsi simlalele.

8. Yini leyentiwa yingijimi nayiphatamiseka?

⁸ Tingijimi letisemncintiswaneni welibanga lelidze tiyawunakisisa umgwaco kuze tingaphatamiseki nobe tigileke. Nobe kunjalo, tingijimi tingase tigilwe nguletinye tingijimi ngesiphosiso nobe tigcumukele emigodzini lekuleyo migwaco. Nangabe tiwa, tiyavuka tichubeke nekugijima. Atikunaki loko lokutiphatamisile, kodvwa tinaka kakhulu kushaya intsambo nemklomelo letitawutfola.

9. Nangabe siphatamiseka, yini lokufanele siyente?

⁹ Kulomncintiswane wetfu, kungenteka siphatamiseke tikhatsi letinyenti, singenta emaphutsa nobe sisho tintfo letikabi. Tingijimi lesinato tingenta emaphutsa langasivisa buhlungu. Akukafaneli kusimangalise loko nakwenteka. Sonkhe sinesono futsi sigijima emgwacweni munye lomncane futsi loyisa ekuphileni. Ngako, ngaletinye tikhatsi kungenteka “sigilane.” Pawula washo kutsi ngaletinye tikhatsi sitawuba ‘sizatfu sekukhonona’ kulabanye. (Khol. 3:13) Kunekutsi sinake tintfo letingasiphatamisa, kufanele sinake umvuzo losembikwetfu. Nakwenteka siphatamiseka nobe sigileka, kufanele sivuke sichubeke nekugijima. Nangabe sitawutfukutsela bese siyayekela kukhonta Jehova, ngeke sifike entsanjeni futsi ngeke siwutfole umklomelo wetfu. Ngetulu kwaloko, kungenteka sibaphatamise labanye labetama kugijima kulomgwaco lomncane.

10. Singakugwema njani kuba “sikhubekiso” kulabanye?

¹⁰ Lenye indlela lesingakugwema ngayo kuba “sikhubekiso” kubazalwane nabodzadzewetfu, kutsi sibavumele bente tintfo ngendlela yabo kunekubaphocelela kutsi bente tintfo ngendlela yetfu. (Rom. 14:13, 19-21; 1 Khor. 8:9, 13) Kufanele sati kutsi asifanani netingijimi letigijima emncintiswaneni mbamba, ngobe tona tiyacudzelana futsi nguleyo naleyo ngijimi ilwela kutitfolela umklomelo. Ngalokuyinhloko, letingijimi leti titicabangela tona kuphela. Ngako tingetama kukweshisa letinye tingijimi kuze tibe sekucaleni. Ngalokwehlukile, tsine asicudzelani. (Gal. 5:26; 6:4) Umgomo  wetfu kusita bantfu labanyenti kutsi bashaye intsambo kanye natsi futsi batfole umvuzo lokuphila phakadze. Ngako kufanele setame kusisebentisa seluleko lesiphefumulelwe lesabhalwa nguPawula lesitsi “ningaticabangeli nine kuphela, kodvwa cabangelani nalabanye.”—Fil. 2:4.

11. Yini lenakwa yingijimi, futsi leni?

¹¹ Ngaphandle nje kwekubuka umgwaco losembikwato, tingijimi letisemncintiswaneni mbamba tisuke ticabanga ngekushaya intsambo. Ngisho nobe tingayiboni, tiyaticabanga setiyishaya intsambo futsi titfola umklomelo wato. Tiba nemandla ekugijima ngekutsi tihlale ticabanga ngemklomelo letitawutfola.

12. Yini Jehova lasetsembise yona?

¹² Kulomncintiswane lesikuwo, Jehova wetsembise bantfu bakhe umvuzo wekutfola kuphila lokuphakadze, kungaba sezulwini nobe emhlabeni lolipharadisi nangabe bawucedza lomncintiswane. LiBhayibheli lisiniketa sitfombe semvuzo lesitawutfola, kuze sibone indlela kuphila lokutawujabulisa ngayo ngaleso sikhatsi. Nangabe sichubeka sicabanga ngelikusasa Jehova lasetsembise lona, sitawutimisela kuze sicinisele.

13. Tsine sehluke ngani etingijimini mbamba?

¹³ Tingijimi lebetiba khona emidlalweni lebeyiba seGrisi, betibhekana netinkinga letitsite, letifaka ekhatsi kudzinwa nebuhlungu. Intfo lobekufanele tetsembele kuyo bekukuceceshwa kwato kanye nekubeketela kwato. Natsi sifanana naletingijimi, siyaceceshwa ngendlela lokufanele sigijime ngayo kulomncintiswane. Kodvwa kunalokwehlukile ngatsi kuletingijimi mbamba. Singawatfola emandla langapheli kuJehova. Nangabe simetsemba Jehova, uyasetsembisa kutsi utasicecesha aphindze asicinise!—1 Phet. 5:10.

14. UmBhalo wa-2 Khorinte 12:9, 10, usisita njani kuze silwisane netinkinga?

¹⁴ Pawula wabhekana netinkinga letinyenti. Ngetulu kwekwetfukwa nekuhlushwa bantfu, ngaletinye tikhatsi bekaphelelwa ngemandla futsi bekufanele abhekane nentfo layibita ngekutsi “linyeva enyameni.” (2 Khor. 12:7) Kunekutsi atsatse letinkinga njengesizatfu sekuyekela kukhonta Jehova, watitsatsa njengelitfuba lekumetsemba. (Fundza 2 Khorinte 12:9, 10.) Ngenca yekutsi Pawula waba nembono lokahle, Jehova wamsita kuto tonkhe tinkinga lebekabhekana nato.

15. Nangabe silingisa Pawula, yini letawenteka kitsi?

¹⁵ Kungenteka natsi setfukwe nobe sihlushwe ngenca yekukholwa kwetfu. Singahle sigule nobe sikhatsale. Nangabe silingisa Pawula, tinkinga lesingahle sibhekane nato tingaba litfuba lekutsi sibone indlela Jehova lasitsandza ngayo.

16. Nangabe ugula, yini longayenta?

¹⁶ Sewulele phansi yini nobe uhamba nge-wheelchair? Emadvolo sekayacegetela yini nobe awusaboni kahle emehlweni? Nangabe kunjalo, ungakhona yini kugijima nalabo labasebasha futsi labaphilile? Ungakhona! Banyenti lasebakhulile futsi labagulako labagijimako kulomgwaco loya ekuphileni. Ngeke sebakhone kukwenta loku ngemandla abo. Bangakwenta ngekutsi batfole emandla kuJehova nabalalela imihlangano yebuKhristu ngelucingo nobe babukele lerekhodiwe. Bayawenta nemsebenti wekwenta bafundzi ngekutsi bashumayele bodokotela, bonesi netihlobo tabo.

17. Jehova utiva njani ngalabo lababutsakatsaka?

¹⁷ Nangabe ungakhoni kwenta tintfo letinyenti lofuna kutentela Jehova, ungapheli emandla bese ucabanga kutsi ngeke  ukhone kucinisela kuze kube sekupheleni kwalelive lelibi. Jehova uyakutsandza ngobe uyakholwa kuye nangenca yato tonkhe tintfo lomentele tona eminyakeni leyendlulile. Uludzinga mbamba lusito lwakhe nyalo, futsi ngeke aze akushiye. (Hla. 9:10) Utawusondzela kakhulu kuwe. Naka naku lokwashiwo ngulomunye dzadze lobekanemphilo lebutsakatsaka, watsi: “Ngenca yekutsi ngihlale ngigula, ematfuba ekucoca nalabanye ngeliciniso ayancipha. Kodvwa ngiyati kutsi loko lokuncane lengikwentako, Jehova uyajabula ngako futsi nami ngiyajabula.” Nangabe ucindzetelekile, khumbula kutsi awusiwedvwa. Cabanga ngesibonelo lesasibekelwa nguPawula, uphindze ukhumbule nemavi akhe lasikhutsatako latsi: ‘Ngiyajabula . . . nangibutsakatsaka, . . . Ngobe nangibutsakatsaka, kulapho ngiba nemandla khona.’—2 Khor. 12:10.

18. Nguyiphi inkinga lematima labanye lababhekana nayo?

¹⁸ Labanye labagijima kulomgwaco loya ekuphileni babhekana nalenye inkinga. Balwisana netinkinga letingatiwa ngulabanye bantfu. Nasi sibonelo, bayacindzeteleka nobe babhekane nemiva lematima yekukhatsateka. Kungani letikhonti taJehova latitsandzako tibhekana nalenkinga lematima kangaka? Nangabe umuntfu ephukile nobe ahamba nge-wheelchair, bantfu bayambona futsi bangase bafise kumsita. Nobe kunjalo, labo lababhekana netimo letingabonakali letibacindzetelako bangase bangabonakali kutsi banetinkinga. Simo sabo singaba buhlungu kakhulu njengalapho wephukile, kodvwa kungenteka bangalutfoli lusito labaludzingako ngenca yekutsi simo labakuso asibonakali.

19. Yini lesiyifundzako kulokwenteka kuMefiboshethi?

¹⁹ Nangabe unebutsakatsaka lobutsite futsi uva shengatsi bantfu abasicondzi simo lokuso, lokwenteka kuMefiboshethi kungakukhutsata. (2 Sam. 4:4) Mefiboshethi bekakhubatekile, futsi iNkhosi Davide beyimphatsa kabi. Kute lokubi Mefiboshethi lebekakwentile kuze kwenteke tintfo letimbi kuye. Nobe kunjalo, akazange atfukutsele, bekajabula ngetintfo letinhle lebetenteka kuye. Bekajabula ngendlela Davide lebekamphatse kahle ngayo esikhatsini lesendlulile. (2 Sam. 9:6-10) Ngesikhatsi Davide amphatsa kabi, wetama kucabangisisa ngalesimo. Akazange avumele liphutsa laDavide kutsi limtfukutselise futsi akazange amsole Jehova ngalobekwentiwe nguDavide. Mefiboshethi wanaka loko lebekangakhona kukwenta kuze asekele iNkhosi lebeyibekwe nguJehova. (2 Sam. 16:1-4; 19:24-30) Jehova wenta kutsi sibonelo lesihle saMefiboshethi sibhalwe eVini Lakhe kuze sizuze.—Rom. 15:4.

20. Kukhatsateka kungabatsintsa njani labanye, kodvwa yini labangaciniseka ngayo?

 ²⁰ Ngenca yekukhatsateka kakhulu, labanye bazalwane nabodzadzewetfu abakhululeki nangabe banalabanye bantfu. Kungenteka kube matima ngabo kutsi babe semkhatsini webantfu labanyenti, kodvwa bayachubeka baya emihlanganweni yelibandla, emihlanganweni lemincane kanye nasemihlanganweni lemikhulu. Kuba matima kutsi bakhulume nebantfu labangabati, kodvwa bayakhona kukhuluma nalabanye babo nabasemsebentini wekushumayela. Nangabe simo sakho sinjalo, ciniseka kutsi awusiwedvwa. Banyenti bantfu labativa njengawe. Khumbula kutsi Jehova uyajabula ngemsebenti lomentela wona ngekutimisela. Lokutsi usengakaphelelwa ngemandla, kubufakazi bekutsi uyakubusisa futsi uyakunika emandla lowadzingako. * (Fil. 4:6, 7; 1 Phet. 5:7) Nangabe ukhonta Jehova ngisho nobe ugula nobe ukhatsatekile, ciniseka kutsi loko kuyamjabulisa.

21. Nangabe sisitwa nguJehova, yini lesitawukhona kuyenta?

²¹ Siyajabula ngobe sesiyati kutsi kunemehluko emkhatsini wemncintiswane mbamba kanye nalowo Pawula lakhuluma ngawo. Emncintiswaneni mbamba wangetikhatsi teliBhayibheli, munye umuntfu lobekatfola umklomelo. Ngalokwehlukile, bonkhe labacinisela ngekwetsembeka kulomncintiswane wekuphila wemaKhristu batawutfola umklomelo wekuphila phakadze. (Joh. 3:16) Emncintiswaneni mbamba, tonkhe tingijimi kufanele tiphile emtimbeni ngobe nangabe tingakaphili kahle ngeke tiphumelele kulomncintiswane. Ngalokwehlukile, labanyenti betfu baphila nekugula lokutsite, kodvwa bayachubeka bacinisela. (2 Khor. 4:16) Nangabe sisitwa nguJehova, sitawukhona kugijima size siyoshaya intsambo!