1-2. Jesu bekasho kutsini nakakhuluma emavi lakuJohane 4:35, 36?

JESU bekahamba emasimini, lokungenteka bekawakolo losakhula. (Joh. 4:3-6) Bekutawutsatsa tinyanga letine kutsi lokolo ulungele kuvunwa. Jesu washo intfo lokungenteka beyingakavami, watsi: “Bukani emasimu, asamhlophe alungele kuvunwa.” (Fundza Johane 4:35, 36.) Bekasho kutsini?

² Kungenteka Jesu bekakhuluma ngekubutsiswa kwebantfu, hhayi kwakolo. Cabanga ngalobekusandza kwenteka. Ngisho nobe emaJuda bekangevani nemaSamariya, Jesu washumayela umfati longumSamariya futsi walalela! Ecinisweni, ngesikhatsi Jesu akhuluma ngemasimu ‘lamhlophe lalungele kuvunwa,’ sicumbi semaSamariya leseva ngaJesu kulomfati, seta kuye kuze sitofundza lokunyenti. (Joh. 4:9, 39-42) Naku lokunye lokushiwo ngulenye inchazelo yeliBhayibheli ngalendzaba, itsi: “Lesento sekutsi labantfu bete ngekushesha kuJesu kuze bamlalele, sakhomba kutsi bebafana nakolo lobekalungele kuvunwa.”

3. Nangabe utsatsa bantfu ngendlela Jesu lebekabatsatsa ngayo, utawutfutfuka njani umsebenti wakho wekushumayela?

³ Ubatsatsa njani bantfu loshumayela kubo tindzaba letimnandzi? Ubatsatsa njengakolo lolungele kuvunwa yini? Nangabe kunjalo, tintsatfu tintfo letitawenteka: Kwekucala, utawushumayela ngekuphutfuma lokukhulu. Sikhatsi sekuvuna sincane; ngako kute sikhatsi sekudlala. Kwesibili, utawujabula nawubona bantfu batilalela tindzaba letimnandzi. LiBhayibheli litsi: ‘Bantfu bajatjuliswa sivuno.’ (Isa. 9:3) Kwesitsatfu, utawubona umuntfu ngamunye njengemfundzi waKhristu, ngako utawenta incociswano yakho imkhange futsi ivumelane naloko lakutsandzako.

4. Yini lesitayifundza ngemphostoli Pawula kulesihloko?

⁴ Kungenteka labanye bafundzi baJesu bebacabanga kutsi emaSamariya bekangeke abe bafundzi bakhe, kodvwa Jesu akazange acabange ngaleyondlela. Kunaloko, bekawabona  njengebafundzi bakhe. Natsi kufanele sibone bantfu labasensimini yetfu njengebafundzi baKhristu. Umphostoli Pawula wasibekela sibonelo lesihle lesingasilingisa. Yini lesingayifundza kuye? Kulesihloko, sitawucoca ngekutsi (1) bekatati njani tintfo lebetikholelwa bantfu lebekabashumayela, (2) bekatati njani tintfo lebebatitsandza nangekutsi (3) wenta njani kuze ababone njengebafundzi baJesu.

5. Kungani Pawula bekaticondza tilaleli takhe esinagogeni?

⁵ Pawula bekavame kushumayela emasinagogeni emaJuda. Sibonelo saloko kutsi ngesikhatsi asesinagogeni leliseThesalonika, “wabonisana nabo [emaJuda] ngemiBhalo emasabatha lamatsatfu.” (Imis. 17:1, 2) Kungenteka Pawula bekakhululeka nakasesinagogeni. Wakhuliswa njengemJuda. (Imis. 26:4, 5) Pawula bekawacondza emaJuda, ngako bekakhona kuwashumayela ngesibindzi.—Fil. 3:4, 5.

6. Bantfu lebebasemakethe yase-Athene bebahluke njani kulabo Pawula labashumayela esinagogeni?

⁶ Ngemuva kwekutsi Pawula aphocelelwe baphikisi kutsi ahambe eThesalonika naseBheriya, waya e-Athene. Waphindze ‘wabonisana nemaJuda lebekasesinagogeni kanye nalabanye lebebakhonta Nkulunkulu.’ (Imis. 17:17) Nobe kunjalo, ngesikhatsi Pawula ashumayela etimakethe, watfola luhlobo lwebantfu lolwehlukile. Emkhatsini walabantfu, bekunetati tefilosofi nebantfu betive lebebatsatsa umlayeto lobewushunyayelwa nguPawula ‘njengemfundziso lensha.’ Batsi kuye: “Ukhuluma ngetintfo lesicalako kutiva ngetindlebe tetfu.”—Imis. 17:18-20.

7. Ngekusho kwencwadzi yeMisebenti 17:22, 23, Pawula wayishintja njani indlela lebekashumayela ngayo?

⁷ Fundza Imisebenti 17:22, 23. Pawula akazange ashumayele bantfu betive lebebase-Athene ngendlela lashumayela ngayo emaJuda lebekasesinagogeni. Kungenteka Pawula wacabanga ngekutsi yini lebeyikholelwa bantfu base-Athene. Bekatinaka tintfo lebetenteka futsi bekawanaka nemasiko ebantfu enkholo. Pawula bekaphindze abuke tintfo lebebavumelana ngato endleleni yabo yekukhonta nangeliciniso lelisemiBhalweni. Lomunye umhlatiyi weliBhayibheli watsi “njengobe bekangumKhristu longumJuda, wabona kutsi emaGriki lebekangemacaba bekangakhonti Nkulunkulu ‘weliciniso’ wemaJuda nemaKhristu, kodvwa wetama kubakhombisa kutsi Nkulunkulu lebekashumayela ngaye bekakhona mbamba,  angasuye umuntfu longatiwa kubase-Athene.” Ngako Pawula bekakulungele kushintja indlela lebekendlulisela ngayo umlayeto wakhe kubo. Watjela ema-Athene kutsi umlayeto wakhe bewuvela “kuNkulunkulu Longatiwa” futsi lebebasolo betama kumkhonta. Ngisho nobe bantfu betive bebangayati imiBhalo, kodvwa Pawula akazange acabange kutsi bebangeke babe ngemaKhristu. Kunaloko wabatsatsa njengebantfu labafana nakolo losalungele kuvunwa, futsi wayishintja nendlela lebekashumayela ngayo tindzaba letimnandzi.

8. (a) Yini lengakusita kuze ukwati loko bantfu labasensimini yakini labakukholelwako? (b) Kufanele uphendvule njani nangabe umuntfu atsi unenkholo yakhe?

⁸ Bani ngumuntfu lonakako njengaPawula. Buka tintfo letitakusita kutsi ukucondze loko bantfu labasensimini yakini labakukholelwako. Umnikati welikhaya ulihlobise njani likhaya nobe imoto yakhe? Ligama lakhe, indlela lagcoke ngayo nobe indlela lakhuluma ngayo kuyakhombisa yini kutsi ukuyiphi inkholo? Mhlawumbe lomunye angakutjela ngalokucondzile kutsi unenkholo yakhe. Loko kwenteka kulelinye lihlahlandlela lelikhetsekile lokutsiwa ngu-Flutura, latsi, “Angiketi kutoshintja inkholo yakho, kodvwa ngitele kutokhuluma nawe nganayi indzaba . . . ”

9. Ngutiphi tintfo longakhuluma ngato nemuntfu lokholwako?

⁹ Ngutiphi tintfo longatikhuluma nemuntfu lokholwako? Yetama kutfola tintfo lenivumelana ngato. Kungenteka ukhonta Nkulunkulu munye, utsatsa Jesu njengemsindzisi webantfu, nobe kungenteka ukholelwa kutsi siphila etikhatsini letimatima letitawuphela madvutane. Sebentisa letintfo lenivumela ngato kuze umkhombise umlayeto loseBhayibhelini ngendlela letamjabulisa.

10. Yini lokufanele setame kuyenta, futsi leni?

¹⁰ Khumbula kutsi kungenteka bantfu abakukholelwa konkhe lokufundziswa yinkholo yabo. Ngako ngisho nobe sewubonile kutsi umuntfu ukuyiphi inkholo, yetama kutfola kutsi yini layikholelwako. David lohlala e-Australia futsi lolihlahlandlela lelikhetsekile utsi: “Labanyenti lamuhla bahlanganisa ifilosofi naloko labakukholelwako.” Donalta lohlala e-Albania utsi: “Labanye lesibatfolako ensimini batsi banenkholo yabo kodvwa ngekuhamba kwesikhatsi babese bayavuma kutsi abakholelwa kuNkulunkulu.” Lomunye umzalwane lositfunywa selivangeli sase-Argentina watsi labanye bantfu batsi bayakholelwa kuMtsatfu amunye, kodvwa abakholelwa kutsi Babe, Indvodzana nemoya longcwele banguNkulunkulu munye. Utsi: “Kwati kutsi lomuntfu lengikhuluma naye kungenteka akakholewa kuyo yonkhe intfo lefundziswa yinkholo yakhe,  kwenta kube melula kutsi ngitfole lokutsite lesingavumelana ngako.” Ngako yetama kutfola kutsi yini bantfu labayikholelwa mbamba. NjengaPawula, ungaba ‘ngiko konkhe kubantfu bato tonkhe tinhlobo.’—1 Khor. 9:19-23.

11. Ngekusho kweMisebenti 14:14-17, Pawula wakhuluma njani kubantfu lebebahlala eListra ngendlela lekhangako?

¹¹ Fundza Imisebenti 14:14-17. Pawula wabona kutsi yini letsandvwa tilaleli takhe, futsi wetama kukhuluma ngaloko lebetikutsandza. Sibonelo saloko kutsi, wakhuluma nesicumbi sebantfu lebesise-Listra lebesinelwati loluncane ngemiBhalo nobe lebesite sanhlobo. Ngako Pawula wakhuluma ngetintfo lebebatawuvumelana ngato. Wakhuluma ngenala nangekujabulela kuphila. Wasebentisa emagama netibonelo lebetitawucondvwa tilaleli takhe.

12. Ungenta njani kuze ukucondze loko umuntfu lakutsandzako, futsi ukhulume ngalenivumelana ngako?

¹² Hlakanipha kuze ukucondze loko bantfu labasensimini yakini labakutsandzako bese ukhuluma ngekuvumelana nako. Ungenta njani kuze ukubone loko umuntfu lakutsandzako nawucoca naye nobe nawungena ekhaya lakhe? Bani ngumuntfu lonakako. Kungenteka umnikati welikhaya ulungisa ingadze, ufundza incwadzi, ulungisa imoto yakhe nobe wenta lokunye nje. Nangabe ungakhona, calisa incociswano yakho ngekukhuluma ngaloko lakwentako. (Joh. 4:7) Indlela umuntfu lagcoke ngayo ingasho lokutsite ngaye, mhlawumbe ingaveta buve bakhe,umsebenti lawentako, nobe licembu letemidlalo lalitsandzako. Gustavo utsi: “Ngacalisa incociswano nelijaha lebelineminyaka lengu-19, lebeligcoke sikipa lebesinesitfombe semhlabeleli lodvumile. Ngalibuta ngalesikipa, futsi langitjela kutsi kungani limtsandza lomhlabeleli. Lencociswano yenta kutsi sicalise sifundvo seliBhayibheli, futsi nyalo selingulomunye webazalwane betfu.”

13. Ungasicela njani sifundvo seliBhayibheli ngendlela lekhangako?

¹³ Nawucela kufundza nalotsite liBhayibheli, kwente kukhange, futsi umkhombise  kutsi kulifundza kutamsita. (Joh. 4:13-15) Sibonelo saloko kutsi dzadze lokutsiwa ngu-Poppy, wemukelwa ngulomunye make lobekakutsandza kufundza. Ngesikhatsi Poppy abona sitifiketi lebesiselubondzeni futsi lebesikhombisa kutsi lomake unguprofesa loceceshelwe kufundzisa, wagcizelela kutsi natsi sifundzisa bantfu sisebentisa liBhayibheli nemihlangano yebuKhristu. Lomake wavuma kufundza liBhayibheli, ngelilanga lelilandzelako waya emhlanganweni welibandla, futsi ngekushesha waya nasemhlanganweni wesifundza. Ngemuva kwemnyaka wabhajatiswa. Tibute: ‘Bantfu lengibuyela kubo bajatjuliswa yini? Luhlelo lwekufundza nabo liBhayibheli ngilwenta lubakhange yini?’

14. Ungenta njani nawufundzisa umuntfu liBhayibheli?

¹⁴ Ngemuva kwekutsi ucalise Sifundvo seliBhayibheli, silungiselele kahle sifundvo ngasinye, futsi ucabangisise ngemndeni waloyo lomfundzelako, imfundvo lanayo, tintfo letentekile ekuphileni kwakhe naloko lokumjabulisako. Njengobe ulungiselela, cabanga ngekutsi utawufundza miphi imibhalo, utamkhombisa maphi ema-video nekutsi utawusebentisa miphi imifanekiso kuze uchaze emaciniso laseBhayibhelini. Tibute kutsi yini letamkhanga futsi imtsintse inhlitiyo lomfundzi. (Taga 16:23) Lomunye make wase-Albania lobekafundzelwa liBhayibheli ngulelinye lihlahlandlela lokutsiwa nguFlora watsi, “Bengingayemukeli imfundziso yeluvuko.” Flora akazange amphocelele lomake kutsi ayemukele ngekushesha lemfundziso. Utsi: “Ngabona kutsi ngaphambi kwekutsi akholelwe eluvukweni, kufanele acale amati Nkulunkulu lotsembisa kuvusa labafile.” Kusukela lapho, bebatsi nabafundza, Flora bekagcizelela lutsandvo lwaJehova, kuhlakanipha nemandla akhe. Ngekuhamba kwesikhatsi, lomfundzi wakholwa kutsi kutawuba neluvuko. Nyalo unguFakazi lokhutsele waJehova.

15. Ngekusho kweMisebenti 17:16-18, ngutiphi tintfo lebetenteka eGrisi yasendvulo lebetikhatsata Pawula, kodvwa yini leyamenta wachubeka ashumayela kuma-Athene?

¹⁵ Fundza Imisebenti 17:16-18. Pawula akazange alahle litsemba ngebantfu base-Athene ngisho nobe lidolobha labo beligcwele bantfu lebebakhonta tithico, bantfu lebebatiphatsa kabi futsi lebebakholelwa kumafilosofi langemacaba. Akazange ayekele kubashumayela ngisho nobe bebamtfuka. Pawula waba ngumKhristu ngisho nobe ‘bekahlambalata, ahlupha labanye futsi edzelela’ (1 Thim. 1:13) Njengobe Jesu bekaciniseka kutsi Pawula bekangaba ngumfundzi wakhe, naPawula waciniseka kutsi ema-Athene bekangaba bafundzi baJesu, futsi kuciniseka kwakhe bekuliciniso.—Imis. 9:13-15; 17:34.

16-17. Yini lekhombisa kutsi bantfu bato tonkhe tive bangaba bafundzi baKhristu? Niketa sibonelo.

¹⁶ Ngelikhulu lekucala, bantfu bato tonkhe tive baba bafundzi baJesu. Ngesikhatsi Pawula abhalela emaKhristu langemaGriki lebekahlala edolobheni laseKhorinte, watsi lamanye emalunga elibandla bekake aba tigebengu futsi atiphatsa kabi. Waphindze watsi: “Nguloko labanye benu lebebangiko. Kodvwa senihlantiwe.” (1 Khor. 6:9-11) Bewutawubona yini kutsi labantfu bebatawushintja futsi babe bafundzi?

¹⁷ Lamuhla, bantfu labanyenti batimisele kwenta lushintjo loludzingekile kuze babe bafundzi baJesu. Sibonelo saloko kutsi, lomunye dzadze lokutsiwa nguYukina lolihlahlandlela lelikhetsekile futsi lohlala e-Australia, wabona kutsi tonkhe tinhlobo tebantfu tingawulalela umlayeto loseBhayibhelini. Ngalelinye lilanga, lodzadze bekakulelinye lihhovisi futsi wabona intfombatane  lebeyigcwele ema-tattoo futsi igcoke timphahla letinkhulu. Yukina utsi: “Ngacale ngangabata kodvwa ngabese ngicala kukhuluma nayo. Ngabona kutsi beyilitsandza liBhayibheli ngobe lamanye alama-tattoo ayo bekungemavesi lasencwadzini yeTihlabelelo!” Lentfombatane yacala kufundza liBhayibheli futsi yaya nasemihlanganweni. *

18. Kungani kufanele singabehluleli bantfu?

¹⁸ Ngesikhatsi Jesu atsi emasimu sekalungele kuvunwa, bekalindzele kutsi bantfu labanyenti bamlandzele yini? Cha. ImiBhalo beyibiketele kutsi bambalwa bantfu lebebatawukholwa kuye. (Joh. 12:37, 38) Jesu bekanelikhono lelimangalisako lekufundza tinhlitiyo. (Mat. 9:4) Bekabanaka labo labambalwa lebebakholwa kuye, futsi bekashumayela ngemdlandla kubo bonkhe bantfu. Asikwati kufundza tinhlitiyo, ngako kufanele singabehluleli bantfu labasensimini yakitsi! Kunaloko, kufanele sibone kutsi bangaba bafundzi. Marc lositfunywa selivangeli saseBurkina Faso utsi: “Bantfu lengicabanga kutsi batawutfutfuka bavame kuyekela kufundza liBhayibheli. Kodvwa bantfu lengicabanga kutsi batawuyekela kufundza bayatfutfuka. Ngako ngifundze kutsi kufanele sivumele umoya waJehova usihole.”

19. Kufanele sibatsatse njani bantfu lesibashumayelako?

¹⁹ Ekucaleni, kungabonakala shengatsi abasibo banyenti bantfu lesibashumayelako labafana nakolo losalungele kuvunwa. Kodvwa khumbula loko Jesu lakusho kubafundzi bakhe. Emasimu amhlophe, lokusho kutsi sekalungele kuvunwa. Bantfu bangashintja futsi babe bafundzi baKhristu. Jehova ubona bantfu lesibashumayelako njengebafundzi futsi ubatsatsa ‘njengalokulangatelelwako.’ (Hag. 2:7) Nangabe sibona bantfu ngendlela Jehova naJesu labababona ngayo, sitawufundza ngendlela labakhuliswe ngayo nangetintfo labatitsandzako. Angeke sibatsatse njengebantfu lesingabati, kodvwa sitabatsatsa njengebazalwane nabodzadzewetfu.