Ngaphambi kwekutsi Jesu afe, kungani asho emavi lakhulunywa nguDavide lakuTihlabelelo 22:1?

Ngaphambi kwekutsi Jesu afe, washo emavi lakuMatewu 27:46, latsi: “Nkulunkulu wami, Nkulunkulu wami, ungishiyeleni?” Ngekusho lamavi, Jesu bekagcwalisa loko lokwashiwo ngumhlabeleli Davide kuTihlabelelo 22:1. (Mak. 15:34) Kungaba liphutsa kutsi sitsi Jesu washo lamavi ngobe bekadvumatekile nobe sitsi bekete kukholwa kwesikhashana. Jesu bekasicondza kahle sizatfu lebesenta kutsi kudzingeke afe, futsi bekatimisele kufa. (Mat. 16:21; 20:28) Bekati nekutsi ngesikhatsi sekufa kwakhe, bekutawudzingeka kutsi Jehova ayekele ‘kumvikela.’ (Jobe 1:10) Ngako kwadzingeka kutsi Jehova ayekele kuvikela Jesu, kuze Jesu akhombise kutsi bekatawuhlale etsembekile ngisho nobe kudzingeka kutsi afe kabuhlungu.—Mak. 14:35, 36.

Ngako kungani Jesu asho lamavi lakulesihlabelelo? Nanobe singaciniseki, kodvwa ase sicoce ngaletinye tizatfu lokungenteka tamenta washo lamavi. *

Ngekusho lamavi, kungenteka Jesu bekagcizelela kutsi Jehova angeke amsite nakafa. Bekudzingeka kutsi Jesu abe yinhlawulo ngaphandle kwekusitwa nguJehova. Bekangumuntfu, futsi bekudzingeka kutsi afe kuze “afele bonkhe bantfu.”—Heb. 2:9.

 Ngekusho incenye yalesihlabelelo, kungenteka Jesu bekafuna labanye bacabange ngaso sonkhe lesihlabelelo. Bekuvamile ngalawo malanga kutsi emaJuda atibambe ngengcondvo tihlabelelo letinyenti. Nakeva livesi linye lesihlabelelo, bekatawuvele acabange ngaso sonkhe lesihlabelelo. Nangabe nguloko Jesu bekafuna kukwenta, bekatawusita balandzeli bakhe labangemaJuda kutsi bakhumbule tiphrofetho letinyenti letimayelana nekufa kwakhe letikulesihlabelelo. (Hla. 22:7, 8, 15, 16, 18, 24) Ngetulu kwaloko, emavesi ekugcina alesihlabelelo advumisa Jehova futsi amchaza ngekutsi uyiNkhosi yemhlaba wonkhe.—Hla. 22:27-31.

Ngekusho lamavi aDavide, kungenteka Jesu bekaveta kutsi akanacala. Ngaphambi kwekutsi Jesu abulawe, inkantolo yemaJuda yamtekisa licala ngalokungekho emtsetfweni futsi yatsi uyahlambalata. (Mat. 26:65, 66) INkantolo yemaJuda yahlangana ngekushesha ebusuku kakhulu futsi yangawulandzeli umtsetfo. (Mat. 26:59; Mak. 14:56-59) Ngesikhatsi Jesu abuta lombuto lotsi “Nkulunkulu wami, Nkulunkulu wami, ungishiyeleni?” bekachaza kutsi kute lokubi lakwentile nekutsi kute sizatfu lebesenta afenele kubulawa.

Kungenteka nekutsi Jesu bekakhumbuta labanye kutsi Davide, longumbhali walesihlabelelo, wavunyelwa kutsi ahlupheke, kodvwa loko bekungasho kutsi Jehova bekangasamtsandzi. Umbuto waDavide bewungaveti kutsi sewute kukholwa. Ngemuva kwekubuta lombuto, watsi uyetsemba kutsi Jehova angabasindzisa bantfu bakhe, futsi Jehova wachubeka ambusisa. (Hla. 22:23, 24, 27) Ngendlela lefanako, nanobe Jesu “iNdvodzana yaDavide,” bekaselusizini ngesikhatsi abetselwa elugodvweni, loko bekungaveti kutsi Jehova akasamtsandzi.—Mat. 21:9.

Kungenteka Jesu bekakhombisa buhlungu lobukhulu labuvako ngenca yekutsi Jehova angeke asamvikela kuze atawukhombisa kutsi utawetsembeka yini kuye. Bekungasiyo injongo yaJehova yasekucaleni kutsi iNdvodzana yakhe ihlupheke futsi ife. Loku kwadzingeka kutsi kwenteke ngemuva kwekutsi bo-Adamu na-Eva bangamlaleli Jehova. Jesu bekangakenti lutfo lolubi, kodvwa kwadzingeka kutsi ahlupheke futsi afe kuze aphendvule imibuto yaSathane aphindze abe yinhlawulo yebantfu. (Mak. 8:31; 1 Phet. 2:21-24) Loku bekungenteka ngekutsi Jehova ayekele kwesikhashana kuvikela Jesu, futsi loku bekukwekucala ngca ekuphileni kwaJesu.

Kungenteka Jesu beketama kusita balandzeli bakhe kutsi bacabange ngekutsi kungani Jehova amvumele kutsi afele elugodvweni. * Jesu bekati kutsi kubulawa kwakhe njengesigebengu elugodvweni bekutawuba sikhubekiso kulabanyenti. (1 Khor. 1:23) Nangabe balandzeli bakhe bebatawunaka sizatfu sekufa kwakhe, bebatawucondza kutsi kungani bekubalulekile. (Gal. 3:13, 14) Ngenca yaloko, bebatamtsatsa njengeMsindzisi wabo hhayi sigebengu.

Kunobe ngusiphi sizatfu lesamenta washo lamavi, bekati kutsi ngekufela elugodvweni, bekenta intsandvo yaJehova. Ngemuva nje kwekusho lesihlabelelo, Jesu watsi: “Sekufezekile!” (Joh. 19:30; Luk. 22:37) Ngenca yekutsi Jehova akazange amvikele kwesikhashana, Jesu wakhona kukwenta konkhe lebekatfunywe kutsi atokwenta lamhlabeni. Loko kwamnika nelitfuba lekugcwalisa tonkhe tintfo letibhalwe ngaye “eMtsetfweni waMosi, etincwadzini tebaPhrofethi, nakuTihlabelelo.”—Luk. 24:44.