1. Yini Jehova layibonako kubantfu bakhe?

JEHOVA NKULUNKULU “uyabatsandza bantfu bakhe.” (Hla. 149:4) Loko kusijabulisa kakhulu! Jehova uyabubona buntfu betfu lobuhle nekutsi singaba bantfu labakahle kakhulu, futsi usidvonsela kuye. Nasihlala setsembekile kuye, utawuhlale asondzelene natsi kuze kube phakadze!—Joh. 6:44.

2. Yini leyenta labanye bangetsembi kutsi Jehova uyabatsandza?

² Labanye bangatsi: ‘Ngiyati kutsi Jehova uyabatsandza bantfu bakhe, kodvwa mine ngingaciniseka njani kutsi uyangitsandza?’ Yini lengenta umuntfu atibute lombuto? Oksana, * lowaba netinkinga letinyenti nakasengumntfwana utsi: “Ngajabula kakhulu ngesikhatsi ngibhajatiswa futsi ngicala kuba lihlahlandlela. Kodvwa ngemuva kweminyaka lengu-15, ngacala kukhumbula letintfo letenteka kimi nangisemncane. Ngaphetsa ngekutsi Jehova bekangasangitsandzi nekutsi bengingasakufaneli kutsandvwa nguye.” Dzadze lolihlahlandlela lokutsiwa nguYua, naye lowaba netinkinga letinyenti ngesikhatsi asengumntfwana utsi: “Nganikela kuphila kwami kuJehova ngobe bengifuna kumjabulisa, kodvwa bengiciniseka kutsi akayoze angitsandze.”

3. Sitawucoca ngani kulesihloko?

³ Njengalabodzadze lababili labetsembekile, kungenteka umtsandza kakhulu Jehova, kepha uyangabata kutsi yena uyakutsandza. Kungani kufanele uciniseke kutsi Jehova ukutsandza mbamba? Yini lengakusita nangabe ucabanga kutsi Jehova akakutsandzi? Asesicoce ngetimphendvulo talemibuto.

4. Kungani kuyingoti kungabata kutsi Jehova uyakutsandza?

⁴ Lutsandvo lunemandla. Nangabe siciniseka kutsi Jehova uyasitsandza, sitawufuna kwenta konkhe lesingakwenta kuze simkhonte ngisho nobe sinetinkinga. Kantsi nasingabata kutsi Nkulunkulu uyasitsandza, “emandla [etfu] atawuba mancane.” (Taga 24:10) Nangabe sicabanga kutsi Nkulunkulu akasitsandzi, angeke sikhone kumelana naSathane nakasilinga.—Ef. 6:16.

5. Yini leyenteke kulabanye bazalwane nabodzadze lebebacabanga kutsi Nkulunkulu akabatsandzi?

⁵ Labanye bazalwane betfu nabodzade bacale kucabanga kutsi Jehova akabatsandzi, futsi kukholwa kwabo kube butsakatsaka. Lomdzala welibandla lokutsiwa nguJames, utsi: “Nanobe bengisebenta eBethel futsi ngisebandleni lelikhuluma lolunye lulwimi, kepha bengingaciniseki kutsi Jehova uyawemukela umsebenti wami. Ngaletinye tikhatsi bengitibuta kutsi uyayilalela yini imithantazo yami.” Eva, naye losemsebentini wasikhatsi sonkhe utsi: “Ngabona kutsi kuyingoti kungabata kutsi Jehova uyasitsandza ngobe kubese kutsintsa indlela lesimkhonta ngayo. Siyayekela kufuna kumentela lokunyenti futsi sibese asisakujabuleli kumkhonta.” Michael, lolihlahlandlela lelivamile futsi longulomdzala welibandla utsi: “Nangabe ungabata kutsi Nkulunkulu uyakutsandza, utawukhwesha kuye.”

6. Yini lokufanele siyente nasicala kungabata kutsi Nkulunkulu uyasitsandza?

⁶ Loko lokushiwo ngulabazalwane nabodzadze kuyasikhombisa kutsi kucabanga kutsi Jehova akasitsandzi kungakulimata kakhulu kukholwa kwetfu. Yini lokufanele siyente nangabe sesicala kucabanga kutsi Jehova akasitsandzi? Ngekushesha kufanele siyekele kucabanga ngalendlela! Cela Jehova akusite kutsi esikhundleni ‘semicabango lengakuniki kuthula’ ube ‘nekuthula kwaNkulunkulu lokutawulondvolota inhlitiyo nengcondvo yakho.’ (Hla. 139:23; umbhalo longentasi; Fil. 4:6, 7) Khumbula kutsi awusiwedvwa. Labanye bazalwane nabodzadze labetsembekile balwisana nemicabango lengakalungi. Ngisho netikhonti taJehova takadzeni take tativa ngalendlela. Cabanga ngaloko lesingakufundza esibonelweni semphostoli Pawula.

7. Ngutiphi tinkinga Pawula laba nato?

⁷ Kuke kwenteke yini uve shengatsi unemisebenti leminyenti futsi ungakhoni kukwenta konkhe lokufanele ukwente? Nangabe kunjalo, utakucondza loko lokwenteka kuPawula. Wakhatsateka, hhayi nje ngelibandla linye kodvwa “ngawo onkhe emabandla.” (2 Khor. 11:23-28) Unekugula lokungapheli yini lokukwenta ungajabuli? Pawula bekahlushwa “linyeva enyameni,” lokungenteka bekukugula futsi bekafuna kuphele. (2 Khor. 12:7-10) Ngalesinye sikhatsi uhle udvumateka yini ngenca yemaphutsa lowentako? NaPawula bekadvumateka ngaletinye tikhatsi. Watibita ngekutsi ‘ungumuntfu lohluphekako’ ngobe bekudzingeka kutsi alwe kamatima kuze ente lokuhle.—Rom. 7:21-24.

8. Yini leyasita Pawula kutsi abeketelele letinkinga bekabhekene nato?

⁸ Ngisho nobe kwadzingeka kutsi Pawula abeketelele tonkhe letinkinga, kodvwa wachubeka akhonta Jehova. Yini leyamsita kutsi ente loko? Nanobe bekawati kahle emaphutsa labekawenta, kodvwa bekanekukholwa lokucinile enhlawulweni. Bekasati setsembiso saJehova lesitsi ‘wonkhe umuntfu lokholwa nguJesu utawutfola kuphila lokuphakadze.’ (Joh. 3:16; Rom. 6:23) Pawula bekangulomunye walabo bebakholwa enhlawulweni. Bekaciniseka kutsi Jehova ufuna kutsetselela ngisho nalabo labente tono letinkhulu nangabe baphendvuka.—Hla. 86:5.

9. Yini lesiyifundza emavini aPawula lakuGalathiya 2:20?

⁹ Pawula bekati kutsi Nkulunkulu umtsandza kakhulu ngobe bekatfumele Jesu kuze atomfela. (Fundza Galathiya 2:20.) Naka lamavi lasicinisekisako lasekugcineni kwalelivesi. Pawula watsi: ‘INdvodzana yaNkulunkulu yangitsandza futsi yatinikela ngenca yami.’ Akazange acabange kutsi bekente tintfo letimbi kakhulu kangekutsi Nkulunkulu bekangeke amtsandze. Akazange acabange atsi, ‘Ngiyabona kutsi kungani Jehova abatsandza labanye bazalwane, kodvwa mine angeke angitsandze.’ Pawula wakhumbuta emaKhristu aseRoma watsi: “Ngesikhatsi sisetoni Khristu wasifela.” (Rom. 5:8) Nkulunkulu usitsandza kakhulu!

10. Yini lesiyifundza KubaseRoma 8:38, 39?

¹⁰ Fundza KubaseRoma 8:38, 39. Pawula bekaciniseka kutsi lutsandvo lwaNkulunkulu lunemandla. Wabhala watsi kute “lokungasehlukanisa nelutsando Nkulunkulu lasikhombisa lona.” Bekayati indlela Jehova lasibeketelela ngayo sive sema-Israyeli. Bekati  nekutsi Jehova wamkhombisa njani umusa. Ngalamanye emavi singasho kutsi Pawula bekatsi, ‘Njengobe Jehova atfumela iNdvodzana yakhe kutsi itongifela, ngite sizatfu sekungabata kutsi uyangitsandza.’—Rom. 8:32.

11. Nanobe Pawula bekente emaphutsa, njengalawo labhalwe ku-1 KuThimothi 1:12-15, kungani bekaciniseka kutsi Nkulunkulu uyamtsandza?

¹¹ Fundza 1 KuThimothi 1:12-15. Kungenteka betihle tiba khona tikhatsi lapho khona Pawula bekeva buhlungu kakhulu ngetintfo latenta asengakabi ngumKhristu. Watibita ngekutsi usoni ‘lesihamba embili’ futsi loko akusimangalisi! Ngaphambi kwekutsi afundze liciniso, bekaphatsa kabi emaKhristu emadolobheni lamanyenti, avalela lamanye awo emajele, waphindze wasekela sincumo senkantolo sekubulala lamanye emaKhristu. (Imis. 26:10, 11) Ase ucabange nje kutsi Pawula bekeva buhlungu kakhulu kangakanani nakwenteka ahlangana nemKhristu losemusha lowashonelwa batali bakhe ngenca yakhe. Watisola ngemaphutsa lebekawentile, kodvwa bekati kutsi bekangeke asakushintja lebekwentekile. Bekakholwa kutsi Jesu wamfela, futsi wabhala watsi: “Ngemusa lomkhulu waNkulunkulu nginguloku lengingiko.” (1 Khor. 15:3, 10) Yini lesiyifundzako? Yemukela kutsi Khristu wakufela futsi wakuvulela indlela yekuba nebuhlobo lobuhle naJehova. (Imis. 3:19) Lokubalulekile kuNkulunkulu nguloko lesikhona kumentela kona nyalo nalesitawukwenta esikhatsini lesitako, hhayi emaphutsa lesawenta esikhatsini lesendlulile, ngisho nobe besiBoFakazi baJehova nobe cha.—Isa. 1:18.

12. Emavi laku-1 Johane 3:19, 20 angasisita njani nangabe siva shengatsi asikabaluleki nobe akusifaneli kutsandvwa?

¹² Nawucabanga ngekutsi Jesu wafela tono takho, kungenteka utsi ‘asingifaneli lesipho lesiligugu kangaka.’ Kungani ungahle  utive ngalendlela? Inhlitiyo yetfu lenesono ingasikhohlisa isente sitive singasilutfo nobe kungasifaneli kutsandvwa. (Fundza 1 Johane 3:19, 20.) Ngetikhatsi letinjalo, kufanele sikhumbule kutsi “Nkulunkulu mkhulu kakhulu kunetinhlitiyo tetfu.” Ngisho nobe singeva shengatsi Jehova akasasitsandzi nobe angeke asitsetselele, kepha Babe wetfu wasezulwini uyasitsandza futsi utasitsetselela. Kufanele siciniseke kutsi Jehova uyasitsandza. Kuze sente njalo, kufanele sidadishe liVi lakhe, sihlale sithantaza futsi sihlale sitihlanganisa nebantfu bakhe labetsembekile. Kubaluleke ngani kwenta letintfo?

13. Kungasisita njani kudadisha liVi laNkulunkulu? (Buka libhokisi lelitsi, “ Indlela LiVi LaNkulunkulu Lelibasita Ngayo.”)

¹³ Dadisha liVi laNkulunkulu onkhe malanga, futsi utabubona kahle buntfu baJehova lobuhle. Utawubona kutsi ukutsandza kakhulu. Kuzindla ngeliBhayibheli onkhe malanga kutakusita kutsi ucabange kahle, ‘ulungise tintfo’ letisengcondvweni nasenhlitiyweni yakho. (2 Thim. 3:16) Kevin, longulomdzala welibandla lobekanenkinga yekutiva angasilutfo, utsi: “Kufundza Tihlabelelo 103 nekuzindla ngato, kungisite ngalungisa indlela lebengicabanga ngayo futsi ngayibona indlela Jehova langitsatsa ngayo.” Eva, lokukhulunywe ngaye ekucaleni utsi: “Ngephetsa lilanga ngekuzindla ngetintfo letibalulekile kuJehova. Loko kungenta ngitive nginekuthula futsi nekukholwa kwami kuyacina.”

14. Ungasisita njani umthantazo?

¹⁴ Thantaza njalo. (1 Thes. 5:17) Nangabe ufuna kwakha bungani nemuntfu lotsite, kufanele uhlale ukhuluma naye futsi umtjele indlela lotiva ngayo. Loko kuyafana nebungani betfu naJehova. Nangabe sithantaza, simtjela indlela lesitiva ngayo, ngalesikucabangako nangalokusikhatsatako, sisuke sikhombisa kutsi siyametsemba nekutsi siyati kutsi uyasitsandza. (Hla. 94:17-19; 1 Joh. 5:14, 15) Yua, lesikhulume ngaye ekucaleni utsi: “Nangithantaza, angigcini nje ngekutjela Jehova ngalokwenteke ngalelolanga. Ngimtjela naloko lengikucabangako nendlela lengitiva ngayo. Nyalo, Jehova angisamtsatsi njengemphatsi wenkapane lenkhulu, kodvwa sengimtsatsa njengaBabe lobatsandza mbamba bantfwana bakhe.”—Buka libhokisi lelitsi, “ Uke Wayifundza Yini?”

15. Jehova ukhombisa njani kutsi unendzaba natsi?

¹⁵ Tihlanganise nebangani labetsembekile; basipho lesivela kuJehova. (Jak. 1:17) Babe wetfu wasezulwini ukhombisa kutsi unendzaba natsi ngekusinika bazalwane nabodzadze ‘labasitsandza ngaso sonkhe sikhatsi.’ (Taga 17:17) Encwadzini yaPawula leya KubaseKholose,  wakhuluma ngalamanye emaKhristu lamsekela, watsi ‘ayindvudvuto lenkhulu.’ (Khol. 4:10, 11) Ngisho naKhristu Jesu, bekaludzinga lusito futsi wajabula kakhulu ngelusito lalutfola kubangani bakhe, lokutingilosi nebantfu.—Luk. 22:28, 43.

16. Bangani labetsembekile bangasisita njani kutsi sisondzele kuJehova?

¹⁶ Uyalwemukela yini lusito lolutfola kubangani labetsembekile ebandleni? Kutjela umngani lovutsiwe ngetinkinga tetfu akusho kutsi sinekukholwa lokubutsakatsaka; kodvwa kwenta njalo kungasivikela. James, lesikhulume ngaye ekucaleni utsi: “Kuba nebungani lobuhle nemaKhristu lavutsiwe kungisite kakhulu. Nakwenteka imicabango lemibi ingihlasela, labangani labaligugu bangilalela ngesineke futsi bangikhumbute kutsi bayangitsandza. Nabenta njalo ngivele ngibone kutsi Jehova uyangitsandza futsi uyangikhatsalela.” Kubalulekile kutsi sibe bangani labakhulu nebazalwane betfu nabodzadze!

17-18. Ngubani lokufanele simlalele, futsi kungani?

¹⁷ Sathane ufuna siyekele kwetama kwenta lokuhle. Ufuna setsembe kutsi Jehova akasitsandzi, nekutsi akusifaneli kusindziswa. Njengobe sesibonile, lawo ngemanga laluhlata, Jehova uyasitsandza.

¹⁸ Jehova uyakutsandza. Uligugu kakhulu kuye. Nangabe umlalela ‘utawuhlale akutsandza’ kuze kube phakadze njengaJesu. (Joh. 15:10) Ngako ungamlaleli Sathane, futsi ungayilaleli inhlitiyo yakho nayikulahla. Kunaloko, lalela Jehova ngobe ubona lokuhle kitsi. Ciniseka kutsi “uyabatsandza bantfu bakhe,” lokufaka ekhatsi nawe!