1-2. Fanekisa kutsi singatilandzela kanjani tinyatselo taJesu.

TICABANGE usecenjini lebantfu nihamba endzaweni leyingoti, lelihlane futsi lenesihlabatsi. Niholwa ngumuntfu losanesikhatsi ahamba kulendzawo. Njengobe ahamba, ushiya tinyatselo takhe kulesihlabatsi. Nanisachubeka nihamba, nibese anisamboni lona loniholako! Kodvwa anesabi, kunaloko nilandzela tinyatselo takhe edvute!

² Ngendlela lefanako, njengobe singemaKhristu eliciniso, sihamba ehlane leliyingoti, lokungulelive lelibi. Siyajabula kutsi Jehova usinikete umuntfu loncono kakhulu longasihola, lokuyiNdvodzana yakhe Jesu Khristu, lesingalandzela tinyatselo tayo edvute. (1 Phet. 2:21) Ngekusho kwalenye incwadzi lekhuluma ngeliBhayibheli, Phetro ufananisa Jesu nemholi. Njengalomholi loshiya tinyatselo takhe, naJesu ushiya tinyatselo lesingatilandzela. Asesiphendvule nayi imibuto lemitsatfu lemayelana nekulandzela tinyatselo takhe. Kusho kutsini kulandzela tinyatselo taJesu? Kungani kufanele sitilandzele? Singatilandzela kanjani?

3. Kusho kutsini kulandzela tinyatselo talotsite?

³ Kusho kutsini kulandzela tinyatselo talotsite? EBhayibhelini, ligama lelitsi “hamba” nalelitsi “tinyawo” ngaletinye tikhatsi asho indlela umuntfu laphila ngayo. (Gen. 6:9; Taga 4:26) Sibonelo lesibekwa ngumuntfu singafananiswa netinyatselo latishiyako njengobe ahamba. Ngako, kulandzela tinyatselo temuntfu kusho kulandzela sibonelo sakhe nobe kumlingisa.

4. Kusho kutsini kulandzela tinyatselo taJesu?

 ⁴ Kusho kutsini kulandzela tinyatselo taJesu? Kalula nje, kusho kumlingisa. Kulombhalo lokusekelwe kuwo lesihloko, umphostoli Phetro bekakhuluma ngesibonelo lesihle lesabekwa nguJesu, ngobe wacinisela nakahlupheka. Nanobe kunjalo, kunaletinye tindlela lesingamlingisa ngato. (1 Phet. 2:18-25) Ecinisweni, kuko konkhe kuphila kwakhe, tintfo latisho nalatenta, tisibonelo lesingasilingisa.

5. Chaza kutsi bantfu labanesono bangakhona yini kulingisa sibonelo saJesu.

⁵ Njengobe sinesono, singakhona yini vele kulingisa sibonelo saJesu? Yebo. Khumbula kutsi Phetro usikhutsata kutsi ‘silandzele tinyatselo taJesu edvute,’ hhayi kutsi sitilandzele ncamashi. Nangabe silandzela tinyatselo takhe ngekucophelela, lokusho kwenta konkhe lesingakhona kukwenta njengebantfu labanesono, sitawube silalela emavi emphostoli Johane latsi: ‘Chubekani nihamba ngendlela Jesu bekahamba ngayo.’—1 Joh. 2:6.

6-7. Kungani sitsi kulandzela tinyatselo taJesu kutasenta sisondzelane naJehova?

⁶ Kulandzela tinyatselo taJesu kutasenta sisondzelane naJehova. Kungani sisho njalo? Kwekucala, Jesu wasibekela sibonelo lesihle kakhulu sekuphila ngendlela lejabulisa Nkulunkulu. (Joh. 8:29) Ngako, nasilandzela tinyatselo taJesu, sitawube sijabulisa Jehova. Singaciniseka kutsi Babe wetfu losezulwini utawusondzela kulabo labetama ngato tonkhe tindlela kuba bangani bakhe.—Jak. 4:8.

⁷ Kwesibili, Jesu wamlingisa ncamashi Babe wakhe. Kungako atsi: “Loyo longibonile mine umbonile naBabe.” (Joh. 14:9) Sisuke silingisa Jehova nasilingisa buntfu baJesu nendlela labaphatsa ngayo labanye. Sibonelo nje,  wayivela indvodza lebeyinebulephelo, namake lobekanesifo lesibi futsi wabavela nalabanye ngesikhatsi bafelwe. (Mak. 1:40, 41; 5:25-34; Joh. 11:33-35) Nangabe sichubeka setama kulingisa buntfu baJehova, sisondzela kakhulu kuye.

8. Chaza kutsi kungani kulandzela tinyatselo taJesu kutasisita kutsi ‘sincobe’ lelive.

⁸ Kulandzela tinyatselo taJesu kusisita kutsi singaphazanyiswa ngulelive lelibi. Ngebusuku bekugcina Jesu alamhlabeni, watsi: “Mine ngilincobile live.” (Joh. 16:33) Bekasho kutsi akalingisi indlela yekucabanga yebantfu balelive, imigomo yabo kanye nendlela labaphila ngayo. Jesu akazange asikhohlwe sizatfu sekutsi kungani atfunywa lamhlabeni, lokukungcweliswa kwaJehova. Kutsiwani ngatsi? Tinyenti tintfo letingasiphatamisa kulelive. Kodvwa nangabe silingisa Jesu, ngekutsi sihlale sinake kwenta intsandvo yaJehova, natsi ‘sitalincoba’ lelive.—1 Joh. 5:5.

9. Yini lokufanele siyente kuze sihlale endleleni leya ekuphileni lokuphakadze?

⁹ Kulandzela tinyatselo taJesu kuholela ekuphileni lokuphakadze. Ngesikhatsi lelinye lijaha lelinjingile libuta kutsi yini lokufanele liyente kuze litfole kuphila lokuphakadze, Jesu watsi: ‘Wota ungilandzele.’ (Mat. 19:16-21) Kulamanye emaJuda lebekangakholwa kutsi unguKhristu, Jesu watsi: “Timvu tami . . . tiyangilandzela. Ngitatinika kuphila lokuphakadze.” (Joh. 10:24-29) Ngesikhatsi akhuluma naNikhodemu, lobekalilunga leNkantolo YemaJuda futsi atitsandza tintfo Jesu bekatifundzisa, Jesu watsi labo ‘labakholwa nguye’ batawutfola “kuphila lokuphakadze.” (Joh. 3:16) Sikhombisa kutsi sinekukholwa kuJesu ngekutsi sisebentise loko lakufundzisa futsi sente loko lakwenta. Nasenta njalo, sitawuhlala endleleni leya ekuphileni lokuphakadze.—Mat. 7:14.

10. Yini lokufanele siyente kuze ‘simati’ kancono Jesu? (Johane 17:3)

¹⁰ Ngaphambi kwekutsi sitilandzele edvute tinyatselo taJesu, kufanele simati. (Fundza Johane 17:3.) ‘Kwati’ Jesu, yintfo lokufanele sichubeke siyenta. Kufanele sichubeke sifundza ngaye, sifundze ngebuntfu bakhe, indlela lacabanga ngayo nangetimiso takhe. Ngisho nobe singakanani sikhatsi sisecinisweni, kufanele sichubeke setama kwati Jehova neNdvodzana yakhe.

11. Akhuluma ngani emaVangeli lamane?

¹¹ Kuze Jehova asisite siyati iNdvodzana yakhe, ngelutsandvo wasifakela emaVangeli lamane eVini lakhe. LamaVangeli akhuluma ngekuphila kwaJesu nangemsebenti wakhe. Letincwadzi tisitjela ngaloko Jesu lakwenta, lakusho nendlela bekativa ngayo. Tiphindze tisisite ‘sicabangisise’ ngesibonelo saJesu. (Heb. 12:3) Ecinisweni, tinetinyatselo  Jesu lasishiyela tona. Ngako, nasidadisha lamaVangeli, singamati kancono Jesu. Ngenca yaloko, sitawukhona kulandzela tinyatselo takhe edvutane.

12. Yini lesingayenta kuze sizuze kakhulu emaVangelini?

¹² Kuze sizuze kakhulu kulamaVangeli, kufanele sente lokungetulu nje kwekumane siwafundze. Kufanele sitinike sikhatsi siwadadishe ngekucophelelela futsi sicabangisise ngawo. (Catsanisa naJoshuwa 1:8.) Asesicoce ngetintfo letimbili letingasisita kutsi sizindle ngalamaVangeli futsi sikhone kutisebentisa tintfo lesitifundza kuwo.

13. Tindzaba lotifundza emaVangelini ungatenta njani tiphile?

¹³ Kwekucala, yenta tindzaba lotifundza emaVangelini tiphile. Sebentisa likhono lakho lekucabanga kuze ubone, ulalele futsi uve lebekwenteka. Kuze ukhone kukwenta loko, cwaninga etincwadzini lesitinikwe yinhlangano yaJehova. Buka kutsi kukhulunywa ngani, lokutintfo letenteka ngaphambili nangemuva kwalendzaba lofundza ngayo. Buka imininingwane leyengetiwe lemayelana nebantfu netindzawo lokukhulunywa ngato kulendzaba. Catsanisa lendzaba lofundza ngayo nalenye indzaba lefana nayo lekulelinye liVangeli. Ngalesinye sikhatsi, lomunye umbhali weliVangeli ubhala imininingwane lelusito lomunye umbhali langakabhali ngayo.

14-15. Yini lesingayenta kuze sikusebentise ekuphileni kwetfu loko lesikufundza emaVangelini?

¹⁴ Kwesibili, kusebentise ekuphileni kwakho loko lokufundza emaVangelini. (Joh. 13:17) Ngemuva kwekudadisha indzaba letsite leseVangelini, tibute: ‘Kukhona yini lengikufundzako kulendzaba lengingakusebentisa ekuphileni kwami? Loko lengikufundzile, ngingakusebentisa njani kuze ngisite lomunye?’ Cabanga ngemuntfu lomatiko, futsi ngelutsandvo nangekuhlakanipha umcocele loko lokufundzile.

¹⁵ Ase sicoce ngekutsi singatisebentisa njani letindlela letimbili lesesifundze ngato.  Sitawucoca ngendzaba yemfelokati lobekaphuye kakhulu lowabonwa nguJesu ethempelini.

16. Chaza lokwenteka kuMakho 12:41.

¹⁶ Yenta lendzaba iphile. (Fundza Makho 12:41.) Kubone ngeliso lengcondvo loko lokwenteka. NguNisan 11, 33 C.E. futsi sekusele emalanga lambalwa kutsi Jesu afe. Cishe lilanga lonkhe Jesu bekafundzisa ethempelini. Kodvwa baholi benkholo bebasolo bamphikisa. Ngaphambi kwaloko, labanye babo bake bambuta kutsi ulitsatsaphi ligunya lekwenta lomsebenti. Labanye babo betame kumcindzetela ngekumbuta imibuto lelukhuni. (Mak. 11:27-33; 12:13-34) Nyalo, Jesu sewukulenye incenye yelithempeli. Kungenteka usendzaweni lebitwa ngekutsi Yindzawo Yalabasikati, futsi lapho ubona emabhokisi emnikelo kanye nelubondza lwalendzawo. Uhlala phansi, futsi ucala kunaka njengobe bantfu bafaka iminikelo yabo kulamabhokisi eminikelo. Ubona bantfu labanyenti labanjingile bafaka imali lenyenti. Kungenteka lapho ahleti khona uyawuva umsindvo walemali njengobe ingena kulamabhokisi.

17. Yini leyentiwa ngumfelokati lophuyile lokukhulunywa ngaye kuMakho 12:42?

¹⁷ Fundza Makho 12:42. Ngemuva kwesikhatsi, Jesu ubona lomunye umfati. Lomake ‘ungumfelokati lophuye kakhulu.’ (Luk. 21:2) Kuphila kwakhe kumatima kakhulu; kungenteka ute ngisho nemali leyenele yekutsenga tintfo latidzingako. Nanobe kunjalo, uya kulinye lalamabhokisi futsi ngekuhlakanipha ufaka tinhlavu letimbili temali telinani lelincane kakhulu, letingabangi ngisho nemsindvo njengobe tingena kulelibhokisi. Jesu uyati kutsi ufakeni, tinhlavu letimbili te-lephithoni, lokutinhlavu letincane kakhulu lebetisetjentiswa ngaleso sikhatsi. Lena yimali lencane kakhulu kutsi ingatsenga ngisho najolwane, lokuyinyoni leshiphe kakhulu lebeyitsengiswa kuze idliwe.

18. Ngekusho kwaMakho 12:43, 44, yini Jesu layisho mayelana nemnikelo walomfelokati?

¹⁸ Fundza Makho 12:43, 44. Jesu ujabula kakhulu ngalomfelokati. Ngako ubita bafundzi bakhe, abakhombise lomfelokati, bese utsi: “Lomfelokati lophuyile ufake lokunyenti kwendlula bonkhe.” Ngemuva kwaloko uyabachazela utsi: “Bonkhe labanye [ikakhulukati labanjingile] bafake labakutsetse kulokunyenti labanako, kodvwa yena nanobe aphuyile, ufake konkhe lanako nalebekaphila ngako.” Ngesikhatsi lomfelokati lophuyile anikela ngemali yakhe yekugcina, beketsemba kutsi Jehova utamnakekela.—Hla. 26:3.

19. Ngusiphi sifundvo lesibalulekile lesingasifundza emavini aJesu lamayelana nemfelokati lophuyile?

¹⁹ Yisebentise ekuphileni kwakho lendzaba lofundza ngayo. Tibute: ‘Ngusiphi sifundvo lengingasifundza emavini aJesu lamayelana nemfelokati lophuyile?’ Cabanga ngalomfelokati. Siyaciniseka kutsi bekafuna kupha Jehova lokunyenti. Ngako wenta konkhe langakwenta; wanika Jehova lokuncono kakhulu. Jesu bekati kutsi umnikelo walomfelokati bewuligugu kuBabe wakhe. Nasi sifundvo lesibalulekile lesingasifundza: Jehova ujabula kakhulu nangabe simupha lokuncono kakhulu lesinako, lokukumkhonta ngenhlitiyo yetfu yonkhe nangemphefumulo wetfu wonkhe. (Mat. 22:37; Khol. 3:23) Jehova uyajabula nakasibona senta konkhe lokusemandleni etfu! Sikhatsi kanye nemandla lesikucitsa sikhonta Jehova, lokufaka ekhatsi nasishumayela nalapho sisemihlanganweni, kufanele kube ngulokuncono kakhulu lesingakhona kukwenta.

20. Ungasisebentisa njani sifundvo lesisendzabeni yemfelokati? Niketa sibonelo.

 ²⁰ Ungasisebentisa njani sifundvo lesisendzabeni yemfelokati? Cabanga ngalabatsite labadzinga kucinisekiswa kutsi Jehova uyajabula ngaloko labamentela kona. Nasi sibonelo, ukhona yini dzadze lomatiko losakhulile, lobutsakatsaka, futsi lokungenteka utiva angakabululeki ngenca yekutsi kuncane lesekakhona kukwenta emsebentini wekushumayela? Ukhona yini umzalwane lonesifo lesingapheli, lesimbangela buhlungu futsi lodvumatekile ngenca yekutsi akakhoni kuya kuyo yonkhe imihlangano yelibandla? Sita labanjalo ngekutsi ukhulume emavi ‘lalungele kwakha.’ (Ef. 4:29) Bacocele ngesifundvo lesikhutsatako lesitfolakala kulendzaba yemfelokati lophuyile. Emavi akho lakhutsatako angabacinisekisa kutsi Jehova uyajabula nangabe simnika lokuncono kakhulu. (Taga 15:23; 1 Thes. 5:11) Nangabe uncoma labanye ngekupha Jehova lokuncono kakhulu kulabanako, ngisho nobe kubonakala kukuncane kangakanani, usuke ulandzela tinyatselo taJesu edvute.

21. Yini lotimisele kuyenta?

²¹ Sijabula kakhulu ngekutsi tindzaba letisemaVangelini tinemininingwane leminyenti lemayelana nekuphila kwaJesu lesisita kutsi simlingise nobe silandzele tinyatselo takhe edvute! Kungaba njani utinike sikhatsi sekufundza lamaVangeli nobe niwafundze eKukhonteni Kwemndeni. Kufanele sikhumbule kutsi kuze sizuze kakhulu nasidadisha, letindzaba lesitifundzako kufanele sitente tiphile futsi sitisebentise ekuphileni kwetfu. Ngetulu kwekulingisa loko Jesu lakwenta, kufanele silalele naloko lakusho. Esihlokweni lesilandzelako, sitawucoca ngaloko lesingakufundza emavini aJesu ekugcina ngaphambi kwekufa kwakhe.