Funa Lokuncono Kakhulu Kunegolide
Uke walitfola yini lucetu lwegolide? Bambalwa kakhulu bantfu labake balutfola. Nobe kunjalo, tigidzi tebantfu tiye tatfola lokuncono kakhulu kunegolide. Loko labakutfolile kuhlakanipha lokuvela kuNkulunkulu, futsi “kungeke kutsengwe ngisho nangalecengiwe igolide.”—Jobe 28:12, 15.
NGANDLELA tsite, bafundzi beliBhayibheli labacotfo bafanana nebantfu labafuna igolide. Labafundzi kudzingeka basebente kamatima kute bachubeke bacwaninga emiBhalweni kute batfole kuhlakanipha lokuligugu. Kulendzaba, sitawufundza ngekutsi sicabange ngetindlela letintsatfu tekutfola igolide.
KUTFOLA IGOLIDE!
Ase sitsi uhamba elusentseni lwemfula futsi ubona intfo lebonakala ilitje lelincane lelimanyatelako njengobe ihlatjwa lilanga. Uyagobondzela futsi nawuyibona kutsi lucetu lwegolide ujabula kakhulu. Luncane kunesihloko selutsi lwemetjiso futsi lihle kakhulu kunelidayimane lesisezingeni lelisetulu. Ubese ubuka emaceleni kute ubone kutsi kute yini letinye tincetu tegolide longatibona.
Ngendlela lefanako, ngelilanga lelitsite esikhatsini lesengcile, Fakazi waJehova kungenteka utile kakho kute acoce nawe ngemlayeto welitsemba loseBhayibhelini. Mhlawumbe ukhumbula kahle ngesikhatsi uwatfola kwekucala emaciniso ngaNkulunkulu, lesingawafanisa nelucetu lwegolide. Loko kungenteka kwenteka ngesikhatsi ulibona kwekucala ngca ligama laNkulunkulu lelitsi Jehova eBhayibhelini. (Hla. 83:18, NW.) Nobe mhlawumbe nawufundza kutsi ungaba ngumngani waJehova. (Jak. 2:23) Wavele nje wabona kutsi utfole lokuncono kunegolide! Kungenteka nekutsi bewufuna kwati lokwengetiwe.
UTFOLA LOKWENGETIWE!
Tinhlayiya tegolide ngalesinye sikhatsi titfolakala emifuleni. Legolide ivamise kutsi ibhicane nemhlabatsi. Ngesikhatsi sinye, bantfu labafuna igolide bangatfola lenyenti kulemifula, lengabita emashumi etinkhulungwane temadola.
Nawucala kufundza liBhayibheli naFakazi WaJehova, ungase utive njengemuntfu lofuna igolide. Kuzindla ngemavesi eliBhayibheli nako kwengeta lwati lwakho futsi kucebisa buhlobo bakho naNkulunkulu. Njengobe uzindla ngalamaciniso eliBhayibheli, ufundza kutsi ungasondzelana njani naJehova futsi uhlale uselutsandvweni lwakhe ube unembono wekuphila lokuphakadze.—Jak. 4:8; Juda 20, 21.
Njengemuntfu lofuna igolide, usebenta ngekutimisela yini kute ufundze emaciniso laligugu laseBhayibhelini?
Njengemuntfu lofuna igolide, kungenteka nawe bewukhutsele ekufuneni kwati ngaNkulunkulu. Mat. 28:19, 20.
Ngemuva kwekufundza emaciniso eliBhayibheli lasisekelo, akungabateki kutsi wabese sewufuna kutsatsa sinyatselo sekutsi utinikele bese uyabhajatiswa.—UYACHUBEKA UFUNA!
Umuntfu lofuna igolide angahle atfole igolide lencane ekhatsi ematjeni. Lamanye alamatje anegolide kodvwa acine kakhulu futsi kudzingeka uwaphishite kute ukwati kukhipha legolide lekuwo. Ekucaleni legolide kungenteka ingabonakali. Kungani? Kungobe lamanye ematje kungenteka ukhandze kutsi anegolide lengaba ngu-0.3 (10g) etjeni ngalinye lelinesisindvo lesingaba lithani lelilodvwa. Nobe kunjalo, lomuntfu lofuna legolide ukubona kufaneleka kutsi ayitfole nanobe iyincane.
Imetamo nayo iyadzingeka nangabe umuntfu sekendlulile “emfundzisweni lesisekelo lemayelana naKhristu.” (Heb. 6:1, 2) Kudzingeka usebente ngekutimisela kute utfole emaphuzu lamasha futsi utfole netifundvo nawufundza liBhayibheli. Ngako yini longayenta kute uciniseke kutsi sifundvo seliBhayibheli lotichubela sona siyakuzuzisa ngisho nobe sekuphele iminyaka uba naso?
Chubeka ukukhutsalele kufundza. Nakisisa imininingwane leyengetiwe. Chubeka ufaka umdlandla futsi utawutfola imiBhalo leligugu lenekuhlakanipha lokuvela kuNkulunkulu nesicondziso. (Rom. 11:33) Kute ukhulise lwati lwakho ngemiBhalo, wasebentise kahle emathulusi ekucwaniga latfolakalako ngelulwimi lwakho. Ngesineke buka ticondziso lotidzingako netimphendvulo temibuto lonayo ngeliBhayibheli. Buta labanye imibhalo netihloko labatitfole tilusito futsi letikhutsatako. Coca nalabanye ngemaphuzu lajabulisako lowatfolile nawufundza liVi laNkulunkulu.
Kuliciniso kutsi umgomo wakho akusiko nje kutfola lwati lolusekelwe ngemaciniso latsite. Umphostoli Pawula wecwayisa ngekutsi “lwati luyakhukhumeta.” (1 Khor. 8:1) Ngako, sebenta ngekutimisela kute uhlale utfobekile futsi ucinile ekukholweni. Kukhonta kwemndeni lokuchubeka njalo kanye nesifundvo seliBhayibheli lotichubela sona, kutakusita kutsi uphile ngekuvumelana netimiso taJehova futsi kutakukhutsata kutsi usite labanye. Ngetulu kwaloko, utawujabula ngobe utfole intfo lencono kakhulu kunegolide.—Taga 3:13, 14.