1, 2. (a) Kulamalanga ekugcina, ugcwaliseke njani umbhalo wa-Isaya 60:22? (b) Ngusiphi sidzingo lesikhona nyalo eluhlangotsini lolusemhlabeni lwenhlangano yaJehova?

“LOMNCANE wenu uyawuba yinkhulungwane, lophansi kakhulu abe sive lesinemandla.” (Isa. 60:22) Lamavi lasiphrofetho ayagcwaliseka kulamalanga ekugcina. Sisho ngobe ngemnyaka wemsebenti wa-2015, bamemeteli beMbuso labebamatasatasa emsebentini wekushumayela emhlabeni wonkhe bebangu-8 220 105. Incenye yekugcina yalamavi lasiphrofetho kufanele itsintse wonkhe umuntfu longumKhristu, ngobe Babe wetfu losezulwini utsi: “NginguSimakadze, ngesikhatsi sako ngiyawukwenta loko ngekushesha lokukhulu.” Njengobe bantfu labagibele imoto bayayiva nayingeta ematubane, natsi siyeva kutsi umsebenti wekwenta bafundzi uyachubeka ukhula. Ngamunye wetfu wenta njani ngalolushintjo lolungaka? Senta konkhe lokusemandleni etfu yini njengebamemeteli beMbuso labakhutsele? Bazalwane nabodzadze labanyenti bachubeka bafaka ticelo tekuba ngemahlahlandlela lavamile nobe lasitako. Asijabuli yini nasibona labanyenti baya kuyosita lapho kunesidzingo lesikhulu khona nobe benta leminye imisebenti ekukhonteni Nkulunkulu?

² Ngesikhatsi lesifanako, solo kunesidzingo setisebenti letengetiwe.  Njalo ngemnyaka kucaliswa emabandla langu-2 000. Kube libandla linye lelisha belingaba nalabadzala belibandla labasihlanu, bekungadzingeka tinceku letisebentako letingu-10 000 kutsi tifanelekele kuba ngulabadzala belibandla njalo ngemnyaka. Loko bekungasho kutsi tinkhulungwane tebazalwane kufanele tisebentele kutsi kutifanele kuba tinceku letisebentako. Ngetulu kwaloko, ngisho nobe sibodzadze nobe sibazalwane, ‘sihlale sinalokunyenti kwekukwenta emsebentini weNkhosi.’​—1 Khor. 15:58.

3, 4. Kusho kutsini kuwe kutfutfuka ebuhlotjeni bakho naNkulunkulu?

³ Fundza 1 Thimothi 3:1. Leligama lesiGriki lelihunyushwe ngekutsi ‘kufisa,’ lisho kufuna intfo lekhashane nawe, mhlawumbe intfo lokungasimelula kuyifinyelela. Ngekusebentisa lelogama, umphostoli Pawula abegcizelela kutsi kutfutfukisa buhlobo betfu naNkulunkulu kudzinga umetamo. Nasi sibonelo: Umzalwane ucabanga ngelikusasa lakhe ebandleni. Kungenteka usengakabi yingenceku lesebentako, kodvwa uyabona kutsi kufanele atfutfuke abe nebuntfu lobuhle bebuKhristu. Kwekucala, usebentela kuba yinceku lesebentako ebandleni. Ngekuhamba kwesikhatsi, uba nesifiso sekutsi abonakale avutfwe ngalokwanele kutsi angakhonta njengembonisi. Kuto totimbili letimo, lomzalwane usebenta ngekutimisela kute afinyelele letimfuneko letidzingekako kute ente umsebenti lowengetiwe ebandleni.

⁴ Ngendlela lefanako, bazalwane nabodzadze labafisa kuba ngemahlahlandlela, kukhonta eBethel nome kuvolontiya ekwakheni emaHholwa eMbuso, basebenta ngekutimisela kute bafinyelele lemigomo yabo. Asesicoce ngekutsi liVi laNkulunkulu lisikhutsata njani kutsi sonkhe sitfutfuke ekukhonteni kweliciniso.

5. Labasha bangawasebentisa njani emandla abo emsebentini weMbuso?

⁵ Labasebasha basenawo emandla ladzingekako ekwenta lokwengetiwe emsebentini waJehova. (Fundza Taga 20:29.) Labanye bazalwane labasebasha labakhonta eBethel banencenye emsebentini wekushicilela emaBhayibheli kanye naletinye tincwadzi letisekelwe eBhayibhelini. Linyenti lebazalwane nabodzadze labasebasha, lisita emsebentini wekwakha emaHholwa eMbuso nekuwagcina asesimeni lesikahle. Bantfu labasebasha basebenta kanye naBoFakazi lasebanesikhatsi ekusiteni labanye lapho kuvela inhlekelele yemvelo. Emahlahlandlela lamanyenti lasemasha alusito ekusakateni tindzaba letimnadzi etindzaweni letikhuluma tilwimi temdzabu kanye netilwimi takulamanye emave.

6-8. (a) Lomunye losemusha wenta luphi lushintjo ekukhonteni kwakhe Nkulunkulu, futsi waba yini umphumela? (b) ‘Singanambitsa njani sibone kutsi Jehova muhle’?

⁶ Kungenteka kutsi uyakujabulela kubaluleka kwekusebentela Nkulunkulu ngenhlitiyo yonkhe. Kepha kutsiwani nangabe utiva ngendlela umzalwane lokutsiwa ngu-Aaron lativa ngayo? Nanobe akhuliswa ngumndeni longemaKhristu, utsi: “Bengingakutsandzi kuya esifundvweni nasensimini.” Abekufuna kujabula ekukhonteni Nkulunkulu, ngako abetibuta kutsi kwentiwa yini angajabuli. Yini labese uyayenta?

⁷ Aaron wacala kuba neluhlelo lwekufundza liBhayibheli, kulungiselela imihlangano kanye nekuphendvula kuyo. Lokubaluleke kakhulu lakwenta, kuthantaza njalo. Njengobe lutsandvo lwakhe ngaJehova lukhula, nebuhlobo bakhe naye bakhula. Kusukela ngaleso sikhatsi, Aaron sewuke waba lihlahlandlela, wasebenta nalabanye ekusiteni lapho kuvele khona tinhlekelele temvelo waphindze washumayela nakulelinye live. Nyalo, Aaron sewukhonta eBhethel futsi sewungulomdzala  welibandla. Utiva njani ngalolushintjo lalwenta? Utsi: “‘Nginambitsile ngabona kutsi [Jehova] muhle.’ Ngenca yekungibusisa, ngimbonga kakhulu futsi ngifuna kwenta lokwengetiwe emsebentini wakhe ngobe loku kutawuholela kuletinye tibusiso.”

⁸ Umhlabeleli wahlabela watsi: “Labo labafuna Simakadze bangeke beswele lutfo loluhle.” (Fundza Tihlabelelo 34:8-10.) Kuliciniso kutsi Jehova akabadvumati labo labakhutsele emsebentini wakhe. Nguloyo naloyo kitsi ‘anganambitsa abone kutsi Jehova muhle unemusa,’ njengobe simsebentela ngawo onkhe emandla etfu. Nasikhonta Nkulunkulu ngemphefumulo wonkhe, sitfola injabulo lengachazeki.

9, 10. Kubaluleke ngani kutsi ‘ulindzele Nkulunkulu’?

⁹ Njengobe usebentela kufinyelela imigomo yakho, khombisa kutsi ‘ulindzele Nkulunkulu.’ (Mik. 7:7) Sonkhe sikhatsi Jehova uyatisekela tinceku takhe letetsembekile, nobe ngalesinye sikhatsi angase akuvumele kutsi tilindze sikhatsi kute titfole emalungelo latsite. Wetsembisa Abrahama kutsi utawuba nendvodzana, kodvwa bekudzingeka abe nekukholwa futsi abeketele. (Heb. 6:12-15) Nabobe kwaphela iminyaka leminyenti ngaphambi kwekutsi kutalwe Isaka, Abrahama akazange alilahle litsemba futsi Jehova akazange amdvumate.​—Gen. 15:3, 4; 21:5.

¹⁰ Kulindza akusimelula. (Taga 13:12) Nasingacabanga kakhulu ngetintfo letisivise buhlungu nobe tasidvumata, singaphelelwa ngemandla. Kungaba kuhlakanipha kusebentisa sikhatsi setfu kute sitfutfukise buntfu betfu bebuKhristu. Naka tindlela letintsatfu lesingakwenta ngato loko.

11. Ngubuphi buntfu bebuKhristu lesingetama kuba nabo, futsi kubaluleke ngani kutsi sibe nabo?

¹¹ Bani nebuntfu bebuKhristu. Nasifundza liVi laNkulunkulu futsi sizindla ngalo, singaba nekuhlakanipha, kucondzisisa, kuncuma lokukahle,  lwati, likhono lekucabanga kanye nekuhluteka engcondvweni. Lobuntfu bubalulekile kulabo labafisa kuhola ekukhonteni kweliciniso. (Taga 1:1-4; Thit. 1:7-9) Siyakhona kutfola umcondvo waNkulunkulu etimeni letinyenti nasifundza tincwadzi tetfu letisekelwe eBhayibhelini. Lilanga nelilanga sibhekana netinkinga etindzabeni tekutijabulisa, tekugcoka nekutilungisa, kusebentisa imali kanye nekusebentelana nalabanye. Nasisebentisa loko lesikufundza eBhayibhelini, singenta tincumo letimjabulisako Jehova.

12. Emalunga elibandla angakhombisa njani kutsi etsembekile?

¹² Khombisa kutsi wetsembekile. Ngisho nobe sibazalwane nobe sibodzadze, kufanele sisente kahle sabelo lesisitfolako enhlanganweni yaJehova. Njengobe abengumholi, Nehemiya kwadzingeka abele bantfu baNkulunkulu imitfwalo letsite. Wabela bobani? Wabela emadvodza lebetsembekile nalabekesaba Nkulunkulu. (Neh. 7:2; 13:12, 13) Nalamuhla, “bantfu labaphatsiswe lokutsite kulindzeleke kutsi betsembeke.” (1 Khor. 4:2) Imisebenti lemihle ngeke ihlale inganakeki.​—Fundza 1 Thimothi 5:25.

13. Ungasisebentisa njani sibonelo saJosefa nangabe ungaphatfwa kahle?

¹³ Vumela Jehova kutsi akutfutfukise. Ungenta njani nangabe labanye bangakuphatsi kahle? Kungenteka ningayikhuluma lendzaba bese niyayengcisa. Kodvwa ngalesinye sikhatsi, kwetama kutivikela kungahlohlela linyeva ekhatsi. Bomnakabo Josefa bamphatsa kabuhlungu, kodvwa akazange ababambele emagcubu. Ngekuhamba kwesikhatsi, Josefa wacanjelwa emanga futsi waboshwelwa intfo labengakayenti. Nobe kunjalo, wavumela kutsi Jehova amcondzise kuletikhatsi letimatima. Waba yini umphumela? ‘Livi laJehova lamvivinya lamtfola kutsi ucinisile.’ (Hla. 105:19) Nakuphela loko kuvivinywa, Josefa waniketwa umsebenti lokhetsekile. (Gen. 41:37-44; 45:4-8) Njengobe ubhekene netinkinga, thantaza ucele kuhlakanipha. Tento nekukhuluma kwakho akube nemusa futsi ucele nemandla kuNkulunkulu. Jehova utakusita.​—Fundza 1 Phetro 5:10.

14, 15. (a) Kungani kufanele ‘sihlale siyinaka’ indlela lesishumayela ngayo? (b) Nguluphi lushintjo longalwenta nangabe timo tishintja? (Buka sitfombe lesisekucaleni kwalesihloko kanye nelibhokisi lelitsi “ Uyafisa Yini Kwetama Indlela Leyehlukile?”)

¹⁴ Pawula wakhutsata Thimothi watsi: “Chubeka utimisela ekufundzeleni linyenti, ekukhutsateni, nasekufundziseni. Hlale utinaka wena nekufundzisa kwakho.” (1 Thim. 4:13, 16) Thimothi abesanesikhatsi angummemeteli weMbuso. Kodvwa abetawuchubeka aphumelela kuphela nangabe ‘ahlale anaka’ indlela yakhe yekufundzisa. Abengeke ayitsatsele phansi indlela bantfu lebebangativa ngayo kuloko labevame kukufundzisa. Kute achubeke afinyelela tinhlitiyo tabo, bekufanele anake tidzingo tabo nakafundzisa. Njengobe sibamemeteli beMbuso, natsi kufanele sente ngendlela lefanako.

¹⁵ Sivame kutfola litje lome inhlama nasishumayela emtini ngemuti. Kuletinye tindzawo asikhoni kungena etakhiweni letitsite letihlala bantfu labanyenti, kanye netindzawo letigadziwe. Nangabe kunjalo ensimini yenu, kungaba njani nicabange ngaletinye tindlela tekushumayela tindzaba letimnandzi?

16. Kungaba yimphumelelo njani kushumayela etindzaweni letiphitsitelako?

¹⁶ Kushumayela etindzaweni letiphitsitelako yindlela lehamba embili yekusakata tindzaba letimnandzi. BoFakazi labanyenti bakutfola kubasebentela kahle futsi babona nemiphumela lemihle. Batibekela sikhatsi sekuyoshumayela kubantfu etindzaweni tekugibela emabhasi netitimela, etimakethe nasemapaki kanye nakuletinye tindzawo letiphitsitelako. Fakazi losebentisa kwehlulela lokuhle angacalisa kucoca nemuntfu ngentfo levele etindzabeni, kumdvumisela ngebantfwana bakhe nobe kumbuta mayelana nemsebenti wakhe. Nabachubeka  bacoca, ummemeteli angabese uveta liphuzu lelisekelwe emBhalweni lelitawenta lomuntfu kutsi asho lakucabangako. Indlela lomuntfu laphendvula ngayo ivamise kwenta kutsi bachubeke bacoca ngeliBhayibheli.

17, 18. (a) Ungaba njani nesibindzi sekushumayela etindzaweni letiphitsitelako? (b) Umoya lomuhle waDavide wekudvumisa Jehova, ungakusita njani nawusemsebentini wekushumayela?

¹⁷ Nangabe ukutfola kulukhuni kushumayela etindzaweni letiphitsitelako, ungalilahli litsemba. Eddie, lolihlahlandlela eDolobheni laseNew York, naye wacale wesaba kucoca nebantfu endzaweni lephitsitelako. Kodvwa ngekuhamba kwesikhatsi wagcine anesibindzi. Wasitwa yini? Utsi: “Ekukhonteni kwemndeni, mine nemkami sicwaninga ngetindlela tekuphendvula labaphikisako kanye nendlela bantfu labavame kutiva ngayo ngesihloko lesitsite. Siyayicela nemibono yalabanye BoFakazi.” Nyalo Eddie sewuyakujabulela kushumayela etindzaweni letiphitsitelako.

¹⁸ Njengobe ucecesheka futsi uba nesibindzi sekushumayela tindzaba letimnandzi, intfutfuko yakho itawubonakala. (Fundza 1 Thimothi 4:15.) Akungabateki futsi kutsi utawudvumisa Babe wetfu losezulwini njengobe kwenta Davide lowahlabelela watsi: “Simakadze ngiyawumbonga ngato tonkhe tikhatsi, ngimdvumise ngemlomo wami ngingakhawuli. Umphefumulo wami utigabatisa ngaSimakadze, labahluphekako abeve bajabule.” (Hla. 34:1, 2) Kungenteka kutsi ngenca yemsebenti wakho wekushumayela, labalungile batawujabulela kukhonta kweliciniso kanye nawe.

19. Kungani inceku yaJehova letsembekile kufanele ijabule ngisho nobe iphila ngaphansi kwetimo leticindzetelako?

¹⁹ Davide wahlabela watsi: “Yonkhe indalo netidalwa takho tiyawubonga tidvumise wena, Simakadze, nalabangcwele bonkhe bakudvumise. Bayawudvumisa ngenkhatimulo yebukhosi bakho, bashumayele ngemandla akho; kuze bonkhe bantfu emhlabeni bayati imisebenti yakho yemandla, kanye nenkhatimulo yebukhosi bembuso wakho.” (Hla. 145:10-12) Lamavi ngalokucinisekile abonisa indlela labativa ngayo bonkhe BoFakazi BaJehova labetsembekile. Kodvwa kutsiwani nangabe kugula nobe kukhula ngeminyaka kukwenta ungakhoni kushumayela kahle? Hlale ukhumbula kutsi nangabe ushumayela tindzaba letimnandzi kulabo labakunakekelako nalabanye, umsebenti wakho lowentela Nkulunkulu uyamkhatimulisa. Nangabe uboshiwe ngenca yekukholwa kwakho, akungabateki kutsi uyakhuluma ngeliciniso nangabe timo tikuvumela, futsi loko kwenta inhlitiyo yaJehova ijabule. (Taga 27:11) Loku kuphindze kwenteke nangabe uhlala ekhaya lelehlukene ngekwenkholo kodvwa wena uchubeke unguFakazi waJehova. (1 Phet. 3:1-4) Ngisho nangephansi kwetimo letingajabulisi, ungamdvumisa Jehova futsi utfutfuke.

20, 21. Nangabe uphatsiswe imisebenti leminyenti enhlanganweni yaJehova, ungaba kanjani sibusiso kulabanye?

²⁰ Ngalokucinisekile Jehova utakubusisa nangabe uchubeka utfutfuka ebuhlotjeni bakho naye. Mhlawumbe nawenta lushintjo loluncane etintfweni lotentako malanga onkhe nobe ekuphileni kwakho, ungakwati kuba nencenye lenkhulu ekuhlanganyeleni tindzaba letimnandzi taNkulunkulu nalabo labanesidzingo selitsemba. Ngetulu kwaloko, intfutfuko yakho nekutidzela kwakho kungabazuzisa lokholwa nabo. Ngesizatfu sekutsi utfobekile ebandleni, utawutfola umvuzo wekutsandvwa, kubongwa kanye nekusekelwa ngulabanye labatsandza Jehova.

²¹ Ngisho nobe sikhonte iminyaka leminyenti nome tinyanga letimbalwa emsebenti waJehova, sonkhe singachubeka sitfutfuka ekumkhonteni. Kodvwa emaKhristu lavutsiwe angabasita njani labasebasha kutsi nabo batfutfuke ebuhlotjeni babo naNkulunkulu? Loko sitawucoca ngako esihlokweni lesilandzelako.