SIHLOKO LESIFUNDVWAKO 34
Lokungakusita Ujabule Esabelweni Lesisha
“Nkulunkulu akasuye umuntfu longakalungi kutsi angakhohlwa umsebenti wenu nelutsandvo lenibe nalo ngelibito lakhe.”—HEB. 6:10.
INGOMA 38 Uyonicinisa Nibe Nemandla
LOKUTAWUCOCWA NGAKO KULESIHLOKO *
1-3. Ngutiphi letinye tetizatfu letingenta tisebenti tasikhatsi sonkhe tishintje tabelo tato?
NABAKHUMBULA sikhatsi lesimnandzi lababa naso nabatitfunywa telivangeli, boRobert naMary Jo batsi: “Ngemuva kweminyaka lengu-21 sititfunywa telivangeli, batali betfu bonkhe besebakhulile futsi bagula. Sakujabulela kubanakekela, kodvwa bekubuhlungu kushiya indzawo lebesihlala kuyo futsi lebesiyitsandza.”
2 William naTerrie batsi: “Sakhala nasiva kutsi ngeke sisakhona kubuyela esabelweni setfu ngenca yetinkinga temphilo. Sifiso setfu sekukhonta Jehova kulelinye live besingeke sisaphumelela.”
3 Aleksey utsi: “Bengati kutsi bantfu labasishushisako bebafuna kulivala lihhovisi leligatja lebengisebenta kulo. Kodvwa nasebalivala setfuka futsi besekufanele sihambe eBethel.”
4. Ngumiphi imibuto lesitawucoca ngayo kulesihloko?
4 Kwenteke lokufanako nakubazalwane labatinkhulungwane lebebangemalunga emndeni waseBethel kanye nakulabanye labatfole tabelo letinsha. * Kungaba matima kakhulu kulabazalwane nabodzadze kutsi bashiye tabelo tabo lebebatitsandza kakhulu. Yini lengabasita bakhone kubhekana nelushintjo etabelweni tabo letinsha? Singabasita njani? Timphendvulo talemibuto tingasisita sonkhe sikhone kubhekana nelushintjo lolungaba khona ekuphileni kwetfu.
YINI LENGAKUSITA NAWUTFOLA SABELO LESISHA?
Kungani kushintsha kwetabelo kungaba matima kulabo labenta umsebenti wasikhatsi sonkhe? (Buka sigaba 5) *
5. Ungaba yini umphumela wekutfola tabelo letinsha?
5 Nangabe sishumayela sikhatsi lesigcwele noma sisebenta eBethel, singagcine sesibatsandza kakhulu bantfu kanye nendzawo lesihlala kuyo. Siva buhlungu nangabe kufanele sishiye tabelo tetfu ngenca yetizatfu letitsite. Siyabakhumbula bazalwane betfu lesibashiyile futsi siyakhatsateka ngabo, ikakhulukati nangabe sihambe ngenca yelushushiso. (Mat. 10:23; 2 Khor. 11:28, 29) Kungaba matima kuya esabelweni lesisha ngenca yekutsi kufanele sitivumelanise nemasiko lamasha. Kungenteka lokufanako ngisho nobe sibuyela endzaweni lesakhulela kuyo. Robert naMary Jo batsi: “Besesiwakhohliwe emasiko etfu kanye nendlela yekushumayela ngelulwimi lesalumunya. Besitiva ngatsi sesitihambi.” Bantfu labanyenti labatfola tabelo letinsha kungenteka babhekane netinkinga tetimali bangakalindzeli. Bangativa bangaciniseki, bangakavikeleki futsi badvumatekile. Yini lengabasita?
Kubalulekile kutsi sisondzele kuJehova futsi simetsembe (Buka tigaba 6-7) *
6. Yini lesingayenta kute sihlale sisondzelene naJehova?
6 Hlala usondzelene naJehova. (Jak. 4:8) Singasondzela njani kuJehova? Ngekwetsembela kuye ngobe “uva imithandazo.” (Hla. 65:2) Tihlabelelo 62:8 titsi: “Tfululelani kuye tinhlitiyo tenu.” Jehova angenta “lokukhulu kakhulu kunato tonkhe tintfo lesiticelako nobe lesiticabangako.” (Ef. 3:20) Jehova akasiphi nje loko lesikucela emithantazweni yetfu kuphela, kodvwa angasiniketa netintfo lesingakatilindzeli nalebesingakaticabangi kute sikhone kucatulula tinkinga tetfu.
7. (a) Yini lengasisita sihlale sisondzelene naJehova? (b) Ngekusho kwemBhalo waHebheru 6:10-12, utawuba yini umphumela nangabe sichubeka sikhonta Jehova ngekwetsembeka?
7 Kute sihlale sisondzelene naJehova, kufanele sifundze imiBhalo malanga onkhe futsi sizindle ngaloko lesikufundzako. Lomunye lobekasitfunywa selivangeli utsi: “Namatsela eluhlelweni lwekukhonta kwemndeni njalo futsi ulungiselele imihlangano njengobe bewenta esabelweni sakho lesendlulile.” Chubeka uhlanganyela ngekutimisela ekushumayeleni tindzaba letimnandzi ebandleni losewukulo. Jehova uhlale abakhumbula labo labachubeka bamkhonta ngekwetsembeka ngisho nobe sebangasakhoni kwenta wonkhe umsebenti lebebawenta esikhatsini lesendlulile.—Fundza Hebheru 6:10-12.
8. Emavi laku-1 Johane 2:15-17 angakusita njani ugcine kuphila kwakho kumelula?
8 Gcina kuphila kwakho kumelula. Ungavumeli tinkhatsato talelive laSathane ‘tikuminyetele,’ bese uyayekela kukhonta Jehova. (Mat. 13:22) Ungavumeli tinkhatsato talelive, bangani bakho nobe tihlobo tikwente ulwele kutfola umcebo lotakuvikela kulelive laSathane. (Fundza 1 Johane 2:15-17.) Tsemba Jehova ngobe wetsembisa kutsi utawunakekela tonkhe tidzingo takho letimayelana nebuhlobo bakho naye, indlela lotiva ngayo kanye netintfo lotidzingako ekuphileni “ngesikhatsi lesifanele.”—Heb. 4:16; 13:5, 6.
9. Ngekusho kweTaga 22:3, 7, kubaluleke ngani kutsi sibalekele kwenta tikwenedi letingakadzingeki, futsi yini lengasisita kutsi sente tincumo letihlakaniphile?
9 Ungaboleki imali longayidzingi. (Fundza Taga 22:3, 7) Kutfutsa kungahle kudzinge imali lenyenti, ngako kungaba melula kutsi ungene etikwenedini. Kute unciphise tikwenedi kufanele ugadze kutsi ungaboleki imali kute utsenge tintfo longatidzingi. Nangabe ucindzetelekile njengalapho unakekela umuntfu lomtsandzako logulako, ungakutfola kumatima kuncuma kutsi kufanele uboleke imali lengakanani. Nawusesimeni lesinjalo, khumbula kutsi umthantazo nekuncusa kungakusita kutsi wente tincumo letihlakaniphile. Nakaphendvula imithantazo yakho Jehova angakuniketa kuthula ‘lokutawulondza inhlitiyo nengcondvo yakho’ kute ukhone kwenta tincumo letikahle.—Fil. 4:6, 7; 1 Phet. 5:7.
10. Yini lengakusita kutsi ube nebangani labasha?
10 Tihlanganise nebangani labalungile. Coca nebangani bakho mayelana nendlela lotiva ngayo, ikakhulukati labo labake baba sesimeni lesifana nesakho. Loko kungakusita kutsi ungacindzeteleki kakhulu. (Shu. 4:9, 10) Bangani lobewunabo esabelweni lesendlulile batawuchubeka babangani bakho. Esabelweni sakho lesisha kutawudzingeka ube nebangani labasha. Khumbula kutsi kufanele ube nebungani kute ube nebangani. Yini lengakusita kute ube nebangani labasha? Cocela labanye ngetintfo letinhle Jehova lakubusise ngato kute babone kutsi uwujabulela kangakanani umsebenti waJehova. Ngisho nobe labanye ebandleni bangacondzi kutsi kungani uwutsandza umsebenti wasikhatsi sonkhe, kodvwa labanye bangafundza kulokwentako futsi babe bangani labakahle. Nobe kunjalo, kufanele ucaphele kutsi awukhulumi kakhulu ngaloko lokufezile emsebentini waJehova nome ngemiva lekabi lokungenteka unayo ngesabelo lobewusenta.
11. Yini lenganisita kutsi nihlale nijabulile emshadweni?
11 Nangabe kudzingeke ushiye sabelo sakho ngenca yekugula kwemuntfu loshade naye, akukafaneli umsole. Ngisho nobe kunguwe lobe netinkinga temphilo, akukafaneli utive unelicala nobe ucabange kutsi umdvumate kakhulu loyo loshade naye. Khumbula kutsi ninyamanye futsi nenta sifungo kuJehova sekutsi nitawunakekelana ngisho nome kwentekani. (Mat. 19:5, 6) Nangabe nitfole umntfwana lebeningakamhleleli, cinisekani kutsi niyamchazela kutsi nguye lobaluleke kakhulu kini kwendlula sabelo senu. Mcinisekiseni kutsi ‘usibusiso’ lesivela kuJehova. (Hla. 127:3-5) Ngetulu kwaloko kufanele nimcocele ngetintfo letinhle lenatitfola ngesikhatsi nenta umsebenti wasikhatsi sonkhe. Loko kungakhutsata umntfwana wenu kutsi kuphila kwakhe akusebentisele kukhona Jehova njengobe nani nentile.
INDLELA LABANYE LABANGASITA NGAYO
12. (a) Singatisita njani tisebenti tasikhatsi sonkhe kutsi tichubeke netabelo tato? (b) Singatisita njani tisebenti tasikhatsi sonkhe kutsi titivumelanise netabelo tato letinsha?
12 Kuyajabulisa kutsi bazalwane emabandleni lamanyenti benta konkhe lokusemandleni abo kute basite labo labasemsebentini wasikhatsi sonkhe kutsi bachubeke netabelo tabo. Loko bakwenta ngekubakhutsata kutsi bachubeke nemsebenti wabo, ngekubasita ngetimali kanye naletinye tintfo labatidzingako noma ngekunakekela emalunga emindeni yabo lasemakhaya. (Gal. 6:2) Nangabe sisebenti sasikhatsi sonkhe sitfunyelwa ebandleni lenu nasitfola sabelo lesisha, akukafaneli sicabange kutsi kukhona lebesingakwenti kahle nobe sitfole sijeziso. * Esikhundleni saloko basite kute bakhone kwenta lushintjo. Bemukele kahle futsi ubancome ngemsebenti labawentile ngisho nobe simo semphilo sesingabavumeli kutsi bente lokunyenti. Yetama kubati kahle futsi ufundze elwatini lwabo, ekucecesheni kwabo kanye nasemakhonweni abo.
13. Singabasita njani labo labatfole tabelo letinsha?
13 Labo labatfole tabelo letinsha abangahle badzinge lusito kute batfole indzawo yekuhlala, kwekuhamba, umsebenti nome letinye tintfo labatidzingako. Bangahle badzinge naleminye imininingwane lebalulekile njengendlela yekubhadala umtselo kanye nekutfola umshuwalensi. Intfo lebaluleke kakhulu labayidzingako kutsi setame kusicondza simo labakuso. Kungenteka banetinkinga temphilo nome kunelilunga lemndeni wabo leligulako. Kungenteka beva buhlungu ngenca yekushonelwa ngumuntfu labamtsandzako. * Kungenteka nababodvwa bayabakhumbula bangani babo lababatfola esabelweni sabo lesendlulile. Kutsatsa sikhatsi kukwemukela futsi kuyabakhatsata.
14. Bamemeteli bamsita njani lomunye dzadze kutsi etayelane nesabelo sakhe lesisha?
14 Kushumayela nabo nekubakhutsata ngesibonelo sakho lesihle kungabasita kutsi batayelane nesabelo sabo. Lomunye dzadze losakhonte iminyaka leminyenti kulelinye live utsi: “Esabelweni sami sangaphambili kunebantfu lebengifundza nabo liBhayibheli onkhe malanga. Esabelweni sami lesisha bekuba matima nekutsi ngitfole litfuba lekufundza nemuntfu livesi linye leliseBhayibhelini nome ngimbukelise i-video ensimini.” Kodvwa bamemeteli bebangimema kutsi ngihambe nabo nababuyela kulabacoce nabo nobe kulabafundza nabo liBhayibheli. Kubona bazalwane nabodzadze labatimisele futsi labanesibindzi bachuba tifundvo teliBhayibheli letitfutfukako kwangisita ngaba nembono lokahle ngebantfu labasensimini. Ngafundza indlela yekucoca nebantfu labasesabelweni sami lesisha futsi loko kwangenta ngaphindze ngajabula.
CHUBEKA UTIMISELA!
Cabanga ngetindlela tekwandzisa umsebenti lowentela Jehova ensimini yasebandleni lokulo (Buka tigaba 15-16) *
15. Yini longayenta kute uphumelele esabelweni sakho lesisha?
15 Ungakhona kuphumelela esabelweni sakho lesisha. Kushintja kwesabelo sakho ungakutsatsi njengeluphawu lwekuba sehluleki nome ucabange kutsi awukabaluleki. Cabanga ngendlela Jehova lakusita ngayo ekuphileni kwakho futsi uchubeke ushumayela. Lingisa emaKhristu letsembekile angelikhulu lekucala. ‘Bekahamba kuto tonkhe tindzawo ashumayela tindzaba letimnandzi telivi laNkulunkulu.’ (Imis. 8:1, 4) Imetamo yakho yekuchubeka ushumayela ingaba nemiphumela lemihle. Nasi sibonelo, lamanye emahlahlandlela lacoshwa kulelinye live, atfutsela kulenye indzawo lenesidzingo lesikhulu lenebantfu labakhuluma lulwimi lwabo. Kungakapheli tinyanga letimbalwa, kwacaliswa emacembu endzaweni lamahlahlandlela labeshumayela kuyo.
16. Yini lengakusita kutsi ujabule esabelweni sakho lesisha?
16 ‘Injabulo levela kuSimakadze ingemandla etfu.’ (Neh. 8:10) Injabulo yetfu kufanele siyitfole kuJehova hhayi esabelweni setfu ngisho nobe sisitsandza kangakanani. Ngako hlale usondzelene naJehova wetsembele kuye kute akuphe kuhlakanipha, akucondzise futsi akusekele. Khumbula kutsi sabelo lebewusenta bewusitsandza ngenca yekutsi bewutimisela ekusiteni bantfu. Ngako timisele nasesabelweni sakho lesisha futsi utawubona indlela Jehova latakusita ngayo kutsi usitsandze.—Shu. 7:10.
17. Yini lekufanele siyikhumbule ngetabelo lesinato nyalo?
17 Kufanele sikhumbule kutsi Jehova sitamkhonta kuze kube phakadze, kodvwa tabelo lesinato nyalo tesikhashana. Eveni lelisha sonkhe singahle sitfole letinye tabelo. Aleksey lokukhulunywe ngaye ekucaleni, uyaciniseka kutsi kushintja kwesabelo sakhe kumlungiselela tingucuko letitawukwenteka esikhatsini lesitako. Aleksey utsi: “Bengati kutsi Jehova ukhona mbamba kanye nekutsi live lelisha litawufika, kodvwa bengibona kungatsi likhashane. Nyalo sengisondzelene kakhulu naJehova futsi ngiyabona kutsi live lelisha selidvutane.” (Imis. 2:25) Shengatsi singachubeka sisondzelene naJehova ngisho nobe ngabe senta tiphi tabelo. Akayuze asishiye, futsi utasisita sijabule kunobe ngumuphi umsebenti lesiwentako.—Isa. 41:13.
INGOMA 90 Khuthazanani
^ sig. 5 Ngalesinye sikhatsi, bazalwane nabodzadze labasemsebentini wasikhatsi sonkhe kungenteka batiyekele tabelo tabo nobe batfole tabelo lesinsha. Kulesihloko, sitawucoca ngetinkinga lababhekana nato nekutsi yini labangayenta kute kube melula kuvumelana netimo labatawubhekana nato etabelweni tabo letinsha. Sitawuphindze sicoce ngekutsi yini labanye labangayenta kute babakhutsate futsi babasekele kanye netimiso letingasisita nakwenteka lushintjo ekuphileni kwetfu.
^ sig. 4 Ngendlela lefanako, nabafika eminyakeni letsite, bazalwane labaphatsiswe imisebenti ebandleni kufanele banikete bazalwane labasebasha imisebenti lebebayenta. Buka sihloko lesitsi, “Nine Makhristu Lasakhulile Kwetsembeka Kwenu Kuligugu KuJehova” lesitfolakala ku-Sicongosekulindza saSeptember 2018, kanye nalesitsi, “Hlale Unekuthula Ngisho Noma Timo Takho Tingashintja” lesitfolakala ku-Sicongosekulindza sa-October 2018.
^ sig. 12 Labadzala belibandla kufanele basheshe babhale incwadzi yekwetfula sisebenti sasikhatsi sonkhe lebe sisebandleni labo kute sikhone kuchubeka silihlahlandlela, inceku lesebentako nobe lomdzala welibandla.
^ sig. 13 Buka sihloko letitsi, “Usizo Kwabasosizini Lokushonelwa,” kuletiluchungechunge letitfolakala ku-Phaphama! No. 3 ya-2018 letfolakala ngesi-Zulu.
^ sig. 57 KUCHAZWA KWESITFOMBE: Labashadene labatitfunywa telivangeli beva buhlungu njengobe bavalelisa bazalwane labasebandleni lebebakulo.
^ sig. 59 KUCHAZWA KWESITFOMBE: Lomndeni sewubuyele eveni lawo, futsi uyathantaza kuJehova kutsi awusite ukhone kubhekana netinkinga.
^ sig. 61 KUCHAZWA KWESITFOMBE: Ngekusitwa nguJehova bakhona kubuyela emsebentini wasikhatsi sonkhe. Basebentisa emakhono abo ekukhuluma lolunye lulwimi labalufundza ngesikhatsi batitfunywa telivangeli kute bashumayele bantfu lababuya kulamanye emave labasensimini yelibandla labakulo.
