1. Kungani singase sitsi Jehova utfobekile?

SINGASHO yini kutsi Jehova utfobekile? Yebo, umhlabeli Davide watsi: “Ungihlomisa ngesihlangu sensindziso yakho; utehlisa wena kuze uphakamise mine.” (2 Sam. 22:36; Hla. 18:35) Ngesikhatsi Davide abhala lamavi, kungenteka abekhumbula sikhatsi umphrofethi Samuweli lefika ngaso endlini yababe wakhe kuze atobeka inkhosi lelandzelako yaka-Israyeli. Davide bekunguye lomncane kulabafana labangu-8, kodvwa Jehova wakhetsa yena kutsi abe yinkhosi lebeyitawulandzela INkhosi Sawula.—1 Sam. 16:1, 10-13.

2. Sitawucoca ngani kulesihloko?

² Davide bekangavumelana nemavi lashiwo ngumhlabeleli lowatsi ngaJehova: ‘Ugobondzela abuke phansi emazulwini nasemhlabeni. Uphakamisa luphuya elutfulini, aphakamise loswele . . .  amhlalise netikhulu.’ (Hla. 113:6-8) Kulesihloko, sitawucale sifundze ngetifundvo letibalulekile ngekutfobeka siphindze sicoce ngekutsi Jehova wabukhombisa njani lobuntfu. Sitawuphindze sicoce ngaloko lesingakufundza ngekutfobeka esibonelweni seNkhosi Sawula, kumphrofethi Danyela nakuJesu.

3. Jehova usiphatsa njani, futsi loko kukhombisa ini?

³ Jehova ukhombisa kutsi utfobekile ngendlela latiphatsa ngayo tikhonti takhe letinesono. Akagcini ngekuyemukela indlela lesimkhonta ngayo, kodvwa uphindze asitsatse njengebangani bakhe. (Hla. 25:14) Kuze sikhone kuba bangani bakhe, Jehova wanikela ngeNdvodzana yakhe kutsi ibe ngumhlatjelo wetono tetfu. Jehova unemusa nesihawu lesikhulu!

4. Yini Jehova lasinike yona, futsi kungani?

 ⁴ Cabanga ngalenye indlela Jehova lakhombisa ngayo kutfobeka. NjengeMdali wetfu, Jehova bekangasikhetsela kutsi siphile njani. Kodvwa akazange ente kanjalo. Wasenta saba ngumfanekiso wakhe futsi wasiniketa inkhululeko yekutikhetsela. Ufuna kutsi bantfu labanesono bamkhonte ngalokusuka enhlitiyweni, ngesizatfu sekutsi bayamtsandza futsi bayatibona netinzuzo tekumlalela. (Dut. 10:12; Isa. 48:17, 18) Sijabula kakhulu ngekutsi Jehova utfobekile!

5. Jehova usifundzisa njani kutsi sitfobeke? (Buka sitfombe lesisekucaleni kwalesihloko.)

⁵ Jehova usifundzisa kutsi sitfobeke ngendlela lasiphatsa ngayo. Jehova uhlakaniphe kwendlula nobe ngabe ngubani emhlabeni nasezulwini. Nobe kunjalo, uhlale akulungele kwemukela imibono yalabanye. Sibonelo saloko kutsi wayivumela iNdvodzana yakhe kutsi imsite nakadala tonkhe tintfo. (Taga 8:27-30; Khol. 1:15, 16) Ngisho nobe Jehova anemandla, kodvwa uyabanika labanye imisebenti. Nasi sibonelo, wabeka Jesu kutsi abe yiNkhosi yeMbuso wakhe futsi utawuniketa licembu lebantfu labangu-144 000 lilungelo lekubusa naJesu. (Luk. 12:32) Kuliciniso kutsi Jehova wacecesha Jesu kutsi abe yiNkhosi nemPhristi loPhakeme. (Heb. 5:8, 9) Uphindze aceceshe nalabo labatawubusa naJesu kutsi bawente kahle umsebenti wabo, kodvwa akabalandzeleli kuze abuke kutsi bawenta kahle yini lomsebenti. Kunaloko, uyabetsemba kutsi batakwenta kahle loko lakufunako.—Semb. 5:10.

6-7. Yini lesingayifundza kuBabe wetfu losezulwini ngekunika labanye imisebenti?

⁶ Nangabe Babe wetfu losezulwini ngisho nobe angaludzingi lusito, kodvwa  abaniketa labanye imisebenti, tsine kufanele sikwente kangakanani loko? Uyinhloko yemndeni yini, nobe ungulomdzala ebandleni? Lingisa sibonelo saJehova ngekutsi ubanike labanye imisebenti, futsi ungabalandzeleli kakhulu kutsi bawenta njani. Nangabe ulingisa Jehova, lomsebenti utokwenteka futsi utawucecesha labanye uphindze ubasite kutsi batetsembe. (Isa. 41:10) Yini lengafundvwa ngulabo labanemisebenti letsite esibonelweni saJehova?

⁷ LiBhayibheli likhombisa kutsi Jehova uyakujabulela kuva imibono yemadvodzana akhe latingilosi. (1 Khos. 22:19-22) Batali, ningasilingisa njani sibonelo saJehova? Nangabe kufanele, funani imibono yebantfwana benu ngekutsi ingentiwa njani imisebenti letsite. Nangabe imibono yabo ikahle, ningayisebentisa.

8. Jehova wababeketelela njani bo-Abrahama naSara?

⁸ Lenye indlela Jehova lakhombisa ngayo kutsi utfobekile, kubeketela. Sibonelo saloko kutsi Jehova uyabeketela nangabe labo labamkhontako bambuta ngetincumo latentako. Walalela ngesikhatsi Abrahama aveta kukhatsateka kwakhe ngesincumo sakhe sekubhubhisa iSodoma neGomora. (Gen. 18:22-33) Cabanga ngendlela Jehova lamphatsa ngayo Sara, lobekangumfati wa-Abrahama. Jehova akazange aphatseke kabi nobe atfukutsele ngesikhatsi Sara ahleka nakametsembisa kutsi utawukhulelwa ngisho nobe sekakhulile. (Gen. 18:10-14) Esikhundleni saloko, wamhlonipha Sara.

9. Yini lengafundvwa batali nangulabadzala esibonelweni saJehova?

⁹ Yini lengafundvwa batali nalabadzala belibandla esibonelweni saJehova? Wenta njani nangabe bantfwana bakho nobe labanye ebandleni bangavumelani netincumo takho? Usheshe ubatjele kutsi benta liphutsa yini nobe wetama kucondza indlela labativa ngayo? Imindeni nemabandla iyazuza nangabe labo labanemalungelo betama kulingisa Jehova. Sesicocile ngekutsi yini lesiyifundzako esibonelweni saJehova. Nyalo sitawufundza ngaletinye tibonelo letiseBhayibhelini nekutsi singakhombisa njani kutsi sitfobekile.

10. Jehova usisebentisa njani sibonelo salabanye kuze asifundzise?

¹⁰ NjengemFundzisi Lomkhulu, Jehova usinike tibonelo eVini lakhe kuze tisifundzise. (Isa. 30:20, 21) Sifundza ngetindzaba letiseBhayibhelini tebantfu lebebanebuntfu lobujabulisa Nkulunkulu, lokufaka ekhatsi kutfobeka. Siphindze sifundze ngaloko lokwenteka kubantfu labehluleka kukhombisa lobuntfu lobuhle.—Hla. 37:37; 1 Khor. 10:11.

11. Yini lesingayifundza esibonelweni lesibi saSawula?

¹¹ Cabanga ngalokwenteka eNkhosini Sawula. Beyitfobekile ngesikhatsi iseyincane. Beyikwati loko lebeyingeke ikhone kukwenta futsi yangabata kwenta imisebenti leminyenti. (1 Sam. 9:21; 10:20-22) Kodvwa ngekuhamba kwesikhatsi, Sawula wacala kutikhukhumeta futsi wenta tintfo lebekungakafaneli atente. Wacala kwenta kanjalo ngemuva kwekutsi abe yinkhosi. Ngalesinye sikhatsi, wehluleka kubeketela ngesikhatsi asemele umphrofethi Samuweli. Kunekutsi etsembe Jehova, Sawula wanikela ngemhlatjelo wekushiswa ngisho nobe bekete lilungelo lekwenta kanjalo. Ngesizatfu saloko, Sawula walahlekelwa ngumusa waJehova futsi walahlekelwa nalilungelo  lekuba yinkhosi. (1 Sam. 13:8-14) Sisuke sikhombisa kutsi sihlakaniphile nasifundza kulesibonelo lesisecwayiso futsi sigwema kwenta tintfo lokungakafaneli sitente.

12. Danyela wakhombisa njani kutsi utfobekile?

¹² Ngalokungafani nesibonelo lesibi saSawula, asesicoce ngesibonelo lesihle semphrofethi Danyela. Kuko konkhe kuphila kwakhe, Danyela bekatfobekile futsi bekahlale acela sicondziso saJehova. Nasi sibonelo, ngesikhatsi asetjentiswa nguJehova kuze achaze liphupho laNebukhadnezari, Danyela akazange atidvumise ngekutsi ukhonile kulichaza. Kunaloko, lonkhe ludvumo walinika Jehova. (Dan. 2:26-28) Ngusiphi sifundvo lesisitfolako? Nangabe bazalwane bakujabulela kulalela tinkhulumo tetfu nobe nangabe siphumelela emsebentini wekushumayela, sifuna kukhumbula kutsi lonkhe ludvumo silunike Jehova. Ngekutfobeka, kufanele sivume kutsi ngeke sesikhone kwenta letintfo ngaphandle kwelusito lwaJehova. (Fil. 4:13) Nasenta njalo sisuke silingisa sibonelo saJesu lesihle. Kanjani?

13. Yini lesiyifundzako ngekutfobeka emavini aJesu latfolakala kuJohane 5:19, 30?

¹³ Ngisho nobe bekayiNdvodzana yaNkulunkulu lete sono, Jesu wetsembela kuJehova. (Fundza Johane 5:19, 30.) Akazange afune kulingana naBabe wakhe losezulwini. Filiphi 2:6 usitjela kutsi Jesu akazange acabange “kuchwaga, lokukutsi alingane naNkulunkulu.” NjengeNdvodzana yaNkulunkulu lelalelako, Jesu bekakwati loko lobekufanele akwente futsi bekalihlonipha lilungelo laBabe wakhe.

14. Jesu wenta njani ngesikhatsi acelwa kutsi ente intfo lebekete lilungelo lekuyenta?

¹⁴ Cabanga ngaloko Jesu lakwenta ngesikhatsi Jakobe naJohane kanye namake wabo bamcela kutsi ente intfo lebekete lilungelo lekuyenta. Ngaphandle kwekungabata, Jesu wabatjela kutsi nguBabe wakhe lotawuncuma kutsi ngubani lotawuhlala ngesekudla nobe ngesencele sakhe eMbusweni wakhe. (Mat. 20:20-23) Jesu wakhombisa kutsi bekakwati loko lebekangeke akhone kukwenta. Bekatfobekile. Akazange ente tintfo Jehova lebekangakamniki lilungelo lekutenta. (Joh. 12:49) Singasilingisa njani sibonelo saJesu lesihle?

15-16. Singasisebentisa njani seluleko lesiseBhayibhelini lesitfolakala ku-1 Khorinte 4:6?

 ¹⁵ Silingisa sibonelo saJesu sekutfobeka nasisebentisa seluleko lesiseBhayibhelini lesitfolakala ku-1 Khorinte 4:6. KulomBhalo sitjelwa kutsi ‘singeceli ngale kwetintfo letibhaliwe.’ Nangabe siniketa seluleko, kufanele singabaphoceleli bantfu kutsi bente loko lesikucabangako nobe sikhulume singakacabangisisi ngendzaba. Kunaloko, kufanele leseluleko setfu sisekelwe eBhayibhelini nasetincwadzini tetfu. Ngaleyondlela sisuke sikhombisa kutsi siyakwati loko lesingeke sesikhone kukwenta. Ngekutfobeka, sisuke sidvumisa ‘imitsetfo yaJehova lelungile.’—Semb. 15:3, 4.

¹⁶ Ngetulu kwekudvumisa Jehova, kunaletinye tizatfu letinhle tekutsi sitfobeke. Nyalo sitawubuka kutsi kutfobeka kungasenta njani kutsi sijabule futsi kusisite kutsi sivane nalabanye.

17. Kungani bantfu labatfobekile bajabula?

¹⁷ Siyajabula nasitfobekile. Kungani? Kungobe nasemukela kutsi kunetintfo lesingeke sesikhone kutenta, sitawujabula ngelusito lesilutfola kulabanye. Cabanga ngesikhatsi Jesu elapha emadvodza lalishumi labekanebulephelo. Yinye kuphela leyabuyela kuJesu kuze imbonge ngekuyelapha kulesifo lesibulalako, lena yintfo lendvodza lebeyingeke ikhone kuyenta ngemandla ayo. Lendvodza letfobekile beyati kutsi ngeke ikhone kwelapheka ngaphandle kwelusito lwaJesu, ngako yadvumisa Nkulunkulu ngaloko.—Luk. 17:11-19.

18. Kutfobeka kusisita njani kutsi setayelane nalabanye? (Roma 12:10)

¹⁸ Bantfu labatfobekile bayashesha kwetayelana nalabanye futsi baba nebungani lobucinile. Kungani? Bayajabula nangabe  labanye bantfu banebuntfu lobuhle futsi bayabetsemba. Bantfu labatfobekile bayajabula nangabe labanye bantfu bawenta kahle umsebenti wabo futsi bayashesha kubabonga nekubadvumisela.—Fundza Roma 12:10.

19. Ngutiphi letinye tizatfu letingasenta sigweme kutikhukhumeta?

¹⁹ Ngalokwehlukile, bantfu labatigcabhako bakutfola kumatima kudvumisa labanye, kunaloko bafuna kudvunyiswe bona. Kungenteka baticatsanisa nalabanye futsi betama kuba ncono kunabo. Umuntfu lotigcabhako uvame kucabanga kutsi intfo yenteka kahle nayenteke ngendlela yakhe. Umuntfu lotigcabhako uvame kufuna kuba ncono kunalabanye futsi uba nemona nangabe labanye benta kancono kunaye. (Gal. 5:26) Bantfu labanjalo abavami kuba nebungani lobuhlala njalo. Nasibona kutsi sinenkinga yekutikhukhumeta, kufanele sithantaze kuJehova simcele asisite sishintje tingcondvo tetfu kuze lomkhuba ungatoba yincenye yebuntfu betfu.—Rom. 12:2.

20. Kungani kufanele sitfobeke?

²⁰ Sibonga kakhulu ngesibonelo saJehova lesihle! Siyabona kutsi utfobekile endleleni laphatsa ngayo tikhonti takhe, futsi sifuna kumlingisa. Ngetulu kwaloko, sifuna kulingisa labo labakhonta Jehova ngekutfobeka. Shengatsi singahlale sinika Jehova ludvumo nenkhatimulo lemfanele. (Semb. 4:11) Nasenta tonkhe letintfo, sitawuba bangani baJehova ngobe uyabatsandza bantfu labatfobekile.