1. Kungani Jehova adala tintfo?

JEHOVA wake waba yedvwa, kodvwa bekete situnge. Jehova bekangamdzingi umuntfu kuze ajabule. Nobe kunjalo, Nkulunkulu bekafuna kutsi labanye bakujabulele kuphila. Lutsandvo lwenta Jehova wacala kudala tintfo.—Hla. 36:9; 1 Joh. 4:19.

2. Jesu netingilosi bativa njani nababona tonkhe tintfo Jehova latidalile?

² Jehova wacala ngekudala iNdvodzana yakhe Jesu. Asebenta neNdvodzana yakhe, Jehova wacala kudala “tonkhe letinye tintfo,” lokufaka ekhatsi netingilosi. (Khol. 1:16) Jesu wajabula kakhulu ngekusebenta naBabe wakhe. (Taga 8:30) Netingilosi betijabula kakhulu. Tabona ngesikhatsi Jehova naJesu loyiNgcweti yeKwakha, badala lizulu nemhlaba. Yini leyentiwa tingilosi? Tacala ‘kuhlatjeleliswa kujabula’ futsi tachubeka tidvumisa Jehova natibona konkhe lakudalile, lokufaka ekhatsi nebantfu. (Jobe 38:7; Taga 8:31) Tonkhe tintfo Jehova latidalile tikhombisa lutsandvo nekuhlakanipha kwakhe.—Hla. 104:24; Rom. 1:20.

3. Ngekusho kwa-1 Khorinte 15:21, 22, yini leyentiwa ngumhlatjelo waJesu?

³ Jehova bekafuna kutsi bantfu bajabulele kuphila phakadze emhlabeni lomuhle lebekawudalile. Kodvwa ngesikhatsi Adamu na-Eva bavukela Babe wabo lonelutsandvo, sono nekufa kwasakateka emhlabeni. (Rom. 5:12) Yini Jehova  layenta? Ngekushesha, waveta indlela lebekatawukhulula ngayo bantfu. (Gen. 3:15) Jehova wetsembisa kunikela ngeNdvodzana yakhe njengesihlengo lebesitawenta bantfwana ba-Adamu na-Eva kutsi bakhululeke esonweni nasekufeni. Wavumela bantfu lebebatawukhetsa kumkhonta kutsi batfole kuphila lokuphakadze.—Joh. 3:16; Rom. 6:23; fundza 1 Khorinte 15:21, 22.

4. Yini lesitawucoca ngayo kulesihloko?

⁴ Setsembiso saNkulunkulu sekuvusa labafile siletsa imibuto leminyenti. Nasi sibonelo, kutawenteka njani kuvuswa kwalabafile? Sitawukhona yini kutibona tihlobo tetfu lesetivusiwe? Luvuko lutasijabulisa ngatiphi tindlela? Kuzindla ngeluvuko kusifundzisani ngelutsandvo lwaJehova, kuhlakanipha, nekubeketela kwakhe? Ase sicoce ngalemibuto.

5. Kungani bonkhe bantfu bangeke bavuswe ngesikhatsi sinye?

⁵ Nakavusa labafile asebentisa iNdvodzana yakhe, ngeke silindzele kutsi Jehova avuse bonkhe bantfu ngesikhatsi sinye. Kungani? Kungobe nasebabanyenti kakhulu bantfu emhlabeni, ngeke kube nekuhleleka. Jehova akatenti tintfo ngendlela lengakahleleki. Uyati kutsi kuze kube nekuthula kudzingeka kuhleleka. (1 Khor. 14:33) Nkulunkulu Jehova wasebentisa kuhlakanipha nekubeketela nakasebenta naJesu kuze bente umhlaba ube sesimeni lesikahle sekuhlala bantfu. Ngendlela lefanako, Jesu utawukhombisa lobuntfu ngesikhatsi Sekubusa Kweminyaka Leyinkhulungwane, nakasebenta nalabo labatawube basindze nge-Armagedoni kuze  balungise umhlaba naletinye tintfo letitawudzingwa ngulabo labatawube bavusiwe.

6. Ngekusho kweMisebenti 24:15, Jehova utawuvusa bobani?

⁶ Lokubaluleke kakhulu kutsi labo labatawube basindze nge-Armagedoni kutawudzingeka bafundzise labo labatawube bavusiwe ngeMbuso waNkulunkulu nangaloko Jehova lakufunako. Leni? Ngobe bantfu labanyenti labatawube bavusiwe batawuba yincenye yalabo liBhayibheli lelibabita ngekutsi ‘ngulabangakalungi.’ (Fundza Imisebenti 24:15.) Kutawudzingeka bente lushintjo lolukhulu kuze bazuze emhlatjelweni waKhristu. Cabanga ngemsebenti lotawuba khona wekufundzisa tigidzigidzi tebantfu letingati ngaJehova. Umuntfu utawuba nemfundzisi wakhe yini lotamfundzisa njengobe senta lamuhla nasifundzisa bantfu liBhayibheli? Labo labatawuvuswa kucala batakuya emabandleni yini kuze baceceshelwe kufundzisa labo labatawuvuswa emvakwabo? Kutawudzingeka silindze kuze sibone. Siyati kutsi ngasekupheleni Kwekubusa KwaKhristu Kweminyaka Leyinkhulungwane, “umhlaba uyawugcwala kwati [Jehova.]” (Isa. 11:9) Sitawuba nemsebenti lomnyenti lojabulisako kuleminyaka leyinkulungwane!

7. Kungani bantfu baNkulunkulu kutawudzingeka kutsi babe neluvelo nabafundzisa labo labavusiwe?

⁷ Ngesikhatsi Sekubusa KwaKhristu Kweminyaka Leyinkhulungwane, bonkhe bantfu kutawudzingeka bente lushintjo ekuphileni kwabo kuze bajabulise Jehova. Kutawudzingeka babe neluvelo kuze basite labo labatawube bavusiwe kutsi bente lushintjo ekuphileni kwabo futsi baphile ngetimiso taJehova. (1 Phet. 3:8) Siyaciniseka kutsi labo labatawuvuswa batawusondzelana nebantfu baJehova labatfobekile futsi labatawube ‘basebentela kusindziswa kwabo.’—Fil. 2:12.

8. Kungani kunengcondvo kucabanga kutsi sitatibona tihlobo nebangani betfu labavusiwe?

⁸ Kunetizatfu letinyenti letisenta sitsi labo labatawube bahlangabeta tihlobo tabo letivusiwe, batawutibona. Cabanga nganati letimbili. Sizatfu sekucala, yindlela Jehova labavusa ngayo bantfu esikhatsini lesendlulile. Kubonakala shengatsi Jehova utawenta labantfu labavusile babukeke ngendlela lebebabukeka ngayo, lebebakhuluma ngayo nalebebacabanga ngayo ngaphambi kwekutsi bafe. Khumbula kutsi Jesu wafananisa kufa nekulala futsi wafananisa luvuko nekuvuswa ebutfongweni. (Mat. 9:18, 24; Joh. 11:11-13) Nangabe umuntfu avuswa ebutfongweni, indlela labukeka ngayo, lakhuluma ngayo, netintfo latikhumbulako tiyafana nangesikhatsi asengakalali. Cabanga ngesibonelo saLazaru. Besekafe emalanga lamane, umtimba wakhe sewucala nekubola. Ngesikhatsi Jesu amvusa, bodzadzewakhe basheshe bambona futsi naLazaru bekasabakhumbula kahle.—Joh. 11:38-44; 12:1, 2.

9. Kungani labo labatawuvuswa bangeke bavuswe sebete sono?

⁹ Ase sicoce ngesizatfu sesibili. Jehova usetsembisa kutsi ePharadesi kute lotawutsi: “Ngiyagula.” (Isa. 33:24; Rom. 6:7) Ngako labo labatawuvuswa ekufeni batawuba nemitimba lephilile. Nobe kunjalo, ngeke basheshe babe bete sono. Nabangavuswa bete sono, imindeni yabo nebangani ngeke sebababone. Kubonakala shengatsi kancane kancane sintfu sitawuba bete sono ngesikhatsi Sekubusa KwaKhristu Kweminyaka Leyinkhulungwane. Nasekuphele  leminyaka leyinkhulungwane, Jesu utawubuyisela uMbuso kuBabe wakhe. UMbuso utawube socedzile kwenta loko Jehova lakufunako, lokufaka ekhatsi kwenta bantfu kutsi babe bete sono.—1 Khor. 15:24-28; Semb. 20:1-3.

10. Utawutiva njani ngeluvuko?

¹⁰ Cabanga kutsi kutawuba njani kuphindze sivusele tihlobo tetfu lesititsandzako. Injabulo lotawuba nayo itakwenta ukhale yini nobe uhleke? Utawujabula kakhulu yini uze uhlabele udvumise Jehova? Siyaciniseka kutsi sitamtsandza kakhulu Babe wetfu losinakekelako neNdvodzana yakhe labente lilungiselelo leluvuko.

11. Ngekusho kwemavi aJesu lakuJohane 5:28, 29, yini letawenteka kulabo labalalela Nkulunkulu?

¹¹ Cabanga ngenjabulo labo labavusiwe labatawuba nayo njengobe batawube benta lushintjo ekuphileni kwabo kuze balalele Nkulunkulu. Labo labatawenta lolushintjo batawuphila phakadze ePharadesi. Jehova ngeke abavumele kutsi baphile ePharadesi labo labangeke bente lushintjo ekuphileni kwabo.—Isa. 65:20; fundza Johane 5:28, 29.

12. Jehova utawubabusisa njani bonkhe labo labatawuphila emhlabeni?

¹² Nasekubusa uMbuso waNkulunkulu, bonkhe bantfu bakhe batawubona kutsi emavi lakuTaga 10:22 aliciniso, atsi: “Sibusiso [saJehova] lesenta umuntfu acebe, akengeti kuhlupheka kuso.” Umoya longcwele waJehova utawusita bantfu baNkulunkulu kutsi bafane naKhristu futsi babe bete sono. (Joh. 13:15-17; Ef. 4:23, 24) Lilanga ngelilanga, batawuba bantfu labaphilile emtimbeni. Kuphila kutawujabulisa kakhulu ngaleso sikhatsi! (Jobe 33:25) Kuzindla ngeluvuko kungakusita njani nyalo?

13. Ngekusho kweTihlabelelo 139:1-4, luvuko lukhombisa njani kutsi Jehova usati kahle?

¹³ Njengobe sicocile ekucaleni, nakavusa bantfu, Jehova utawubuyisela inkhumbulo yabo nebuntfu lebebanabo ngaphambi kwekutsi bafe. Kusho kutsini loko? Jehova ukutsandza kakhulu kangangekutsi uyakubona futsi uyakukhumbula loko lokucabangako, indlela lotiva ngayo, lokushoko nalokwentako. Ngako nakakuvusa utawukhona kukuvusa ngendlela lobongiyo ngaphambi kwekutsi ufe. INkhosi Davide beyati kutsi Jehova usati kahle. (Fundza Tihlabelelo 139:1-4.) Kwati kutsi Jehova usati kahle kusitsintsa njani lamuhla?

14. Kufanele sitive njani nasizindla ngendlela Jehova lasati ngayo?

¹⁴ Nasizindla ngendlela Jehova lasati ngayo, akukafaneli sikhatsateke. Leni? Khumbula kutsi Jehova uyasikhatsalela. Uyatinaka tintfo letisenta sehluke kulabanye. Uyatikhumbula tintfo letenteke ekuphileni kwetfu. Loko kuyasicinisekisa kutsi Jehova akasishiyi. Uhlale anatsi ngaso sonkhe sikhatsi futsi uyafuna kusisita.—2 Khr. 16:9.

15. Luvuko lukhombisa njani kutsi Jehova uhlakaniphile?

¹⁵ Bantfu labanyenti bayakwesaba kufa. Bantfu labacondziswa nguSathane basebentisa lokwesaba kuze bente bantfu bangatsembeki kubangani babo nobe bente  tintfo labatiko kutsi timbi. Kodvwa tsine ngeke bakhone kusesabisa. Siyati kutsi Jehova utawuphindze asivuse nangabe titsa tetfu tisibulala. (Semb. 2:10) Siyati kutsi kute labangakwenta lokungasiyekelisa kukhonta Jehova. (Rom. 8:35-39) Jehova ukhombisile kutsi uhlakaniphile ngekusinika litsemba leluvuko! Ngesizatfu salelitsemba lesinalo, asesabi nangabe bantfu labacondziswa nguSathane basetsembisa kusibulala nangabe singakwenti loko labakufunako, futsi lelitsemba lisinika sibindzi sekuhlala setsembekile kuJehova.

16. Ngumiphi imibuto lokufanele utibute yona, futsi timphendvulo tayo titakusita njani ubone kutsi umetsemba kanganani Jehova?

¹⁶ Nangabe titsa taJehova tikwetsembisa kukubulala, uyaciniseka yini kutsi Jehova utakuvusa? Yini lengakwenta kutsi umetsembe? Lenye indlela kutibuta, ‘Tincumo letincane lengitenta onkhe malanga tiyakhombisa yini kutsi ngetsembele kuJehova?’ (Luk. 16:10) ‘Indlela lengiphila ngayo iyakhombisa yini kutsi ngiyatetsemba tetsembiso taJehova tekutsi utatinakekela tidzingo tami nangifuna kucala uMbuso?’ (Mat. 6:31-33) Nangabe imphendvulo yakho kulemibuto ingu-yebo, loko kukhombisa kutsi uyametsemba Jehova futsi ukulungele kubhekana nanobe ngubuphi bumatima esikhatsini lesitako.—Taga 3:5, 6.

17. (a) Luvuko lukhombisa njani kutsi Jehova uyabeketela? (b) Singakhombisa njani kutsi siyabonga ngekubeketela kwaJehova?

¹⁷ Jehova ubeke lilanga neli-awa latawucedza ngalo lelive lelibi. (Mat. 24:36) Ngeke atsatse sinyatselo sisengakafiki leso sikhatsi. Unesifiso sekuvusa labafile, kodvwa uyabeketela. (Jobe 14:14, 15) Ulindzele kutsi kufike sikhatsi sakhe lasibekile kuze abavuse. (Joh. 5:28) Sinetizatfu letinhle tekubonga ngekubeketela kwaJehova. Ngesizatfu sekutsi Jehova uyabeketela, bantfu labanyenti, lokufaka ekhatsi natsi, batfole litfuba lekuphendvuka. (2 Phet. 3:9) Jehova ufuna kutsi bantfu labanyenti batfole kuphila lokuphakadze. Ngako asikhombise kutsi siyabonga ngekubetela kwakhe. Kanjani? Ngekutsi sifune bantfu ‘labatimisele kutfola kuphila lokuphakadze’ futsi sibasite batsandze Jehova futsi bamkhonte. (Imis. 13:48) Ngako njengatsi, nabo batawuzuza ekubeketeleni kwaJehova.

18. Kungani kufanele sibabeketelele labanye?

 ¹⁸ Jehova utawulindzela kutsi sibe bete sono nasekuphele iminyaka leyinkhulungwane. Jehova utaticolela tono tetfu kuze kufike leso sikhatsi. Ngako kufanele silingise yena ngekutsi sibuke lokuhle kulabanye futsi sibabeketelele. Cabanga ngesibonelo salomunye dzadze lobekanendvodza lebeyikhatsateke kakhulu, kangangekutsi yaze yayekela kuya emihlanganweni. Utsi: “Loko kwaba matima kakhulu kimi. Kuphila kwetfu kwashintja ngekushesha futsi besesingasakhoni kwenta tintfo lebesifuna kutenta.” Ngetulu kwako konkhe loko, lodzadze wayibeketelela indvodza yakhe. Bekatsembele kuJehova futsi akazange alilahle litsemba. Walingisa Jehova, wangatinaki letinkinga kodvwa wanaka lokuhle ngendvodza yakhe. Utsi: “Indvodza yami inebuntfu lobuhle futsi yenta konkhe lengakwenta kuze incobe lokukhatseteka.” Kubaluleke kakhulu kutsi sitibeketelele tihlobo tetfu nobe labo labasebandleni labetama kuncoba tinkinga!

19. Yini lokufanele sitimisele kuyenta?

¹⁹ Jesu netingilosi, bajabula kakhulu nakudalwa umhlaba. Cabanga kutsi batawujabula kanganani nababona umhlaba sewugcwele bantfu labete sono, labatsandza Jehova futsi labamkhontako. Cabanga kutsi batawujabula kanganani labo labatawubusa naKhristu ezulwini nababona bantfu emhlabeni bajabulela umsebenti wabo. (Semb. 4:4, 9-11; 5:9, 10) Cabanga ngesikhatsi lapho tinyembeti tebuhlungu setitinyembeti tenjabulo, lapho kugula, lusizi nekufa sekungasekho. (Semb. 21:4) Ngako timisele kulingisa Babe lonelutsandvo, lohlakaniphile futsi lobeketelako. Nawenta njalo utawujabula ngisho ubhekana natiphi tinkinga. (Jak. 1:2-4) Sijabula kakhulu ngesetsembiso saJehova sekutsi “kutawuba neluvuko”!—Imis. 24:15.