1. Nguliphi lilungelo lesilijabulelako?

SIJABULA kakhulu ngekuba yincenye yelibandla laJehova. Siba nekuthula nasikhonta Jehova sikanye nebazalwane nabodzadzewetfu. Ngumuphi umsebenti lonawo ebandleni?

2. Umphostoli Pawula wasebentisa muphi umfanekiso etincwadzini takhe letinyenti letiseBhayibhelini?

² Singafundza lokunyenti ngalendzaba emfanekisweni umphostoli Pawula lawusebentisa etincwadzini takhe letinyenti. Kuletincwadzi, Pawula wafananisa libandla nemtimba wemuntfu. Waphindze wafananisa lilunga ngalinye lelibandla nemalunga emtimba.—Rom. 12:4-8; 1 Khor. 12:12-27; Ef. 4:16.

3. Ngutiphi tifundvo letintsatfu lesitawucoca ngato kulesihloko?

³ Kulesihloko, sitawucoca ngetifundvo letintsatfu letibalulekile lesingatifundza kulomfanekiso waPawula. Kwekucala, sitawufundza ngekutsi sonkhe sinemsebenti * lobalulekile ebandleni laJehova. Kwesibili, sitawucoca ngaloko lesingakwenta kuze siwati umsebenti wetfu ebandleni. Kwesitsatfu, sitawucoca ngekutsi kungani kufanele sihlale simatasa senta umsebenti Jehova lasinikete wona ebandleni.

4. Umbhalo waRoma 12:4, 5 usifundzisani?

⁴ Sifundvo sekucala lesingasifundza emfanekisweni waPawula kutsi sonkhe sinendzima lokufanele siyidlale emndenini waJehova. Pawula ucala lomfanekiso wakhe ngemavi latsi: “Njengobe emtimbeni munye kunemalunga lamanyenti, lamalunga akenti umsebenti munye, ngako natsi nanobe sibanyenti, singumtimba munye ebunyeni naKhristu, futsi singemalunga letsembele kulelinye nalelinye.” (Rom. 12:4, 5) Pawula bekasho kutsini ngalamavi? Nanobe sinemisebenti leyehlukene ebandleni, kodvwa sonkhe sibalulekile.

5. Ngutiphi “tipho letibantfu” Jehova latiphe libandla?

⁵ Nawucabanga ngalabo labanemisebenti ebandleni, ngekushesha engcondvweni yakho kufika labo labaholako. (1 Thes. 5:12; Heb. 13:17) Kuliciniso kutsi asebentisa Khristu, Jehova usiphe “tipho letibantfu” ebandleni Lakhe. (Ef. 4:8) ‘Letipho letibantfu’ tifaka ekhatsi emalunga eSigungu Lesibusako, basiti beSigungu Lesibusako, emalunga eKomidi yeliGatja, babonisi labajikeletako, bothishela betikolwa letisekelwe eBhayibhelini, labadzala belibandla netinceku letisebentako. Bonkhe labazalwane bamiswe ngumoya longcwele waJehova kutsi banakekele timvu takhe letiligugu futsi bacinise libandla.—1 Phet. 5:2, 3.

6. Ngekusho kwa-1 Thesalonika 2:6-8, yini bazalwane lababekwe ngumoya longcwele labalwela kuyenta?

⁶ Bazalwane babekwa ngumoya longcwele kuze bente imisebenti leyehlukene ebandleni. Njengobe emalunga emtimba, lokufaka ekhatsi tandla netinyawo, kusebenta ndzawonye kuze kuzuze umtimba wonkhe, bazalwane lababekwe ngumoya longcwele basebenta kamatima kuze kuzuze lonkhe libandla. Abatifuneli ludvumo. Kunaloko, balwela kucinisa libandla. (Fundza 1 Thesalonika 2:6-8.) Simbonga kakhulu Jehova ngalabazalwane lababeka tidzingo talabanye tite kucala kunetabo.

7. Ngutiphi tibusiso letijatjulelwa ngulabo labasemsebentini wasikhatsi sonkhe?

⁷ Labanye ebandleni babekwa kutsi babe titfunywa telivangeli, emahlahlandlela lakhetsekile nobe emahlahlandlela lavamile. Ecinisweni, bazalwane nabodzadze emhlabeni wonkhe bakhetse kwenta umsebenti wekushumayela sikhatsi sonkhe. Ngekwenta njalo, basite bantfu labanyenti kutsi babe bafundzi baJesu Khristu. Ngisho nobe letikhonti taJehova tasikhatsi sonkhe tite imali lenyenti nobe umcebo, Jehova utinike tintfo letinyenti letinhle. (Mak. 10:29, 30) Sibatsandza kakhulu labazalwane betfu nabozadzewetfu, futsi siyajabula kutsi bayincenye yelibandla!

8. Kungani bamemeteli betindzaba letimnandzi baligugu kuJehova?

⁸ Bazalwane lababekiwe nalabo labasemsebentini wasikhatsi sonkhe, ngibo kuphela yini labanemsebenti ebandleni? Cha! Bonkhe bamemeteli betindzaba letimnandzi babalulekile kuNkulunkulu nasebandleni. (Rom. 10:15; 1 Khor. 3:6-9) Ecinisweni, umgomo loyinhloko welibandla kwenta bafundzi baJesu Khristu. (Mat. 28:19, 20; 1 Thim. 2:4) Bonkhe labashumayela tindzaba letimnandzi, kungaba bamemeteli lababhajatisiwe nobe labangakabhajatiswa, bayetama kwenta lomsebenti ute kucala ekuphileni kwabo.—Mat. 24:14.

9. Kungani sibatsandza kakhulu bodzadzewetfu labangemaKhristu?

 ⁹ Jehova unike bodzadze labangemaKhristu umsebenti lobalulekile ebandleni. Ubatsandza kakhulu bafati, bomake, bafelokati, nabodzadze labangakashadi labamkhonta ngekwetsembeka. ImiBhalo ikhuluma tikhatsi letinyenti ngebafati labanyenti labasibonelo futsi labajabulisa Nkulunkulu. Badvunyiswa ngetibonelo tabo letinhle tekuhlakanipha, kukholwa, kukhutsala, sibindzi, umusa nemisebenti lemihle. (Luk. 8:2, 3; Imis. 16:14, 15; Rom. 16:3, 6; Fil. 4:3; Heb. 11:11, 31, 35) Simbonga kakhulu Jehova ngabodzadze labangemaKhristu lesinabo emabandleni, labanebuntfu lobuhle lobufana nalobu!

10. Kungani sibatsandza bazalwane betfu lasebakhulile?

¹⁰ Siyajabula kuba nalasebakhulile emabandleni. Lamanye emabandla anebazalwane nabodzadze lasebakhulile futsi labakhonte Jehova ngekwetsembeka kuphila kwabo konkhe. Labanye babo balifundze nyalo liciniso. Labanyenti babo banetinkinga temphilo ngesizatfu sekutsi sebakhulile ngeminyaka. Letinkinga tingabenta bangasakhoni kwenta lokunyenti emsebentini wekushumayela. Nobe kunjalo, labazalwane benta konkhe labangakwenta emsebentini wekushumayela, futsi basebentisa emandla abo kuze bakhutsate futsi baceceshe labanye. Sizuza kakhulu kuloko lokwenteke ekuphileni kwabo. Bahle kakhulu kuJehova nakitsi.—Taga 16:31.

11-12. Labasebasha labasebandleni lokulo bakukhutsate njani?

¹¹ Cabanga nangalabasha betfu. Babhekana netinkinga letinyenti njengoba baphila kulelive lelibuswa nguSathane Develi nalelikhutsata imikhuba lemibi. (1 Joh. 5:19) Siyakhutsateka nasibabona baphendvula emihlanganweni, bashumayela nobe nangabe bakhona kuchaza ngesibindzi loko labakukholelwako. Kuliciniso kutsi nine labasha ninemsebenti  lobalulekile ebandleni laJehova!—Hla. 8:2.

¹² Nobe kunjalo, labanye bazalwane nabodzadze bakutfola kumatima kukholelwa kutsi banemsebenti labangawenta ebandleni. Yini lengasisita siciniseke kutsi sinemsebenti lobalulekile lesingawenta ebandleni? Asesibone.

13-14. Yini lengenta labanye bative bangakabaluleki ebandleni?

¹³ Naka sifundvo sesibili lesisifundzako emfanekisweni waPawula. Lomfanekiso usenta sicabange ngenkinga bantfu labanyenti labanayo lamuhla; bakutfola kumatima kukholelwa kutsi babalulekile ebandleni. Pawula utsi: “Nangabe lunyawo lungatsi, ‘Njengobe ngingasiso sandla, angisiyo incenye yemtimba,’ loko akulwenti kutsi lungabi yincenye yemtimba. Nangabe indlebe ingatsi, ‘Njengobe ngingesilo liso, angisiyo incenye yemtimba,’ loko akuyenti kutsi ingabi yincenye yemtimba.” (1 Khor. 12:15, 16) Ngusiphi sifundvo Pawula lasifundzisa sona?

¹⁴ Nawuticatsanisa nalabanye ebandleni, utawubona shengatsi awukabaluleki. Kungenteka labanye ebandleni banelikhono lekufundzisa, labanye banelikhono lekudvudvuta nelekukhutsata labanye. Kungenteka ucabanga kutsi awukhoni kwenta njengabo. Loko kukhombisa kutsi utfobekile. (Fil. 2:3) Kodvwa caphela kutsi ungahlali uticatsanisa nalabo labanemakhono langetulu kunemakhono akho, ngobe utawudvumateka. Ungativa shengatsi ute umsebenti ebandleni njengobe Pawula asho. Yini lengakusita ungativa ngalendlela?

15. Ngekusho kwa-1 Khorinte 12:4-11, yini lokufanele siyati ngetipho lesinato?

¹⁵ Cabanga nganali liciniso: Jehova wanika emaKhristu angelikhulu lekucala tipho temoya longcwele, kodvwa lamaKhristu akazange atfole tipho letifanako. (Fundza 1 Khorinte 12:4-11.) Jehova wapha lamaKhristu tipho  nemakhono langafani, kodvwa onkhe lamaKhristu bekabalulekile. Lamuhla, site tipho letisimangaliso temoya longcwele futsi site emakhono lafanako, kodvwa sibalulekile kuJehova.

16. Ngusiphi seluleko semphostoli Pawula lokufanele sisisebentise?

¹⁶ Kunekutsi siticatsanise nalamanye emaKhristu, kufanele sisebentise seluleko semphostoli Pawula lesiphefumulelwe: “Nguloyo naloyo akahlole tento takhe, nakenta njalo utawuba nesizatfu sekutibonga yena, hhayi ngekuticatsanisa nalomunye umuntfu.”—Gal. 6:4.

17. Yini lesitayizuza nasilalela seluleko saPawula?

¹⁷ Nasilalela seluleko lesiphefumulelwe semphostoli Pawula futsi sihlola tento tetfu, sitawubona kutsi sinetipho nemakhono langafani. Nasi sibonelo, lomdzala welibandla angase abebete likhono lekubeka tinkhulumo, kodvwa abe nelikhono lelihle lekwenta bafundzi. Kungenteka angahleleki njengalabanye labadzala ebandleni, kodvwa abe nemusa nelutsandvo futsi nebazalwane bakhululeke kucela lusito kuye. Nobe angaba nemoya lomuhle wekwemukela tihambi. (Heb. 13:2, 16) Nasitati tipho tetfu, sitawujabula ngaloko lesikwentela libandla, futsi angeke sibe nemona ngebazalwane labanetipho letingafani netetfu.

18. Singawatfutfukisa njani emakhono etfu?

¹⁸ Ngisho nobe sinamuphi umsebenti ebandleni, sonkhe kufanele sibe nesifiso sekutfutfukisa umsebenti lesiwentela Jehova nemakhono etfu. Kuze asisite sitfutfuke, Jehova uyasicecesha asebentisa inhlangano yakhe. Emihlanganweni yetfu yasekhatsi neliviki, sitfola kuceceshwa lokusenta siphumelele emsebentini wekushumayela. Uyakusebentisa yini lokuceceshwa lokutfola kulemihlangano?

19. Yini longayenta kuze umgomo wakho wekuya eSikolweni Sebavangeli BeMbuso uphumelele?

¹⁹ Lokunye kuceceshwa lokujabulisako sikutfola eSikolweni Sebavangeli BeMbuso. Lesikolwa silungiselelwe bazalwane nabodzadze labenta umsebenti wekushumayela sikhatsi sonkhe labaneminyaka lengu-23 kuya ku-65. Kungabonakala shengatsi angeke sewukhone kuya kulesikolwa. Kunekutsi ubeke luhla lwetizatfu letingakwenta ungakhoni kuya kulesikolwa, beka luhla lwetizatfu letingakwenta ufune kuya kuso. Yenta konkhe longakwenta kuze ufake sicelo sekuya kulesikolwa. Nawutimisela, Jehova utakusita kutsi wente loko lebewucabanga kutsi angeke ukhone kukwenta.

20. Yini lesingayifundza kuRoma 12:6-8?

²⁰ Sifundvo sesitsatfu lesingasifundza emfanekisweni waPawula sitfolakala kuRoma 12:6-8. (Fundza.) Pawula usifundzisa kutsi sonkhe ebandleni sinetipho letingafani. Kodvwa manje ugcizelela kutsi kufanele sisebentise tipho lesinato kuze sakhe futsi sicinise libandla.

21-22. Yini lesingayifundza kuloko lokwenteka kuRobert naFelice?

²¹ Cabanga ngaloko lokwenteka kumzalwane lesitambita ngekutsi nguRobert. Ngemuva kwekutsi akhonte kulelinye live, watfola sabelo sekuyokhonta eBethel lebeyiseveni lakhe. Ngisho nobe bazalwane bamcinisekisa kutsi kute lokubi labekakwentile utsi: “Kwaphela tinyanga letinyenti ngingajabuli ngesizatfu sekutsi bengicabanga kutsi ngehlulekile esabelweni sami.” Bekunetikhatsi lapho  bengivele ngicabange kuyekela kusebenta e-Bethel. Yini leyamsita waphindze wajabula? Lomunye umzalwane lomdzala wamtjela kutsi Jehova usebentisa tabelo tetfu lebesitenta kuze asiceceshe etabelweni tetfu letisha. Robert wabese uyabona kutsi kufanele ayekele kucabanga ngesabelo sakhe lebekasenta, kunaloko anake langakwenta nyalo.

²² Kwenteka lokufanako nakumzalwane Felice Episcopo. Lomzalwane nemfati wakhe baphotfula eGileyadi nga-1956 futsi benta umsebenti wekujikeleta eBolivia. Batfola umntfwana wabo nga-1964. Felice utsi: “Kwaba matima kushiya sabelo setfu lebesisitsandza. Kwaphela umnyaka solo ngidvumatekile. Kodvwa Jehova wangisita ngayishintja indlela lebengicabanga ngayo futsi nganaka kakhulu lilungelo lami lekuba ngumtali.” Utiva njengaRobert naFelice yini? Udvumatekile yini kutsi sewute emalungelo lebewunawo? Nangabe kunjalo, utawujabula kakhulu nawunganaka loko longakwentela Jehova nebazalwane bakho nyalo. Hlale umatasa usebentisa tipho takho nemakhono akho kuze usite labanye, futsi utawujabula njengobe utawube wakha libandla.

23. Yini lokufanele sitinike sikhatsi sekuyenta, futsi sitawucoca ngani esihlokweni lesilandzelako?

²³ Sonkhe siligugu kuJehova. Ufuna sibe yincenye yemndeni wakhe. Nasitinika sikhatsi sekuzindla ngekutsi yini lesingayenta kuze sakhe bazalwane nabodzadzewetfu, futsi sitimisela kukwenta loko, ngeke sicabange kutsi site umsebenti lesingawenta ebandleni! Kufanele sibatsatse njani labanye ebandleni? Singakhombisa njani kutsi siyabatsandza futsi siyabahlonipha? Esihlokweni lesilandzelako, sitawucoca ngalemibuto.