1. Yini lowafundziswa yona mayelana neMdali?

NANGABE wakhulela emndenini waBoFakazi BaJehova, kungenteka wafundza ngaJehova kusukela usemncane. Wafundziswa kutsi unguMdali, nekutsi unebuntfu lobuhle kanye nekutsi ufuna kwenta lomhlaba ube lipharadisi.—Gen. 1:1; Imis. 17:24-27.

2. Labanye bantfu babatsatsa njani labo labakholelwa kutsi kuneMdali?

² Bantfu labanyenti abakholelwa kutsi Nkulunkulu ukhona nobe kutsi wadala tonkhe tintfo. Esikhundleni saloko, bakholelwa kutsi tintfo letiphilako tativelela, tacale taba tintfo letincane letingasiyo inkimbinkimbi tabese tiyandza taba tintfo letinyenti letehlukahlukene letiyinkimbinkimbi kakhulu. Labanye balabantfu labakholelwa loku bafundze kakhulu. Bangatsi isayensi inikete bufakazi bekutsi liBhayibheli linemanga nekutsi bantfu labangakafundzi, labangakahlakaniphi nobe labayengeka kamelula labakholelwa kutsi kuneMdali.

3. Kubaluleke ngani kutsi sicinise kukholwa kwetfu?

³ Loko lokushiwo ngulabanye bantfu labafundzile kutawusenta singabate yini kutsi Jehova nguMdali wetfu lositsandzako? Kutawuya ngekutsi kungani sikholelwa kutsi Jehova unguMdali. Kungenca yekutsi satjelwa kanjalo yini nobe kungenca yekutsi satitfolela tsine kutsi vele unguMdali? (1 Khor. 3:12-15) Ngisho nobe sinesikhatsi lesingakanani siBoFakazi BaJehova, sonkhe kufanele sichubeke sicinisa kukholwa kwetfu. Nasenta njalo, angeke siyengwe bantfu labatsi loko lokushiwo liBhayibheli kungemanga. (Khol. 2:8; Heb. 11:6) Kuze sisisite sente loko, lesihloko sitawucoca ngekutsi (1) yini leyenta bantfu labanyenti bangakholelwa kuMdali, (2) nekutsi ungakwakha njani kukholwa kwakho kuJehova longuMdali wakho, kanye nekutsi (3) ungachubeka njani ucinisa kukholwa kwakho.

4. Ngekusho kwembhalo waKumaHebheru 11:1 nembhalo longentasi, kusekelwe kuphi kukholwa mbamba?

⁴ Labanye bantfu bacabanga kutsi kuba nekukholwa kusho kukholelwa entfweni lete bufakazi. Kodvwa ngekusho kweliBhayibheli, loko akusiko kukholwa mbamba. (Fundza KumaHebheru 11:1 nembhalo longentasi.) Naka kutsi kukholwa etintfweni letikhona mbamba letingabonakali letifaka ekhatsi Jehova, Jesu kanye neMbuso wasezulwini kusekelwe etintfweni letinebufakazi lobucinisekisako. (Heb. 11:3) Lomunye sosayensi lowagcine anguFakazi watsi: “BoFakazi BaJehova banebufazi betintfo labatikholelwako. Bayakunaka naloko lokushiwo yisayensi.”

5. Kungani bantfu labanyenti bangakholelwa kutsi nguMdali lowadala tonkhe tintfo?

⁵ Singahle sitibute: ‘Yini leyenta kutsi bantfu labanyenti bangakholelwa kutsi Nkulunkulu wadala tonkhe tintfo letiphilako kube kunebufakazi lobunyenti bekutsi watidala?’ Labanye abakase batihlolela bona emaciniso ngalendzaba. Robert, losekanguFakazi waJehova utsi: “Njengobe singazange sifundziswe ngendalo esikolweni, bengicabanga kutsi tintfo atizange tidalwe. Kodvwa nangineminyaka lengaba ngu-20 ngacoca naBoFakazi BaJehova, futsi ngafundza kutsi liBhayibheli lisinika tizatfu letinhle tekukholelwa kutsi Nkulunkulu wadala tonkhe tintfo.” *—Buka libhokisi lelitsi “ Umlayeto Lobalulekile Loya Kubatali.”

6. Yini leyenta labanye bangakholelwa kutsi kuneMdali?

⁶ Labanye abakholelwa kuMdali ngobe batsi bakholelwa kuloko labakubonako. Kodvwa ecinisweni bayakholelwa etintfweni labangatiboni njengemandla ladvonsela phansi  ngobe banebufakazi bekutsi akhona. Kukholwa lokukhulunywa ngako eBhayibhelini kusekelwe ‘etintfweni letikhona mbamba letingakabonwa.’ (Heb. 11:1) Kudzinga sikhatsi nemandla kuze umuntfu atihlolele lobufakazi, futsi bantfu labanyenti abafuni kucitsa sikhatsi sabo benta loko. Umuntfu longatifuneli yena lobufakazi angaphetsa ngekutsi kute Nkulunkulu.

7. Chaza kutsi bonkhe bantfu labafundze kakhulu bayaphika yini kutsi Nkulunkulu wadala tonkhe tintfo.

⁷ Ngemuva kwekuhlola bufakazi, labanye bososayensi babese bayaciniseka kutsi Nkulunkulu wadala tonkhe tintfo. * NjengaRobert, lesike sakhuluma ngaye, kungenteka labanye bebacabanga kutsi kute uMdali ngenca yekutsi  abazange bafundziswe ngendalo enyuvesi. Nobe kunjalo, bososayensi labanyenti sebayamati Jehova futsi sebayamtsandza. Njengobe kwenta labososayensi, natsi kufanele sicinise kukholwa kwetfu kuNkulunkulu ngisho nobe sifundze kangakanani. Kute longasentela loko.

8-9. (a) Ngumuphi umbuto lesitawucoca ngawo? (b) Kutakusita ngani kufundza ngendalo?

⁸ Ungakucinisa njani kukholwa kwakho kuMdali? Ase sicoce ngetindlela letine.

⁹ Fundza ngendalo. Ungakucinisa kukholwa kwakho kuMdali ngekubuka tilwane, lokumilako kanye netinkhanyenti. (Hla. 19:1; Isa. 40:26) Nawuchubeka ufundza ngaletintfo, utawuciniseka kakhulu kutsi Jehova unguMdali. Tincwadzi tetfu tivame kuba netihloko letikhuluma ngendalo leyehlukahlukene. Ungateci letihloko ngisho nobe ungaticondzi kahle. Yetama kucoshacosha lokukhonako. Ungakhohlwa kubukela ema-video lakhuluma ngendalo latfolakala ku-jw.org, lebekadlalwa emihlanganweni yesifundza eminyakani leyendlulile.

10. Niketa sibonelo lesifakazela kutsi ukhona uMdali. (KubaseRoma 1:20)

¹⁰ Nawufundza ngendalo, nakisisa kutsi ikufundzisani ngeMdali. (Fundza KubaseRoma 1:20.) Nasi sibonelo, lilanga likhipha kushisa nekukhanya lokudzingekako kuze tintfo letikhona emhlabeni tiphile, kodvwa leminye imisebe lekhishwa lilanga ingaba yingoti. Tsine bantfu kufanele sivikeleke kulemisebe, futsi sivikelekile! Kanjani? Kuneludvwadvwasi lolutungelete umhlaba lolusivikelako kulemisebe leyingoti. Nangabe lemisebe iba nemandla, naloludvwadvwasi luyakhula. Awuvumi yini kutsi ukhona umuntfu lowente konkhe loku nekutsi unguMdali lonelutsandvo nalohlakaniphile?

11. Ungawatfola kuphi emaciniso langacinisa kukholwa kwakho mayelana nendalo? (Buka libhokisi lelitsi “ Tintfo Letitawucinisa Kukholwa Kwakho KuMdali.”)

¹¹ Ungatfola emaciniso lamanyenti lacinisa kukholwa mayelana nendalo ku-Watch Tower Publications Index nangekutsi ucwaninge ku-jw.org. Ungacala ngekufundza tihloko nekubukela ema-video ngephansi kweluchungechunge lolutsi “Tonkhe Tintfo Tadalwa Yini?” Letihloko nalama-video kufishane futsi kuveta emaciniso lamangalisako ngetilwane nangalenye indalo. Kuphindze kube netibonelo tetintfo letakhiwe bososayensi bakopa indalo.

12. Ngutiphi letinye tintfo lokufanele sitinake nasidadisha liBhayibheli?

¹² Dadisha liBhayibheli. Lososayensi lesike sakhuluma ngaye esigabeni 4 wacale waphika kutsi ukhona uMdali. Kodvwa ngekuhamba kwesikhatsi wabese uyaciniseka kutsi vele ukhona. Utsi: “Kukholwa kwami bekungakasekelwa nje kuphela kulebengikutfole nangidadisha isayensi. Bekusekelwe nakuloko bengikutfole nangidadisha liBhayibheli.” Kungenteka sewukwati kahle loko lokufundziswa liBhayibheli. Nobe kunjalo, kuze ucinise kukholwa kwakho kuMdali, kufanele uchubeke udadisha liVi laNkulunkulu. (Josh. 1:8; Hla. 119:97) Cabanga ngendlela lelitichaza kahle ngayo tintfo letenteka kadzeni. Naka tiphrofetho letiseBhayibhelini kanye nendlela babhali balo bebavumelana ngayo. Nawenta njalo, kungacina kukholwa kwakho kutsi sadalwa nguMdali lonelutsandvo nalohlakaniphile nekutsi waphefumulela liBhayibheli. *—2 Thim. 3:14; 2 Phet. 1:21.

13. Ngusiphi sibonelo lesikhombisa kutsi seluleko seliVi laNkulunkulu sihlakaniphile?

¹³ Nawudadisha liVi laNkulunkulu, naka kutsi seluleko salo singakusita njani. Nasi  sibonelo, kusukela kadzeni liBhayibheli lecwayisa kutsi kutsandza imali kuyingoti nekutsi kubangela “buhlungu lobunyenti.” (1 Thim. 6:9, 10; Taga 28:20; Mat. 6:24) Lesecwayiso sisasebenta yini nalamuhla? Incwadzi letsi “The Narcissism Epidemic” itsi: “Ngekwesilinganiso, bantfu labatsandza imali abakavami kujabula, futsi bacindzeteleka kakhulu. Ngisho nebantfu labafuna kuba nemali lenyenti abajabuli futsi baba netinkinga temphilo letinyenti.” Ngako silusito kakhulu leseluleko seliBhayibheli lesisecwayisa ngekutsandza imali! Tikhona yini letinye teluleko teliBhayibheli letikusitile? Nasicabanga ngato tonkhe teluleko letiseBhayibhelini, sitawubona kutsi uMdali wetfu lositsandzako uyakwati lokusilungelako futsi sitawuhlale setsembela kuye kuze sitfole seluleko. (Jak. 1:5) Ngenca yaloko, kuphila kwetfu kutawuba mnandzi.—Isa. 48:17, 18.

14. Kudadisha liBhayibheli kutakufundzisani ngaJehova?

¹⁴ Dadisha liBhayibheli unemgomo wekwati Jehova kancono. (Joh. 17:3) Njengobe ulidadisha, utawufundza ngebuntfu baJehova, futsi lobu buntfu lobufanako lobufundze nawubuka indalo. Kufundza ngebuntfu baJehova kuyasicinisekisa kutsi unguMuntfu mbamba. (Eks. 34:6, 7; Hla. 145:8, 9) Njengobe umati kancono Jehova, kukholwa kwakho kuye kutawucina nendlela lomtsandza ngayo ikhule futsi nibe bangani labakhulu.

15. Utawuzuza njani nawucocela labanye ngaloko lokukholelwako?

¹⁵ Cocela labanye ngaloko lokukholelwako ngaNkulunkulu. Nawenta njalo, kukholwa kwakho kutawucina kakhulu. Utawenta njani nangabe umuntfu lomshumayelako akubuta umbuto lomayelana nekutsi Nkulunkulu ukhona mbamba yini, futsi ungaciniseki ngekutsi utamphendvula njani? Yetama kufuna imphendvulo lesekelwe eBhayibhelini etincwadzini tetfu lekhuluma ngalendzaba, bese ucoca ngayo nalomuntfu. (1 Phet. 3:15) Ungaphindze ucele lomunye Fakazi akusite kutsi uphendvule lombuto. Ngisho nobe lomuntfu akwemukela loko lokushiwo liBhayibheli nobe angakwemukeli, utawuzuza kulolucwaningo. Kukholwa kwakho kutawucina. Ngenca yaloko, angeke udukiswe ngemanga ebantfu lababonakala bahlakaniphile futsi labafundze kakhulu labatsi kute uMdali.

16. Yini lengenteka nangabe singachubeki sicinisa kukholwa kwetfu?

¹⁶ Ngisho nobe sinesikhatsi lesidze kangakanani sikhonta Jehova, kufanele sichubeke sakha kukholwa kwetfu kuye futsi sikucinisa. Kungani? Kungobe nasingakanaki, kukholwa kwetfu kungaba butsakatsaka. Khumbula kutsi kukholwa kusho kuciniseka ngetintfo letikhona mbamba letingakabonwa. Loko lesingakuboni singasheshe sikukhohlwe. Kungako Pawula atsi kuba bete kukholwa ‘kusono lesisigigela kamelula.’ (Heb. 12:1) Ngako yini lesingayenta kuze siciniseke kutsi kukholwa kwetfu kuhlala kucinile?—2 Thes. 1:3.

17. Yini lengasisita kutsi sicinise kukholwa kwetfu?

¹⁷ Kwekucala, hlale uncenga Jehova kutsi akuphe umoya wakhe longcwele. Kungani? Ngobe kukholwa kusitselo semoya. (Gal. 5:22, 23) Angeke sibe nekukholwa lokucinile kuMdali nangabe singasitwa ngumoya wakhe longcwele. Nangabe sichubeka sicela umoya longcwele waJehova, utosipha. (Luk. 11:13) Singaze sithantaze sitsi: “Sisite sicinise kukholwa kwetfu.”—Luk. 17:5.

18. Ngekusho kweTihlabelelo 1:2, 3, nguliphi lilungelo lesinalo?

¹⁸ Ngetulu kwaloko, hlale udadisha liVi laNkulunkulu. (Fundza Tihlabelelo 1:2, 3.) Ngesikhatsi lesihlabelelo sibhalwa, bekambalwa ema-Israyeli lebekanekhophi lephelele yeMtsetfo waNkulunkulu. Nobe kunjalo, emakhosi  kanye nebaphristi bebangawatfola lamakhophi, futsi njalo ngemuva kweminyaka lengu-7, “emadvodza, bafati, bantfwana” kanye nebantfu bekuhamba labebahlala ka-Israyeli bebahlangana ndzawonye kuze balalele nakufundvwa uMtsetfo waNkulunkulu. (Dut. 31:10-12) Ngemalanga aJesu bebambalwa bantfu lebebanemakhophi emiBhalo lengcwele, futsi emakhophi lamanyenti bekahlala emasinagogeni. Kodvwa lamuhla bantfu labanyenti bayakhona kutifundzela incenye yeliVi laNkulunkulu nobe balifundze lonkhe. Leli lilungelo lelikhulu! Singakhombisa njani kutsi siyabonga ngalo?

19. Yini lokufanele siyente kuze sihlale sicinisa kukholwa kwetfu?

¹⁹ Singakhombisa kutsi siyabonga ngalelilungelo lesinalo lekuba neliVi laNkulunkulu ngekutsi silifundze njalo. Kufanele sibe neluhlelo lwekufundza liBhayibheli futsi silidadishe, hhayi nje kutsi silifundze nasitfola sikhatsi. Nasiciniseka kutsi silifundza njalo, kukholwa kwetfu kutawuhlale kucinile.

20. Yini lokufanele sitimisele kuyenta?

²⁰ Ngalokungafani ‘nalabahlakaniphile nalabafundzile’ balelive, tsine sinekukholwa lokucinile lokusekelwe eVini laNkulunkulu. (Mat. 11:25, 26) LiBhayibheli liyasichazela kutsi kungani timo lamhlabeni tiba timbi kakhulu nangaloko Jehova latawukwenta. Ngako asitimisele kucinisa kukholwa kwetfu nekusita labanyenti kutsi babe nekukholwa kuMdali wetfu. (1 Thim. 2:3, 4) Shengatsi sonkhe singachubeka sisibuke ngalabovu sikhatsi lapho khona bonkhe labaphilako emhlabeni batawudvumisa Jehova, futsi basho emavi lakuSembulo 4:11 latsi: “Kukufanele Jehova Nkulunkulu wetfu kwemukela inkhatimulo . . . ngobe wadala tonkhe tintfo.”