1. Yini labanyenti labetama kuyenta kuze bentele Jehova lokunyenti emsebentini wakhe?

 SINEMSEBENTI lomnyenti lokufanele siwente njengobe lelive liya ngasekupheleni. (Mat. 24:14; Luk. 10:2; 1 Phet. 5:2) Sonkhe sifuna kwenta konkhe lesingakhona kukwenta ekukhonteni Jehova. Labanye bafuna tindlela tekwenta lokunyenti ekukhonteni Jehova. Labanye bafisa kuba ngemahlahlandlela. Labanye bafisa kusebenta eBethel nobe basite emsebentini wekwakha takhiwo tenhlangano. Kantsi labanye bazalwane labanyenti bafuna kuba tinceku letisebentako nobe kuba ngulabadzala belibandla. (1 Thim. 3:1, 8) Jehova ujabula kakhulu nakabona indlela bantfu bakhe labafuna ngayo kumentela lokutsite ekumkhonteni!—Hla. 110:3; Isa. 6:8.

2. Singativa njani nangabe singakhoni kufinyelela umgomo lesitibekele wona emsebentini waJehova?

² Singahle sidvumateke nangabe kutsatsa sikhatsi lesidze kufinyelela imigomo lesitibekele yona ekukhonteni Jehova. Kungenteka sidvumateke nangabe singakhoni kwenta imisebenti letsite enhlanganweni yaJehova ngenca yekutsi sesikhulile ngeminyaka nobe ngenca yaletinye tizatfu. (Taga 13:12) Nguleso simo lakuso Melissa. * Uyafuna kuyosebenta eBethel nobe kuya eSikolweni SeBavangeli BeMbuso, kodvwa utsi: “Iminyaka yami seyingetulu kwaleyo lefunekako. Nyalo sekumane nje kusifiso. Ngaletinye tikhatsi ngitiva ngidvumatekile.”

3. Yini labanye lokudzingeka bayente kuze banikwe leminye imisebenti?

 ³ Labanye labasebasha futsi labaphilile emtimbeni kungahle kudzingeke kutsi bakhule futsi babe nalobunye buntfu lobudzingekako kuze balungele kwenta leminye imisebenti. Nasi sibonelo, kungenteka labanye bahlakaniphile, bayashesha kwenta tincumo, futsi bayafuna kusebenta, kodvwa kungenteka kusadzingeka bafundze kubeketela, kunaka nabenta umsebenti wabo kanye nekuhlonipha labanye. Nangabe wenta konkhe longakhona kukwenta kuze ube nalobuntfu lobudzingekile, bazalwane bangakunika umsebenti ngesikhatsi longakalindzeli ngaso. Cabanga ngaloko lokwenteka kuNick. Nakaneminyaka lengu-20, wadvumateka kakhulu ngobe akanikwanga umsebenti wekuba yinceku lesebentako. Utsi: “Ngeva shengatsi kukhona lebekungahambi kahle ngami.” Kodvwa Nick akazange aphelelwe ngemandla. Wenta konkhe langakhona kukwenta ebandleni nasemsebentini wekushumayela. Nyalo ulilunga leKomidi Yeligatja.

4. Sitawucoca ngani kulesihloko?

⁴ Udvumatekile yini ngenca yekutsi solo awukhoni kufinyelela umgomo lotsite emsebentini waJehova? Nakunjalo, thantaza kuJehova umtjele indlela lotiva ngayo. (Hla. 37:5-7) Ngetulu kwaloko, cela seluleko kubazalwane labavutsiwe ngendlela longatfutfuka ngayo emsebentini waNkulunkulu, futsi wente konkhe lokusemandleni akho kuze usisebentise. Nawenta njalo, kungenteka uwufinyelele lomgomo. Kodvwa njengaMelissa, kungenteka nyalo ungakhoni kwenta loko lofuna kukwentela Jehova. Yini-ke longayenta kuze uchubeke ujabula? Kuze siphendvule lombuto, lesihloko sitawucoca ngekutsi (1) ungayitfola njani injabulo, (2) yini longayenta kuze ujabule kakhulu, nekutsi (3) ngumiphi imigomo longatibekela yona lengakwenta ujabule kakhulu.

5. Kuze sijabule, yini lokufanele siyinake? (Umshumayeli 6:9)

⁵ Umshumayeli 6:9 usichazela loko lesingakwenta kuze sijabule. (Fundza.) Umuntfu lonaka ‘tintfo latibona ngemehlo’ uyenetiseka ngaloko lanako, uyenetiseka ngesimo lakuso ngaleso sikhatsi. Ngalokwehlukile, umuntfu lofisa tintfo langeke abe nato uhlale afisa kuba netintfo langeke atitfole. Yini lesiyifundzako? Kuze sijabule, kufanele sinake tintfo lesinato hhayi tintfo lesingeke sikhone kuba nato.

6. Ngumuphi umfanekiso lesitawucoca ngawo, futsi yini lesitayifundza kuwo?

⁶ Ungakhona yini vele kwenetiseka ngaloko lonako? Bantfu labanyenti bacabanga kutsi loko angeke kwenteke ngobe siyatsandza kuchubeka sifundza tintfo letinsha. Kodvwa loko kungenteka. Singatijabulela mbamba tintfo lesinato nyalo. Singakwenta njani loko? Kuze sitfole imphendvulo, ase sicoce ngemfanekiso waJesu lomayelana nemathalenta, lotfolakala kuMatewu 25:14-30. Sitawufundza ngekutsi yini lesingayenta kuze sijabule futsi sijabule kakhulu ngaloko lesinako nyalo.

7. Chaza kafishane umfanekiso waJesu lomayelana nemathalenta.

⁷ Kulomfanekiso, lenye indvodza beyitawutsatsa luhambo. Ngaphambi kwekutsi ihambe, yabita tisebenti tayo yatinika emathalenta kuze tente ibhizinisi ngawo. * Lendvodza beyati kutsi letisebenti tayo tinemakhono langafani, ngako yanika sisebenti sekucala emathalenta lasihlanu, sesibili yasinika lamabili  kantsi sesitsatfu yasinika linye. Tisebenti letimbili tasebenta kamatima kuze titalise lemali. Kodvwa sisebenti sesitsatfu asizange siyitalise lemali, futsi umphatsi waso wasicosha.

8. Kungani sisebenti sekucala lokukhulunywa ngaso kulomfanekiso besingajabula?

⁸ Kungenteka lesisebenti sekucala sajabula kakhulu ngekutsi umphatsi waso usinikete emathalenta lasihlanu. Leyo bekuyimali lenyenti kakhulu, futsi bekukhombisa kutsi umphatsi waso usetsemba kakhulu! Kodvwa kutsiwani ngalesisebenti sesibili? Besingadvumateka ngenca yekutsi asizange sinikwe emathalenta lamanyenti njengalesi sekucala. Kodvwa senta njani?

9. Yini Jesu langakhulumi ngayo mayelana nesisebenti sesibili? (Matewu 25:22, 23)

⁹ Fundza Matewu 25:22, 23. Jesu akazange asho kutsi lesisebenti sesibili satfukutsela futsi saphatseka kabi ngenca yekutsi besinikwe emathalenta lamabili nje kuphela. Akazange asho nekutsi lesisebenti sakhonona satsi: ‘Kungani umphatsi wami anginike emathalenta lamancane? Nami ngisebenta kamatima njengalesisebenti lesinikwe emathalenta lasihlanu! Nangabe umphatsi wami angacabangi kutsi ngisisebenti lesikahle, kuncono kutsi ngiyigubhele phansi lemali, ngitisebentele mine kunekutsi ngisebentele yena.’

10. Yini leyentiwa sisebenti sesibili ngemathalenta aso?

¹⁰ Njengalesisebenti sekucala, nalesisebenti sesibili sawutsatsa njengalobaluleke kakhulu umsebenti lebesiwunikwe ngumphatsi waso futsi sasebenta kamatima kuze siwufeze. Ngenca yaloko, satalisa lamathalenta emphatsi waso ngalokuphindvwe kabili. Lomphatsi wasinika umvuzo lesisebenti ngenca yekusebenta kamatima. Akagcinanga nje ngekujabula,  kodvwa wasinika nalomunye umsebenti lomnyenti!

11. Yini lesingayenta kuze sijabule kakhulu?

¹¹ Ngendlela lefanako, singajabula kakhulu nangabe siwenta ngekutimisela wonkhe umsebenti lesiniketwe wona emsebentini waJehova. ‘Bani matasatasa’ emsebentini wekushumayela futsi usebente ngekutimisela ebandleni. (Imis. 18:5; Heb. 10:24, 25) Yilungiselele kahle imihlangano kuze utawuniketa timphendvulo letakhako. Titsatse njengaletibalulekile tabelo loba nato emhlanganweni losekhatsi neliviki. Nangabe ucelwe kutsi wente umsebenti lotsite ebandleni, sibambe sikhatsi futsi wetsembeke. Ungacabangi kutsi umsebenti loniketwe wona awukabaluleki nekutsi akudzingeki kutsi ucitse sikhatsi sakho lesinyenti uwenta. Yetama kamatima kutfutfukisa emakhono akho. (Taga 22:29) Nangabe uwenta ngekutimisela umsebenti waJehova, utawuba ngumngani wakhe lomkhulu futsi ujabule kakhulu. (Gal. 6:4) Kutawuba melula nekutsi ujabule nangabe labanye batfola sabelo lebewusifuna.—Rom. 12:15; Gal. 5:26.

12. Yini leyasita boMelissa naNick kutsi bajabule kakhulu?

¹² Usamkhumbula yini Melissa lesikhulume ngaye esigabeni 2, lobekangatsandza kuyosebenta eBethel nobe kuya eSikolweni SeBavangeli BeMbuso? Nanobe sifiso sakhe singeke sifezeke, kodvwa utsi: “Ngenta konkhe lengingakhona kukwenta emsebentini wekuba lihlahlandlela futsi ngetama kusebentisa tonkhe tindlela tekushumayela. Loku kungijabulise kakhulu.” Wenta njani Nick ngesikhatsi anganikwa umsebenti wekuba yinceku lesebentako? Utsi: “Nganaka kakhulu loko lebengikhona kukwenta, Iokufaka ekhatsi umsebenti wekushumayela nekuniketa timphendvulo letakhako emihlanganweni. Ngafaka nesicelo sekuyosebenta eBethel futsi semukelwa ngemnyaka lolandzelako.”

13. Utawuba yini umphumela nangabe uwenta ngekutimisela umsebenti loniketwe wona nyalo? (Umshumayeli 2:24)

¹³ Nangabe uwenta ngekutimisela umsebenti loniketwe wona nyalo, loko kusho kutsi utawuniketwa imisebenti leminyenti yini esikhatsini lesitako? Kungenteka, njengobe kwenteka kuNick. Kodvwa nangabe kungenteki, njengakuMelissa, utawuchubeka ujabula kakhulu futsi wenetiswe nguloko lomentela kona Jehova. (Fundza Umshumayeli 2:24.) Utawuphindze ujabule kakhulu ngobe utawube wati kutsi loko lokwentako kuyijabulisa kakhulu iNkhosi yetfu Jesu Khristu.

14. Yini lokufanele sihlale siyikhumbula nasicabanga ngemigomo lesitibekele yona emsebentini waJehova?

¹⁴ Nangabe senta konkhe lesingakwenta emsebentini lesiniketwe wona nyalo, loko kusho kutsi akukafaneli yini sifune tindlela tekwenta lokunyenti? Cha. Kufanele sitibekele imigomo letasisita kutsi sibe bafundzisi labancono futsi sibe lusito kakhulu kubazalwane betfu nabodzadze. Sitayifinyelela lemigomo nangabe sinaka kusita labanye kunekutsi sitinake tsine.—Taga 11:2; Imis. 20:35.

15. Ngumiphi leminye imigomo lengakusita kutsi ujabule kakhulu?

¹⁵ Ngumiphi imigomo longatibekela yona? Cela Jehova akusite ubone imigomo longatibekela yona futsi ukhone kuyifinyelela. (Taga 16:3; Jak. 1:5) Ungetama yini kutibekela munye walemigomo lesikhulume ngayo  esigabeni sekucala, lefaka ekhatsi kuba lihlahlandlela lelisitako nobe lelivamile, kuyosebenta eBethel nobe kwakha takhiwo tenhlangano? Mhlawumbe ungakhona kufundza lulwimi lolusha kuze uyoshumayela kulenye indzawo. Ungafundza lokunyenti ngaleminye  yalemigomo kusehluko 10 sencwadzi letsi “Ukuhlelelwa Ukwenza Intando KaJehova” futsi ukhulume nalabadzala belibandla lokulo. * Nawetama kuyifinyelela lemigomo, labanye batawubona kutsi uyatfutfuka futsi utawujabula kakhulu.

16. Yini longayenta nangabe kwanyalo ungakhoni kufinyelela umgomo lotsite?

¹⁶ Kodvwa kutsiwani nangabe ungakhoni kufinyelela ngisho namunye walemigomo lesesicoce ngayo? Yetama kutibekela umgomo longakhona kuwufinyelela. Cabanga nganayi leminye imigomo longatibekela yona.

17. Ngekusho kwa-1 KuThimothi 4:13, 15, yini umzalwane langayenta kuze abe ngumfundzisi lokahle kakhulu?

¹⁷ Fundza 1 KuThimothi 4:13, 15. Nangabe ungumzalwane lobhajatisiwe, ungetama kutfutfukisa emakhono akho ekukhuluma newekufundzisa. Kungani? Kungobe nawetama kamatima kufundza kahle, kukhuluma kahle nekufundzisa kahle, utawukhona kubasita labo labakulalele. Yetama kutibekela umgomo wekudadisha nekusebentisa loko lokutfolakala encwajaneni letsi Timisele Ekufundzeni Nasekufundziseni. Dadisha sifundvo ngasinye futsi usiphrakthize usekhaya, ngemuva kwaloko usebentise loko lokufundzile nasewubeka inkhulumo. Cela seluleko kumeluleki longumsiti nobe kulamanye emadvodza lamadzala elibandla “lasebenta kamatima ekukhulumeni nasekufundziseni.” * (1 Thim. 5:17) Unganaki nje kuphela kusebentisa tifundvo lotitfolako kulencwajana, kodvwa unake nendlela yekusita labakulalele kutsi bacinise kukholwa kwabo  futsi basebentise loko labakufundzako. Nawenta njalo, utawujabula kakhulu, futsi nabo batawujabula.

18. Yini lengasisita kutsi sifinyelele imigomo yetfu emsebentini wekushumayela?

¹⁸ Sonkhe sinemsebenti wekushumayela newekwenta bafundzi. (Mat. 28:19, 20; Rom. 10:14) Uyafuna yini kutfutfukisa emakhono akho kulomsebenti lobaluleke nakangaka? Dadisha incwajana letsi Timisele futsi utibekele imigomo letakusita kutsi ukusebentise loko lokufundzako. Ungatfola tintfo letitakusita kubhukwana lotsi Kuphila KwemaKhristu Nemsebenti Wawo—Incwajana Yekubhalela Emihlanganweni nakuma-video etincociswano letisibonelo labukelwa emihlanganweni lesekhatsi neliviki. Yetama tindlela letehlukahlukene kuze utfole lokhona kuyisebentisa. Nawutisebentisa letindlela, utawuba ngumfundzisi loncono kakhulu futsi utawujabula kakhulu.—2 Thim. 4:5.

19. Yini longayenta kuze ube nebuntfu lobujabulisa Nkulunkulu?

¹⁹ Nawucabanga ngemigomo longatibekela yona, ungawukhohlwa lomunye wemigomo lebaluleke kakhulu wekuba nebuntfu lobujabulisa Nkulunkulu. (Gal. 5:22, 23; Khol. 3:12; 2 Phet. 1:5-8) Ungawufinyelela njani lomgomo? Nasi sibonelo, ase sitsi ufuna kuba nekukholwa lokucinile. Ungafundza tihloko letitfolakala etincwadzini tetfu letikhuluma ngaloko longakwenta kuze ucinise kukholwa kwakho. Kungakusita nekubukela ema-video eMsakato we-JW laveta indlela bazalwane nabodzadze labakhombise ngayo kutsi banekukholwa lokucinile ngesikhatsi babhekene netimo letimatima. Ngemuva kwaloko, cabanga ngetindlela longalingisa ngato kukholwa kwabo ekuphileni kwakho.

20. Yini lesingayenta kuze sijabule kakhulu futsi singadvumateki kakhulu?

²⁰ Siyaciniseka kutsi sonkhe sifisa shengatsi singamentela lokunyenti kakhulu Jehova kunaloko lesikwentako nyalo. Emhlabeni lomusha waNkulunkulu, sitawukhona kumentela lokunyenti kakhulu. Kodvwa nangabe kwanyalo senta konkhe lesikhona kukwenta, sitawujabula kakhulu futsi ngeke sidvumateke kakhulu. Lokubaluleke kakhulu kutsi sitawudvumisa Jehova ‘Nkulunkulu wetfu lojabulako.’ (1 Thim. 1:11) Ngako asijabule ngemisebenti lesiyentela Nkulunkulu!