1-2. Ngekusho kweTihlabelelo 34:8, yini lokufanele siyente kuze sibone kutsi Jehova muhle?

ASE sitsi umuntfu ukupha kudla longazange sewukudle. Ungatfola lokutsite ngako ngekutsi ukubuke, uve kutsi kunukelela njani, utfole indlela lokuphekwe ngayo nobe ubute labanye kutsi bayakutsandza yini. Kodvwa indlela lekahle yekubona kutsi uyakutsandza yini kutsi ukudle.

² Singafundza ngebuhle baJehova ngekufundza liBhayibheli, netincwadzi tetfu futsi silalele labanye nabacoca ngetintfo letinhle Jehova labentele tona. Kodvwa sitawutibonela tsine kutsi Jehova muhle kangakanani ‘nasitinambitsela’ buhle bakhe. (Fundza Tihlabelelo 34:8.) Nasi sibonelo sendlela lesingakwenta ngayo loko. Ase sitsi sifuna kwenta umsebenti wasikhatsi sonkhe, kodvwa kuze siwufinyelele lomgomo kutawudzingeka sente kuphila kwetfu kube melula. Kungenteka sivamile kufundza ngesetsembiso saJesu lesitsi nasibeka kucala uMbuso, Jehova utasipha tintfo lesitidzingako, kodvwa sisengakase sakubona loko kwenteka kitsi. (Mat. 6:33) Nobe kunjalo, ngenca yekutsi siyasetsemba lesetsembiso saJesu, sinciphisa indlela lesisebentisa ngayo imali, sente lushintjo endleleni lesenta ngayo umsebenti wekutiphilisa, futsi sinake kakhulu umsebenti wekushumayela. Njengobe senta loko, siyatibonela kutsi vele Jehova uyatinakekela tidzingo tetfu. ‘Siyatinambitsela’ buhle baJehova.

3. Ngekuvumelana neTihlabelelo 16:1, 2, bobani Jehova labentela tintfo letinhle?

³ Jehova “muhle kubo bonkhe,” ngisho nakulabo labangamati. (Hla. 145:9; Mat. 5:45) Kodvwa ubentela tintfo letinhle kakhulu labo labamtsandzako nalabamkhonta ngemphefumulo  wonkhe. (Fundza Tihlabelelo 16:1, 2.) Ase sicoce ngaletinye tintfo letinhle Jehova lasentele tona.

4. Jehova ubentela njani tintfo letinhle labo labacala kusondzelana naye?

⁴ Ngaso sonkhe sikhatsi nasikusebentisa loko lesikufundza kuJehova siyabona kutsi kusisita njani. Nasi sibonelo, ngesikhatsi sifundza ngaye futsi sicala kumtsandza, wasisita sayekela imicabango lemibi kanye nekwenta tintfo letingamjabulisi. (Khol. 1:21) Ngetulu kwaloko, ngesikhatsi sitinikela kuJehova futsi sibhajatiswa, sabubona kakhulu buhle bakhe ngesikhatsi asenta siba nanembeza lohlantekile futsi sisondzelana kakhulu naye.—1 Phet. 3:21.

5. Ngutiphi tindlela lesibona ngato kutsi Jehova muhle nasishumayela?

⁵ Siyachubeka sibona kutsi Jehova muhle njengobe senta umsebenti wekushumayela. Unemahloni yini? Bantfu baJehova labanyenti banawo. Kungenteka ngaphambi kwekutsi ube yinceku yaJehova, bewungaticabangi uvakashela bantfu longabati emakhaya abo futsi ubacocela ngeliBhayibheli. Kodvwa lamuhla sewuhlale ukwenta loko. Ngetulu kwaloko, Jehova ukusitile kutsi uwujabulele umsebenti wekushumayela! Jehova ukusite nangaletinye tindlela. Ukusitile kutsi ukhone kwehlisa umoya nakwenteka uphatfwa kabi emsebentini wekushumayela. Uphindze wakusita wakhumbula umbhalo lokahle longawufundzela umnikati welikhaya lofuna kulalela. Ukunikete nemandla ekuchubeka ushumayela ngisho uhlangana nebantfu labangafuni kulalela.—Jer. 20:7-9.

6. Kuceceshwa lesikunikwa nguJehova kukhombisa njani kutsi muhle?

⁶ Jehova uphindze wasikhombisa kutsi muhle ngekutsi asiceceshele umsebenti wekushumayela. (Joh. 6:45) Emihlanganweni leba sekhatsi neliviki, silalela tincociswano letisibonelo letilungiselelwe kahle, futsi sikhutsatwa kutsi sitisebentise nasishumayela. Ekucaleni, singase sesabe kusebentisa indlela lensha kodvwa nasiyisebentisa singahle sitfole kutsi iyaphumelela ensimini lesikuyo. Emihlanganweni yelibandla neyesifundza sikhutsatwa kutsi setame kusebentisa tindlela letehlukene tekushumayela lokungenteka asizange sesike sitisebentise ngaphambili. Naloku kungasenta sesabe, kodvwa nasikwetama Jehova utasibusisa. Ase sicoce ngaletinye tibusiso Jehova latasipha tona nangabe sisebentisa tindlela letinsha kuze simentele lokuncono kakhulu ngisho nobe sikutiphi timo. Ngemuva kwaloko sitawubese sicoca ngalesingakwenta kuze sifinyelele imigomo lesitibekele yona.

7. Sitfola siphi sibusiso nasetama kwenta lokunyenti emsebentini wekushumayela?

⁷ Sisondzelana kakhulu naJehova. Cabanga ngesibonelo salomunye lomdzala welibandla lokutsiwa nguSamuel, * lokhonta nemkakhe eColombia. Bebakujabulela kuba ngemahlahlandlela ebandleni lasekhaya, kodvwa bebafuna kwenta lokunyenti emsebentini wekushumayela ngekutsi bayosita lapho kunesidzingo lesikhulu khona. Kuze bafinyelele lomgomo, kwadzingeka kutsi bayekele letinye tetintfo lebebatitsandza. Samuel utsi: “Sasebentisa emavi lakuMatewu 6:33 futsi sayekela kutsenga tintfo lesingatidzingi. Kodvwa kwaba matima kakhulu kushiya likhaya letfu. Belakhiwe ngendlela lesifuna ngayo futsi besingalikweleti.” Ngemuva kwekutfutsela kulelibandla lelisha, babona kutsi bebadzinga imali lencane kakhulu kuze baphile kunangaphambili. Samuel utsi: “Siyibonile indlela  Jehova lasicondzisa ngayo nalayiphendvula ngayo imithantazo yetfu. Sibonile nekutsi Jehova uyasemukela futsi uyasitsandza, loko sikubone ngetindlela lebesingakake sitibone.” Ungakhona yini kwenta lokunyenti emsebentini wekushumayela? Nawungakhona, ungaciniseka kutsi Jehova utawusondzelana nawe futsi utakunakekela.—Hla. 18:25.

8. Yini loyifundzako kulokwashiwo ngu-Ivan naViktoria?

⁸ Sitfola injabulo emsebentini lesiwentela Nkulunkulu. Naka naku lokushiwo ngu-Ivan naViktoria labashadene, futsi labangemahlahlandlela eKyrgyzstan. Baphila imphilo lemelula kuze batovolontiya kunobe ngusiphi sabelo, lokufaka ekhatsi umsebenti wekwakha. Ivan utsi: “Besisebenta kamatima kunobe ngusiphi sabelo. Ngisho nobe ekupheleni kwelilanga besitiva sidziniwe, kodvwa besijabula ngobe besati kutsi sisebentise emandla etfu emsebentini waJehova. Besiphindze sijatjuliswe kutsi sitfole bangani labasha saphindze senta tintfo letinyenti letimnandzi lesitawuhlale sitikhumbula.”—Mak. 10:29, 30.

9. Lomunye dzadze lobhekene netimo letimatima wenteni kuze akhone kwentela Jehova lokunyenti, futsi ube yini umphumela?

⁹ Sitfola injabulo emsebentini waJehova ngisho nobe sibhekene netimo letimatima. Nasi sibonelo, Mirreh, longumfelokati losakhulile eWest Africa, wayekela kuba ngudokotela futsi wacala kuba lihlahlandlela. Mirreh unesifo sematsambo futsi ukhona kwenta li-awa linye nje kuphela nakashumayela emtini ngemuti. Kodvwa uyakhona kucitsa sikhatsi lesinyenti ashumayela etindzaweni tawonkhe wonkhe. Unebantfu labanyenti labuyela kubo naladadisha nabo liBhayibheli futsi labanye babo ucoca nabo ngelucingo. Yini leyabangela Mirreh kutsi afune kwentela Jehova lokunyenti? Utsi: “Ngimtsandza kakhulu Jehova naKhristu Jesu. Ngihlale ngithantaza kuJehova ngimcele kutsi angisite ngente lokunyenti emsebentini wakhe.”—Mat. 22:36, 37.

10. Njengobe kuvetiwe ku-1 Phetro 5:10, yini Jehova labentela yona labo labamentela lokunyenti?

¹⁰ Sitfola kuceceshwa lokwengetiwe lokuvela kuJehova. Kenny, lolihlahlandlela eMauritius, wabona kutsi loku kuliciniso. Ngemuva kwekufundza liciniso, wayekela enyuvesi, wabhajatiswa futsi wangenela umsebenti wasikhatsi sonkhe. Utsi: “Ngetama kulingisa sibonelo semphrofethi Isaya lowatsi: ‘Nangu mine! Tfuma mine!’” (Isa. 6:8) Kenny ube nesandla ekwakheni takhiwo letinyenti tenhlangano, waphindze wasita ekuhumusheni tincwadzi letisekelwe eBhayibhelini ngelulwimi lwakhe. Utsi: “Kuceceshwa lengikutfolile kungifundzise emakhono lebengiwadzinga kuze ngitente kahle tabelo tami.” Kodvwa akagcinanga nje ngekufundza kutsi angawenta njani umsebenti. Uchubeka atsi: “Ngabona kutsi kunetintfo lengingakhoni kutenta nangebuntfu lebengibudzinga kuze ngibe sikhonti saJehova lesikahle kakhulu.” (Fundza 1 Phetro 5:10.) Mhlawumbe nawe kungadzingeka wente lushintjo kuze Jehova akuceceshe ngetindlela letinyenti.

11. Yini bodzadze labaseSouth Korea labayenta kuze bakhone kushumayela, futsi waba yini umphumela? (Buka sitfombe lesisekhasini lekucala.)

¹¹ Ngisho nalabo lesebabe boFakazi iminyaka leminyenti bayadzinga kuceceshwa kuze bakhone kusebentisa tindlela letinsha tekushumayela. Ngesikhatsi se-COVID-19, labadzala belibandla leliseSouth Korea babhala batsi: “Labanye lebebacabanga kutsi ngeke bakhone kushumayela ngenca yesimo sabo semphilo, nyalo bayakhona basebentisa i-videoconferencing. Bodzadze labatsatfu labaseminyakeni yabo-80 bafundza kusebentisa i-computer kuze bakhone kushumayela futsi nyalo bashumayela cishe onkhe malanga.” (Hla. 92:14, 15) Ungatsandza yini kwenta  lokunyenti emsebentini wekushumayela futsi uchubeke ubona buhle baJehova? Nati letinye tintfo longatenta kuze ufinyelele lomgomo.

12. Yini Jehova layetsembisa labo labetsembela kuye?

¹² Fundza kwetsembela kuJehova. Wetsembisa kusinika tintfo letinyenti letinhle nangabe setsembela kuye futsi simnika lokuncono kakhulu. (Mal. 3:10) Dzadze waseColombia lokutsiwa nguFabiola wabona ngesikhatsi Jehova asigcina lesetsembiso kuye. Bekafuna kuba lihlahlandlela lelivamile ngemuva kwekubhajatiswa. Kodvwa bekudzingeka kutsi asebente kuze akhone kunakekela umndeni wakhe. Ngesikhatsi sekaneminyaka levumako kutsi angatsatsa umhlalaphansi, wathantaza kakhulu kuJehova amcela kutsi amsite. Utsi: “Kuvame kutsatsa sikhatsi lesidze ngaphambi kwekutsi imali yemhlalaphansi iphume, kodvwa yami yaphuma ngemuva kwenyanga nje ngifake sicelo. Kwenteka intfo lesimanga!” Ngemuva kwetinyanga letimbili, waba lihlahlandlela. Nyalo sewuseminyakeni yabo-70 futsi sewube lihlahlandlela iminyaka lengetulu kwalengu-20. Kuyo yonkhe leminyaka, usite bantfu labangu-8 kutsi babhajatiswe. Utsi: “Nanobe ngaletinye tikhatsi ngihle ngiba butsakatsaka, kodvwa Jehova ungisita onkhe malanga kutsi ngichubeke ngilihlahlandlela.”

13-14. Ngutiphi tibonelo letingasisita kuze setsembele kuJehova futsi sente lokunyenti emsebentini wakhe?

¹³ Fundza etibonelweni talabo labetsembela kuJehova. LiBhayibheli linetibonelo letinyenti tebantfu labawenta ngekutimisela  umsebenti waJehova. Etikhatsini letinyenti, Jehova bekatibusisa letikhonti takhe ngemuva kwekutsi setente lokutsite lokukhombisa kutsi tiyametsemba. Nasi sibonelo, Jehova wabusisa Abrahama ngemuva kwekutsi sekashiye likhaya lakhe, “nanobe bekangati kutsi uyaphi.” (Heb. 11:8) Jakobe watfola sibusiso lesikhetsekile ngemuva kwekulwa nengilosi. (Gen. 32:24-30) Ngesikhatsi sive saka-Israyeli sesitawungena eVeni Lesetsembiso, lesive sakhona kwewela ngemuva kwekutsi baphristi bafake tinyawo tabo emantini lanemandla eMfula iJordane.—Josh. 3:14-16.

¹⁴ Kukhona nalokunye longakufundza etibonelweni talamuhla taboFakazi labetsembele kuJehova futsi bamentela lokunyenti. Nasi sibonelo, umzalwane lokutsiwa nguPayton kanye nemkakhe Diana, bebatsandza kufundza ngebazalwane nabodzadze labentela Jehova lokunyenti, njengalabo lokukhulunywa ngabo ngephasi kwesihloko lesitsi, “Batinikela Ngekutitsandzela.” * Payton utsi: “Besitsi nasifundza ngabo, kube shengatsi sibuka umuntfu lodla kudla lokumnandzi. Njengobe sichubeka simbuka, besifisa ‘kutinambitsela futsi sibone kutsi Jehova muhle.’” Ekugcineni, Payton naDiana batfutsela lapho kunesidzingo lesikhulu khona sebamemeteli. Uke watifundza yini letihloko? Uke wayibukela yini i-video letsi Kushumayela Ensimini Lekhashane—Australia naletsi “Witnessing in Isolated Territory—Ireland” latfolakala ku-jw.org? Letihloko nalama-video kungakusita utfole tindlela longatisebentisa kuze wentele Jehova lokunyenti.

15. Kungasisita njani kubakhetsa kahle bantfu lesitihlanganisa nabo?

¹⁵ Bakhetse kahle bantfu lotihlanganisa nabo. Kumelula kutsi sidle kudla lesingazange sesikudle nasinebantfu labakutsandzako. Ngendlela lefanako, nangabe sicitsa sikhatsi nebantfu lababeka Jehova kucala ekuphileni kwabo, kungenteka natsi sifune tindlela tekumentela lokunyenti. Nguloko lokwenteka kuKent naVeronica. Kent utsi: “Bangani betfu kanye nemalunga emndeni basikhutsata kutsi sifune tindlela letinsha tekumentela lokunyenti Jehova. Sabona kutsi nasitihlanganisa nalabo labafuna uMbuso kucala, siba nesibindzi sekwenta intfo lensha.” Nyalo boKent naVeronica bangemahlahlandlela lakhetsekile eSerbia.

16. Njengobe kuvetwe emfanekisweni waJesu lokuLukha 12:16-21, kungani kufanele sikulungele kutidzela?

¹⁶ Dzela tintfo letitsite ngenca yaJehova. Kute sidzingo sekutsi sidzele tonkhe tintfo lesinato kuze sijabulise Jehova. (Shu. 5:19, 20) Nobe kunjalo, kube besingayekela kwenta lokunyenti emsebentini waJehova, ngenca nje yekutsi asifuni kudzela letinye tintfo lesititsandzako, besitawufana nalendvodza lesemfanekisweni waJesu, leyasebenta kamatima kuze ibe netintfo letinhle letinyenti kodvwa yangamnaki Nkulunkulu. (Fundza Lukha 12:16-21.) Lomunye umzalwane lohlala eFrance lokutsiwa nguChristian, utsi: “Besengite kahle sikhatsi sekukhonta Jehova kanye nesemndeni wami.” Yena nemkakhe bancuma kuba ngemahlahlandlela. Kodvwa kuze bafinyelele lomgomo, kwadzingeka bayekele umsebenti lebebawenta. Kuze batinakekele, bacala ibhizinisi lencane yekuklina futsi bafundza kwenetiswa ngulokuncane labanako. Bajabula yini ngekutsi badzela letinye tintfo kuze babe ngemahlahlandlela? Christian utsi: “Nyalo siwujabulela kakhulu umsebenti wekushumayela futsi kuyasijabulisa kubona bantfu lesidadisha nabo liBhayibheli nalesibuyela kubo bafundza ngaJehova.”

17. Yini lengasivimbela kutsi setame kusebentisa tindlela letinsha tekushumayela?

 ¹⁷ Kulungele kwetama tindlela letinsha tekushumayela. (Imis. 17:16, 17; 20:20, 21) Shirley, lolihlahlandlela eMelika, kwadzingeka asebentise tindlela letinsha tekushumayela ngesikhatsi se-COVID-19. Ekucaleni bekangabata kushumayela ngelucingo. Kodvwa ngemuva kwekuceceshwa ngeliviki lelikhetsekile, wabese ucala kushumayela njalo ngelucingo. Utsi: “Ekucaleni bengesaba, kodvwa nyalo sengiyakujabulela. Sikhona kucoca nebantfu labanyenti kunangesikhatsi sishumayela emtini ngemuti!”

18. Yini lengasisita nangabe sibhekana netinkinga letingenta kutsi kube matima kutsi sente lokunyenti emsebentini wekushumayela?

¹⁸ Tibekele umgomo futsi wetame kuwufinyelela. Nasinetinkinga, siyathantaza sicele lusito, futsi sicabangisise ngalesitakwenta kuze sitincobe. (Taga 3:21) Sonia, lolihlahlandlela lelivamile ecenjini lesiRomany eYurophu, utsi: “Ngitsandza kuyibhala ephepheni imigomo yami futsi ngilibeke endzaweni lengitalibona khona. Etafuleni lami kunemdvwebo wemigcwaco lemibili leya etindzaweni letingafani. Nakufanele ngente sincumo, ngibuka lemigwaco futsi ngicabange ngekutsi sincumo lengitasenta sitangiyisa kuphi.” Sonia wetama kuba nembono lokahle ngetinkinga takhe. Utsi: “Inkinga lengibhekana nayo ngiyitsatsa njengelubondza lolungivimbela kutsi ngifinyelele umgomo wami, nobe njengelibhuloho lelingisita kutsi ngiwufinyelele, kuya ngami kutsi ngikhetsa ini.”

19. Yini lokufanele sitimisele kuyenta?

¹⁹ Jehova usibusisa ngetindlela letinyenti. Singakhombisa kutsi sibonga kakhulu ngetintfo lasentela tona ngekutsi sente konkhe lesingakhona kukwenta kuze simdvumise. (Heb. 13:15) Loko kungafaka ekhatsi kumentela tintfo letinyenti kuze simkhonte, futsi Jehova angasibusisa kakhulu ngenca yaloko. Shengatsi onkhe malanga singafuna tindlela ‘tekunambitsa futsi sibone kutsi Jehova muhle.’ Nasenta njalo, sitawufana naJesu lowatsi: “Kudla kwami kwenta intsandvo yaloyo longitfumile nekutsi ngicedze umsebenti wakhe.”—Joh. 4:34.