1. Ngumiphi imibuto lesingahle sitibute yona nasicabanga ngako konkhe Jehova lakudalile?

NASICABANGA ngako konkhe Jehova lakudalile, kungenteka sitive njengemhlabeleli Davide lowabuta watsi: “Nangibuka emazulu, lokungumsebenti wetandla takho, inyanga netinkhanyeti lotentile, umuntfu abeyini-ke kutsi ungahlale umkhumbula, nendvodzana yemuntfu beyiyini kutsi ungayinakekela?” (Hla. 8:3, 4) NjengaDavide, singahle sicabange kutsi sibancane kakhulu nasicatsaniswa netinkhanyenti letidalwe nguJehova, futsi kungasimangalisa kakhulu kutsi uyasinaka. Kodvwa sitawubona kutsi Jehova wabanakekela bo-Adamu na-Eva waphindze wabenta emalunga emndeni wakhe.

2. Yini Jehova lebekafuna bo-Adamu na-Eva kutsi bayente?

² Bo-Adamu na-Eva bebabantfwana baJehova bekucala basemhlabeni, futsi Jehova bekanguBabe wabo wasezulwini lobatsandzako. Bekalindzele kutsi lamalunga emndeni wakhe abambisane naye. Nkulunkulu wabatjela watsi: “Talanani nandze nigcwale emhlabeni futsi niwuncobe.” (Gen. 1:28) Bekafuna kutsi babe nebantfwana baphindze bawunakekele kahle umhlaba lebewulikhaya labo. Kube bamlalela Jehova futsi benta loko bekacele kutsi bakwente, bona kanye nebantfwana babo bebatawuchubeka bangemalunga emndeni waNkulunkulu kuze kube phakadze.

3. Yini lesenta sitsi Jehova waniketa bo-Adamu na-Eva indzawo lebalulekile emndenini wakhe?

³ Bo-Adamu na-Eva bebanendzawo lebalulekile emndenini waJehova. Naku Davide lakusho kuTihlabelelo 8:5 mayelana nendalo yaJehova lebantfu: “Umente waba ngephansana  kwetingilosi, futsi wametfwesa ludvumo nekuhlonipheka.” Kuliciniso kutsi Jehova akazange ente bantfu babe nemandla njengetingilosi, bahlakaniphe njengato baphindze babe nemakhono njengato. (Hla. 103:20) Nobe kunjalo, bantfu ‘bangephansana’ nje kwetingilosi letinemandla. Loko kuyamangalisa! Ngesikhatsi Jehova adala batali betfu bekucala, wabanika imphilo lenhle.

4. Njengobe bo-Adamu na-Eva bangamlalelanga Jehova, yini leyenteka kubo, futsi sitawucoca ngani kulesihloko?

 ⁴ Lokubuhlungu kutsi bo-Adamu na-Eva yabalahlekela indzawo yabo emndenini waJehova. Loko kwabangela titukulwane tabo tinkinga letimatima, njengobe sitawubona kulesihloko. Kodvwa injongo yaJehova ayikashintji. Ufuna kutsi bantfu labalalelako babe bantfwana bakhe kuze kube phakadze. Kwekucala, ase sicoce ngekutsi Jehova ukhombise njani kutsi sibalulekile kuye. Sitawubese sicoca ngaloko lesingakwenta kuze sikhombise kutsi sifuna kuba ngemalunga emndeni waNkulunkulu. Ekugcineni, sitawucoca ngetibusiso letitawujatjulelwa bantfwana baJehova lamhlabeni kuze kube phakadze.

5. Singakhombisa njani kutsi siyabonga kutsi Nkulunkulu wasidala saba ngumfanekiso wakhe?

⁵ Jehova ukhombise kutsi sibalulekile ngekusenta sibe ngumfanekiso wakhe. (Gen. 1:26, 27) Ngenca yekutsi sentiwe saba ngumfanekiso waNkulunkulu, singaba nebuntfu bakhe lobuhle lobufaka ekhatsi lutsandvo, luvelo, kwetsembeka nekulunga. (Hla. 86:15; 145:17) Njengobe setama kuba nalobuntfu, sidvumisa Jehova futsi sikhombisa kutsi siyambonga. (1 Phet. 1:14-16) Nangabe sitiphatsa ngendlela lejabulisa Babe wetfu wasezulwini, siyajabula futsi senetiseke. Ngetulu kwaloko, ngenca yekutsi sinebuntfu lobufana nebaJehova, singaba luhlobo lwebantfu lalufunako emndenini wakhe.

6. Jehova wakhombisa njani kutsi bantfu babalulekile ngesikhatsi adala umhlaba?

⁶ Jehova usilungiselele likhaya lelihle. Kusesele sikhatsi lesidze ngaphambi kwekutsi Jehova adale umuntfu wekucala, walungiselela bantfu umhlaba. (Jobe 38:4-6; Jer. 10:12) Ngenca yekutsi Jehova unemusa futsi uyephana, wadala tintfo letinyenti letinhle kuze sijabule. (Hla. 104:14, 15, 24) Ngaletinye tikhatsi bekacabanga ngetintfo latentile, futsi ‘wabona kutsi tinhle.’ (Gen. 1:10, 12, 31) Wakhombisa kutsi bantfu babalulekile ngekubenta ‘babuse’ tonkhe tintfo letinhle latidalile emhlabeni. (Hla. 8:6) Nkulunkulu ufuna kutsi bantfu labete sono bakujabulele kunakekela indalo yakhe lenhle kuze kube phakadze. Uhlale umbonga yini Jehova ngalesetsembiso sakhe lesihle kangaka?

7. Joshuwa 24:15 ukhombisa njani kutsi umuntfu unenkhululeko yekutikhetsela?

⁷ Jehova usinikete inkhululeko yekutikhetsela. Singatikhetsela kutsi yini lesifuna kuyenta ekuphileni. (Fundza Joshuwa 24:15.) Jehova usinikete inkhululeko yekutentela tincumo. Nkulunkulu wetfu lonelutsandvo uyajabula nangabe sikhetsa kumkhonta. (Hla. 84:11; Taga 27:11) Inkhululeko yetfu yekutikhetsela singayisebentisa kuze sente letinye tincumo letinyenti letinhle. Cabanga ngendlela Jesu layisebentisa ngayo inkhululeko yakhe yekutikhetsela.

8. Niketa sibonelo sendlela Jesu layisebentisa ngayo inkhululeko yakhe yekutikhetsela.

⁸ Singamlingisa Jesu ngekutsi sente tidzingo talabanye tite kucala kunetetfu. Ngalelinye lilanga, ngesikhatsi Jesu nebaphostoli bakhe badzinwe kakhulu, baya endzaweni lethulile kuze baphumule. Kodvwa abazange bakhone kuphumula ngobe bekunesicumbi sebantfu lebesifuna kufundziswa nguJesu. Kodvwa loko akuzange kumtfukutselise. Esikhundleni  saloko, wasihawukela lesicumbi sebantfu. Ngako wenta njani Jesu? “Wase usifundzisa tintfo letinyenti.” (Mak. 6:30-34) Nangabe silingisa Jesu ngekutsi sisebentise sikhatsi setfu nemandla etfu kuze sisite labanye, sitawube sidvumisa Babe wetfu wasezulwini. (Mat. 5:14-16) Ngetulu kwaloko, sitawube sikhombisa Jehova kutsi sifuna kuba ngemalunga emndeni wakhe.

9. Ngusiphi sipho lesihle Jehova lasinikete bantfu?

⁹ Jehova wente bantfu kutsi bakhone kuba nebantfwana, wabanika nemsebenti wekubafundzisa kutsi bamtsandze baphindze bamkhonte. Nangabe ungumtali, usitsatsa njengalesibalulekile yini lesipho lesiligugu? Nanobe Jehova anikete tingilosi emakhono lamanyenti lamahle, kodvwa akatenti takhona kuba nebantfwana. Ngako nangabe ungumtali, jabula kakhulu ngelilungelo lonalo lekukhulisa bantfwana. Batali baniketwe umsebenti lobalulekile wekukhulisa bantfwana babo “ngekubayala nangesicondziso saJehova.” (Ef. 6:4; Dut. 6:5-7; Hla. 127:3) Kuze inhlangano yaNkulunkulu isite batali, ibalungiselele emathulusi lamanyenti lasekelwe eBhayibhelini, lafaka ekhatsi tincwadzi, ema-video, tingoma kanye netihloko letitfolakala ku-internet. Kuyacaca kutsi Babe wetfu wasezulwini kanye neNdvodzana yakhe babatsandza kakhulu bantfwana. (Luk. 18:15-17) Jehova uyajabula nangabe batali betsembela kuye futsi benta konkhe lokusemandleni abo kuze banakekele bantfwana babo labaligugu. Batali labenta njalo basita bantfwana babo kutsi babe nelitsemba lekuba ngemalunga emndeni waJehova kuze kube phakadze!

10-11. Nguliphi litfuba Jehova lasinikete lona asebentisa inhlawulo?

¹⁰ Jehova wasinika iNdvodzana yakhe leligugu kakhulu kuze siphindze sibe ngemalunga emndeni wakhe. Njengobe sibonile  esigabeni 4, ngesikhatsi bo-Adamu na-Eva bona, bebangeke basaba ngemalunga emndeni waJehova bakanye nebantfwana babo. (Rom. 5:12) Bo-Adamu na-Eva bakhetsa kungamlaleli ngemabomu Nkulunkulu, ngako bekufanele kutsi abacoshe emndenini wakhe. Kodvwa bekutawentekani ebantfwaneni babo? Jehova uyabatsandza bantfu, ngako wenta kutsi bantfwana babo labalalelako babe ngemalunga emndeni wakhe. Loko wakwenta ngemhlatjelo weNdvodzana yakhe lekuphela kwayo, lenguJesu Khristu. (Joh. 3:16; Rom. 5:19) Ngenca yemhlatjelo waJesu, bantfu labangu-144 000 labetsembekile batawuba ngemadvodzana aNkulunkulu.—Rom. 8:15-17; Semb. 14:1.

¹¹ Ngetulu kwaloko, tigidzi tebantfu labetsembekile tenta intsandvo yaNkulunkulu. Tinelitsemba lekuba ngemalunga emndeni waNkulunkulu ngemuva kweluvivinyo lwekugcina ekupheleni kweminyaka lengu-1 000. (Hla. 25:14; Rom. 8:20, 21) Kwanyalo setivele tibita Jehova uMdali wato ngekutsi ‘nguBabe.’ (Mat. 6:9) Nalabavuswe ekufeni batawunikwa litfuba lekufundza ngaloko Jehova lakulindzele kubo. Labo labakhetsa kulalela sicondziso sakhe nabo batawuba ngemalunga emndeni wakhe.

12. Nyalo sitawuphendvula muphi umbuto?

¹² Njengobe sesibonile, Jehova wente tintfo letinyenti kuze akhombise kutsi bantfu babalulekile. Labagcotjiwe sewuvele ubente emadvodzana akhe, futsi unikete emalunga ‘esicumbi lesikhulu’ litsemba lekuba bantfwana bakhe emhlabeni lomusha. (Semb. 7:9) Yini lesingayenta nyalo nangabe sifuna kukhombisa Jehova kutsi sifuna kuba ngemalunga emndeni wakhe kuze kube phakadze?

13. Yini lesingayenta kuze sibe ngemalunga emndeni waNkulunkulu? (Makho 12:30)

¹³ Khombisa kutsi uyamtsandza Jehova ngekutsi umkhonte ngenhlitiyo yakho yonkhe.  (Fundza Makho 12:30.) Kuto tonkhe tintfo lesitiphiwe nguNkulunkulu, kungenteka lesinye setipho lesikhulu kakhulu lilungelo lekumkhonta. Sikhombisa Jehova kutsi siyamtsandza ngekutsi “sigcine imiyalo yakhe.” (1 Joh. 5:3) Lomunye umyalo Jehova lafuna kutsi siwulalele ngulowo lowashiwo nguJesu wekutsi sente bantfu babe bafundzi futsi sibabhabhatise. (Mat. 28:19) Waphindze wasiyala kutsi sitsandzane. (Joh. 13:35) Jehova utawenta labo labagcina imiyalo yakhe kutsi babe ngemalunga emndeni wakhe losemhlabeni wonkhe.—Hla. 15:1, 2.

14. Singakhombisa njani kutsi siyabatsandza labanye? (Matewu 9:36-38; KubaseRoma 12:10)

¹⁴ Khombisa kutsi uyabatsandza labanye. Lutsandvo lubuntfu baJehova lobuhamba embili. (1 Joh. 4:8) Jehova wakhombisa kutsi uyasitsandza ngaphambi kwekutsi simati. (1 Joh. 4:9, 10) Sisuke simlingisa nasikhombisa kutsi siyabatsandza labanye. (Ef. 5:1) Lenye indlela lekahle yekukhombisa kutsi siyabatsandza bantfu, kubafundzisa ngaJehova litfuba lisekhona. (Fundza Matewu 9:36-38.) Nasenta njalo, sisuke sibanika litfuba lekufundza kutsi yini labangayenta kuze babe ngemalunga emndeni waNkulunkulu. Ngemuva kwekutsi umuntfu sekabhajatisiwe, kufanele sichubeke simtsandza futsi simhlonipha. (1 Joh. 4:20, 21) Singakwenta njani loko? Lenye indlela lesingakwenta ngayo kutsi simetsembe kutsi unetisusa letinhle. Nasi sibonelo, nangabe singacondzi kutsi kungani ente lokutsite, angeke sicabange kutsi loko lakwentile ukwente ngetizatfu tebugovu. Esikhundleni saloko, sitamhlonipha umzalwane wetfu, simtsatse njengalomkhulu kunatsi.—Fundza KubaseRoma 12:10; Fil. 2:3.

15. Bobani lokufanele sibe nemusa kubo?

¹⁵ Bani nemusa kubo bonkhe bantfu. Nangabe sifuna kuba ngemalunga emndeni waJehova kuze kube phakadze, kufanele sikusebentise ekuphileni kwetfu loko lesikufundza eVini laNkulunkulu. Nasi sibonelo, Jesu wasifundzisa kutsi kufanele sibe nemusa kubo bonkhe bantfu, lokufaka ekhatsi titsa tetfu. (Luk. 6:32-36) Ngaletinye tikhatsi, kungahle kube matima kukwenta loko. Nangabe kunjalo, kufanele sifundze kucabanga njengaJesu futsi sente njengaye. Nangabe senta konkhe lokusemandleni etfu kuze silalele Jehova futsi silingise Jesu, sitawube sikhombisa Babe wetfu wasezulwini kutsi sifuna kuba ngemalunga emndeni wakhe kuze kube phakadze.

16. Singalivikela njani lidvumela lemndeni waJehova?

¹⁶ Vikela lidvumela lemndeni waJehova. Emndenini, kuvamile kutsi umfana lomncane ente tintfo letentiwa ngubhuti wakhe lomdzala. Nangabe lona lomdzala asebentisa timiso teliBhayibheli ekuphileni kwakhe, utawuba sibonelo lesihle kubhuti wakhe lomncane. Nangabe lona lomdzala enta tintfo letimbi, kungenteka lobhuti wakhe lomncane ente lokufanako. Loku kuyafana nasemndenini waJehova. Nangabe umKhristu lobeketsembekile aba sihlubuki nobe atiphatsa kabi nobe enta tintfo letimbi, kungenteka labanye bente njengaye. Labo labenta njalo bona lidvumela lemndeni waJehova. (1 Thes. 4:3-8) Kufanele singatilingisi tibonelo letimbi futsi singavumeli lutfo kutsi lusehlukanise naBabe wetfu losezulwini lositsandzako.

17. Nguyiphi indlela yekucabanga lokufanele siyigweme, futsi kungani?

¹⁷ Yetsembela kuJehova hhayi emcebeni. Jehova wetsembisa kutsi utasipha kudla, kwekwembatsa, kanye nendzawo yekuhlala nangabe sifuna kucala uMbuso wakhe futsi siphila ngekuvumelana netimiso takhe letilungile. (Hla. 55:22; Mat. 6:33) Nangabe sisetsemba lesetsembiso, angeke sicabange kutsi umcebo walelive utasivikela futsi usente sijabule. Siyati  kutsi lokukuphela kwendlela lesingatfola ngayo kuthula mbamba kutsi sente intsandvo yaJehova. (Fil. 4:6, 7) Ngisho nobe singakhona kutsenga tintfo letinyenti, kufanele sicabange kutsi sinaso yini vele sikhatsi nobe emandla ekutisebentisa nekutinakekela. Kungenteka yini sititsandze kakhulu tintfo lesinato? Kufanele sikhumbule kutsi Nkulunkulu usinikete umsebenti lokufanele siwente emndenini wakhe. Loko kusho kutsi akukafaneli sivume kuphazamiseka. Asifuni kulingisa lelijaha lelala kukhonta Jehova futsi libe ngulelinye lemadvodzana akhe ngenca nje yekutsi belitsandza tintfo letimbalwa talamhlabeni!—Mak. 10:17-22.

18. Ngutiphi tibusiso letitawujatjulelwa bantfu labalalelako?

¹⁸ Bantfu labalalelako batawujabulela lilungelo lelikhulu kakhulu lekutsandza Jehova nelekumkhonta kuze kube phakadze! Labo labanelitsemba lekuphila emhlabeni batawujabulela nekunakekela umhlaba lowadalwa kuze ube likhaya labo lelihle. Ngekushesha, uMbuso waNkulunkulu utawenta kutsi umhlaba kanye nato tonkhe tintfo letikuwo tiphindze tibe tinhle. Jesu utawucatulula tonkhe tinkinga letabangwa ngu-Adamu na-Eva ngesikhatsi bancuma kushiya umndeni waNkulunkulu. Jehova utawuvusa tigidzi tebantfu labafa futsi atinike litfuba lekuphila phakadze emhlabeni lotawube sewulipharadisi, setiphile saka! (Luk. 23:42, 43) Nasebete sono, bonkhe bantfu labakhonta Jehova batawuba ‘neludvumo nekuhlonipheka’ Davide lakhuluma ngako.—Hla. 8:5.

19. Yini lokufanele sihlale siyikhumbula?

¹⁹ Nangabe ulilunga ‘lesicumbi lesikhulu,’ unelitsemba lelihle kakhulu. Nkulunkulu uyakutsandza futsi ufuna ube lilunga lemndeni wakhe. Ngako yenta konkhe lokusemandleni akho kuze umjabulise. Lilanga nelilanga hlale ucabanga ngetetsembiso taNkulunkulu. Litsatse njengalelibalulekile lilungelo lonalo lekukhonta Babe wetfu wasezulwini lesimtsandzako, futsi ulitsatse njengalelibalulekile litsemba lonalo lekumdvumisa kuze kube phakaze!