1, 2. Kungani incwadzi yemaRoma sehluko 8 ibalulekile kumaKhristu lagcotjiwe?

NAWUCABANGA ngesikhumbuto sekufa kwaJesu lesigujwa njalo ngemnyaka, uyaye uyifundze yini incwadzi yemaRoma 8:15-17? Mhlawumbe kunjalo. Lamavesi achaza kutsi emaKhristu ati njani kutsi agcotjiwe. Atsi umoya ufakazelana nemoya wabo. Livesi lekucala kulesehluko likhuluma ngalabo “labamunye naKhristu Jesu.” Kodvwa, lesehluko sikhuluma ngalabagcotjiwe kuphela yini? Siyakhuluma yini ngemaKhristu lanelitsemba lekuphila emhlabeni?

² Lesehluko sikhuluma ngalokuyinhloko ngemaKhristu lagcotjiwe. Amukela “umoya” njengalalindzele ‘kutsatfwa entiwe emadvodzana, akhululwe ngenhlawulo kulemitimba [yawo].’ (Rom. 8:23) Anelitsemba lekuyoba ngemadvodzana aNkulunkulu ezulwini. Loku kuliciniso ngoba angemaKhristu labhajatisiwe futsi Nkulunkulu wasebentisa sihlengo kuze awatsetselele tono tawo kwase kutsiwa alungile njengemadvodzana akhe.​—Rom. 3:23-26; 4:25; 8:30.

3. Kungani siphetsa ngekutsi incwadzi yemaRoma 8 ibalulekile nakulabo labanelitsemba lekuphila emhlabeni?

³ Noma kunjalo, incwadzi yemaRoma sehluko 8 ibalulekile nakulabo  labanelitsemba lekuphila emhlabeni ngobe nabo Nkulunkulu ubabheka njengalabalungile. Bufakazi baloko sibubona kuloko Pawula lakusho etahlukweni tekucala talencwadzi. Esahlukweni 4 ukhuluma nga-Abrahama. Lendvodza lebeyinekukholwa yaphila ngaphambi kwekutsi Jehova anikete ema-Israyeli umtsetfo futsi bekusesele sikhatsi lesidze kutsi Jesu afele tono tetfu. Noko, Jehova wakunaka kukholwa lokucinile kwa-Abrahama futsi watsi ulungile. (Fundza Roma 4:20-22) Nalamuhla Jehova uyawanaka emaKhristu letsembekile futsi lanelitsemba lekuphila phakadze emhlabeni. Ngako, nabo bangazuza eselulekweni lesitfolakala kulencwadzi yemaRoma sehluko 8 lesiniketwa labo labalungile.

4. Incwadzi yemaRoma 8:21 kufanele isisite sitibute muphi umbuto?

⁴ EmBhalweni wemaRoma 8:21, sitfola bufakazi bekutsi nakanjani live lelisha litawufika. Lelivesi lisetsembisa kutsi indalo itawukhululwa “ekugcilatweni konakala, bese itfola inkhululeko lekhatimulako yebantfwana baNkulunkulu.” Ngako, singase sitibute kutsi: Ngiyaciniseka yini kutsi ngitawuba ngulomunye walabatfola lesibusiso? Incwadzi yemaRoma 8 isiniketa seluleko lesingasisita sikhone kuciniseka.

5. KumaRoma 8:4-13 Pawula wakhuluma ngani?

⁵ Fundza Roma 8:4-13. Incwadzi yemaRoma sehluko 8 icatsanisa labo “labacondziswa yinyama” nalabo “labacondziswa ngumoya.” Labanye bangase bacabange kutsi lesehluko sicatsanisa labo labasenkholweni yeliciniso nalabo labangekho kuyo kanye nalabo labangemaKhristu nalabo labangasiwo. Nobe kunjalo, Pawula bekabhala ngabo “bonkhe labatsandzekako baNkulunkulu labaseRoma, nalababitelwe kutsi babe ngulabangcwele.” (Rom. 1:7) Ngako, Pawula bekacatsanisa emaKhristu lebekacondziswa yinyama nemaKhristu lebekacondziswa ngumoya. Bewuyini umehluko walamaKhristu?

6, 7. (a) Leligama lelitsi “inyama” lisetjentiswa ngatiphi tindlela eBhayibhelini? (b) KuRoma 8:4-13, Pawula wasebentisa leligama lelitsi “inyama” ngamuphi umcondvo?

⁶ Ase sicoce ngaleligama lelitsi “inyama.” Pawula bekakhuluma ngani nakasebentisa leligama? LiBhayibheli lisebentisa leligama lelitsi “inyama” ngetindlela letehlukene. Ngaletinye tikhatsi nalisebentisa leligama lisuke libhekisela emitimbeni yetfu. (Rom. 2:28; 1 Khor. 15:39, 50) Leligama liphindze  lisetjentiswe nakuchazwa luhla lwekutalwa. Jesu wavela “esitukulwaneni saDavide” futsi Pawula bekabheka emaJuda njengalawo ‘latihlobo takhe enyameni.’​—Rom. 1:3; 9:3.

⁷ Nobe kunjalo, loko Pawula lakhuluma ngako kusehluko 7 kusiniketa umcondvo waleligama lelitsi “inyama” lokukhulunywe ngalo kuRoma 8:4-13. Wacatsanisa ‘kuphila ngekuvumelana nenyama’ kanye ‘netifiso letisono,’ leto ‘lebetisasebenta emalungeni abo.’ (Rom. 7:5) Loku kusiniketa umcondvo waloko lokushiwo ngulamavi lashiwo nguPawula latsi, “labacondziswa yinyama banaka tintfo tenyama.” Bekakhuluma ngebantfu lababuswa tifiso tabo kanye nalabo labanaka kakhulu loko lokutsandvwa ngibo. Ngalokuyinhloko, laba ngulabo labalandzela tinkhanuko tabo, kungakhatsaliseki kutsi tinkhanuko tebulili nobe talokunye.

8. Kungani bekubalulekile kutsi emaKhristu lagcotjiwe nawo ecwayiswe mayelana ‘nekucondziswa yinyama’?

⁸ Kodvwa ungahle ufune kwati kutsi kungani Pawula aveta kutsi bekuyingoti ‘kucondziswa yinyama’ nakakhuluma nemaKhristu lagcotjiwe. Nalamuhla, lamaKhristu Nkulunkulu lawemukele njengebangani bakhe futsi lawabheka njengalalungile, angaba sengotini lefanako yini? Kuyadzabukisa kutsi nobe ngabe ngumuphi umKhristu angase acale kucondziswa yinyama. Nasi sibonelo: Pawula wabhala kutsi labanye bazalwane eRoma bebatigcili “tetifiso tabo” lebekungenteka betifaka ekhatsi sifiso sebulili nobe sifiso sekudla, sekunatsa nobe lesinye sifiso. Labanye babo ‘bebahunga labangakahlakaniphi.’ (Rom. 16:17, 18; Fil. 3:18, 19; Juda 4, 8, 12) Khumbula kutsi lomunye umzalwane eKhorinte ‘bekahlala nemfati weyise.’ (1 Khor. 5:1) Ngako kuyakhanya kutsi kungani Nkulunkulu asebentisa Pawula kutsi ecwayise emaKhristu mayelana ‘nekunaka tintfo tenyama.’​—Rom. 8:5, 6.

9. Secwayiso saPawula lesikuRoma 8:6 asisho ini?

⁹ Lesecwayiso sisebalulekile nalamuhla. UmKhristu angase acale kunaka tintfo tenyama ngisho nobe sekakhonte Nkulunkulu iminyaka leminyenti. Kunaka inyama akusho kucabanga ngekudla, umsebenti, tekutijabulisa nobe ngisho tindzaba telutsandvo. Loku kuyincenye yekuphila kwemuntfu lokhonta Nkulunkulu. Jesu bekakujabulela kudla futsi waze wondla nalabanye bantfu. Wasibona sidzingo sekutijabulisa. NaPawula wakhuluma ngendzawo lekahle lapho bantfu lababili labashadile labangakhombisa kuyo lutsandvo lwabo.

10. Lamavi latfolakala kuRoma 8:5, 6 latsi ‘kunaka’ asho kutsini?

 ¹⁰ Ngako, Pawula bekasho kutsini nakakhuluma ‘ngekunaka tintfo tenyama’? Leligama lesiGriki lelihunyushwe ngekutsi ‘kunaka,’ Pawula lalisebentisile lapha lisho “kuhlale ucabanga ngalokutsite, kwenta konkhe longakwenta kuze uciniseke kutsi sifiso lesitsite nobe indlela yekwenta lokutsite iyafezeka.” Labo labacondziswa yinyama bavumela kuphila kwabo kutsi kulawulwe yimitimba yabo lenesono. Lomunye umfundzi weliBhayibheli nakakhuluma ngalamavi lakuRoma 8:5 watsi: “Bantfu labanaka inyama bavamise kukhuluma ngetintfo tenyama, bente tintfo letihambisana nayo futsi bajatjuliswe tintfo letiphatselene nenyama.”

11. Ngutiphi tintfo lokufanele sicabange ngato nasitibuta kutsi, ‘Yini lebalulekile ekuphileni kwetfu?’

¹¹ Bekubalulekile ngemaKhristu aseRoma kutsi acabangisise ngaloko lebekubalulekile ekuphileni kwawo. Bekungenteka yini kutsi indlela lebekaphila ngayo beyikhombisa kutsi bekanaka kakhulu “tintfo tenyama”? Natsi kubalulekile kutsi siyihlole indlela lesiphila ngayo. Yini lebalulekile ekuphileni kwetfu futsi emavi etfu akhombisa kutsi yini lesiyitsandza kakhulu? Yini lesitikhandla ngayo lilanga nelilanga? Labanye bangase banake kakhulu kuva tinhlobonhlobo temawayini, kuhlobisa tindlu tabo, kutsenga timphahla letisefashinini, kutjala timali, kuhlela kuvakasha kanye nalokunye. Letintfo letinjengaleti atisito letimbi, tiyindlela yekuphila levamile. Nasi sibonelo: Jesu wake walenta liwayini futsi naPawula watjela Thimothi kutsi anatse “liwayini lelincane.” (1 Thim. 5:23; Joh. 2:3-11) Kodvwa Jesu naPawula bebahlale bakhuluma ngeliwayini yini, futsi bahlale nje bacabanga ngalo? Cha. Kutsiwani ngatsi? Yini lebalulekile ekuphileni kwetfu?

12, 13. Kungani kufanele singayinaki inyama?

¹² Kubalulekile kutsi sitihlole mayelana nalendzaba. Kungani? Pawula watsi: “Kunaka tintfo tenyama kuletsa kufa.” (Rom. 8:6) Lendzaba ibaluleke kakhulu ngobe ingasho kufa kwetfu ebuhlotjeni betfu naNkulunkulu nyalo kanye nekufa mbamba esikhatsini lesitako. Nanobe kunjalo, Pawula bekangasho kutsi umuntfu locala ‘kunaka tintfo tenyama’ nakanjani utawugcine afile. Kusenekwenteka lomuntfu ashintje. Cabanga ngendvodza lebeyitiphatsa kabi eKhorinte lebeyinaka “inyama” futsi leyagcina seyicoshiwe ebandleni. Kodvwa lendvodza ngekuhamba kwesikhatsi yashintja. Yakuyekela kunaka tifiso tenyama futsi yabuyela endleleni yekulunga.​—2 Khor. 2:6-8.

¹³ Nangabe lendvodza yaseKhorinte yakhona kushintja, nemKhristu lamuhla angashintja, ikakhulukati nangabe besekangene kulomgodzi wekunaka inyama. Ngako, lesecwayiso saPawula lesimayelana nemphumela longaba khona nangabe umuntfu ‘anaka tintfo tenyama’ kufanele ukhutsate emaKhristu kutsi ente nobe nguluphi lushintjo loludzingekile.

14, 15. (a) Ngukuphi lokunye lesingakwenta ngaphandle ‘kwekunaka inyama’? (b) Yini lengashiwo “kunaka tintfo temoya”?

¹⁴ Ngemuva kwekutsi lomphostoli asecwayise ngekunaka tintfo tenyama, wase sewuniketa seluleko lesitsi: “Kunaka tintfo temoya kuletsa kuphila nekuthula.” Umphumela lomuhle ukutsi sitfole kuphila nekuthula. Singawutfola njani lomvuzo lomuhle?

¹⁵ “Kunaka tintfo temoya” akusho kutsi umuntfu kufanele sale aphilisa kwengilosi. Akusho futsi nekutsi sekufanele akhulume ngeliBhayibheli kuphela nobe akhulume ngendlela lamtsandza ngayo Nkulunkulu kanye nangelitsemba lakhe lesikhatsi lesitako  kuphela. Asikhumbule kutsi Pawula kanye nalabanye lebebaphila ngelikhulu lekucala labajabulisa Nkulunkulu, bebaphila imphilo levamile. Bebadla futsi banatsa. Labanyenti bebashadile, baphila nemindeni yabo, futsi bebenta nemisebenti yekutiphilisa.​—Mak. 6:3; 1 Thes. 2:9.

16. Nanobe Pawula abephila imphilo levamile, ngumuphi umsebenti lebekawunake kakhulu?

¹⁶ Nanobe kunjalo, letinceku taNkulunkulu atizange tivumele lendlela yato levamile yekuphila kutsi ite kucala ekuphileni kwato. Ngemuva kwekutsi liBhayibheli lisitjele kutsi Pawula bekenta umsebenti wekwakha emathende, liphindze lisitjele kutsi umsebenti lobewuta kucala ekuphileni kwakhe bekukushumayela kanye nekufundzisa. (Fundza Imisebenti 18:2-4; 20:20, 21, 34, 35) Umphostoli Pawula wakhutsata bazalwane baseRoma kutsi nabo banake lomsebenti wekushumayela. Pawula bekanake kakhulu tintfo letiphatselene nemsebenti waNkulunkulu. EmaKhristu aseRoma bekufanele amlingise futsi natsi kufanele simlingise.​—Rom. 15:15, 16.

17. Ngumuphi umvuzo lesitawutfola nangabe ‘sinaka tintfo temoya’?

¹⁷ Utawuba yini umphumela nangabe sihlale sinake tintfo temoya? Roma 8:6 usiniketa imphendvulo lecacile, utsi: “Kunaka tintfo temoya kuletsa kuphila nekuthula.” Loku kusho kutsi kufanele sivumele tingcondvo tetfu ticondziswe ngumoya longcwele futsi indlela yetfu yekwenta tintfo ivumelane naloko lokufunwa nguNkulunkulu. Singaciniseka kutsi nangabe sinaka “umoya” sitawenetiseka ekuphileni. Ngetulu kwaloko sitawutfola kuphila lokuphakadze, kungaba sezulwini nobe lapha emhlabeni.

18. Kuthula sikutfola njani nangabe ‘sinaka tintfo temoya’?

¹⁸ Ase sicoce kabanti ngalamavi latsi “Kunaka tintfo temoya kuletsa . . . kuthula.” Bantfu labanyenti bayehluleka kutfola kuthula. Nanobe bona basakufuna kuthula, tsine sesivele sikutfolile. Lenye indlela yekutfola lokuthula ikutsi sitimisele kuba nekuthula nemindeni yetfu kanye nalabo lesinabo ebandleni. Siyati kutsi tsine nebazalwane betfu sinesono. Ngenca yaloko, tinkinga tingahle tibe khona futsi nangabe leto tinkinga tivela emkhatsini wetfu, sifundzisiwe kutsi kufanele silandzele seluleko saJesu lesitsi: ‘Yakha kuthula [nemnakenu].’ (Mat. 5:24) Loku kuba lula nangabe sikhumbula kutsi lomzalwane nobe lodzadzewetfu naye ukhonta “Nkulunkulu lonika kuthula.”​—Rom. 15:33; 16:20.

19. Nangabe sinaka tintfo temoya, ngukuphi kuthula lokukhetsekile lesiba nako?

¹⁹ Kukhona nalokunye kuthula lokuhlala njalo. Nangabe ‘sinaka tintfo temoya’ siba nekuthula neMdali wetfu. Isaya wabhala emavi lebekasebenta ngesikhatsi sakhe kodvwa lagcwaliseka nakakhulu esikhatsini setfu, latsi: “Wena Simakadze, lowo lotimiselako ngawe uyamlondvolota, umuphe kuthula nenhlalakahle, ngobe abeke litsemba lakhe kuwe.”​—Isa. 26:3; fundza Roma 5:1.

20. Kungani ubonga ngaleseluleko lesikuRoma sehluko 8?

²⁰ Ngako, kungakhatsaliseki kutsi sigcotjwe ngemoya nobe sinelitsemba lekuphila phakadze emhlabeni, kufanele sibonge ngaleseluleko lesiphefumulelwe lesikuRoma sehluko 8. Sijabula kakhulu ngalesikhutsato sekungavumeli “inyama” ibe yintfo leta kucala ekuphileni kwetfu. Kunaloko, siyabona kutsi kukuhlakanipha kuphila ngekuvumelana naleseluleko lesiphefumulelwe lesitsi: “Kunaka tintfo temoya kuletsa kuphila nekuthula.” Umvuzo wekuphila ngekuvumelana naleseluleko utawuba kuphila lokuphakadze, njengobe nje naPawula abhala watsi: “Umvuzo wesono kufa, kodvwa sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.”​—Rom. 6:23.