1, 2. (a) Kungani kungakafanele simangale nangabe sibhekene netinkhatsato? (Buka sitfombe lesisekucaleni kwalesihloko.) (b) Sitawucoca ngani kulesihloko?

SIPHILA etikhatsini letimatima. Sathane Develi utfukutsele ugane lunwabu futsi “uhambahamba njengelibhubesi lelibhodlako, lelifuna lotsite lelingamshwabadzela.” (1 Phet. 5:8; Semb. 12:17) Ngako-ke, akusimangalisi kutsi natsi njengetinceku taNkulunkulu ngaletinye tikhatsi sibhekana netimo letisikhatsatako. Ngetulu kwaloko, tinceku taJehova lebetetsembekile tangesikhatsi lesendlulile, njengeNkhosi Davide, nato betihle ‘tilwisana nemicabango’ lekhatsatako. (Hla. 13:2) Khumbula kutsi nemphostoli Pawula naye wake ‘wakhatsateka ngemabandla.’ (2 Khor. 11:28) Yini lesingayenta nangabe sitiva sikhatsatekile?

² Babe wetfu lonelutsandvo watisita tinceku takhe esikhatsini lesendlulile, futsi natsi usentele tindlela tekukhululeka nangabe sikhatsatekile nome sicindzetelekile. LiBhayibheli liseluleka kutsi ‘siphonse konkhe kukhatsateka kwetfu kuye, ngobe uyasikhatsalela.’ (1 Phet. 5:7) Singakwenta njani loku? Asesicoce ngetindlela letine lesingakwenta ngako loku​—ngekuthantaza ngalokusuka enhlitiyweni, ngekufundza liVi laNkulunkulu uphindze uzindle ngalo, ngekucela umoya longcwele waJehova kanye nekutfulula  sifuba sakho kumutfu lometsembako. Njengoba sihlolisisa letindlela letine, buka kutsi ngutiphi lotatisebentisa.

3. Umthantazo ungakusita njani kutsi ‘ulahlele imitfwalo yakho kuJehova’?

³ Indlela yekucala ikutsi sithantaze kuJehova ngalokusuka enhlitiyweni. Nangabe ubhekene netimo letimatima nome letikukhatsatako, tfululela sifuba sakho kuBabe wetfu lonelutsandvo. Umhlabeli Davide wancenga Jehova watsi: “Nkulunkulu, lalela umthandazo wami.” Kuso sona lesihlabelelo watsi: “Lahlela imitfwalo yakho kuSimakadze, yena uyawukusimisa.” (Hla. 55:1, 22) Nase wente konkhe longakwenta kuze ucatulule inkinga letsite, kwenta umthantazo losuka enhlitiyweni kungakusita unciphise kukhatsateka. Kodvwa umthantazo ungakusita njani kutsi ungacindzetelwa yimicabango lecedza kuthula kanye nalebangela lusizi?​—Hla. 94:18, 19.

4. Kungani umthantazo ubalulekile nangabe sikhatsatekile?

⁴ Fundza Filiphi 4:6, 7. Jehova angayiphendvula imithantazo lecotfo nalesuka enhlitiyweni lesiyenta ngaso sonkhe sikhatsi. Kanjani? Angasiniketa kuthula kwangekhatsi lokungakhulula tingcondvo netinhlitiyo tetfu ekuhlushweni tinkhatsato. Labanyenti bangafakaza kutsi Jehova ubasitile ngesikhatsi babhekene netinkinga. Ngesikhatsi babhekene netinkinga letimatima, Nkulunkulu ubasitile kutsi batfole kuthula lokungetulu kwaloko umuntfu langabanika kona. Kungenteka nawe Nkulunkulu uke wakusita. Ngako, “kuthula kwaNkulunkulu” kungancoba nobe ngabe ngutiphi tinkinga longase uhlangabetane nato. Ungasetsemba mbamba setsembiso saJehova lesitsi: “Ungajabhi, ngobe mine nginguNkulunkulu wakho. Ngitakucinisa ngikusite.”​—Isa. 41:10.

5. Singakutfola njani kuthula eVini laNkulunkulu?

⁵ Indlela yesibili yekutfola kuthula kutsi sifundze emavesi eliBhayibheli bese sizindla ngawo. Kungani loku kubalulekile? LiBhayibheli lineticondziso letivela kuNkulunkulu letingasisita sikhone kugwema kucindzeteleka nobe silwisane nako. Ungalitsatseli phansi leliciniso lekutsi liVi laNkulunkulu lilusito futsi liyasiphumuta ngobe linemavi ekuhlakanipha eMdali wetfu. Njengoba uzindla ngemicabango yaNkulunkulu emini noma ebusuku futsi ucabanga kutsi ungatisebentisa njani ticondziso letiseBhayibhelini, utawutfola emandla ekubhekana nesimo lokuso. Nangabe sifundza liVi lakhe, Jehova utsi ‘sitocina sibe nesibindzi futsi ngeke setfuke nome siphelelwe ngemandla.’​—Josh. 1:7-9.

6. Emavi aJesu angakusita njani?

⁶ EVini laNkulunkulu sitfola emavi aJesu ladvudvutako. Emavi akhe kanye netimfundziso takhe bekungumtfombo wekuphumula etilalelini takhe. Sicumbi sebantfu besita kuye ngoba bekabadvudvuta labanetinhlitiyo letidzabukile, acinise lababutsakatsaka kanye nalabacindzetelekile. (Fundza Matewu 11:28-30.) Wabakhombisa lutsandvo labanye ngekubafundzisa tintfo letiphatselene naNkulunkulu, wasita nalabakhatsatekile kanye nekubasita ngetidzingo tabo tenyama. (Mak. 6:30-32) Setsembiso saJesu sekucinisa labacindzetelekile sisasebenta nalamuhla. Singakusita nawe njengoba nebaphostoli lebebahamba naye sabasita. Akusho kutsi kufanele ube lapho kunaJesu khona kute usitakale. NjengeNkhosi yasezulwini, Jesu uyachubeka avelana nebantfu. Ngako, nangabe ukhatsatekile, ‘ngesihawu angakusita nawulingwa’ futsi ‘akusite ngesikhatsi lesifanele.’ Jesu angakusita kutsi ubhekane nekucindzeteleka futsi angakunika litsemba nesibindzi.​—Heb. 2:17, 18; 4:16.

7. Utawuba yini umphumela nawucela Nkulunkulu kutsi akuphe umoya wakhe longcwele?

⁷ Jesu watsembisa kutsi Babe wetfu losezulwini ngeke ehluleke kubaniketa umoya wakhe longcwele labo labawucela kuye. (Luk. 11:10-13) Loku kusiletsa endleleni yesitsatfu yekubhekana nekukhatsateka—lokutitselo temoya. Letitselo temoya letivetwa ngemandla aNkulunkulu tikhombisa buntfu bakhe lobubaluleke kakhulu. (Fundza Galathiya 5:22, 23; Khol. 3:10) Njengobe ukhombisa letitselo temoya, buhlobo bakho nalabanye butawutfutfuka. Ngako, utawubona kutsi timo letibanga kukhatsateka uyakhona kutincoba. Utawubona nekutsi letitselo temoya tikusite njani.

8-12. Titselo temoya longcwele waNkulunkulu tingakusita njani kutsi ubhekane netimo letingakubangela kutsi ukhatsateke?

⁸ “Lutsandvo, injabulo, kuthula.” Nangabe usebenta matima kute uphatse labanye bantfu ngenhlonipho, utakutfola kumelula kulwisana nemiva yakho lengasiyo. Kungenteka kanjani loku? Njengoba ukhombisa labanye lutsandvo lwebuzalwane futsi ubahlonipha, utawugwema tintfo letingabangela kukhatsateka.​—Rom. 12:10.

⁹ “Kuthula, kubeketela, umusa.” Ungatfutfukisa budlelwane lobunekuthula nangabe unaka leseluleko lesitsi: “Nibophatsana ngemusa, nibe nesihawu, nitsetselelane ngekukhululeka.” (Ef. 4:32) Nawenta njalo, utawube uvimbela timo letingabangela kukhatsateka. Ungaphindze ukhone kubhekana kancono netimo letibangelwa kutsi sinesono.

¹⁰ “Kukholwa.” Lamuhla kukhatsateka kwetfu kuvame kubangelwa kufuna kuba nemali kanye tintfo letinyenti. (Taga 18:11) Ngako, kuba nekukholwa lokucinile elutsandvweni lwaJehova lasibonisa lona kungakusita ubhekane nekukhatsateka nome ulwisane nako. Kanjani? Ungakugwema kukhatsateka kakhulu ngekunaka seluleko semphostoli Pawula lesiphefumulelwe lesitsi: “Yeneliswani tintfo leninato.” Pawula wachubeka watsi: “Ngobe [Nkulunkulu] utsite: ‘Ngeke ngize ngikushiye, futsi ngeke ngize ngikulahle.’ Ngako sinesibindzi futsi sitsi: ‘Jehova ungumsiti wami; ngeke ngesabe. Umuntfu angangentani?’”​—Heb. 13:5, 6.

¹¹ “Umoya lomuhle, nekutibamba.” Cabanga ngendlela lokungaba kuhle ngayo kusebentisa letitselo temoya. Ngako, ungakhona kugwema netimo letingakubangela kukhatsateka futsi utawuzuza ngekugwema “inzondo, intfukutselo, lulaka, umsindvo, nenkhulumo lehlabako, kanye nako konkhe lokulimatako.”​—Ef. 4:31.

¹² Kuyavunywa kutsi utakudzinga kutfobeka kute uvikeleke “ngephansi kwesandla saNkulunkulu lesinemandla” futsi ukhone ‘kuphonsa konkhe kukhatsateka kwakho kuye.’ (1 Phet. 5:6, 7) Njengobe ulwela kutfobeka, utawuba ngulomunye walabo labasekelwa nguNkulunkulu futsi utawutfola nemusa wakhe. (Mik. 6:8) Nangabe uchubeka unaka simo sakho sengcondvo, semtimba kanye nendlela lotiva ngayo, ngeke uhlale ukhatsetekile ngaso sonkhe sikhatsi ngobe utawube utsembele kuNkulunkulu.

13. Bekasho kutsini Jesu nakatsi: “Ningacali nikhatsateke”?

¹³ KuMatewu 6:34 (fundza), sitfola seluleko saJesu lesikhutsatako lesitsi: “Ningacali nikhatsateke.” Nobe kunjalo, kungenteka kube matima kusisebentisa leseluleko. Bekasho kutsini Jesu nakatsi: “Ningacali nikhatsateke”? Kuyacaca kutsi abengasho kutsi inceku yaNkulunkulu ngeke ikhatsateke ngaletinye tikhatsi njengobe sibonile endzabeni yaDavide naPawula. Kodvwa Jesu abesita bafundzi bakhe kutsi babone  kutsi kukhatsateka kakhulu akuticatululi tinkinga. Lilanga ngalinye linetinkinga talo, ngako emaKhristu akukafanele engete letinye tinkinga ngekutsi akhatsateke ngetintfo letendlulile noma leto letisatokwenteka. Ungakutfola njani kuphumula nangabe usebentisa seluleko saJesu lesimayelana nekukhatsateka kakhulu?

14. Ungabhekana kanjani ngekukhatsateka ngetintfo lowatenta kadzeni?

¹⁴ Lokunye kukhatsateka kungabangelwa tintfo umuntfu latenta esikhatsini lesendlulile noma lahluleka kutenta. Kungenteka acabange kakhulu ngetintfo letimbi latenta kadzeni ngisho nobe sekwendlule iminyaka leminyenti atenta. Ngaletinye tikhatsi, iNkhosi Davide yeva shengatsi ‘tono tayo betiyigabhile.’ Yatsi: “Ngiyabubula ngenca yekutfutfumela enhlitiyweni yami.” (Hla. 38:3, 4, 8, 18) Yini Davide labengayenta ngaleso simo sakhe? Wentani? Wetsembela kuJehova, ngobe unemusa futsi uyatsetselela. Ngekukholwa watsi: “Ubusisiwe umuntfu lotsetselelwe tiphambuko takhe.”​—Fundza Tihlabelelo 32:1-3, 5.

15. (a) Kungani kungakafaneli ukhatsateke ngetintfo letenteka nyalo? (b) Ngutiphi tinyatselo letilusito longatitsatsa kute unciphise kukhatsateka? (Buka libhokisi lelitsi “ Tindlela Tekunciphisa Kukhatsateka.”)

¹⁵ Ngalesinye sikhatsi ungase ukhatsateke ngetintfo letenteka nyalo. Nasi sibonelo: Ngalesikhatsi Davide abhala Tihlabelelo 55, abesabela imphilo yakhe. (Hla. 55:2-5) Nobe kunjalo akazange avumele kukhatsateka kucedze kwetsembela kwakhe kuJehova. Davide wathantaza ngalokukhetsekile ngetinkinga takhe, kepha bekakucondza kubaluleka kwekutsatsa sinyatselo sekulwisana netintfo lebetimbangela kutsi akhatsateke. (2 Sam. 15:30-34) Kukhona lesingakufundza kulesibonelo saDavide. Kunekutsi sivumele kukhatsateka kusengame, kufanele sente konkhe lesingakwenta kute silwisane naleso simo bese ngekukholwa sishiyela tonkhe tintfo etandleni taJehova.

16. Inchazelo yelibito laNkulunkulu ingakucinisa kanjani kukholwa kwakho?

¹⁶ Kukhatsateka ngalokute sidzingo kungenta umKhristu eve buhlungu kakhulu ngetinkinga letingase timehlele esikhatsini lesitako. Nobe kunjalo akukafaneli ukhatsateke kakhulu ngetintfo longati lutfo ngato. Kungani? Ngobe ngalesinye sikhatsi tintfo tivamise kungabi timbi ngendlela lebesicabanga ngayo. Ngetulu kwaloko, kute simo lesingetulu kwaNkulunkulu lokunguyena silahlela kuye konkhe kukhatsateka kwetfu. Libito lakhe lisho kutsi “Ubangela tonkhe tintfo kutsi tibe khona.” (Eks. 3:14, NW) Lenchazelo yaleligama lakhe leliphakeme liyasicinisekisa kutsi Nkulunkulu angakhona kusisita lapho sibhekene netimo letisikhatsatako. Ungaciniseka kutsi Nkulunkulu utawubabusisa labo labatsembekile aphindze abasite balwisane nekukhatsateka ngetintfo letenteka, naletentekako kanye naleto letisatokwenteka.

17, 18. Kukhulumisana lokuhle kungakusita njani kutsi ubhekane nekukhatsateka?

¹⁷ Indlela yesine yekukusita ubhekane nekukhatsateka kutsi ukhulumisane kahle nalabanye futsi utfulule sifuba sakho kumuntfu lometsembako. Umuntfu loshade naye, umngani wakho nome lomdzala ebandleni angakusita kutsi ube nembono lokahle ngekukhatsateka. Taga 12:25 titsi: “Kukhatsateka kuyamondzisa umuntfu; kodvwa livi lemusa limenta ajabule.” Kukhulumisana lokuhle kungakusita kutsi ubhekane kancono netinkinga takho. LiBhayibheli litsi: “Tinhloso atiphumeleli ngaphandle kweteluleko; kodvwa nangabe kunebeluleki labanyenti tiyakuphumelela.”​—Taga 15:22.

¹⁸ Jehova uphindze asite emaKhristu kutsi abhekane nekukhatsateka ngekuwalungiselela imihlangano yelibandla leba khona njalo ngeliviki. Kulemihlangano ungakhona kutihlanganisa nebantfu labakukhatsalelako futsi labafuna kukukhutsata. (Heb. 10:24, 25) ‘Kukhutsatana’ lokufana naloku kutakusita kutsi usebentise kahle tincwadzi letisekelwe eBhayibhelini letitakwenta kube melula kubhekana netimo letikhatsatako.​—Rom. 1:12.

19. Kungani ungaciniseka kutsi buhlobo bakho naNkulunkulu butakucinisa?

¹⁹ Asewucabange ngendlela lomunye lomdzala welibandla eCanada lafundza ngayo kulahlela kukhatsateka kwakhe kuJehova. Unguthishela nemeluleki futsi kufanele alwisane netinkinga tekukhatsateka ekuphileni kwakhe. Lomzalwane ubhekene njani nalesimo? Nakachaza utsi: “Kusebenta matima kuze ngicinise buhlobo bami naJehova kuyangisita, ngobe ngitfola emandla ekubhekana netimo letingikhatsatako. Kusekelwa bangani beliciniso kanye nebazalwane kubaluleke kakhulu ngetikhatsi letimatima. Ngiyakhululeka kutjela umfati wami indlela lengitiva ngayo futsi ngetsembeke. Labadzala belibandla kanye nembonisi wesigodzi babe lusito lolukhulu kimi kute ngibe nembono lokahle ngetimo tami. Ngiye ngafuna lusito kubodokotela, ngenta lushintjo endleleni lengisebentisa ngayo sikhatsi sami futsi ngiye ngatinika sikhatsi sekuphumula nesekucecesha umtimba. Kancane kancane, ngacala kutiva sengincono. Nangabe kukhona tintfo lengingakhoni kuticatulula ngivele ngitishiyele etandleni taJehova.”

20. (a) Singakulahlela njani kukhatsateka kwetfu kuNkulunkulu? (b) Sitawucoca ngani esihlokweni lesilandzelako?

²⁰ Sesiphetsa, sibonile kutsi kubalulekile kulahlela kukhatsateka kwetfu kuNkulunkulu, ngekuthantaza ngalokusuka enhlitiyweni kanye nangekufundza liVi lakhe futsi sizindle ngalo. Siphindze sacoca ngekubaluleka kwekusebentisa titselo temoya longcwele, kutfululela sifuba kulabo lesibetsembako kanye nekutfola emandla ngekutihlanganisa nalamanye emaKhristu. Sihloko lesilandzelako sitawucoca ngendlela Jehova lachubeka asisekela ngayo ngekusiniketa litsemba lekutfola umvuzo.​—Heb. 11:6.