Umoya Lomnene—Indlela Yekuhlakanipha
Toñi, longumnakekeli webantfu labagulako nalasebakhulile, wanconcotsa emnyango futsi kwaphendvula lomunye wesifazane losesigabeni sekuba ngumake. Lowesifazane wametfuka futsi wamtsetsisa ngekutsi atsi wephutile kufika kute atewunakekela unina lobekasakhulile. Toñi bekangakephuti kufika emsebentini wakhe. Nome kunjalo, ngemoya lophansi wacolisa kulona wesifazane ngekungaboni ngasolinye.
NGELILANGA lelilandzelako, lona wesifazane waphindze wametfuka. Wenta njani Toñi? Utsi: “Lesi bekusikhatsi lesimatima. Tinhlamba takhe betingabeketeleleki.” Nalapho, Toñi wacolisa waphindze watjela lowesifazane kutsi abesicondza simo lesibuhlungu labekadze abhekane naso.
Kube bewunguToñi, bewuyokwenta njani? Bewutawukhombisa umoya lomnene yini? Noma bekuyawuba matima ngawe kutibamba? Kuyavunywa kutsi akusimelula kuhlala utibambile etimeni letifana naleti Toñi labhekana nato. Nangabe sicindzetelekile noma sicansulwa ngulotsite kuba matima kubeketela.
Nome kunjalo, liBhayibheli likhutsata emaKhristu kutsi abe nemoya lomnene. Empeleni liVi laNkulunkulu lihlobanisa buntfu lobunjalo nekuhlakanipha. Jakobe wabuta lombuto lotsi: “Ngubani lohlakaniphile nalonekucondza emkhatsini wenu? Ngekutiphatsa kwakhe lokuhle, akavete imisebenti leyentiwa ngemoya lophansi loletfwa kuhlakanipha.” (Jak. 3:13) Kungayiphi indlela umoya lomnene ubufakazi bekuhlakanipha lokuvela kuNkulunkulu? Futsi yini lengasisita sikhombise lobuntfu baNkulunkulu?
KUKUHLAKANIPHA KUBA NEMOYA LOMNENE
Umoya lomnene ungayehlisa intfukutselo. LiBhayibheli litsi: “Imphendvulo letfobekile icitsa intfukutselo; kodvwa leyedzelelako nalenelulaka iyatfukutselisa.”—Taga 15:1.
Kuphendvula ngekutfukutsela kungabangela simo sibe sibi kakhulu ngoba kufana nekutsi utsela phalafini emlilweni. (Taga 26:21) Ngalokwehlukile, kuba nemoya lomnene kuvame kwenta simo sibe ncono. Kungaphindze kwente umuntfu lotfukutsele ehlise umoya.
Toñi watibonela matfupha loku. Nakabona kuba nemoya lomnene kwaToñi, lona wesifazane wavele wakhala. Lowesifazane watsi bekakhungetfwe tinkinga takhe kanye netemndeni. Toñi wamfundzela umBhalo wekumdvudvuta futsi kamuva wacala sifundvo seliBhayibheli nalona wesifazane—konkhe loku kwaba ngumphumela wekuba nemoya lomnene kanye nekuba nekuthula.
Kuba nemoya lomnene kungasenta sijabule. LiBhayibheli litsi: “Bayajabula labo labatfobekile, ngobe batawudla lifa lemhlaba.”—Mat. 5:5.
Kungani bantfu labanemoya lomnene bajabula? Ngekugcoka bumnene, labanyenti lebebanelulaka manje sebayajabula. Kuphila kwabo sekwehlukile kunasekucaleni futsi bayati kutsi balindzelwe likusasa lelihle. (Khol. 3:12) Adolfo longumbonisi wesigodzi eSpain, ukhumbula imphilo lebekayiphila asengakabi nguFakazi.
Adolfo utsi: “Kuphila kwami bekume ndzawonye. Intfukutselo yami beyingalawuleki kangangekuba ngisho nebangani bami bebangesaba ngenca yekutsi bengitikhukhumeta futsi ngisihonga. Kodvwa kunesimo lesangenta ngayishintja indlela lebengiphila ngayo. Ngalelinye lilanga ngilwa, bangigwaza emanceba lasitfupha futsi ngopha kakhulu ngaphose ngafa.”
Nobe kunjalo, nyalo Adolfo ufundzisa labanye kuba nemoya lomnene ngemavi nangetento. Labanyenti bativa bakhululekile kusondzela kuye ngenca yelutsandvo lasanalo kanye nebuntfu bakhe lobuhle. Adolfo utsi uyajabula ngelushintjo lakhone kulwenta ekuphileni kwakhe. Futsi utsi uyambonga Jehova ngekumsita asebentele kuba nemoya lomnene.
Kuba nemoya lomnene kwenta Jehova ajabule. LiBhayibheli litsi: “Ndvodzana yami, hlakanipha, khona ngitewujabula, ngitekwati kuphendvula nome ngabe ngubani longedzelelako.”—Taga 27:11.
Jehova solo udzelelwa sitsa sakhe lesikhulu lesinguDeveli. Nanobe liBhayibheli litsi Jehova “uyephuta kutfukutsela,” kepha unato tonkhe tizatfu tekutfukutselela kwetfukwa nguSathane. (Eks. 34:6) Nangabe sitikhandla futsi silwa kamatima, silingisa Nkulunkulu ngekutsi sephute kutfukutsela kanye nangekuba mnene, sisuke sikhombisa kuhlakanipha lokujabulisa Jehova.—Ef. 5:1.
Lelive lesiphila kulo ligcwele budlova. Singase sihlangane nebantfu ‘labatigabatisako, labatigcabhako, labahlambalatako . . . labangatibambi nalabanelulaka.’ (2 Thim. 3:2, 3) Nobe kunjalo, loko akukafaneli kwente umKhristu ayekele kukhombisa umoya lomnene. LiVi laNkulunkulu lisikhumbuta kutsi: “kuhlakanipha lokuvela ezulwini, . . . kunekuthula, kuyacabangela.” (Jak. 3:17) Nangabe sinemoya wekuthula futsi sibacabangela labanye, sitawube sifakazela kutsi sinekuhlanipha lokuvela kuNkulunkulu. Kuhlakanipha lokufana naloku kutawusenta kutsi sibaphendvule ngekuhlakanipha labasitfukako noma labasicansulako futsi loku kutasisondzeta nakakhulu kuJehova longumtfombo wekuhlakanipha.
