Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

Ngukuphi lokona Jesu lakhuluma ngako kuleseluleko lesikuMatewu 18:15-17?

Bekakhuluma ngetinkinga lebetingaba khona emkhatsini webantfu, lebetingacatululwa ngasense. Leti akusito nje tono letincane, kodvwa tono letingenta umuntfu ayekeliswe kuba nguFakazi nangabe angaphendvuki. Letono tingafaka ekhatsi kukhwabanisa nobe kunyundzela.​—w16.05, likh. 7.

Yini lesingayenta kute kufundza kwetfu liBhayibheli kuzuzise kakhulu?

Naku lesingakwenta: Lifundze ngemcondvo lovulekile, ufune tifundvo longatisebentisa; utibute imibuto lenjengekutsi ‘Ngingakusebentisa kanjani loku kute ngisite labanye?; futsi usebentise emathuluzi ekucwaninga latfolakalako lamayelana naloko lokufundzako.​—w16.05, emakh. 24-26.

Kubi yini ngemKhristu kuva buhlungu nakafelwe ngisho nobe akholelwa eluvukweni?

Kuba nekukholwa endzabeni yeluvuko akubukhweshisi buhlungu bekufelwa. Abrahama wakhala ngesikhatsi kufe Sara. (Gen. 23:2) Ngekuhamba kwesikhatsi lobuhlungu butawuncipha.​—wp16.3, likh. 4.

Embonweni waHezekeli, indvodza lenesipatji setintfo tekubhala kanye nemadvodza lasitfupha laphetse tilimato letimbi amelela bobani?

Lamadvodza amelela libutfo lasezulwini lebelinencenye ekubhujisweni kweJerusalema futsi latawuphindze abe nencenye ekubhujisweni kwelive laSathane lelibi nge-Amagedoni. Lamuhla, lendvodza lenesipatji lesinetintfo tekubhala imelela Jesu, lotawubeka luphawu labo labatawusindza.—w16.06, emakh. 31-32.

LiBhayibheli lasindza kutiphi tintfo?

Lasindza (1) ekutseni letintfo lebekubhalelwa kuto letinjenge-papyrus ne-parchment betingonakala; (2) kubosopolitiki nakubaholi benkholo lebebangalifuni lebebatama kulicedza, laphindze (3) nakubantu lebebafuna kushintja umlayeto walo.​—wp16.4, emakh. 4-7.

Yini umKhristu langayenta kuze ente kuphila kwakhe kube melula?

Tati tidzingo takho futsi unciphise tindleko letingenamsebenti. Yihlele kahle indlela loyisebentisa ngayo imali. Nciphisa tinto longatidzingi futsi ubhadale tikweleti lonato. Nciphisa emalanga lowasebentako futsi uhlele indlela yekutfutfukisa umsebenti wakho wekushumayela.​—w16.07, likh. 10.

LiBhayibheli litsi yini lencono kakhulu kuneligolide nobe lisiliva?

Jobe 28:12, 15 ukhombisa kutsi kuhlakanipha lokuvela kuNkulunkulu kuncono kakhulu kuneligolide nobe lisiliva. Njengobe ulwela kukutfola lokuhlakanipha, ciniseka kutsi uhlala utfobekile futsi unekukholwa lokucinile.​—w16.08, emakh. 18-19.

Kukahle yini ngemzalwane kutsi abe nesilevu?

Kulamanye emasiko kuvumelekile kutsi silevu sihhulwe futsi silungiswe kahle lokuyintfo lengeke ibaphatamise labanye bantfu ekulaleleni umlayeto weMbuso. Nanobe kunjalo, labanye bazalwane bangakhetsa kusihhula silevu sabo. (1 Khor. 8:9) Kulamanye emasiko nome tindzawo, silevu asemukeleki kumaKhristu.​—w16.09, likh. 21.

Yini lesenta siyetsembe indzaba leseBhayibhelini lemayelana naDavide naGoliyathi?

Goliyathi abemudze ngemasentimitha langu-15 kumuntfu lomudze lokukhulunywa ngaye esikhatsini setfu. Tincwadzi tasendvulo letikhuluma ngendlu yaDavide kanye naloko Jesu lakusho, kufakazela kutsi Davide bekangumuntfu mbamba. Letintfo lokukhulunywa ngato kulendzaba tenteka endzaweni lekhona mbamba.​—wp16.5, likh. 13.

Uyini umehluko emkhatsini welwati, kucondza nekuhlakanipha?

Umuntfu lonelwati usuke acongelele kwatiswa lokutsite nobe emaciniso. Kepha umuntfu lonekucondza uyabona kutsi liciniso lelitsite lihlobana njani nalelinye. Kantsi umuntfu lohlakaniphile uyakhona kuhlanganisa ndzawonye lolwati kanye nekucondza bese uyakusebentisa.​—w16.10, likh. 18.