Kulandzisa lokukuDutheronomi 22:25-27 akukhulumi nje ngekuveta licala lalendvodza, ngobe kulendzaba lendvodza beseyivele inelicala. LoMtsetfo bewunaka kakhulu kutfola kutsi lona lomsikati akanacala yini. Lendzaba ifuna kunakisiswa.

Emavesi langemuva akhuluma ngendvodza ledlwengule intfombi ‘edolobheni.’ Lendvodza beyibekwa licala lekuphinga njengoba lentfombi leyetsembisene nalotsite beyitsatfwa njengaloshadile. Kutsiwani ngalentfombi? “Beyingekhatsi edolobheni kodvwa ayizange imemete.” Kube imemetile, kungenteka ngabe bakhona labayiva futsi bayisita. Kodvwa ayizange imemete. Ngenca yaloko, nayo beyiphinga.—Dut. 22:23, 24.

LoMtsetfo lolandzelako sewukhuluma ngalesinye simo: “Kodvwa nangabe indvodza itsite ingaphandle kwelidolobha yahlangana nentfombi leseyetsenjiswe ngulenye indvodza, bese iyayidlwengula, ngulendvodza kuphela lekufanele ife. Ningenti lutfo kulentfombi, ngobe kute sono leyisetile lesiyenta ifanelwe kufa. Lelicala lifanana naleli lekutsi umuntfu angahlasela abulale makhelwane wakhe, ngekutsi lendvodza ihlangene nalentfombi ngaphandle esigangeni, kungenteka kube lentfombi imemetile, yahlaba inyandzaleyo, kodvwa kwabate loyisitako.”—Dut. 22:25-27.

Kulesimo, lebebateka lendzaba bebayikholwa lentfombi. Leni? Ngobe ‘beyimemetile, yahlaba inyandzaleyo, kodvwa kwabate loyisitako.’ Ngako beyingakaphingi. Noma kunjalo, lendvodza beyibekwa licala lekugagadlela nelekuphinga ngobe beyisuke ‘iyidlwengulile’ lentfombi leyetsembisene nalomunye umshado.

Nanobe lomtsetfo bewunaka kakhulu kutfola kutsi lona lomsikati akanacala, lendzaba iveta kutsi ngulendvodza lebeyinelicala lekudlwengula nelekuphinga. Siyaciniseka kutsi lendzaba ‘beyihlolisiswa futsi iphenyisiswa’ kuze kwentiwe sincumo lebesisekelwe etimisweni taNkulunkulu lebekatiphindzaphindza njalo kubantfu bakhe.—Dut. 13:14; 17:4; Eks. 20:14.