1-2. (a) Uyini uMnyaka Wekubuyiselwa? (Buka libhokisi lelitsi “ Bewuyini UMnyaka Wekubuyiselwa?”) (b) Njengobe kubhaliwe encwadzini yaLukha 4:16-18, yini Jesu lakhuluma ngayo?

EMAVE lamanyenti anemikhosi lekhetsekile layigubhako nangabe inkhosi nobe indlovukazi seyibuse iminyaka lengu-50. lomkhosi ungagujwa lilanga linye, liviki, nobe sikhatsi lesidze, kodvwa ugcina uphelile, futsi bantfu bayakhohlwa ngawo ngekushesha.

² Sitawucoca ngeMnyaka Wekubuyiselwa, loncono khashane kuneMnyaka Wekubuyiselwa lobewugujwa njalo ngemuva kweminyaka lengu-50 ka-Israyeli wasendvulo. LoMnyaka Wekubuyiselwa wasendvulo bewuniketa ema-Israyeli inkhululeko. Kungani kufanele sifundze ngawo lamuhla? Ngobe usikhumbuta ngentfo lenhle Jehova lasentela yona. Lomnyaka Wekubuyiselwa utasiletsela inkhululeko yaphakadze Jesu lakhuluma ngayo, futsi singazuza kuwo nanyalo.—Fundza Lukha 4:16-18.

3. Ngekusho kwembhalo waLevithikhusi 25:8-12, uMnyaka Wekubuyiselwa bewuwazuzisa njani ema-Israyeli?

³ Kutawuba melula ngatsi kucondza loko Jesu bekakusho nakakhuluma ngenkhululeko nasicala ngekucoca ngeMnyaka Wekubuyiselwa Nkulunkulu lawentela bantfu bakhe endvulo. Jehova watsi kuma-Israyeli: “UMnyaka Wema-50 niyakuwungcwelisa nimemetele inkhululeko eveni lonkhe nakuto tonkhe takhamiti takhona. Kuyawuba nguMkhosi wekugubha iMinyaka Lengema-50 kini, ngulowo nalowo uyawuncandzeka abuyele kuleyo ndzawo bekungeyakhe, iphindze ibe yakhe nesitukulwane sakhe.” (Fundza Levithikhusi 25:8-12.) Esihlokweni lesendlulile, sicoce ngekutsi  liSabatha lebelentiwa maviki onkhe beliwazuzisa njani ema-Israyeli. UMnyaka Wekubuyiselwa bewuwazuzisa njani ema-Israyeli? Asesitsi um-Israyeli bekanesikweleti, ngako bekufanele atsengise umhlaba wakhe kuze abhadale lesikweleti. NgeMnyaka Wekubuyiselwa, lomhlaba bewubuyiselwa kuye. Ngako-ke, lom-Israyeli ‘bekatawubuyela endzaweni lebekungeyakhe,’ futsi ngekuhamba kwesikhatsi bantfwana bakhe bebatayitfola njengelifa lendzawo. Ngaletinye tikhatsi, umuntfu lobekanesikweleti lesikhulu bekungadzingeka atsengise umntfwana wakhe nobe atitsengise yena kuze abesisebenti khona atewubhadala lesikweleti. NgeMnyaka Wekubuyiselwa, lesisebenti bekufanele ‘sibuyele emndenini wakubo.’ Ngako kute umuntfu lobekatawuhlala asisebenti! Loku kukhombisa kutsi Jehova bekabanakekela mbamba bantfu bakhe!

4-5. Kungani kubalulekile ngatsi kutsi sifundze ngeMnyaka Wekubuyiselwa wema-Israyeli asendvulo?

⁴ Yini lenye lebeyifezwa nguMnyaka Wekubuyiselwa? Jehova watsi: “Akufanele kube nalomphofu emkhatsini wenu, ngobe kulelive Simakadze Nkulunkulu wenu lanipha lona kutsi nilidle libe lifa lenu utanibusisa kakhulu ngemcebo.” (Dut. 15:4) Loku kwehlukile kunalokwentekako lamuhla lapha emhlabeni, sivame kubona bantfu labanjingile banjinga kakhulu futsi labaphuyile baphuya mbamba!

⁵ Njengobe singemaKhristu, asikho ngephansi kweMtsetfo waMosi. Loko kusho kutsi asiwulandzeli uMtsetfo weMnyaka Wekubuyiselwa lobewukhulula tisebenti, ucishe tikweleti, futsi unikete bantfu tindzawo tabo. (Rom. 7:4; 10:4; Ef. 2:15) Noma kunjalo, kubalulekile kutsi sifundze ngeMnyaka Wekubuyiselwa. Kungani? Ngobe singajabulela inkhululeko lesikhumbuta ngaloko Jehova lakwentela ema-Israyeli.

6. Bantfu badzinga kukhululwa kuphi?

⁶ Sonkhe siyakudzinga kukhululeka ngobe sitigcili tesono. Ngenca yekutsi sinesono, siyaguga, sigule, futsi sife. Labanyenti bayabubona bufakazi baloko nabatibuka  esibukweni nobe nabaya kudokotela kuze abelaphe. Siyadvumateka nasenta sono. Umphostoli Pawula watsi: “Ngibona lomunye umtsetfo emtimbeni wami  . .  . futsi ungenta sigcili semtsetfo wesono losemalungeni ami.” “Maye mine muntfu lohluphekako! Ngubani lotangikhulula kulomtimba lofako?”—Rom. 7:23, 24.

7. Yini Isaya layibiketela ngenkhululeko?

⁷ Kuyasijabulisa kutsi Nkulunkulu usilungiselele indlela yekutsi sikhululeke esonweni. NguJesu lowenta sikhone kukhululeka. Eminyakeni lengu-700 ngaphambi kwekutsi Jesu ete emhlabeni, umphrofethi Isaya wabiketela kutsi bantfu bebatawutfola inkhululeko lekahle kakhulu. Lenkhululeko beyitawufeza lokuncono kakhulu kunalako lobekujatjulelwa ngema-Israyeli ngeMnyaka Wekubuyiselwa. Watsi: “Moya weNkhosi Simakadze ukimi, ngobe Simakadze ungigcobile, kutsi ngishumayele tindzaba letimnandzi kulabamphofu. Ungitfume kutsi ngitewubopha labo labatinhlitiyo tabo tidzabukile. Ungitfume kutawumemetela kukhululwa kulabatfunjiwe.” (Isa. 61:1) Lesiphrofetho besibhekiselwe kubobani?

8. Siphrofetho sa-Isaya lesimayelana nenkhululeko sasebenta kubobani?

⁸ Siphrofetho lesibalulekile lesimayelana nenkhululeko, sacala kugcwaliseka ngemuva kwekutsi Jesu acale umsebenti wakhe. Ngesikhatsi aya edolobheni lakubo eNazaretha, Jesu wafundzela emaJuda lebekahlangene esinagogeni lesiphrofetho sa-Isaya. Jesu wawasebentisa ekuphileni kwakhe lamavi latsi: “Umoya waJehova ukimi, ngobe ungigcobile kute ngimemetele tindzaba letimnandzi kulabaphuyile; ungitfumile kute ngishumayele ngekukhululwa kwalabatfunjiwe, nangekuvulwa kwemehlo alabatimphumphutse, kute ngikhulule labacindzetelekile, futsi ngishumayele umnyaka wekwemukelwa nguJehova.” (Luk. 4:16-19) Jesu wasigcwalisa njani lesiphrofetho?

9. Ngesikhatsi kusaphila Jesu, bantfu bebafuna kukhululeka kuphi?

⁹ Inkhululeko Isaya lakhuluma ngayo naleyo Jesu lafundza ngayo, yacala kutfolakala ngelikhulu lekucala. Singakukholwa loku ngobe Jesu watsi: “Lamuhla, lombhalo lenisandza kuwuva uyagcwaliseka.” (Luk. 4:21) Bantfu labanyenti labaweva lamavi Jesu lawafundza bebanelitsemba lekutsi batawukhululeka ngephansi kwemtsetfo wemaRoma. Kungenteka bativa ngendlela  lefanako neyemadvodza lamabili latsi: “Besetsemba kutsi nguye lotawukhulula Israyeli.” (Luk. 24:13, 21) Kodvwa siyati kutsi Jesu bekangakhutsati balandzeli bakhe kutsi bavukele umbuso wemaRoma lobewubusa bantfu kabuhlungu. Esikhundleni saloko, Jesu wakhutsata bantfu kutsi ‘banike Khesari lokukwakhe.’ (Mat. 22:21) Ngako Jesu wabakhulula kanjani bantfu ngaleso sikhatsi?

10. Jesu wabakhulula kuphi bantfu?

¹⁰ Indvodzana yaNkulunkulu yeta kutosita bantfu kutsi bakhululeke ngetindlela letimbili. Kwekucala, Jesu wasita bantfu kutsi bakhululeke etimfundzisweni letingemanga lebetifundziswa baholi benkholo. EmaJuda lamanyenti ngaleso sikhatsi bekaphoceleleka kutsi alandzele emasiko ebantfu langemanga kanye netinkholo letingasilo teliciniso. (Mat. 5:31-37; 15:1-11) Bantfu lebebatsi basita labanye kutsi bakhonte Nkulunkulu, bebangamkhonti ngendlela lekahle, ngako bekufana nekutsi batimphumphutse. Ngenca yekutsi bamphika Mesiya neliciniso lebekalifundzisa, abazange bamati Nkulunkulu futsi bachubeka batimphumphutse netono tabo atizange titsetselelwe. (Joh. 9:1, 14-16, 35-41) Ngesizatfu sekutsi Jesu bekafundzisa liciniso futsi abeka sibonelo lesihle, wakhombisa bantfu labatfobekile indlela lebebangakhululeka ngayo etimfundzisweni letingemanga.—Mak. 1:22; 2:23–3:5.

11. Nguyiphi indlela yesibili Jesu laniketa ngayo inkhululeko?

¹¹ Kwesibili, Jesu wenta kutsi bantfu bakhululeke ekugcilatweni sono. Ngenca yekutsi Jesu wanikela ngekuphila kwakhe njengesihlengo, Nkulunkulu angaticolela tono talabo labanekukholwa futsi labakhombisa kukholwa kwabo etintfweni labatentako. (Heb. 10:12-18) Jesu watsi: “Nangabe iNdvodzana inikhulula, nitawukhululeka sibili.” (Joh. 8:36) Lenkhululeko incono kakhulu kunalena lebeyitfolwa ngum-Israyeli ngeMnyaka Wekubuyiselwa! Sibonelo saloko kutsi umuntfu lobekakhululiwe ngeMnyaka Wekubuyiselwa bekaphindze abesigcili, futsi ngekuhamba kwesikhatsi bekatawufa.

12. Bobani bantfu bekucala labazuza enkhululekweni leyamenyetelwa nguJesu?

¹² NgeliPhentekhoste la-33 C.E., Jehova wagcoba baphostoli kanye nalamanye emadvodza nebafati lebekatsembekile ngemoya longcwele. Wabafaka esiswini njengemadvodzana akhe kuze esikhatsini lesitako bavuselwe ezulwini futsi babuse naJesu. (Rom. 8:2, 15-17) Laba  labagcotjwa baba bekucala kuzuza kulenkhululeko Jesu Khristu layimemetela esinagogeni laseNazaretha. Lamadvodza nebafati lebebatsembekile bebangasasito tigcili tetimfundziso temanga lebetifundziswa baholi benkholo labangemaJuda kanye nemasiko abo lebekangaveli evini laNkulunkulu. Nkulunkulu wabatsatsa njengalabakhululekile esonweni lesiletsa kufa. Umnyaka wenkhululeko longokwemfanekiso lowacala nakugcotjwa balandzeli baKhristu nga-33 C.E. utawufika ekugcineni nakuphela Kubusa KwaJesu kweMinyaka Leyinkhulungwane. Ngutiphi tintfo letinhle letitakwenteka nyalo kanye nasekupheleni Kwekubusa KwaJesu kweMinyaka Leyinkhulungwane?

13-14. Ngaphandle kwemaKhristu lagcotjiwe, bobani labangazuza kulenkhululeko Jesu layimemetela?

¹³ Esikhatsini salamuhla, bantfu labanyenti labatfobekile labavela etiveni tonkhe bayincenye ‘yaletinye timvu.’ (Joh. 10:16) Abakakhetfwa nguNkulunkulu kutsi babuse naJesu ezulwini. Kunaloko, IiBhayibheli litsi banelitfuba lekuphila phakadze emhlabeni. Lelo litsemba lonalo yini?

¹⁴ Ngisho namanje utfola tintfo letinhle letijatjulelwa ngulabo labatawuba nencenye embusweni waNkulunkulu wasezulwini. Ngenca yekutsi uyakholelwa emhlatjelweni waJesu, ungamcela Jehova kutsi akucolele tono takho. Nkulunkulu angakwemukela futsi loko kungakunika kuthula.  (Ef. 1:7; Semb. 7:14, 15) Cabanga nangetibusiso lotitfolako manje ngenca yekutsi wakhululeka etimfundzisweni letingemanga. Jesu watsi: “Nitawulati liciniso, futsi liciniso litawunikhulula.” (Joh. 8:32) Lenkhululeko isijabulisa kakhulu!

15. Nguyiphi inkhululeko kanye netibusiso lesitatijabulela esikhatsini lesitako?

¹⁵ Kufanele ulindzele inkhululeko lencono letako. Ngekushesha, Jesu utawubhubhisa inkholo yemanga kanye nabohulumende labakhohlakele. Nkulunkulu utasivikela “sicumbi lesikhulu” lesimkhontako, futsi utasivumela sijabulele tibusiso emhlabeni lolipharadesi. (Semb. 7:9, 14) Bantfu labanyenti batawuvuswa futsi batawutfola litfuba lekukhululeka emiphumeleni lemibi yesono sa-Adamu.—Imis. 24:15.

16. Nguyiphi inkhululeko lenhle bantfu labatayitfola esikhatsini lesitako?

¹⁶ Ngesikhatsi sekubusa Kweminyaka Leyinkhulungwane, Jesu kanye nalabo latawubusa nabo batawusita ekwenteni bantfu babe nemphilo lenhle futsi babe nebuhlobo lobuhle naNkulunkulu. Lesikhatsi sekubuyiselwa nesekukhululeka sitawufana nesikhatsi seMnyaka Wekubuyiselwa wema-Israyeli. Loku kutawusho kutsi bantfu labakhonta Jehova ngekwetsembeka batawuba bete sono.

17. Umbhalo wa-Isaya 65:21-23 utsi yini letawenteka kubantfu baNkulunkulu? (Buka sitfombe lesisekhasini lekucala.)

¹⁷ Siphrofetho lesichaza indlela kuphila lokutawuba ngayo emhlabeni sitfolakala embhalweni wa-Isaya 65:21-23. (Fundza.) Ngeke sibe ngemavila nobe singenti lutfo. Kunaloko, liBhayibheli liveta kutsi bantfu baNkulunkulu ngaleso sikhatsi batawujabulela umsebenti labawentako. Ekupheleni KweKubusa Kweminyaka Leyinkhulungwane, singaciniseka kutsi indalo itawukhululwa “ekugcilatweni konakala, bese itfola inkhululeko lekhatimulako yebantfwana baNkulunkulu.”—Rom. 8:21.

18. Kungani kufanele setsembe kutsi sitawuba nelikusasa lelijabulisako?

¹⁸ Njengobe Jehova bekaciniseka kutsi ema-Israyeli atfola sikhatsi sekusebenta nesekuphumula, utawenta lokufanako nangebantfu bakhe esikhatsini seKubusa KwaKhristu Kweminyaka Leyinkhulungwane. Sitawuba khona nesikhatsi sekukhonta Nkulunkulu. Kubalulekile kukhonta Nkulunkulu kuze sijabule lamuhla, futsi ngisho nasemhlabeni lomusha sitawuba naso sikhatsi sekumkhonta. Bonkhe bantfu labetsembekile batawujabula ngesikhatsi seKubusa KwaKhristu Kweminyaka Leyinkhulungwane, ngobe sitawube senta imisebenti lejabulisako futsi sonkhe sitawube sikhonta Nkulunkulu.