UNGUMUNTFU lobongako yini? Sonkhe sidzinga kucabanga ngalombuto. Libhayibheli labiketela kutsi esikhatsini setfu bantfu labanyenti batawuba ‘ngulabangabongi.’ (2 Thim. 3:2) Kungenteka sewukile wahlangana nebantfu labalindzela kutsi tintfo letinyenti tentelwe bona nobe baniketwe tintfo letitsite. Beva shengatsi abadzingi kubonga ngetintfo labentelwa tona. Kuliciniso kutsi akujabulisi kutihlanganisa nebantfu labanjalo?

Ngalokwehlukile, tinceku taJehova tikhutsatwa kutsi ‘tibe nguletibongako.’ Kufanele ‘sibonge kuto tonkhe tintfo.’ (Khol. 3:15; 1 Thes. 5:18) Kuliciniso kutsi kuba ngulababongako kuzuzisa tsine. Kunetizatfu letinyenti letenta loko kube liciniso.

Lesinye sizatfu lesibalulekile sekutsi sihlale sibonga kutsi kuyasisita sihlale sijabulile. Nangabe umuntfu abonga ngentfo letsite uyajabula futsi naloyo lobongwako uyajabula. Yini leyenta kubonga kusijabulise, kuphindze kujabulise nalabanye? Sibonelo saloko kutsi: Nangabe umuntfu anesifiso sekucitsa sikhatsi sakhe kuze akwentele lokutsite, usuke abona kutsi kufanele akwentele, futsi usuke akutsandza. Nawubona kutsi uyatsandvwa uyajabula. Kwenteka lokufanako nakuRuthe. Bowazi waba nemusa kuRuthe. Kuliciniso kutsi kwamjabulisa Ruthe kubona kutsi kunemuntfu lomkhatsalelako.—Ruth 2:10-13.

Kubaluleke kakhulu kutsi sibonge kuNkulunkulu. Kuliciniso kutsi ngaletinye tikhatsi uyacabanga ngetintfo Nkulunkulu latentile, nalachubeka atenta kuze ukhone kucinisa buhlobo bakho naye. (Dut. 8:17, 18; Imis. 14:17) Kufanele sizindle ngetibusiso letinyenti Nkulunkulu lasiphe tona kanye nalatiphe labo lesibatsandzako. Kuzindla ngemusa weMdali wetfu kutawusenta simbonge futsi sibone indlela lasitsandza ngayo.—1 Joh. 4:9.

Kufanele singagcini ngekucabanga ngemusa wakhe kanye nangetibusiso lasiphe tona, kodvwa kufanele siphindze simbonge ngebuhle bakhe. (Hla. 100:4, 5) Bantfu labanyenti batsi “kubonga labanye kubenta bajabule.”

Lesinye sizatfu lesenta kubonga kubaluleke kutsi kuyabucinisa bungani. Sonkhe siyakudzinga kubongwa. Nawubonga umuntfu ngalokusuka enhlitityweni ngesento lesihle lasentile, bungani benu buyacina. (Rom. 16:3, 4) Ngetulu kwaloko, bantfu lababongako bavamile kuba lusito kulabanye. Bayabona nangabe labanye baba nemusa kubo futsi nabo bayakhutsateka kutsi babe nemusa. Kuliciniso kutsi kusita labanye kukwenta ujabule. Kunjengobe Jesu asho kutsi: “Kunenjabulo lenyenti ekupheni kunasekwemukeleni.”—Imis. 20:35.

Robert Emmons, longumcondzisi eNyuvesi leseCalifornia lebeyenta lucwaningo ngendzaba yekubonga, watsi: “Kuze sikhone kubonga kufanele sicondze kutsi siyadzingana. Ngaletinye tikhatsi siyabapha labanye futsi ngaletinye tikhatsi siyemukela.” Kuze sikhone kuchubeka siphila futsi sihlale sijabulile, setsembela kulabanye ngetindlela letinyenti. Sibonelo saloko kutsi bangasipha kudla nobe basisite nasigula. (1 Khor. 12:21) Umuntfu lobongako uyakujabulela loko bantfu labamentela kona. Uyabonga yini ngaloko bantfu labakwentela kona?

Lesinye sizatfu lesenta kubonga kubaluleke kutsi kuyakusita ucabange tintfo letinhle kunekucabanga tintfo letimbi. Ngalomunye umcondvo, singasho kutsi ingcondvo isebenta njengesisefo. Kubonga kuyakusita unake tintfo letinhle letentekako kunekutsi unake tintfo letimbi. Kukusita nekutsi unganaki tinkinga. Nawubonga, ubona tintfo letinyenti letinhle, loko kukwenta ubonge kakhulu. Kunaka tintfo longabonga ngato kutakusita wente naku lokwashiwo nguMphostoli Pawula nakatsi: “Hlalani nijabula eNkhosini.”—Fil. 4:4.

Kubonga kuyasisita sinake tintfo letinhle. Kumatima kakhulu kubonga nangabe ngesikhatsi lesifanako unemona, utfukutsele nobe ukwatile. Bantfu lababongako abavami kuba netintfo letinyenti, bayenetiseka ngaloko labanako futsi abetami kuba netintfo letinyenti.—Fil. 4:12.

Njengobe ungumKhristu, uyabona kutsi Sathane ufuna udvumateke ngenca yebumatima lobhekana nabo kulamalanga ekugcina. Sathane uyajabula nangabe ucabanga tintfo letimbi futsi uhlale ukhonona. Nangabe wenta njalo kutawuba lukhuni ngebantfu kutsi bakulalele nawushumayela tindzaba letimnandzi. Ecinisweni, kubonga kuhlobene nebuntfu baNkulunkulu. Sibonelo saloko kutsi siyajabula nangabe sibona tintfo letinhle Nkulunkulu lasiphe tona, futsi siba nekukholwa etintfweni lasetsembise tona esikhatsini lesitako. —Gal. 5:22, 23.

Nangabe ungulomunye wetikhonti taJehova, kungenteka uyavumelana naloko losekukhulunywe ngako kulesihloko mayelana nekubonga. Nobe kunjalo, kungenteka kungabi melula kuhlale ubonga futsi ucabanga tintfo letinhle. Kodvwa ungakuvumeli loko kukucedze emandla. Ungakhona kuhlala ungumuntfu lobongako. Njalo ngelilanga, cabanga ngetintfo letinhle letentekako ekuphileni kwakho longabonga ngato. Nawuhlale ubonga, utakwetayela kubonga. Loko kutakwenta uhlale ujabule kakhulu kwendlula bantfu labanaka bulukhuni labahlangabetana nabo. Cabanga ngetintfo letinhle Nkulunkulu kanye nalabanye bantfu labakwentela tona kuze ukhutsateke, futsi letikwenta ujabule. Mhlawumbe ungatibhala phansi. Ungabhala ngetintfo letimbili nobe letintsatfu letikwenta ujabule lilanga ngelilanga.

Bacwaningi batfole kutsi “nangabe sihlale sibabonga labanye indlela ingcondvo yetfu lesebenta ngayo iyashintja futsi kuba melula ngatsi kubonga nekuba nembono lokahle ngekuphila.” Umuntfu lobongako uhlale ajabulile. Ngako cabanga ngetintfo letinhle lotitfolile kanye netintfo letinhle lotijabulelako letentekako ekuphileni kwakho, futsi hlale ubonga ngato! Kunekutsi utitsatsele phansi tintfo letinhle letentekako, “bonga Jehova ngobe ulungile.” “Mbonge kuto tonkhe tintfo.”—1 Khr. 16:34; 1 Thes. 5:18.