Akusinjalo. Develi akazange atjele Eva kutsi nakadla sitselo Nkulunkulu labayala kutsi bangasidli, bekutawubonakala shengatsi ufile kodvwa incenye letsite (labanye lamuhla labayati ngekutsi ngumphefumulo longafi) itawuchubeka iphila endzaweni letsite. Sathane wakhuluma asebentisa inyoka kuze atjele Eva kutsi nakasidla lesitselo salesihlahla ‘angeke afe.’ Sathane watjela Eva kutsi utawuchubeka aphila, ajabulele imphilo lencono kakhulu emhlabeni futsi angasamdzingi Nkulunkulu.—Gen. 2:17; 3:3-5.

Nangabe lemfundziso lengemanga lokukhulunywa ngayo lamuhla lemayelana nekungafi kwemphefumulo ingazange icale ensimini yaseEdeni, yacala kuphi? Ayikho imphendvulo lecondzile. Siyati kutsi tonkhe timfundziso temanga tabhujiswa ngaZamcolo wangalelinga laNowa. Tinkholo letifundzisa emanga atizange tiphumelele ngesikhatsi saZamcolo ngoba kwasindza Nowa nemndeni wakhe lebebatikhonti teliciniso.

Ngako kungenteka imfundziso yekungafi kwemphefumulo levamile lamuhla yacala ngemuva kwaZamcolo. Kuliciniso kutsi lemfundziso yekungafi kwemphefumulo yasakateka ngesikhatsi Nkulunkulu asanganisa tilwimi eBhabheli futsi asakata bantfu ‘emhlabeni wonkhe.’ (Gen. 11:8, 9) Ngisho nobe kungatsiwa yacala nini lemfundziso lengemanga, siyaciniseka kutsi yabangelwa nguSathane Develi ‘longuyise wemanga,’ futsi wajabula nakayibona igcwala umhlaba wonkhe.—Joh. 8:44.