1-2. Loko lokwenteka ku-Angelito, kusifundzisa kutsi senteni?

BATALI bakho baboFakazi BaJehova yini? Nangabe kunjalo, khumbula kutsi angeke ube ngumngani waJehova ngesizatfu sekutsi nabo babangani baJehova. Ngisho nobe batali betfu bakhonta Jehova nobe bangamkhonti, ngamunye wetfu kufanele atakhele buhlobo lobuhle naJehova.

² Cabanga ngalokwenteka kumzalwane Angelito. Bonkhe bakubo bebaBoFakazi BaJehova. Nobe kunjalo, ngesikhatsi asemncane bekeva shengatsi ute buhlobo lobuhle naNkulunkulu. Utsi: “Bengikhonta Jehova ngesizatfu sekutsi umndeni wami bewumkhonta.” Nobe kunjalo, Angelito wancuma kucitsa sikhatsi lesinyenti afundza liVi laNkulunkulu futsi azindla ngalo, waphindze wacala kuthantaza njalo kuJehova. Waba yini umphumela? Angelito utsi: “Ngafundza kutsi indlela lencono kakhulu yekutsi ngisondzelane naBabe wami Jehova kutsi ngimati kahle.” Loko lokwenteka ku-Angelito kusenta sicabange nganayi imibuto lebalulekile: Uyini umehluko emkhatsini wekwati tintfo letimbalwa ngaJehova kanye nekumati kahle? Futsi singentani kuze simati kahle Jehova?

3. Ngumuphi umehluko emkhatsini wekwati Jehova kanye nekumati kahle?

³ Singacabanga kutsi siyamati Jehova ngenca yekutsi sati libito lakhe nobe tintfo latenta kanye netintfo latisho? Loko akusho kutsi simati kahle Jehova. Kufanele sicitse sikhatsi lesinyenti sifundza ngaJehova kanye nangebuntfu bakhe lobuhle. Nasenta njalo, sitawucondza kutsi yini lemkhutsata  kutsi asho aphindze ente tintfo letitsite. Loko kutasisita sati kutsi Jehova uyakutsandza yini loko lesikucabangako nalesikwentako. Nasesikwati loko Jehova lafuna sikwente, kufanele sikwente.

4. Kucoca ngetibonelo letiseBhayibhelini kutasisita njani?

⁴ Labanye bantfu bangahlekisa ngatsi nasifuna kukhonta Jehova, futsi bangasiphikisa kakhulu nasesicala kuya emihlanganweni yebuKhristu. Kodvwa nasetsembela kuJehova angeke asilahle. Sitawube sakha bungani lobungeke buphele naNkulunkulu. Singakhona yini kumati Jehova? Yebo, singakhona! Tibonelo lesatibekelwa bantfu labanesono njengaMosi kanye neNkhosi Davide tiyakhombisa kutsi loko kungenteka. Njengobe sitawube sicoca ngaloko labakwenta, sitawuphendvula nayi imibuto lemibili: Bamati kanjani Jehova? Futsi ngutiphi tifundvo lesingatifundza etibonelweni tabo?

5. Yini Mosi lakhetsa kuyenta?

⁵ Mose wakhetsa kukhonta Nkulunkulu. Ngesikhatsi aneminyaka lengu-40, Mosi wakhetsa kutihlanganisa nebantfu labakhonta Nkulunkulu, lokungema-Israyeli, kunekutsi atiwe ngekutsi “uyindvodzana yendvodzakati yaFaro.” (Heb. 11:24) Mosi wala kuba sesikhundleni lesisetulu. Ngesikhatsi Mosi asekela ema-Israyeli, bekati kutsi Faro utawutfukutsela kakhulu. Faro bekayinkhosi lenemandla, futsi emaGibhithe bekacabanga kutsi ungunkulunkulu. Loko kwakhombisa kutsi Mosi bekanekukholwa lokucinile! Mosi bekametsemba Jehova. Lokumetsemba kwaba sizatfu lesibaluleke kakhulu lesenta Mosi waba nebuhlobo lobuhle naJehova, futsi lobuhlobo baba khona kuphila kwakhe konkhe.—Taga 3:5.

6. Yini lesingayifundza esibonelweni saMosi?

⁶ Ngusiphi sifundvo lesisitfolako? NjengaMosi, sonkhe kufanele sente sincumo sekutsi sitawukhetsa kukhonta Jehova futsi sitihlanganise nebantfu bakhe yini? Kungenteka kudzingeke sitidzele kuze sikhonte Nkulunkulu, futsi kungenteka bantfu labangamati Jehova basiphikise. Kodvwa nasimetsemba Babe wetfu losezulwini, sitawuciniseka kutsi utasisekela!

7-8. Yini Mosi lachubeka ayifundza?

⁷ Mosi wachubeka afundza ngebuntfu baJehova futsi enta intsandvo yakhe. Sibonelo saloko kutsi ngesikhatsi Jehova acela Mosi kutsi akhiphe sive sema-Israyeli eGibhithe, Mosi bekangatetsembi futsi watjela Jehova tikhatsi letinyenti kutsi utiva angasifanelekeli lesabelo. Indlela Nkulunkulu lamphendvula ngayo yakhombisa kutsi bekaneluvelo, lokusho kutsi wayicondza indlela Mosi lebekativa ngayo futsi wamsita. (Eks. 4:10-16) Umphumela waloko waba kutsi Mosi wakhona kwetfula umlayeto wesehlulelo lonemandla kuFaro. Mosi wabona ngesikhatsi Jehova asebentisa emandla akhe nakasindzisa ema-Israyeli futsi abhubhisa Faro lebekatsatfwa njengaNkulunkulu kanye nemabutfo akhe elwandle lolubovu.—Eks. 14:26-31; Hla. 136:15.

⁸ Ngesikhatsi Mosi sekasikhiphile sive sema-Israyeli eGibhithe, besihlale sikhonona. Nobe kunjalo, Mosi wayinaka indlela Jehova lababeketelela ngayo labantfu labakhululwa ekugcilatweni. (Hla. 78:40-43) Mosi wabona kutsi Jehova utfobekile ngesikhatsi alalela sicelo sakhe sekutsi angawabhubhisi ema-Israyeli.—Eks. 32:9-14.

9. Ngekusho kwembhalo waHebheru 11:27 bebucine kangakanani buhlobo baJehova naMosi?

 ⁹ Ngemuva kwekukhululwa kwema-Israyeli eGibhithe, Mosi waba nebuhlobo lobuhle naJehova kwaze kwaba shengatsi uyambona Babe wakhe losezulwini. (Fundza Hebheru 11:27.) LiBhayibheli liyakhombisa kutsi lobuhlobo bebucine kangakanani nalitsi: “Simakadze abekhuluma naMosi buso nebuso, njengemuntfu akhuluma nemngani wakhe.”—Eks. 33:11.

10. Kuze simati kahle Jehova, yini lokufanele siyente?

¹⁰ Ngusiphi sifundvo lesisitfolako? Kuze simati kahle Jehova, akukafaneli sigcine ngekufundza ngebuntfu bakhe kodvwa kufanele sente intsandvo yakhe. ‘Intsandvo yaJehova ikutsi tonkhe tinhlobo tebantfu tisindziswe, titfole nelwati lolungulonalona lweliciniso.’ (1 Thim. 2:3, 4) Lenye indlela yekwenta intsandvo yaNkulunkulu kutsi sifundzise labanye ngaJehova.

11. Simati njani Jehova kancono nasifundzisa labanye ngaye?

¹¹ Simati kancono Jehova, nangabe sifundzisa labanye ngaye. Sibonelo saloko kutsi siyalubona luvelo Jehova lanalo ngebantfu nakasisita kutsi sitfole labo labafuna kuba bangani bakhe. (Joh. 6:44; Imis. 13:48) Siyabona kutsi liVi laNkulunkulu liBhayibheli linemandla ngobe lisita labo lesifundza nabo liBhayibheli kutsi bayekele imikhuba yabo lemibi futsi bashintje indlela labaphila ngayo. (Khol. 3:9, 10) Siyabona nekutsi uyababeketelela bantfu labasensimini yetfu ngobe usitfumela kubo tikhatsi letinyenti kuze sibasite bafundze ngaye futsi basindziswe.—Rom. 10:13-15.

12. Ngekusho kwembhalo wa-Eksodusi 33:13, yini Mosi layicela futsi leni?

¹² Mosi wabutsatsa njengalobuligugu buhlobo bakhe naJehova. Jehova wasebentisa Mosi kutsi ente timangaliso letinyenti, ngako Mosi besekamati kahle Jehova kodvwa wachubeka acela Jehova kutsi amsite. (Fundza Eksodusi 33:13.) Mosi bekaneminyaka lengetulu kwalengu-80 ngesikhatsi enta lesicelo, kodvwa bekati kutsi bekusafanele afundze lokunyenti ngaBabe wakhe losezulwini futsi lonelutsandvo.

13. Nguyiphi indlela lesingakhombisa ngayo kutsi sibutsatsa njengalobuligugu buhlobo betfu naNkulunkulu?

¹³ Ngusiphi sifundvo lesisitfolako? Ngisho nobe sesikhonte Jehova sikhatsi lesingakanani, kufanele singabutsatseli phansi buhlobo betfu naye. Lenye indlela lesingakhombisa ngayo kutsi sibutsatsa njengalobuligugu buhlobo betfu naNkulunkulu, kutsi sikhulume naye ngemthantazo.

14. Kungani umthantazo ubalulekile kuze sifundze lokunyenti ngaNkulunkulu?

¹⁴ Nangabe ufuna kuba ngumngani lomkhulu nemuntfu lotsite, kufanele nihlale nicoca. Ngako nangabe ufuna kuba ngumngani lomkhulu naNkulunkulu, kufanele uthantaze kuye ngaso sonkhe sikhatsi futsi ungesabi kumtjela loko lokucabangako nendlela lotiva ngayo. (Ef. 6:18) Krista lohlala eTurkey utsi: “Lutsandvo lenginalo ngaJehova kanye nendlela lengimetsemba ngayo kuyakhula nangithantaza kuye ngimtjela loko lengikucabangako nalapho ngimbona angisita. Kubona indlela Jehova layiphendvule ngayo imithantazo yami kungisite ngambona njengaBabe neMngani wami.”

15. Jehova watsi iNkhosi Davide beyingumuntfu lonjani?

¹⁵ INkhosi Davide yatalelwa esiveni lebesitinikele kuJehova Nkulunkulu. Kodvwa  Davide akazange akhonte Jehova ngesizatfu nje sekutsi umndeni wakhe uyamkhonta. Kodvwa watakhela yena buhlobo lobuhle naNkulunkulu, futsi Jehova wamtsandza kakhulu. Jehova watsi Davide ungumuntfu ‘lowemukelwe yinhlitiyo yakhe.’ (Imis. 13:22) Davide wasondzelana njani naJehova?

16. Yini Davide layifundza ngaJehova nakabuka indalo?

¹⁶ Davide wafundza ngaJehova endalweni. Ngesikhatsi Davide asemncane, wacitsa sikhatsi lesinyenti asehlane futsi anakekela timvu tababe wakhe. Kungenteka nguleso sikhatsi lacala ngaso kuzindla ngetintfo Jehova latentile. Sibonelo saloko kutsi ngesikhatsi Davide abuka etulu esibhakabhakeni ebusuku, bekangaboni kuphela tinkhulungwane tetinkhanyeti, kodvwa kungenteka wacabangisisa ngebuntfu baloyo lotentile. Davide wabhala watsi: “Emazulu ababata bukhosi baNkulunkulu, nemkhatsi wembula likhono lakhe.” (Hla. 19:1, 2) Ngesikhatsi Davide acabanga ngendlela lemangalisako yena kanye nalabanye bantfu labadalwe ngayo, wabona kuhlakanipha kwaJehova. (Hla. 139:14) Ngesikhatsi Davide azindla ngetintfo Jehova latentile, wabona kutsi mncane kakhulu nakaticatsanisa naye.—Hla. 139:6.

17. Yini lesingayifundza nasizindla ngendalo?

¹⁷ Ngusiphi sifundvo lesisitfolako? Tinike sikhatsi sekubuka tintfo letinhle Jehova latidalile; futsi utijabulele! Njalo ngelilanga, zindla ngendalo lekutungeletile kutsi ikufundzisani ngaJehova, lokufaka ekhatsi tihlahla, tilwane, kanye nebantfu. Nawenta njalo, utawufundza lokunyenti ngaBabe wetfu lositsandzako Jehova. (Rom. 1:20) Lutsandvo lonalo ngaye lutawukhula njalo ngelilanga.

18. Ngekusho kweTihlabelelo 18, yini Davide lebekayati?

¹⁸ Davide wabona kutsi Jehova uyamsita. Nasi sibonelo, ngesikhatsi Davide avikela timvu tababe wakhe kutsi tingadliwa libhubesi kanye nelibhele, wabona kutsi nguJehova lowamsita kutsi abulale letilwane tesiganga. Ngesikhatsi ancoba sidlakela lesinguGoliyathi, Davide wabona kutsi bekacondziswa nguJehova. (1 Sam. 17:37) Ngesikhatsi Davide abalekela inkhosi lenemona Sawula, wabona kutsi bekasindziswa nguJehova. (Hla. 18) Kube Davide bekatikhukhumeta, bekatawucabanga kutsi letintfo utente ngekuhlakanipha kwakhe. Kodvwa Davide bekatfobekile, ngako wabona kutsi bekasitwa nguJehova.—Hla. 138:6.

19. Yini lesingayifundza esibonelweni saDavide?

¹⁹ Ngusiphi sifundvo lesisitfolako? Kudzingeka sente lokungetulu nje kwekumane sicele lusito lwaJehova. Kufanele siphindze sinake kutsi usisita nini futsi kanjani. Nangabe sitfobekile, sitawubona kutsi ngeke sente tintfo ngekuhlakanipha kwetfu kodvwa nguJehova losisita kutsi sente loko lesingakhona kukwenta. Ngaso sonkhe sikhatsi nasibona Jehova asisita, buhlobo betfu naye butawucina. Isaac longumzalwane waseFiji, futsi lokhonte Jehova iminyaka leminyenti ukubonile loko. Utsi: “Nangibuka emuva kulokwenteka ekuphileni kwami, ngiyabona kutsi Jehova ungisite njani kusukela ngacala kufundza liBhayibheli kuze kube ngulamuhla. Ngako Jehova ungumuntfu mbamba kimi.”

20. Yini lesingayifundza ngebuhlobo baDavide naNkulunkulu?

²⁰ Davide walingisa buntfu baJehova. Jehova wasidala ngendlela yekutsi sikhone  kulingisa buntfu bakhe. (Gen. 1:26) Sitawukhona kumlingisa Jehova nasichubeka sifundza lokunyenti ngebuntfu bakhe. Davide bekamati kahle Babe wakhe losezulwini, ngako wakhona kumlingisa nakanalabanye. Cabanga nganasi sibonelo, Davide wona kuJehova ngesikhatsi alala naBhatisheba futsi atsi indvodza yakhe ayibulawe. (2 Sam. 11:1-4, 15) Jehova wamkhombisa umusa Davide njengobe naDavide bekabakhombisa umusa labanye. Ngesizatfu sekutsi Davide bekanebuhlobo lobuhle naJehova, ema-Israyeli bekamtsandza kakhulu futsi naJehova wamsebentisa njengesibonelo kulamanye emakhosi aka-Israyeli.—1 Khos. 15:11; 2 Khos. 14:1-3.

21. Ngekusho kwembhalo wa-Efesu 4:24; 5:1, uyini umphumela ‘wekulingisa Nkulunkulu’?

²¹ Ngusiphi sifundvo lesisitfolako? Kufanele ‘silingise Nkulunkulu.’ Nasilingisa Nkulunkulu siyazuza futsi sifundza lokunyenti ngaye. Nasilingisa buntfu baNkulunkulu, sisuke sikhombisa kutsi sibantfwana bakhe.—Fundza Efesu 4:24; 5:1.

22-23. Yini letawenteka nasikusebentisa loko lesikufundzako ngaJehova?

²² Njengoba sesibonile, singafundza ngaJehova nasibuka indalo kanye nangeliVi lakhe liBhayibheli. LiBhayibheli linetibonelo tetinceku taNkulunkulu letetsembekile lesingatilingisa, njengaMosi naDavide. Jehova uwentile umsebenti wakhe. Ngako natsi kudzingeka sente wetfu, ngekutsi sifundze lokunyenti ngaye.

²³ Angeke siyekele kufundza ngaJehova. (Shu. 3:11) Intfo lebalulekile, akusiko nje kutsi siyamati Jehova, kodvwa kutsi sentani ngaloko lesikwatiko ngaye. Nangabe sikusebentisa loko lesikufundzako futsi setama kulingisa Babe wetfu lonelutsandvo, Jehova, utawuchubeka asondzela kitsi. (Jak. 4:8) EVini lakhe liBhayibheli, uyasicinisekisa kutsi angeke abashiye labo labetama kumati kancono.