Ecinisweni, akusiko loko lokushiwo ngulelivesi. Lelivesi likhuluma ngemuntfu lobhekana netinkinga letinyenti kodvwa atibeketelele.

Asesibuke Taga 24:15-17, utsi: “Ungabhaci ngasekhaya lemuntfu lolungile ube unetisusa letimbi; Ungayibhidliti indzawo lahlala kuyo. Ngobe ngisho nome lolungile angawa tikhatsi letingu-7, utawuphindze avuke, Kodvwa lomubi utakuwa bhu phansi ngenca yenhlekelele. Ungajabuli nangabe sitsa sakho siwa, Futsi ungayivumeli inhlitiyo yakho ijabule nangabe sigileka.”—Taga 24:15-17.

Labanye bantfu bacabanga kutsi livesi 16 likhuluma ngemuntfu lowenta sono kodvwa aphendvuke futsi abe nebuhlubo lobuhle naNkulunkulu. Baholi lababili baseNgilandi babhala kutsi bafundisi bakadzeni nebalamuhla, balichaza kanjalo lelivesi. Baphindze batsi “nobe umuntfu lolungile angenta . . . sono tikhatsi letinyenti, Nkulunkulu uhlale amtsandza ngobe njalo nakenta sono uyaphendvuka.” Umuntfu longafuni kuyekela kwenta lokubi angayijabulela lenchazelo. Angase acabange kutsi ngisho nobe angona tikhatsi letinyenti, Nkulunkulu utawuhlale amcolela.

Kodvwa loko akusiko lokushiwo nguvesi 16.

Ligama lesiHebheru lelichazwe ngekutsi “angawa” nalelitsi “siwa” lokukhulunywa ngawo kuvesi 16 na-17 angasetjentiswa ngetindlela letehlukahlukene. Lingasho kuwa mbamba. Nasi sibonelo, silwane singawa emgwacweni, umuntfu angawa eluphahleni nelitje lingawela emhlabatsini. (Dut. 22:4, 8; Amo. 9:9) Leligama lingaphindze libe nalenye inchazelo, nasi sibonelo: “Jehova uyamcondzisa umuntfu nangabe indlela laphila ngayo imjabulisa. Ngisho nobe angagileka, angeke awe bhu phansi, Ngobe Jehova utawubamba sandla sakhe.”—Hla. 37:23, 24; Taga 11:5; 13:17; 17:20.

Nobe kunjalo, naka naku lokwashiwo nguProfessor Edward H. Plumptre, watsi: “Ligama lesiHebheru [‘lekuwa’] alisho kuwela esonweni.” Lesinye sati sachaza vesi 16 ngalendlela: “Akunangcondvo kuphatsa kabi bantfu baNkulunkulu, ngobe batawuhlale baphumelela kodvwa lababi ngeke baphumelele!”

Ngako, konkhe loku kuyakhombisa kutsi Taga 24:16 atikhulumi ngekona kodvwa tikhuluma ngekubhekana netinkinga nobe bumatima tikhatsi letinyenti. Kulelive lelibi, umuntfu lolungile angagula nobe abhekane naletinye tinkinga. Angahlushwa nguhulumende ngenca yekukholwa kwakhe. Kodvwa angetsemba kutsi Nkulunkulu utamsekela futsi amsite akhone kubhekana naletinkinga futsi aphumelele. Tibute, ‘Yini leyenta tikhonti taNkulunkulu tihlale tiphumelela?’ Siyaciniseka kutsi “Jehova uyabasita bonkhe labawako, Aphakamise bonkhe labacindzetelekile.”—Hla. 41:1-3; 145:14-19.

“Lolungile” akajabuli ngenca yekutsi labanye banetinkinga. Kunaloko, uyadvudvuteka ngobe uyati kutsi “kutabahambela kahle labo labesaba Nkulunkulu weliciniso, ngenca yekutsi bamesaba mbamba.”—Shu. 8:11-13; Jobe 31:3-6; Hla. 27:5, 6.