SIHLOKO LESIFUNDVWAKO 5
“Inhloko Yawo Onkhe Emadvodza NguKhristu”
“Inhloko yawo onkhe emadvodza nguKhristu.”—1 KHOR. 11:3.
INGOMA 12 Nkulunkulu Lophakeme Jehova
LOKUTAWUCOCWA NGAKO KULESIHLOKO *
1. Ngutiphi tintfo letingafaka sandla endleleni indvodza lemphatsa ngayo umfati wayo nebantfwana?
UCABANGA kutsi kusho kutsini kuba yinhloko yemndeni? Lamanye emadvodza avumela lisiko nendlela lakhuliswe ngayo kutsi kube nesandla endleleni laphatsa ngayo bafati bawo nebantfwana. Dzadze Yanita lohlala e-Europe utsi, “Langihlala khona, bantfu bakholelwa kakhulu kutsi bafati abakabaluleki kunemadvodza futsi kufanele baphatfwe njengetisebenti.” Lomunye umzalwane lokutsiwa nguLuke lohlala eMelika utsi, “Labanye bobabe bafundzisa emadvodzana abo kutsi kute lokubalulekile lokushiwo bafati futsi asikho sidzingo sekulalela labakushoko.” Kodvwa Jehova akafuni kutsi emadvodza aphatse bafati bawo ngaleyondlela. (Catsanisa naMakho 7:13.) Yini lengasita indvodza kutsi ibe yinhloko yemndeni lekahle?
2. Yini inhloko yemndeni lokufanele ikwati, futsi kungani?
2 Kuze indvodza ibe yinhloko yemndeni lekahle, kufanele ikwati loko Jehova lafuna kutsi ikwente. Kufanele yati nekutsi kungani Jehova enta kutsi kube nebunhloko, nekutsi ingamlingisa njani Jehova naJesu. Kungani kubalulekile kutsi indvodza ikwati loko? Kungobe Jehova unikete tinhloko temindeni ligunya futsi ufuna tilisebentise kahle.—Luk. 12:48b.
BUYINI BUNHLOKO?
3. Sifundzani kuloko lokushiwo liBhayibheli ngebunhloko ku-1 KubaseKhorinte 11:3?
3 Fundza 1 KubaseKhorinte 11:3. Lelivesi lichaza indlela Jehova lawuhlele ngayo umndeni wakhe losezulwini nalosemhlabeni. Bunhloko bufaka ekhatsi tintfo letimbili, ligunya nekulandzisa. Njengobe ayinhloko, Jehova unalo lonkhe ligunya futsi unikete labanye ligunya kodvwa batawulandzisa kuye ngendlela labalisebentisa ngayo leligunya. (Rom. 14:10; Ef. 3:14, 15) Jehova unikete Jesu ligunya etikwelibandla, kodvwa Jesu utawulandzisa kuye ngendlela lasiphatsa ngayo. (1 Khor. 15:27) Jehova unikete nendvodza ligunya etikwemfati wayo nebantfwana kodvwa lendvodza itawulandzisa kuJehova nakuJesu ngendlela lewuphatsa ngayo umndeni wayo.—1 Phet. 3:7.
4. Jehova naJesu baneligunya lani?
4 Njengobe ayiNhloko yemndeni wasezulwini nasemhlabeni, Jehova uneligunya lekubeka imitsetfo mayelana nendlela bantfwabakhe lokufanele batiphatse ngayo, futsi uyaciniseka kutsi bayayilalela lemitsetfo. (Isa. 33:22) Njengobe ayinhloko yelibandla lebuKhristu, Jesu unelilungelo lekusibekela imitsetfo futsi aciniseke kutsi siyayilandzela.—Gal. 6:2; Khol. 1:18-20.
5. Nguliphi ligunya inhloko yemndeni lenalo, futsi yini lokungakafaneli ikwente?
5 Njengobe ilingisa sibonelo saJehova naJesu, inhloko yemndeni ineligunya lekwenta tincumo emndenini wayo. (Rom. 7:2; Ef. 6:4) Kodvwa kunetintfo lokungakafaneli itente. Nasi sibonelo, imitsetfo leyibekako kufanele isekelwe eVini laNkulunkulu. (Taga 3:5, 6) Inhloko yemndeni ite ligunya lekubekela labo labangasiyo incenye yemndeni wayo imitsetfo. (Rom. 14:4) Ngisho nobe bantfwana bayo sebakhulile futsi sebahambile ekhaya, bayachubeka bayihlonipha kodvwa abasekho ngephansi kwebunhloko bayo.—Mat. 19:5.
KUNGANI JEHOVA ENTA KUTSI KUBE NEBUNHLOKO?
6. Kungani Jehova enta kutsi kube nebunhloko?
6 Jehova wenta kutsi kube nebunhloko ngobe uyawutsandza umndeni wakhe. Busipho lesivela kuye. Bunhloko benta kutsi umndeni waJehova ube nekuthula futsi ube nekuhleleka. (1 Khor. 14:33, 40) Kube bekungacaci kutsi ngubani loneligunya, umndeni waJehova bewungeke uhleleke futsi bewungeke ujabule. Nasi sibonelo, kute lobekatakwati kutsi ngubani lokufanele ente tincumo nekutsi ngubani lokufanele aciniseke kutsi loko lokuncunyiwe kuyenteka.
7. Ngekusho Kwebase-Efesu 5:25, 28, Jehova ufuna kutsi emadvodza abaphatse njani bafati bawo?
7 Nangabe kukuhle kutsi emadvodza abe neligunya emindenini yawo, kwentiwa yini kutsi bafati labanyenti beve shengatsi emadvodza abo ayabacindzetela futsi abaphatsa kabi? Sizatfu saloko kutsi emadvodza lamanyenti akayilaleli imitsetfo yaJehova lemayelana nemindeni, kunaloko akhetsa kulandzela emasiko endzawo. Angaphindze abaphatse kabi bafati bawo kuze nje ative ajabulile. Nasi sibonelo, indvodza ingamphatsa kabi umfati wayo kuze nje itive ibalulekile nobe kuze ikhombise labanye kutsi “iyindvodza sibili.” Ingase icabange kutsi angeke imphocelele umfati wayo kutsi ayitsandze kodvwa ingamenta kutsi ayesabe. Ingasebentisa lokwesaba kuze imentise nobe yini leyifunako. * Emadvodza lacabanga ngalendlela futsi lenta tintfo ngalendlela awenti kahle, akabahloniphi bafati bawo futsi enta lokuphambene naloko lokufunwa nguJehova.—Fundza Kubase-Efesu 5:25, 28.
YINI LENGASITA INDVODZA KUTSI IBE YINHLOKO YEMNDENI LEKAHLE?
8. Yini lengasita indvodza kutsi ibe yinhloko yemndeni lekahle?
8 Indvodza ingaba yinhloko yemndeni lekahle ngekutsi ilingise indlela Jehova naJesu labalisebentisa ngayo ligunya. Cabanga ngebuntfu lobakhonjiswa nguJehova naJesu futsi unake kutsi inhloko yemndeni ingabukhombisa njani endleleni lephatsa ngayo umfati wayo nebantfwana.
9. Jehova ukhombisa njani kutsi utfobekile?
9 Kutfobeka. Jehova uhlakaniphe kwendlula nobe ngubani kodvwa uyayilalela imibono yetikhonti takhe. (Gen. 18:23, 24, 32) Uvumele labo labangephansi kweligunya lakhe kutsi bavete loko labakucabangako. (1 Khos. 22:19-22) Jehova ute sono kodvwa akalindzeli kutsi singawenti emaphutsa. Kunaloko, usita bantfu labanesono labamkhontako kutsi baphumelele. (Hla. 113:6, 7) Ecinisweni liBhayibheli lize lichaze Jehova ngekutsi “ungumsiti.” (Hla. 27:9; Heb. 13:6) INkhosi Davide yasho kutsi yakhona kwenta umsebenti wayo ngesizatfu sekutsi Jehova utfobekile.—2 Sam. 22:36.
10. Jesu wakhombisa njani kutsi utfobekile?
10 Cabanga ngesibonelo saJesu. Ngisho nobe bekayiNkhosi, wageza tinyawo tebafundzi bakhe. Ngusiphi lesinye sizatfu lesenta Jehova wabhala lendzaba eBhayibhelini? Bekafuna kutsi bonkhe bantfu lokufaka ekhatsi netinhloko temindeni, balandzele lesibonelo saJesu. Jesu watsi: “Nginentele sibonelo, kuze nani nente njengobe ngentile.” (Joh. 13:12-17) Ngisho nobe Jesu bekaneligunya leliphakeme, akazange afune kusetjentelwa. Kunaloko waba yinceku yalabanye.—Mat. 20:28.
Inhloko yemndeni ingakhombisa kutsi itfobekile nekutsi iyawutsandza umndeni wayo ngekutsi yente imisebenti yasendlini futsi isite umndeni wayo kutsi ube nebuhlobo lobuhle naJehova (Buka tigaba 11, 13)
11. Inhloko yemndeni ingafundzani ngekutfobeka kuloko lokwentiwa nguJehova naJesu?
11 Lesikufundzako. Inhloko yemndeni ingakhombisa kutsi itfobekile ngetindlela letinyenti. Nasi sibonelo, ayilindzeli kutsi umfati wayo nebantfwana bangawenti emaphutsa. Iyawulalela umbono wemalunga emndeni wayo ngisho nobe angavumelani nembono wayo. Marley lohlala eMelika utsi: “Ngaletinye tikhatsi mine nendvodza yami sihle siba nemibono lengafani. Kodvwa ngiyati kutsi ngibalulekile kuyo ngobe iyawucela umbono wami futsi icabangisise ngawo ngaphambi kwekutsi yente sincumo.” Ngetulu kwaloko, indvodza letfobekile iyawenta umsebenti wasendlini ngisho nobe labanye bantfu bacabanga kutsi ngumsebenti webafati. Loko kungaba matima. Kungani? Dzadze lokutsiwa nguRachel utsi: “Langihlala khona, nangabe indvodza isita umfati ngekutsi iwashe titja nobe ihlante indlu, bomakhelwane netihlobo bangase bangabate kutsi ‘iyindvodza sibili.’ Bangase bacabange kutsi lomfati uyidvonsa ngelikhala lendvodza.” Nangabe bantfu labanyenti bacabanga ngaleyondlela lawuhlala khona, khumbula kutsi Jesu watigeza tinyawo tebafundzi bakhe ngisho nobe bantfu bebacabanga kutsi ngumsebenti wetigcili. Inhloko yemndeni lekahle ayikhatsateki ngekubonakala ikahle kulabanye bantfu kunaloko ifuna kujabulisa umfati wayo nebantfwana. Ngetulu kwekutfobeka, ngubuphi lobunye buntfu inhloko yemndeni lokufanele ibe nabo?
12. Lutsandvo lwenta Jehova naJesu kutsi benteni?
12 Lutsandvo. Konkhe Jehova lakwentako, ukwenta ngobe asitsandza. (1 Joh. 4:7, 8) Ukhombisa kutsi uyasitsandza futsi ufuna sibe bangani bakhe ngekutsi asinike liVi lakhe liBhayibheli kanye nenhlangano yakhe. Ufuna sive kutsi siyatsandvwa ngekutsi asicinisekise kutsi uyasitsandza. Kutsiwani ngetintfo lesitidzingako kuze siphile? Jehova ‘usinika ngalokuphuphumako tonkhe tintfo letisijabulisako.’ (1 Thim. 6:17) Akayekeli kusitsandza ngisho nobe senta emaphutsa kunaloko uyasilungisa. Ngenca yekutsi uyasitsandza, Jehova wasilungiselela inhlawulo. NaJesu usitsandza kakhulu kangangekutsi wanikela ngekuphila kwakhe ngenca yetfu. (Joh. 3:16; 15:13) Kute lokungenta kutsi Jehova naJesu bangabatsandzi labo labatsembekile kubo.—Joh. 13:1; Rom. 8:35, 38, 39.
13. Kubaluleke ngani kutsi inhloko yemndeni ikhombise kutsi iyawutsandza umndeni wayo? (Buka nelibhokisi lelitsi, “ Yini Lengentiwa Yindvodza Lesandza Kushada Kuze Ihlonishwe Ngumfati Wayo?”)
13 Lesikufundzako. Konkhe lokwentiwa yinhloko yemndeni kufanele ikwente ngobe inelutsandvo. Kungani loko kubalulekile? Umphostoli Johane watsi: “Loyo longamtsandzi umzalwane wakhe lambonile [lilunga lemndeni], ngeke amtsandze Nkulunkulu langakamboni.” (1 Joh. 4:11, 20) Indvodza lewutsandzako umndeni wayo futsi lefuna kulingisa Jehova naJesu itawusita umndeni wayo kutsi ube nebuhlobo lobuhle naJehova, iwente utive uvikelekile futsi iwunakekele. (1 Thim. 5:8) Itawufundzisa bantfwana bayo futsi ibekhute. Itawuchubeka ifundza kwenta tincumo letitawudvumisa Jehova futsi tisite nemndeni wayo. Ase sicoce ngaloko lokudzingekako futsi sibone kutsi inhloko yemndeni ingamlingisa njani Jehova naJesu.
LOKO LOKUFANELE KWENTIWE YINHLOKO YEMNDENI
14. Inhloko yemndeni iwusita njani umndeni wayo kutsi ube nebuhlobo lobuhle naJehova?
14 Inhloko yemndeni isita umndeni wayo kutsi ube nebuhlobo lobuhle naJehova. Jesu wakhombisa kutsi ufana naBabe wakhe ngobe bekafuna kusita balandzeli bakhe kutsi bachubeke banekukholwa lokucinile. (Mat. 5:3, 6; Mak. 6:34) Ngendlela lefanako, lokubaluleke kakhulu lokungentiwa yinhloko yemndeni kutsi isite umndeni wayo kutsi ube nebuhlobo lobuhle naJehova. (Dut. 6:6-9) Loko ikwenta ngekutsi iciniseke kutsi umndeni wayo ufundza liVi laNkulunkulu, uya emihlanganweni, ushumayela tindzaba letimnandzi futsi wakha uphindze ucinise buhlobo bawo naJehova.
15. Inhloko yemndeni ingawusita njani umndeni wayo kutsi utive utsandvwa?
15 Inhloko yemndeni isita umndeni wayo kutsi utive utsandvwa. Jehova watjela Jesu kutsi uyamtsandza embikwebantfu. (Mat. 3:17) Jesu wakhombisa kutsi uyabatsandza balandzeli bakhe ngaloko lakwenta nangaloko lakusho. Nabo bamtjela kutsi bayamtsandza. (Joh. 15:9, 12, 13; 21:16) Inhloko yemndeni ingakhombisa ngaloko lekwentako kutsi iyamtsandza umfati wayo nebantfwana, njengekudadisha nabo liBhayibheli. Ingaphindze ibatjele kutsi iyabatsandza futsi babalulekile kuyo futsi nangabe simo sivuma ibancome nasembikwebantfu.—Taga 31:28, 29.
Kuze ijabulise Jehova, inhloko yemndeni kufanele inikete umndeni wayo tintfo lotidzingako kuze uphile (Buka sigaba 16)
16. Yini lenye lokufanele yentiwe yinhloko yemndeni futsi yini lokufanele ingakwenti?
16 Inhloko yemndeni inakekela umndeni wayo ngetintfo lotidzingako kuze uphile. Jehova waciniseka kutsi ema-Israyeli anato tonkhe tintfo latidzingako ngisho nobe bekajeziswa ngenca yekungalaleli. (Dut. 2:7; 29:5) Nalamuhla, uyasinika loko lesikudzingako. (Mat. 6:31-33; 7:11) NaJesu wabapha kudla labo lebebamlandzela. (Mat. 14:17-20) Waphindze welapha nalabo lebebagula. (Mat. 4:24) Kuze ijabulise Jehova, inhloko yemndeni kufanele inakekele umndeni wayo ngetintfo lotidzingako kuze uphile. Nobe kunjalo, kunentfo lokufanele ingayenti. Akukafaneli icitse sikhatsi sayo lesinyenti isemsebentini wekutiphilisa bese ayisakhoni kusita umndeni wayo kutsi ube nebuhlobo lobuhle naJehova nekuwucinisekise kutsi iyawutsandza.
17. Jehova naJesu basifundzisa futsi basilungise njani?
17 Cecesha. Jehova uyasicecesha futsi asiyale ngobe ufuna kusisita. (Heb. 12:7-9) NjengaBabe wakhe, Jesu ubacecesha ngelutsandvo labangephansi kweligunya lakhe. (Joh. 15:14, 15) Uniketa seluleko lesicinile kodvwa ngendlela lenemusa. (Mat. 20:24-28) Uyati kutsi sinesono nekutsi sitawuhlale siwenta emaphutsa.—Mat. 26:41.
18. Inhloko yemndeni lekahle ihlale ikhumbula ini?
18 Inhloko yemndeni lelingisa Jehova naJesu ihlale ikhumbula kutsi umfati wayo nebantfwana banesono. ‘Ayibatfukutseleli’ kakhulu. (Khol. 3:19) Kunaloko, isebentisa simiso lesiKubaseGalathiya 6:1 futsi yetame kubasita “ngemoya lophansi,” ibe ikhumbula kutsi nayo inesono. NjengaJesu, iyati kutsi indlela lekahle yekubafundzisa kutsi ibabekele sibonelo.—1 Phet. 2:21.
19-20. Nakwentiwa tincumo, inhloko yemndeni ingamlingisa njani Jehova naJesu?
19 Ungaticabangeli wena kuphela nawenta tincumo. Jehova wenta tincumo letitawubazuzisa nalabanye bantfu. Sibonelo saloko kutsi Jehova wasidala hhayi kuze kuzuze yena kodvwa kuze sijabulele kuphila. Kute lebekamphocelele kutsi anikele ngeNdvodzana yakhe kuze kutsetselwe tono tetfu. Loko wakwenta ngobe bekafuna kusisita. NaJesu wenta tincumo letasita labanye. (Rom. 15:3) Nasi sibonelo, ngesikhatsi adziniwe wafundzisa sicumbi sebantfu kunekutsi aphumule.—Mak. 6:31-34.
20 Inhloko yemndeni lekahle iyati kutsi lenye yetintfo letimatima lokufanele iyentele umndeni wayo, kuwutsatsela tincumo letikahle futsi loko kubaluleke kakhulu kuyo. Iyakugwema kwenta tincumo ngaphandle kwesizatfu lesiphatsekako nobe yente tincumo ngendlela letiva ngayo ngaleso sikhatsi. Kunaloko, ivumela Jehova kutsi ayifundzise kwenta tincumo letikahle. * (Taga 2:6, 7) Nayenta njalo, itawucabanga ngaloko lokutawuzuzisa labanye kunekutsi iticabangele yona.—Fil. 2:4.
21. Sitawucoca ngani esihlokweni lesilandzelako?
21 Jehova unikete tinhloko temindeni umsebenti lomatima, futsi titawulandzisa kuye ngendlela letiwenta ngayo. Kodvwa nangabe indvodza isebenta kamatima kuze ilandzele sibonelo saJehova naJesu itawuba yinhloko yemndeni lekahle. Nangabe nemfati awenta umsebenti lanikwe wona, batawujabulela umshado wabo. Umfati kufanele abutsatse njani bunhloko futsi ngutiphi tinkinga langabhekana nato? Sihloko lesilandzelako sitayiphendvula lemibuto.
INGOMA 16 Dvumisa Jehova, NgeNdvodzana Yakhe Legcotjiwe
^ sig. 5 Indvodza nayishada, iba yinhloko yemndeni lomusha. Kulesihloko sitawucoca ngekutsi buyini bunhloko, kungani Jehova enta kutsi kube nebunhloko nekutsi yini lengafundvwa ngemadvodza esibonelweni saJehova naJesu. Esihlokweni sesibili, sitawucoca ngaloko indvodza nemfati labangakufundza esibonelweni saJesu nakuletinye tibonelo letiseBhayibhelini. Esihlokweni sesitsatfu, sitawucoca ngekutsi bazalwane kufanele balisebentise njani ligunya labanalo ebandleni.
^ sig. 7 Umbono wekutsi kwemukelekile ngendvodza kutsi imphatse kabi umfati wayo futsi imhlukubete ukhutsatwa ngemafilimu, imidlalo naletinye tincwadzi. Ngako labanye bantfu bangase bacabange kutsi akusikubi kutsi indvodza yente umfati wayo ente nobe yini layifunako.
^ sig. 20 Kuze utfole lokwengetiwe mayelana nakwenta tincumo letikahle, buka sihloko lesitsi “Yenza Izincumo Ezidumisa UNkulunkulu,” lesikuSicongosekulindza sa-April 15, 2011 emakh. 13-17 lesitfolakala ngesiZulu.
